17
Jises asolom ta aseben oro lau tan
1 Jises asehek sahou dah ano, iy eme anyolom ili loken ili kandrah, ma iy asolom i buku doh,
“Tama, len ndrasahan ai. Ou atehei lomadam keme ta nadum, ma nadum ale kameh edeu lomadan ewek tam.
2 Tasah ou ndratehei boto-on tam ndrame tek ta atondrok iri lau marakon, ma jo kameh edeu kohak udu luluwen ili toro lau nane oro atehei budon toro in tek.
3 Kohan handru udu luluwen kameh udu le buku doh. Moson ta aliy i buku doh: Oro katanan ou, ou le ari Kindrei handru, ma oro katanan Jises Krais, iy nane, ou suni iy eme.
4 Jo ndraleheyani lomadam ndrala tiri lau badu kon munyak. Iri gok marakon nane ou tiye jo ta amekes badeh, jo ndrabwidi marakon ndrano.
5 Tama, kon munyak basahan bwe le, jo ndra bwena udu hawem, ma lomadam udu hawek. Na dah, jo aso-ok lomadam le mene keme tek ja.
6 “Jo ndrasehek ou ndrala toro lau tam. Oro lau tam bwena, arile ou andrei oro ado kon munyak ame len, ame are bahandrak. Ma oro a-en hamon tiri sahou tam marakon.
7 Ya na dah, oro ndratanan, iri lakou marakon ou adeu eme tek, badu minem eme.
8 Jo ndratiye toro ta sahou mene ou asehek tek, ma bwidi oro sekesek. Oro ndratanan jo udu hawem eme, ma oro atehei budon toro ewek tam ta ou le suni jo eme.
9 “Jo asolom oro, jo basolom ta iri lau marakon badu kon munyak bwe. Jo asolom toro le lau mene ou atehei oro ame are bahandra tondrok tek, tasah oro lau tam.
10 Oro lau tek, oro lau tam; oro tam, oro tek ale. Iri lau atou oro lau tek nane, ma iri anyolom lomadak handru udu toro.
11 Eme na len dah kameh jo anya kewek hawem ai. Jo winiyan bado kon munyak ja bwai, arile oro kameh are ndra kon munyak areu. Tama, ou ndrabun labai! Ou tondrokei oro kudu mwasin bahandra boto-on ta nyaram, nyaram mene ou tondrohon jo. Ma idah kameh oro asahan ari, i buku le talu.
12 Len jo udu ndra hawe oro, jo atondrok oro udu mwasin labai, are bahandra boto-on ta nyaram, ou mene tondrohon jo. Jo turuki oro na aliy, eme oro mari are mwasin. Iy ari le toro kameh amai iu mara-ei. Idah kameh iri sahou marakon udu bolo buk ndrabun asahan eme lewan handru.
13 Na len dah jo ewek hawem, arile jo udu ndra kon munyak kahis, jo asehek iri lakou dah ili toro, ta sekesek tek tinan kirek ndrine oro.
14 “Jo ndrasihidi iri sahou tam marakon ndrala toro, ano iri lau badu kon munyak baso-ok oro ja bwe. Tasah oro badu kon munyak bwe, i buku jo ale badu kon munyak dah bwe le.
15 Jo bandremenya ou ta andrei oro ado kon munyak au bwe, arile jo ndremenya ou ta tondrokei oro kare ndra len ta ndramak ndra-in balik.
16 I buku le jo badu kon munyak dah bwe, oro ale badu kon munyak dah bwe.
17 Sahou tam handru. Jo aso-ok ou atehei sahou tam handru kamekes gok kili bolo ndrine oro ma kabwidi oro kameh kasahan oro lau tam handru.
18 Jo suni oro ta ala bolo kon munyak, i buku le ou mene suni jo eme andri kon munyak.
19 Jo anya kaseben oro, eme ma jo atehei jo mara-ei ewek tam, ta oro katehei oro mara-ei kewek tam, ma ta oro kameh asahan oro lau tam handru.
20 “Tama, jo basolom toro le lau nane ado hawek kada-ah bwe, arile ta are lau kameh iy atehei budon tan ale in tek, tasah ta sahou tam oro kameh asehek.
21 Jo asolom ta oro kala le ari. Tama, oro kare hawe talu, i buku le ou ado hawek, ma jo udu hawem. Oro kasahan ari le, ta iri lau badu kon munyak kameh anyolom ma atehei budon tiri ewek tam, ta ou suni jo eme.
22 Jo ndratehei lomadam ndrala toro. Lomadam doh mene ou adeu eme tek, ta oro kameh kasahan ka le ari, buku talu ma la-uh badeh, ari le.
23 “Jo udu hawe oro, ya ou ado hawek. Jo aso-ok oro kasahan ari buruwen, ta iri lau badu kon munyak kanyolom ma iri katanan, ta ou suni jo eme. Ma iri ale katanan ta ou aso-ok oro, i buku le ou aso-ok jo tinan labai.
24 “Tama! Ou ndratehei oro ndrame tek, eme jo aso-ok oro kame kare hawek, kare kon kameh jo udu aliy. Ma jo aso-ok oro kanyolom lomadak mene ou adeu eme tek, tasah ou aso-ok jo bwena labai, ano kon munyak barasahan.
25 “Tama, ou mwasin labai! Lau badu kon munyak tana iri ou bwe, arile jo tanan ou mwasin labai. Oro lau tek badu hawek nane, oro tana oro ou le badeh, suni jo eme.
26 Jo ndrasehek iri kandriyen ma nyaram ndrala toro. Jo kameh asehek ili toro kahis le, winiya le oro andrei kandriyen ta aso-ok ndramak ari ari, i buku ou aso-ok jo tinan labai. Jo aso-ok kandriyen doh kihis kudu ndrine oro. Eme ma jo kameh in hawe oro.”
Jises akohok sisi-in ma iy imek, ano iy amak ja
(Kalan 18–20)