18
Judas leheyani Jises ili mine iri lau ndra-in ta bahun
(Metiu 26:47-56; Mak 14:43-50; Luk 22:47-53)
1 Jises asolom ano le badeh, iy hawe oro lau tan, oro adek ala bolo gwa Kindron ala asahan bilisiu. Udu loboho bilisiu nane doh, bilin ta Olip udu aliy, eme Jises ma hawe oro lau tan ala ado bolo bilin nane doh.
2 Judas, iy nane edeu sa-oh ta Jises, iy ndratanan kon nane doh, tasah len marakon ta ndrahune tutukum ta Jises hawe oro lau tan ala le bolo bilin nane doh.
3 Iri tinan tiri pris ma iri Parasi tiye i tiri lau ta bahun badu kon Rom, ma iri lau ta atondrok asiu tinan ta Kindrei ka-en hamon ta Judas. Judas tanan kon doh, eme ma iy in bwena tiri. Iri telemei sun hawe iri lakou ta bahun, iri ala asahan bolo bilin ta Olip nane doh.
4 Jises ndratanan ta iri lakou kameh asahan tan, ma iri lau asahan badan ale. Iy eme suri iy, iy edek ili bwena ma iy ndremenya iri i buku doh, “Aha asilah are lau handru?”
5 Iri anya, “Ahi asilah Jises badu Nasaret.”
Jises anya, “Jo iy ndramak nane udu le buku doh, asah idah.” Judas, iy nane edeu sa-oh ta Jises, iy ales udu hawe iri ale.
6 Jises tiye i tiri i buku doh, “Jo iy ndramak nane ta udu le buku doh, asah idah,” eme iri marakon arou ala le kona iri ma iri taku ala andri.
7 Jises eme ndremenya iri ja, “Aha asilah are lau handru?”
Iri marakon anya, “Ahi asilah Jises badu Nasaret.”
8 Jises anya, “Jo nane ndrasehek taha eh, jo iy ndramak nane ta udu le buku doh, asah idah. I buku aha asilah jo handru eh, ya oro lau nane ado hawek kada-ah ka-au o.”
9 Iy asehek iri sahou nane doh, eme ta iri lakou iy nane ndrasehek idah kameh marakon asahan handru: “Tama, oro lau marakon ou mene atehei oro ame bahandra tondrok tek, ari toro bamai bwe.”
10 Saimon Pita badeh, samen gwak tan ari udu aliy, iri aloh bainat. Eme iy aluwi samen tan eme len, ma iy sani ka-u ndranye bonyo-ou salin iu. Nyara bonyo-ou nane doh Malkus.
11 Jises anyolom ili ta Pita ma iy asehek sahou i tan anya, “Ou atehei samen tam ki hamon bolo awin ja! I buku sah handru? Bwesam ta sisi-in nane doh, tama atehei eme tek, jo sa-un sala aliy ai?”
Iri aruwi Jises ili hawe Anas
12 Ano iri lau nane ta bahun badu kon Rom hawe tinan ta bwena ta bahun tiri, ma hawe iri lau ta atondrok asiu ta Kindrei ame tawi Jises, ma bawei iy.
13 Ano iri andrei iy ma bwena ili hawe Anas. Anas doh badeh, nyana Kayapas, iy badeh, tinan tiri pris ta bolo jaha nane doh.
14 Kayapas mene edeu budon ma iy tiye tiri Juwis i buku doh, “Mwasin, ta ndramak ari le, iy kimek ta saluwe lau marakon. Ndra-in ta lau marakon amak laleyah.”
Pita anya iy tanan Jises bwe
(Metiu 26:69-70; Mak 14:66-68; Luk 22:55-57)
15 Saimon Pita hawe lau ta Jises ari ja, uru adek an hamon ta Jises. Tinan tiri pris tanan iy lau ta Jises ari doh, eme ma iy lau doh in hamon ta Jises ili bolo kowah ta asiu, ta tinan tiri pris.
16 Arile Pita badeh, bala bolon bwe, iy ales udu ndra manan kona kou udu. Eme iy lau ta Jises ari nane tinan tiri pris tanan iy, eme iy ili ndremenya i badih ta atondrok madasan nane doh ta Pita keme bolon, eme ma iy andrei Pita eme bolon.
17 Iy badih ta atondrok madasan nane doh, anyolom Pita, eme ma iy ndremenya Pita, “Sebwe ou lau ta iy ndramak kodo-oh ale, neh?” Pita eme besebes le, “Bwe, jo lau tan bo-oh.”
18 Ben nane doh nyala-an labai, eme iri lohowan hawe iri lau tinan tabani jih, eme iri ales are aliy ta anyan. Pita anyala ale, iy eme edek ili ales udu hawe iri, ma anyan jih.
Tinan tiri pris eme ndremenya Jises
(Metiu 26:59-66; Mak 14:55-65; Luk 22:66-71)
19 Uru lau tan ma la-uh nane are ndra manan. Tinan tiri pris eme ndremenya Jises ta oro lau tan ma ta sahou iy ndrasihidiy ndrala tiri lau.
20 Jises eme asehek i tan, “Len marakon jo badeh, asehek sahou ili tiri lau ba-en kabwak bwe, ma jo leheya iri lau marakon badeh, udu bolo asiu ta atukum tiri Juwis, ma udu bolo asiu tinan ta Kindrei, na len marakon iri ala aliy. Jo batone ari sahou bwe.
21 Ya, i buku sah handru ou ndremenya jo ta aliy? Ou ndremenya iri lau nane ndranuhun iri sahou tek. Iri tanan ta saba lakou jo ndrasehek.”
22 Jises asehek sahou doh kahis le badeh, ndramak tinan ari mudi minen i bolo kapan, ma iy asehek i buku doh, “I buku sah handru, ya ou asehek sahou boto-on labai i ta tinan tiri pris i buku doh?”
23 Jises eme asumon sahou tan ja, “Ya, i buku jo ndrasehek saba sahou bamwenen bwe, abo, jo aso-ok ou tiye tiri lau marakon nane ado kada-ah ta saba sahou handru jo asehek. Arile, i buku jo asehek sahou amwenen eh? Ya tasah handru ou a-um jo?”
24 Ano Anas tiye iri kasirini iy kili hawe Kayapas tinan tiri pris. Arile, iri batolowei malou nane iri bawei iy na aliy ba-au bwe le.
San lusan Pita besebes ja
(Metiu 26:71-75; Mak 14:69-72; Luk 22:58-62)
25 Pita ales udu hawe iri lau anyan jih kahis le. Eme oro lau rayah anyolom iy ma oro ndremenya iy ja, “Sebwe ou lau tan ari ale?”
Arile Pita besebes le, iy anya, “Jo bwe.”
26 Arile ndramak ari, iy lohowan ta tinan tiri pris, iy badu hawe iy ndramak nane Pita sani ndranyen na samen, asehek ja, “Jo mene anyolom ou ado bolo bilin ta Olip hawen oh?”
27 Pita besebes ja, iy anya, “Bwe.” Eme ma nawin bwe kakaro eden.
Iri andrei Jises ili hawe Pailat
(Metiu 27:1-2; Metiu 27:11-14; Mak 15:1-5; Luk 23:1-5)
28 Mandraben ma wahun, iri sirini Jises udu asiu ta Kayapas iu ili asiu ta kabin badu Rom. Iri tinan tiri Juwis bala bolo asiu nane doh bwe, tasah kora-on iri kandraka-an ta mada Kindrei, ma idah kameh iri winiyan baimon nyamon ta len ndrabun aloh Pasoba bwe. Eme iri are ndra manan areu.
29 Pailat eme manan hawe iri, ma iy ndremenya iri, “Aha anya kadeu iy ndramak dah kili ta mada sahou ta saba lakou handru?”
30 Eme iri marakon asumon sahou tan, “I buku iy ndramak ta amekes kandriyen ndra-in bwe, ahi winiyan bandrei iy bame hawem bwe.”
31 Pailat eme asehek i tiri ja, “Mwasin, aha kandrei iy kewek hawe aha, ma aha katehei iy ki ta mada sahou ki-in hamon ta iri kandriyen taha amwenen.” Iri ame asumon sahou ta Pailat ja, “Badeh, ndrabun tinan labai, ta ahi winiyan badai iri lau amekes kandriyen ndra-in amak bwe.”
32 Bwena mene Jises asehek ta iri kandriyen iy kameh imek ta aliy, eme ma iri lakou marakon doh asahan ta amekes sahou tan kasahan handru.
33 Pailat eme anuhun iri sahou i buku doh, eme iy edek iu ili hamon ili bolo asiu tan ja. Eme iy aloh iri lau katiyani Jises kili hawen. Iy eme ndremenya iy, “Ou kabin tiri Juwis, neh?”
34 Jises anuhun ano, eme iy asumon ndremenya tan, “Ou ndremenya jo nane dah, na le budon tam amwenen o rayah lau ja tanan jo, eme iri adeu budon ewek tam?”
35 Pailat eme tiye i ta Jises, “Ou kede-eh anya jo badu Juwis nadeh? Idah iri lau tam amwenen ma iri tinan tiri pris, iri le adeh tiyani ou ame hawek nane dah. Ya ou amekes saba lakou handru eme iri atehei ou a ta sahou?”
36 Jises anya, “Boto-on ta tondrok tek badeh, badu kon munyak dah bwe; i buku boto-on ta tondrok tek badu kon munyak, badeh kameh iri lau tek winiya amekes bahun hawe iri Juwis, ta iri sandrei jo same hawem. Arile boto-on ta tondrok tek badeh, badu kon rakon ja.”
37 Pailat eme ndremenya iy ja, “Ou kabin ari handru, neh?” Jises asehek i tan i buku doh, “Ou anya jo kabin ari, badeh handru. Arile sahou handru bala buku budon tam badeh bwe. Tine atehei jo eme kon munyak ta atiye iri sahou handru, kili tiri lau marakon. Are lau iri an hamon ta sahou handru, kameh anuhun jo.”
38 Pailat ndremenya Jises, “Ya ‘sahou handru,’ saba moson ta aliy?”
Pailat tiye ta atideh Jises kili ta kei tondreh
(Metiu 27:15-31; Mak 15:6-20; Luk 23:13-25)
Pailat asehek sahou ano, iy eme ili manan ja hawe iri Juwis. Iy eme tiye i tiri, “Jo badeh, basilahei ari ndra-in udu tan bwai.
39 Arile, idah in hamon ta kandriyen taha. Jo badeh, ruwani ndramak ari udu bolo asiu lulik eme len laleyah, udu bolo len tinan aloh Pasoba. Ya, aha aso-ok jo karuwani kabin tiri Juwis kewek mine aha?”
40 Iri arah ma aloh i tinan i buku doh, “Iy badeh, bwai. Ahi aso-ok ou ruwani Barabas keme len laleyah.” Barabas badeh, iy ndramak ta bahun ta adai lau amak ma iy ale ta bahana.