12
आखरी को समय
“उच समय मीकाएल नाम को बड़ो स्वर्गदूत, जो तोरो लोगों को पक्ष करन ख खड़ो रह्य हय, ऊ उठेंन। तब असो संकट को समय होयेंन, जसो कोयी देश को पैदा होन को समय सी ले क अब तक कभी नहीं भयो, न होयेंन; पर ऊ समय तोरो लोगों म सी जितनों को नाम परमेश्वर कि किताब म लिख्यो हुयो हंय, हि बच निकलेंन। जो जमीन को खल्लो सोयो रहेंन उन्म सी बहुत सो लोग जाग उठेंन, कितनो त हमेशा को जीवन लायी, अऊर कितनो अपनी बदनामी अऊर हमेशा तक बहुत बेकार ठह्यरन लायी। जो समझदार हय, हि आसमान की ज्योति को जसो चमकेंन, अऊर जो बहुतों ख धर्म की रस्ता पर लिजावय हय, हि तारों को जसो हमेशा चमकतो रहेंन। पर हे दानिय्येल, तय या किताब पर मुहर कर क् इन वचनों ख आखरी समय तक लायी बन्द रख। बहुत सो लोग पूछ पाछ अऊर ढूंढ़ ढांढ करेंन, अऊर येको सी ज्ञान भी बढ़ जायेंन।”
यो सब सुन क, दानिय्येल न नजर सी यो देख्यो कि अऊर दोय आदमी खड़ो हय, एक त नदी को यो किनार पर, अऊर दूसरो नदी को ऊ किनार पर हय। तब जो आदमी सन को कपड़ा पहिन्यो हुयो नदी को पानी को ऊपर होतो, ओको सी उन आदमियों म सी एक न पूच्छ्यो, “इन आश्चर्य कर्मों को अन्त कब तक होयेंन?” तक जो आदमी सन को कपड़ा पहिन्यो हुयो नदी को पानी को ऊपर होतो, ओन मोरो सुनतोच दाहिनो अऊर बायो, अपनो दोयी हाथ स्वर्ग को तरफ उठायक, हमेशा जीन्दो रहन वालो की कसम खाय क कह्यो, “या दशा साढे़ तीन साल तकच रहेंन; अऊर जब पवित्र प्रजा की शक्ति टूटत टूटत खतम होय जायेंन, तब ये सब बातें पूरी होयेंन।” या बात मय सुनत त होतो पर कयी नहीं समझ्यो। तब मय न कह्यो, “हे मोरो प्रभु, इन बातों को आखरी परिनाम का होयेंन?” ओन कह्यो, “हे दानिय्येल, चली जा; कहालीकि या बातें आखरी समय लायी बन्द हंय अऊर इन पर मुहर लगायी हुयी हय। 10 बहुत सो लोग त अपनो अपनो ख निर्मल अऊर शुद्ध करेंन, अऊर स्वच्छ होय जायेंन; पर दुष्ट लोग दुष्टताच करतो रहेंन; अऊर दुष्टों म सी कोयी या बातें नहीं समझायेंन; पर जो बुद्धिमान हंय हिच समझायेंन। 11 जो दिन रोज की होमबलि चढ़ानो बन्द होय जायेंन, अऊर बेकार चिजे वा जागा पर स्तापित करी जायेंन, जो नाश को वजह होयेंन, तब तक बारा सौ नब्बे दिन बीत जायेंन। 12 का हि धन्य हय ऊ, जो धीरज धर क तेरा सौ पैंतीस दिन को आखरी तक भी पहुंचे। 13 दानिय्येल अब तय जाय क आखरी तक ठह्यरयो रह्य; अऊर तय आराम करतो रह्यजो; अऊर उन दिनों को आखरी म तय अपनो निज भाग पान लायी खड़ो होजो।”
12:1 मत्ती 2४:21; मरकुस १३:19; प्रकाशितवाक्य 7:१४; 1२:7 12:2 यशायाह २६:१९; मत्ती २५:४६; यूहन्ना ५:२९ 12:4 प्रकाशितवाक्य २२:१० 12:10 प्रकाशितवाक्य २२:११ 12:11 दानिय्येल ९:२७; ११:३१; मत्ती २४:१५; मरकुस १३:१४