4
कैन अऊर हाबिल
1 जब आदम अपनी पत्नी हवा को जवर गयो तब वा गर्भवती भयी तब ओन कैन ख जनम दियो अऊर कह्यो, “प्रभु की मदत सी मय न एक बेटा पा लियो हय।”
2 तब बाद म हवा न अऊर एक बेटा, हाबिल ख जनम दियो। तब हाबिल मेंढावों को चरवाहा बन गयो, लेकिन कैन खेती करन वालो किसान होतो।
3 कुछ दिनों बाद कैन अपनी फसल ले क आयो अऊर ओख प्रभु ख भेंट को रूप म दियो।
4 तब हाबिल न अपनी शेरी अऊर मेंढी म सी कुछ एक ख जो पैदा हुयो पहिलो मेंढी को बच्चा चर्बी युक्त भेंट चढ़ायी; तब प्रभु न हाबिल अऊर ओकी भेंट सी प्रसन्न भयो,
5 लेकिन ओन कैन अऊर ओकी भेंट ख अस्वीकार कर दियो। येकोलायी कैन बहुत गुस्सा भयो, अऊर ओको मुंह पर उदासी छाय गयी।
6 तब प्रभु न कैन सी कह्यो, “तय कहाली गुस्सा होय रह्यो हय? अऊर तोरो मुंह पर उदासी कहाली छायी हुयी हय?”
7 यदि तय न सही काम करयो रह्यतो, त का म तोख ग्रहन नहीं करतो; किन्तु यदि तय भलायी नहीं करजो त देख; तोरो दरवाजा पर पाप खड़ो हय, अऊर यो तोरो पर शासन करनो चाहवय हय, लेकिन तोख येख दूर करनो पड़ेंन।
8 तब कैन न हाबिल सी कह्यो, “आवो हम खेत ख निकलजे हंय।” जब हि खेत को बाहेर होतो, त कैन न अपनो भाऊ हाबिल पर चढ़ क ओख मार डाल्यो।
9 प्रभु न कैन सी कह्यो, “तोरो भाऊ हाबिल कित हय?”
ओन उत्तर दियो, “मोख नहीं मालूम। त कैन न कह्यो का मय अपनो भाऊ को रखवाली करन वालो आय?”
10 तब प्रभु न कह्यो, “तय न यो भयानक काम कहाली करयो हय? तोरो भाऊ को खून जमीन सी मोख बुलाय रह्यो हय।
11 अब तय वा जमीन को तरफ सी श्रापित हय, जेन तोरो भाऊ को खून तोरो हाथ सी स्वीकार करन लायी अपनो मुंह खोल्यो हंय।
12 जब तय जमीन पर खेती करन की कोशिश करजो, त माटी तोरो लायी कुछ पैदा नहीं करेंन; अऊर तय धरती पर बेघर होय जाजो अऊर भटकन वालो होयजो।”
13 अऊर कैन न परमेश्वर सी कह्यो, “यो सजा मोरो लायी सहन करनो बहुत कठिन हय।
14 देख, तय न अज मोख जमीन सी हटाय दियो हंय, अऊर मय तोरी नजर की आड़ म रहूं, अऊर धरती पर एक बेघर होय जाऊं अऊर भटकूं, अऊर जो कोयी मोख मिलेंन ऊ मोख मार डालेंन।”
15 परमेश्वर न कैन सी कह्यो, “असो नहीं होयेंन। जो कोयी कैन ख मार डालेंन ओको सी सात गुना बदला ले लियो जायेंन।” येकोलायी प्रभु न कैन पर एक चिन्ह डाल दियो कि ओख पान वालो कोयी भी ओकी हत्या नहीं करे।
16 तब कैन प्रभु की उपस्थिति सी दूर चली गयो अऊर “नोद” नाम को देश म रहन लग्यो, जो कि अदन की पूर्व दिशा म हय।
कैन को वंशज
17 जब कैन अपनी पत्नी को जवर गयो तब वा गर्भवती भयी, अऊर ओन हनोक ख जनम दियो; तब कैन न एक नगर बसायो अऊर ऊ नगर को नाम अपनो बेटा को नाम पर हनोक रख्यो।
18 हनोक सी ईराद पैदा भयो, अऊर ईराद सी महूयाएल, अऊर महूयाएल सी मतूशाएल, अऊर मतूशाएल सी लेमेक पैदा भयो।
19 लेमेक की दोय पत्नी होती। एक को नाम आदा अऊर दूसरी को नाम सिल्ला होतो।
20 आदा न याबाल ख जनम दियो। याबाल उन लोगों को बुजूर्ग बन्यो जो तम्बुवों म रहत होतो अऊर जनावर पालत होतो।
21 अऊर ओको भाऊ को नाम यूबाल होतो। ऊ वीणा अऊर बांसुरी बजावन वालो को पूर्वज होतो।
22 अऊर सिल्ला न तूबल अऊर कैन ख जनम दियो, ऊ पीतर अऊर लोहा को सब धार वालो हथियार बनान वालो पहिलो धातुकार होतो। तूबल कैन की बहिन नामा होती।
23 अऊर लेमेक न अपनी पत्नियों सी कह्यो,
“हे आदा अऊर हे सिल्ला मोरी बात सुनो; हे लेमेक की पत्नियों, मोरी बात पर ध्यान देवो :
जो आदमी न मोख घायल करयो, अऊर जो जवान न मोख चोट पहुंचायी, ओख मय न मार डाल्यो हय।
24 अगर कैन को बदला सात गुना लियो जायेंन,
त लेमेक को सतहत्तर गुना लियो जायेंन।”
शेत अऊर एनोश
25 अऊर आदम अपनी पत्नी को जवर फिर गयो; अऊर ओन एक बेटा ख जनम दियो अऊर ओको नाम यो कह्य क शेत रख्यो कि : “परमेश्वर न मोरो लायी हाबिल को बदला, जेक कैन न मार डाल्यो होतो, येकोलायी परमेश्वर न हाबिल की जागा पर यो दूसरो बच्चा प्रदान करयो हय।”
26 अऊर शेत ख भी एक टुरा पैदा भयो अऊर ओन ओको नाम एनोश रख्यो; ऊ समय सी लोग प्रभु को नाम सी आराधना करन लग्यो।