13
Ou anuhun sahou tiri lau ta atondrok kon
1 Ou anuhun sahou tiri lau ta atondrok kon. Tasah, Kindrei badeh, edeu boto-on i tiri ta atondrok. Iri lau ta atondrok doh badeh, Kindrei le edeu.
2 Ya eme, are lau oro tebelese o amekes bahun i tiri lau ta atondrok, oro tebelese boto-on ale Kindrei amwenen ndratehei. Ya oro kameh bwese maha-an ma isi i la-u oro ta aliy.
3 Tasah, iri lau ta atondrok badeh, lahou tiri ta nohowa lau amekes kandriyen mwasin bwe; arile toro lau heh amekes kandriyen ndra-in labai. I buku none ou anya, ou sanoh tiri lau ta atondrok badeh, ou amekes kandriyen mwasin, ya idah kameh, iy masiye ou.
4 Iri lau ta atondrok doh, Kindrei le edeu iri ta anyolom tekedek tam kudu mwasin. Arile, i buku none ou amekes kandriyen ndra-in bamwenen ta madan bwe, ou anoh iy. Tasah, iri badeh, i nyara Kindrei kameh ateu samen ma winiyan adeu maha-an hawe isi ewek tam.
5 Ya eme ta katin doh, aha kanuhun boho iri lau ta atondrok aha. Idoh badeh, anya ta aha kabelek maha-an hawe isi le bwe. Idoh in hamon ta budon mwasin tiye ou amekes kandriyen mwasin.
6 Ta katin don adeh, aha ala akeh luk ta takis i tiri lau ta atondrok kon adeh. Tasah, iri badeh, lohowan ta Kindrei; iri amekes lahou ta atondrok na len mari.
7 Aha katehei lakou saluwe lakou iri lau mari mene aha ndrandrei, kili hamon ja: Ya, i buku none aha bakeh luk ta takis ta sasah aha akohok eme bolo kon bwe badeh, aha kakeh kili; ya, i buku none aha mene banoh bwe, aha kanoh iri lau ta atondrok kon; ma i buku none aha bamasiye iri mene bwe badeh, aha kamasiye iri.
Kandriyen ta aseken in hamon tiri batanau ta Kindrei
8 I buku none aha mene ndrandrei ari lakou ta ari ndramak ta aseben aha, ya aha batehei saluwen bala hamon bwe le, badeh, aha katehei kili hamon. Arile, kandriyen ta aseken ndramak ari ja badeh, aha winiyan babwidiy bano bwe. Tasah, kandriyen ta aseken ndramak ari ja badeh, lakou maha-an labai ta aha winiyan batehei mara-ei bala hamon bwe. Ya, iy are lau aseken ndramak badu heh, badu heh badeh, iy in hamon handru ta batanau malen mari.
9 Tasah, taha tanan, batanau malen mene ndratorowenei tiye i buku doh,
“Ou sateu badih udu mwan, ya ou sadai ndramak samak, ya ou sabahana, ya madam salikis lakou ta ndramak ari ja.” Eksodus 20:13-15, 17; Dutoronomi 5:17-19, 21
Ma saba batanau malen ja badu hawe oro doh badeh, sukik le bada batanau ari le doh:
“Ou aseken iri lau ari ari badu hawem, i le buku ou aso-ok ou le.” Lebitikus 19:18
10 Ya eme are lau aseken lau badu mirihik tan badeh, iy winiyan bamekes budon ndra-in bala tiri bwe. Eme ya sendrehendreh ta aliy i buku doh: Kandriyen ta aseken ndramak ari ari badeh, mesekei ou an hamon ta batanau malen mari.
Taha katondrok tekedek tataha kudu mwasin
11 Ma eme aha kamekes kandriyen doh, tasah aha ndratanan ta taha na dah manyah ado bolo len ta aliy ai. Mada an ndrasahan ta aha samadin, tasah ndramak ta aseben taha, ale taha mene atehei budon tataha handru in tan badeh, len tan ndrame bakep, bala buku none kabatana na len mene taha tubuni ndrine taha, bwe.
12 Mirihik kon kaleu ai, ma len kataku ai. Ya eme taha karuwaniy ta amekes kandriyen ndra-in badu lulik, ya taha kasini awin ta bahun ma len.
13 Ma eme taha katondrok tekedek tataha kudu mwasin i buku none lau manyah ado bolo an na len; sala buku none taha ka-un gwa boto-on ma bwidi batu taha asahan lolo-ou, ya taha asehek sahou laleyah, ma amekes karei ma madasarah, ma samekes bahun hawe samekes madalakis sala ta ndramak ari ari, ndri-iy.
14 Arile, aha katehei kandriyen ta Laban Jises Krais ki buku none awin taha, ma aha karuwani budon ta karei ma lomondra ndra-in badu bolo oda aha.