27
ཡེ༌ཤུ༌ པི༌ལ༌ཏུའི༌ཀ༌ ཁྱེརས༌།
27:1 ནེ༌ 2
1 ང༌ཏོག༌ ང༌མོ༌ནེ༌, བླ༌མ༌ འུ༌སྐྱོང༌ ཚང༌མ༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ གཙོ༌བོ༌ ཡེ༌ཤུ༌ སད༌གོས༌ ཟེར༌ཏེ༌ ཐག༌ཅདས༌།
2 ཁོང༌གུན༌ནི༌ ཁོང༌ངི༌ ཆག༌ ལྡམས༌ཏེ༌ ཀའ༌ལོན༌ པི༌ལ༌ཏུའི༌ ལག༌ག༌ སྟད༌ད༌ ཁྱེརས༌།
ཡུ༌དཱ༌ ཨོག༌སྐྱེལ༌ལི༌ག༌ ཞུགས༌།
27:3 ནེ༌ 10
3 ངོ༌ལོག༌ ཅོ༌ཁན༌ནི༌ ཡུ༌དཱའེ༌ གཙོ༌བོ༌ ཡེ༌ཤུའ༌ སད༌ཅེས༌སི༌ ཆད༌པ༌ ཕོག༌ག༌ ཐོང༌ཏེ༌ ཁོའེ༌ ཅོ༌ཁན༌བོའེ༌ཀ༌ ཚེར༌ཁའ༌ ཡོངས༌ཏེ༌ ཡང༌ མུལ༌ལི༌ པེ༌ནེ༌ སུམ༌ཅུ༌བོ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ལོགས༌ཏེ༌ ཁྱེརས༌,
4 ཡང༌ ཁོའེ༌ ཟེརས༌, "ངའེ༌ ནོངས༌མེད༌ཁན༌ཞིག༌ག༌ ངོ༌ལོག༌ ཅོས༌ཏེ༌ སྡིག༌པ༌ ཅོས༌ཏོག༌།"
ཁོང༌གུན༌ནི༌ ཟེརས༌, "ང༌ཞའེ༌ ཅིའ༌ ཚེར༌ཁའ༌ ཅོ༌ཨིན༌། ཏེ༌བོའ༌ ཚེར༌ཁའ༌ ཁོ༌རང༌ངི༌ ཅོས༌"
5 ཏེ༌ནེ༌ ཡུ༌དཱའེ༌ ཆོད༌ཁང༌ངི༌ ནང༌ང༌ མུལ༌ལི༌ པེ༌ནེ༌གུན༌ ཕངས༌ ཡང༌ ཕི༌ལོག༌ག༌ སོང༌ཏེ༌ ཨོག༌སྐྱེལ༌ལི༌ག༌ ཞུགས༌།
6 བླ༌མ༌ འུ༌སྐྱོང༌གུན༌ནི༌ མུལ༌ལི༌ པེ༌ནེ༌གུན༌ ཏུས༌ཏེ༌ ཟེརས༌, "འི༌ པེ༌ནེ༌ ཁྲག༌རིན༌ ཨིན༌ པ༌སང༌, ཆོད༌ཁང༌ངི༌ བང༌ཛོད༌དི༌ ནང༌ང༌ བོར༌ཅེས༌པོ༌ ཁྲིམས༌ ནང༌ཞིན༌ གལ༌ཏེ༌ ཨིན༌ནོག༌"
7 ཁོང༌གུན༌ནི༌ ཏེ༌ པེ༌ནེ༌བོའ༌ ཟ༌མ༌ ཅོ༌ཁན༌ནི༌ ཞིང༌བོ༌ ཉོས༌ཏེ༌ ཞན༌ཡུལ༌ལི༌ མི༌གུན༌ ཤི༌ན༌ སུབ༌ཅེས༌སི༌ ཕིའ༌ ནས༌ས༌ ཅོ༌ཅེས༌ལ༌ ཐག༌ཅདས༌།
8 ཏེན༌ན༌ གྱུན༌ཚན༌བོའེ༌ ཕིའ༌ དག༌སའང༌ ཏེ༌ ཞིང༌བོའ༌ ཁྲག༌གི༌ ཞིང༌ ཟེར༌ར༌ནོག༌།
9 སྔུན༌མའེ༌ ལུང༌སྟོན༌པ༌ ཡེ༌རེམ༌ཡཱའི༌ མོལ༌ཁན༌བོ༌ དྲན༌དྲ༌ གྲུབ༌ཏེ༌ ཨིན༌ནོག༌, ཁོང༌ངི༌ མོལས༌,
"ཨིས༌ར༌ཨེལ༌པ༌གུན༌ནི༌ སྲོག༌ རིན༌ ཅད༌ཁན༌ནི༌
མུལ༌ལི༌ པེ༌ནེ༌ སུམ༌ཅུ༌ ཁུར༌ཏེ༌
10 ཟ༌མ༌ ཅོ༌ཁན༌ནི༌ ཞིང༌བོ༌ ཉོས༌།
ཀ༌ཟུག༌ གཙོ༌བོ༌ དཀོན༌མཆོག༌གི༌ ངའ༌ བཀའ༌ སལ༌ལ༌ ཛདས༌།"
པི༌ལ༌ཏུའི༌ ཡེ༌ཤུའ༌ ཏྲི༌ཝ༌ ཏྲིས༌།
27:11 ནེ༌ 26
11 གཙོ༌བོ༌ ཡེ༌ཤུ༌ པི༌ལ༌ཏུའི༌ དུན༌ལ༌ ཞངས༌ཏེ༌ ཡོད༌ ཏུས༌ ཁོའེ༌ ཁོང༌ང༌ ཏྲིས༌, "ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?"
ཡེ༌ཤུའི༌ ལན༌སལས༌, "ཨིན༌, ཉེ༌རང༌ངི༌ ཟེར༌ཁན༌བོ༌ ཨིན༌།"
12 བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ང༌ ཉད༌ ཀལ༌ ཟ༌ནེ༌ ཁོང༌ངི༌ ཅའང༌ ལན༌སལ༌ལ༌ མ༌ཛདས༌།
13 ཏེ༌ནེ༌ པི༌ལ༌ཏུའི༌ ཁོང༌ང༌ ཏྲིས༌, "ཁོང༌གུན༌ནི༌ སྐྱོན༌ མང༌པོ༌ ཀལ༌ཁན༌བོ༌ ཁྱོ༌རང༌ང༌ ཚོར༌ར༌ མེ༌རག༌ག༌?"
14 ཁོང༌ངི༌ སྐྱོན༌ ཀལ༌ཁན༌ ཅིག༌གའང༌ ལན༌ མ༌སལ༌པ༌, ཀའ༌ལོན༌ མ༌སྲན༌ཏྲེ༌ ཧ༌ལས༌།
15 ལུག༌སྲོལ༌ ནང༌ཞིན༌ པེ༌སག༌གི༌ ཏུས༌ཆེན༌ནི༌ ཏུས༌ལ༌, ཀའ༌ལོན༌ནི༌ མི༌ཚོགས༌སི༌ ལྡམ༌ཁན༌ནི༌ ཙོན༌པ༌ ཅིག༌ ཕུད༌དད༌པིན༌།
16 ཏེ༌ཏུས༌ལ༌ ལས༌ངན༌ ཅོས༌ཏེ༌ མིང༌ཅན༌ གྱུར༌ཁན༌ བཱ༌ར༌བས༌ ཙོན༌པ༌ཞིག༌ ཡོད༌པིན༌།
17 མི༌ཚོགས༌ ཛོམ༌མ༌ཅིག༌, པི༌ལ༌ཏུའི༌ ཁོང༌གུན༌ལ༌ ཏྲིས༌, "བཱ༌ར༌བས༌ ཡ༌ ཡེ༌ཤུ༌ ཀ༌བོའ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཟེར༌རད༌, ཁོང༌ ཉིས༌ཀོའེ༌ ནང༌ནེ༌ ཕུད༌ད༌ལ༌ ཁྱོ༌ཞའེ༌ ཀ༌བོ༌ ལྡམ༌མད༌?"
18 ༼བླ༌མ༌ འུ༌སྐྱོང༌གུན༌ ཡེ༌ཤུའི༌ཀ༌ ཚིག༌ཅེས༌པོའེ༌ ཁོང༌ ཁོའེ༌ ལག༌ག༌ སྟད༌ཁན༌བོ༌ པི༌ལ༌ཏུའ༌ གྱུས༌སོང༌༽།
19 པི༌ལ༌ཏུ༌ ཁྲིམས༌པོན༌ནི༌ ཁྲིས༌སི༌ཀ༌ དུགས༌ཏེ༌ ཡོད༌ ཟ༌ནེ༌, ཁོའེ༌ ན༌མའེ༌ འི༌ ལོན༌བོ༌ ཀལས༌, "ཏེ༌ མི༌ ནོངས༌མེད༌པོའ༌ ཁྲིམས༌ཅད༌ཅེས༌སི༌ ནང༌ང༌ དྲེས༌ མ༌དྲེས༌ ཅིའ༌ཟེར༌ན༌ དའང༌ངི༌ ཚན༌ལ༌ ཁོའེ༌ སྐོར༌ལ༌ ཇིགས༌ནང༌ཅན༌ ཉི༌ལམ༌ ཐོང༌ཅེས༌པོའེ༌ ངའ༌ རྡུག༌ངལ༌ ཆེན༌མོ༌ ཐོང༌།"
20 ཨིན༌ནའང༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ བཱ༌ར༌བས༌ ཕུད༌ཅེས༌ དང༌ ཡེ༌ཤུ༌ སད༌ཅུག༌ཅེས༌སི༌ ཕིའ༌ མི༌ཚོགས༌ལ༌ ཀའ༌ལོན༌ལ༌ ཞུ༌ཝ༌ ཕུལ༌ཅུག༌ཅེས༌སི༌ ཕིའ༌ ལྕེ༌ ཀོལ༌ཏེ༌ ཁའ༌ཆམས༌ ཅུགས༌།
21 ཀའ༌ལོན༌ནི༌ ཡང༌སྐྱར༌ མི༌ཚོགས༌ལ༌ ཏྲིས༌, "ཁོང༌ ཉིས༌ཀོའེ༌ ནང༌ནེ༌ ངའེ༌ ཁྱོ༌ཞའེ༌ ཕིའ༌ སུ༌ ཕུད༌?"
མི༌ཚོགས༌སི༌ ལན༌ཏངས༌, "བཱ༌ར༌བས༌ ཕུད༌ད༌ ཛད༌།"
22 པི༌ལ༌ཏུའི༌ ཏྲིས༌, "ཏེ༌ནེ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, ཡེ༌ཤུའ༌ ངའེ༌ ཅི༌ ཅོ༌?"
མི༌ཚོགས༌སི༌ ལན༌ཏངས༌, "ཁོ༌ རྐྱང༌ཤིང༌ང༌ རྐྱོང༌།"
23 པི༌ལ༌ཏུའི༌ ཏྲིས༌, "ཅི༌ཕིའ༌, ཁོའེ༌ ཁྲིམས༌སི༌ གྱབ༌གལ༌ ཅི༌ ཅོས༌ཏོག༌?" ཨིན༌ནའང༌ མི༌ཚོགས༌སི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, "རྐྱང༌ཤིང༌ངི༌ཀ༌ རྐྱོང༌།"
24 པི༌ལ༌ཏུའི༌ མི༌ཚོགས༌སི༌ ནང༌ང༌ གྱུར༌ཇ༌ ཁྱོང༌ མི༌ཉན༌ནོག༌ སམ༌ མ༌ཚད༌ ཁོང༌གུན༌ལ༌ སྲོ༌ ཡོངས༌ཏེ༌ ཧི༌ལིངས༌ ཕིང༌ཅེས༌ གོ༌ཟུགས༌པ༌ ཁོའེ༌ མི༌ཚོགས༌སི༌ དུན༌ལ༌ ཆུ༌ ཁྱོངས༌ཏེ༌ ཁོ༌རང༌ངི༌ ལག༌པ༌ ཁྲུས༌ ཡང༌ ཟེརས༌, "འི༌ མི༌བོ༌ སད༌ཅེས༌སི༌ ནང༌ང༌ ང༌ ནོངས༌མེད༌ ཨིན༌, འི༌བོའེ༌ ཕིའ༌ ཁྱོ༌ཞའ༌ ནོངས༌ཅན༌ ཨིན༌ནོག༌"
25 མི༌ཚོགས༌སི༌ ཟེརས༌, "ཁོ༌ སད༌ཅེས༌སི༌ ཉད༌གལ༌བོ༌ ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ལ༌ ཕོག༌ཤིག༌"
26 ཏེ༌ནེ༌ ཁོང༌གུན༌ནི༌ ཕིའ༌ པི༌ལ༌ཏུའི༌ བཱ༌ར༌བས༌ ཙོན༌ཁང༌ནེ༌ ཕུད༌ཅུགས༌ ཡང༌ ཡེ༌ཤུའ༌ རྟལ༌ལྕག༌ གྱབ༌ཏེ༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ མག༌མི༌གུན༌ལ༌ སྟདས༌།
མག༌མི༌གུན༌ནི༌ ཡེ༌ཤུའ༌ ཚིག༌པ༌ སྲགས༌།
27:27 ནེ༌ 31
27 ཏེ༌ནེ༌ ཀའ༌ལོན༌ནི༌ མག༌མི༌གུན༌ནི༌, ཀའ༌ལོན༌ནི༌ ཁར༌རི༌ མག༌མི༌ ཛོམས༌སེ༌ ནས༌སའེ༌ ནང༌ང༌ གཙོ༌བོ༌ ཡེ༌ཤུ༌ ཁྱེར༌ཏེ༌ མག༌ཚོགས༌ གང༌པོ༌ ཁོང༌ང༌ ཁོར༌ཏེ༌ དུགས༌།
28 ཁོང༌གུན༌ནི༌ ཁོང༌ངི༌ ནམ༌ཟའ༌ ཕུད༌ཏེ༌, གྱལ༌པོ༌ གོན༌ཁན༌ ཙོགས༌སི༌ ནམ༌ཟའ༌ མར༌པོ༌ཞིག༌ སྐོནས༌,
29 ཡང༌ ཚེར༌མའེ༌ ཐོར༌ཤོག༌ སླས༌ཏེ༌ ཁོང༌ངི༌ ཨུའ༌ སྐོནས༌། ཁོང༌ངི༌ ཆག༌ ཡས༌པའེ༌ ནང༌ང༌ སྙུག༌བེར༌ཞིག༌ ཀལས༌ ཡང༌ ཁོང༌ངི༌ དུན༌ལ༌ པིག༌དོང༌ ཙུགས༌ཏེ༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, "ཡ༌ཧུ༌དཱ༌པའེ༌ གྱལ༌པོའ༌ ཆག༌ཚལ༌།"
30 ཐུ༌ གྱབ༌, སྙུག༌བེར༌བོ༌ ཁུར༌ཏེ༌ ཁོང༌ངི༌ ཨུའ༌ ལན༌ མང༌པོ༌ གྱབས༌།
31 ཚིག༌པ༌ སྲགས༌ཏེ༌ སྟིང༌ནེ༌ ཁོང༌གུན༌ནི༌ ནམ༌ཟའ༌ མར༌པོ༌བོ༌ ཕུད༌ཏེ༌, ཡེ༌ཤུའ༌ ཁོང༌རང༌ངི༌ ནམ༌ཟའ༌བོ༌ སྐོནས༌། ཏེ༌ནེ༌ ཁོང༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ ཁྱེརས༌།
ཡེ༌ཤུ༌ རྐྱང༌ཤིང༌ང༌ རྐྱངས༌།
27:32 ནེ༌ 44
32 ཁོང༌གུན༌ནི༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མི༌ གྱལ༌ས༌ནེ༌ ཕིངས༌ཏེ༌ ཁྲིད༌ཏེ༌ ཁྱེར༌ ཟ༌ནེ༌ ཀི༌རིན༌པ༌ ཤི༌མོན༌ ཐུག༌, ཡང༌ མག༌མི༌གུན༌ནི༌ ཁོའ༌ ཝང༌ ཏངས༌ཏེ༌ ཡེ༌ཤུའི༌ རྐྱང༌ཤིང༌ ཁུར༌ཅུགས༌།
33 ཁོང༌གུན༌ གོལ༌གོ༌ཐཱ༌ ༼ཀ༌བོའེ༌ ཏོན༌ཏག༌པོ༌ གོའི༌ རུས༌པའེ༌ ས༌ཀྱད༌༽ ཟེར༌ཁན༌ནི༌ ནས༌སའེ༌ཀ༌ ལེབ༌།
34 ཏེ༌རུ༌ ཁོང༌གུན༌ནི༌ ཡེ༌ཤུའ༌ གལ༌ སྲེས༌ཁན༌ནི༌ རྒུན༌ཆང༌ དོན༌ཅེས༌ལ༌ ཕུལས༌, ཨིན༌ནའང༌ ཁོང༌ངི༌ ཏེ༌བོ༌ ཉངས༌ཏེ༌ དོན༌ན༌ མ༌ཛདས༌།
35 ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ ཚར༌ར༌ཅིག༌, ཁོང༌ངི༌ ནམ༌ཟའ༌ བགོས༌ཏེ༌ སུའ༌ ཐོབ༌དུག༌ ལྟ༌ཅེས༌ལ༌ ཆོ༌ལོ༌ རིལས༌།
36 ཡང༌ མག༌མི༌གུན༌ སའེ༌ཀ༌ དུགས༌ཏེ༌ ཡེ༌ཤུ༌ སྲུངས༌།
37 ཁོང༌ངི༌ ཨུའི༌ སྟག༌ག༌ ཉད༌གལ༌ ཀལ༌ཁན༌ནི༌ སྟགས༌པོའེ༌ཀ༌ འི༌བོ༌ ཡེ༌ཤུ༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ བྲིས༌ཏེ༌ ཡོད༌པིན༌།
38 ཅག༌པ༌ ཉིས༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌, ཅིག༌པོ༌ ཁོང༌ངི༌ ཡས༌པ༌ ཡང༌ ཅིག༌པོ༌ ཡོ༌མའ༌།
39 ཏེ༌ ནས༌ས༌ གྱུད༌ཏེ༌ གྲུལ༌ཁན༌གུན༌ནི༌ གོ༌ ཡུག༌ཏེ༌ སྨད༌ར༌ ཏང༌ཨིན༌ ཟེརས༌,
40 "ཆོད༌ཁང༌ ཤིགས༌ཏེ༌ ཞག༌ སུམ༌མི༌ ནང༌ང༌ རྩིག༌ཨིན༌ ཟེར༌ཁན༌ ཁྱོད༌, གལ༌ཏེས༌ དཀོན༌མཆོག༌གི༌ སྲས༌ ཨིན༌ན༌ རྐྱང༌ཤིང༌ངི༌ ཀ༌ནེ༌ ཡོག༌ག༌ བབས༌ཏེ༌ རང༌ སྐྱོབ༌བའང༌།"
41 ཏེན༌ན༌ ཙོགས༌ལ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནིའང༌ ཁོང༌ང༌ ཚིག༌པ༌ སྲག༌ཨིན༌ ཟེརས༌,
42 "ཁོའེ༌ ཞན༌མ༌གུན༌ སྐྱོབས༌, ཨིན༌ནའང༌ ཁོ༌རང༌ སྐྱོབ༌ཉན༌ན༌ མི༌དུག༌། ཨིས༌ར༌ཨེལ༌པའེ༌ གྱལ༌པོ༌ རྐྱང༌ཤིང༌ངི༌ ཀ༌ནེ༌ དག༌ས༌ བབས༌ཏེ༌ ཡོང༌ན༌, ང༌ཞའེ༌ ཏད༌པ༌ ཅོ༌ཨིན༌།
43 དཀོན༌མཆོག༌ག༌ ཨིད༌ཤེས༌ ཅོས༌ཏེ༌ ཁོའེ༌ ཟེར༌རད༌པིན༌, 'ང༌ དཀོན༌མཆོག༌གི༌ སྲས༌ ཨིན༌', ཏ༌ སྟེན༌བ༌ དཀོན༌མཆོག༌གི༌ ཁོ༌ སྐྱོབ༌བ༌ཛད༌ དུག༌ག༌?"
44 ཏེན༌ན༌ ཙོགས༌ལ༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཁན༌ ཅག༌པ༌གུན༌ནིའང༌ ཁོང༌ང༌ ཚིག༌ ཏངས༌།
གཙོ༌བོ༌ ཡེ༌ཤུ༌ ཀྲོངས༌།
27:45 ནེ༌ 56
45 ཉིང༌གུང༌ནེ༌ ཆུ༌ཚོད༌ སུམ༌པ༌ ཚག༌པ༌ ཡུལ༌ གང༌པོ༌ མུན༌གྲིག༌ སོང༌།
46 ཆུ༌ཚོད༌ སུམ༌པ༌ ཟོད༌ཤིག༌ག༌ ཡེ༌ཤུའི༌ ཨིབ༌རི༌པའེ༌ སྐད༌དི༌ ནང༌ང༌ ཀུ༌ཅོ༌ སྲན༌ཏྲེ༌ སལ༌ཨིན༌ མོལས༌, "ཨེ༌ལོའི༌ ཨེ༌ལོའི༌ ལེ༌མ༌ ས༌བའཅ༌ཐ༌ནི༌" ཀ༌བོའེ༌ ཏོན༌ཏག༌པོ༌, "ངའེ༌ དཀོན༌མཆོག༌, ངའེ༌ དཀོན༌མཆོག༌, ཉེ༌རང༌ངི༌ ངའ༌ ཅིའ༌ ཕང༌ང༌ ཛད༌ཏེ༌ ཨིན༌?"
47 ཏེ༌ཀ༌ ཡོད༌ཁན༌གུན༌ནི༌ ནང༌ནེ༌ ཁ༌ཅིག༌གི༌ ཏེ༌བོ༌ ཚོར༌ར༌ཅིག༌ ཟེརས༌, "ཁོའེ༌ ལུང༌སྟོན༌པ༌ ཨེ༌ལི༌ཡཱ༌ བོད༌ད༌རག༌།"
48 ཏེན༌ན༌མལ༌ལ༌ ཁོང༌གུན༌ནི༌ ཕྲོ༌ནེ༌ ཅིག༌ བང༌ཏངས༌ཏེ༌ རས༌བལ༌ཞིག༌ རྒུན༌ཆང༌ སྐྱུར༌མོའེ༌ ནང༌ང༌ ཅུགས༌ ཡང༌ བེར༌ཀའེ༌ཀ༌ སྐྱོན༌ཏེ༌ ཡེ༌ཤུའ༌ དོན༌ཅེས༌ལ༌ ཏངས༌།
49 ཞན༌གུན༌ནི༌ ཟེརས༌, "དུག༌ཅུག༌གའང༌། ལུང༌སྟོན༌པ༌ ཨེ༌ལི༌ཡཱའ༌ ཁོ༌ སྐྱོབ༌བ༌ལ༌ སྐྱོད༌དུག༌ག༌ སྟེན༌བ༌།"
50 ཡེ༌ཤུའི༌ ཡང༌སྐྱར༌ སྐད༌ ཆེན༌མོ༌ ཉམ༌པོ༌ ཀུ༌ཅོ༌ སལ༌ཏེ༌ རང༌ངི༌ སྐུ༌སྲོག༌པོ༌ སལས༌།
51 ཏེན༌ན༌ ཟ༌ནེ༌ ཆོད༌ཁང༌ངི༌ ཡོ༌ལ༌ གོ༌ནེ༌ ཇུག༌ ཚོག༌པ༌ ཁག༌ཉིས༌སི༌ ནང༌ང༌ ཆད༌།
52 རོམ༌ཁང༌གུན༌ བེ༌ཏེ༌ ཤི༌ཁན༌ནི༌ མི༌ དམ༌པ༌ མང༌པོ༌ སོན༌ཏེའ༌ ལང༌ང༌ ཛདས༌།
53 ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ སྟིང༌ནེ༌ རོམ༌ཁང༌ནེ༌ བིངས༌ཏེ༌ ཡོང༌ཁན༌གུན༌ དམ༌པའེ༌ ཡེ༌རུ༌ཤ༌ལེམ༌མི༌ གྱལ༌ས༌ སོང༌ ཡང༌ མི༌ མང༌པོ༌ཞིག༌ག༌ ཐོང༌།
54 ཡེ༌ཤུ༌ སྲུང༌ཏེ༌ ཡོད༌ཁན༌ མག༌མི༌རྒྱའེ༌ སྤོན༌བོ༌ དང༌ ཞན༌ མག༌མི༌གུན༌ནི༌, སང༌གུལ༌ དང༌ བྱུང༌ཁན༌ ཚང༌མ༌ ཐོང༌ཏེ༌ མ༌སྲན༌ཏྲེ༌ ཇིགས༌ ཡང༌ ཟེརས༌, "འི༌ མི༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཨིན༌ནོག༌།"
55 ཐག༌རིང༌ཞིག༌ནེ༌ བུ༌མོ༌ མང༌པོའེ༌ ཡེ༌ཤུ༌ ཀྲོང༌ཤེས༌པོ༌ ལྟེན༌ ཡོད༌པིན༌, ཁོང༌གུན༌ནི༌ ཡེ༌ཤུའི༌ སྒོས༌དོམ༌གུན༌ རིགས༌ཏེ༌ ཞབ༌ཤི༌ ཞུ༌ཨིན༌ ཁོང༌ ཉམ༌པོ༌ གཱ༌ལིལ༌ལི༌ནེ༌ པར༌ལ༌ ཡོངས༌ཏེ༌ ཨིན༌པིན༌།
56 ཁོང༌གུན༌ནི༌ ཕྲོའ༌ མིར༌ཡམ༌ མག༌དལ༌ལ༌མ༌, ཡོ༌སེབ༌ དང༌ ཁོའེ༌ ནོ༌ ཡ༌ཀོབ༌བི༌ ཨ༌མ༌ མིར༌ཡམ༌ དང༌ ཟེ༌བེད༌དིའི༌ བུ༌ཚའ༌ གུན༌ནི༌ ཨ༌མ༌ ཡོད༌པིན༌།
ཡེ༌ཤུའི༌ སྤུར༌ སྤུར༌ཁང༌ངི༌ ནང༌ང༌ བོར༌ར༌ ཛདས༌།
27:57 ནེ༌ 61
57 མུན༌ཅུ༌རུབ༌ཀྱིས༌ ཡོད༌ ཟ༌ནེ༌ ཡོ༌སེབ༌ ཟེར༌ཁན༌ ཨ༌རི༌མ༌ཐཱ༌པ༌ མི༌ ཆུག༌པོ༌ཞིག༌ ཏེ༌རུ༌ ཡོངས༌, ཁོའང༌ ཡེ༌ཤུའི༌ ལོབ༌ཕྲུགས༌ཞིག༌ ཨིན༌པིན༌།
58 ཁོ༌ པི༌ལ༌ཏུའི༌ཀ༌ སོང༌ཏེ༌, ཁོའ༌ ཡེ༌ཤུའི༌ སྤུར༌ སལ༌ ཟེར༌ཏེ༌ ཞུ༌ཝ༌ ཕུལས༌, ཏེ༌ནེ༌ པི༌ལ༌ཏུའི༌ ཏེ༌བོ༌ ཁོའ༌ ཏོང༌ ཟེར༌ཏེ༌ བཀའ༌ ཏངས༌།
59 ཡོ༌སེབ༌བི༌ ཡེ༌ཤུའི༌ སྤུར༌ ཁྱེར༌ཏེ༌ རས༌ ལག༌མོ༌ ཀུས༌པོའེ༌ ནང༌ང༌ ཏུམས༌ཏེ༌
60 བྲག༌གི༌ ནང༌ང༌ ཁོ༌རང༌ངི༌ ཕིའ༌ སྐོས༌ཏེ༌ ཡོད༌ཁན༌ནི༌ སོ༌མ༌ སྤུར༌ཁང༌བོའེ༌ ནང༌ང༌ ཡེ༌ཤུའི༌ སྤུར༌ བོརས༌ ཡང༌ སྤུར༌ཁང༌ངི༌ ཁའེ༌ཀ༌ ཁར༌རྡོ༌ ཆེན༌མོ༌ཞིག༌ རིལ༌ཏེ༌ ཁོ༌ སོང༌།
61 མག༌དལ༌ལ༌མ༌ མིར༌ཡམ༌ དང༌ ཞན༌ མིར༌ཡམ༌ གུན༌ སྤུར༌ཁང༌ངི༌ འ༌ངོ༌ ཆོགས༌ལ༌ དུགས༌ཏེ༌ ཡོད༌པིན༌།
མག༌མི༌གུན༌ནི༌ ཡེ༌ཤུའི༌ སྤུར༌ཁང༌ སྲུངས༌།
27:62 ནེ༌ 66
62 ཐོ༌རེ༌ཟུག༌པོ༌ ཤབ༌བད༌དི༌ ཞག༌ག༌, བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ པི༌ལ༌ཏུ༌ ཡོད༌ས༌ སོང༌།
63 ཁོང༌གུན༌ནི༌ ཟེརས༌, "སྤོན༌བོ༌ལེ༌, ཏེ༌ གོབ༌སྐོར༌ཁན༌བོའེ༌ སོན༌ཏེའ༌ ཡོད༌ཏུས༌ ཁོའེ༌, 'ཞག༌ སུམ༌མི༌ སྟིང༌ནེ༌ ང༌ སོན༌ཏེའ༌ ལང༌ཨིན༌' ཟེར༌ཁན༌བོ༌ ང༌ཞའ༌ ཨིད༌ཏུ༌རག༌།
64 ཏེ༌བོའེ༌ཕིའ༌ ཞག༌ སུམ༌ ཚག༌པའ༌ ཁོའེ༌ རོམ༌ཁང༌ང༌ སྲུང༌ཁན༌ རིག༌ བོར༌ར༌ ཛད༌, ཏེ༌ མ༌ནེ༌ ཁོའེ༌ ལོབ༌ཕྲུགས༌གུན༌ ཡོངས༌ཏེ༌ རོ༌བོ༌ སྐུས༌ཏེ༌ ཁྱེར༌ཏེ༌ མི༌གུན༌ལ༌ ཁོ༌ ཤི༌ཁན༌གུན༌ནི༌ ཕྲོ༌ནེ༌ ལངས༌ ཟེར༌སྲིད༌ཅེས༌ ཨིན༌ནོག༌། ཏེ༌ནེ༌ ང༌དང༌གུན༌ནི༌ ཕིའ༌ སྟིང༌ཇུག༌གི༌ གོབ༌སྐོར༌བོ༌ སྔུན༌མའེ༌ སང༌ མང༌ང༌ ཐུའ༌ ཡོང༌ཨིན༌།"
65 པི༌ལ༌ཏུའི༌ ཟེརས༌, "མག༌མི༌གུན༌ ཁྱེར༌ཏེ༌ ཙམ༌ཐུབ༌ ཉན༌ནའང༌ སྟན༌པོ༌ ཅོས༌ཏེ༌ སྲུང༌ཅུག༌།"
66 ཏེ༌ནེ༌ ཁོང༌གུན༌ སོང༌ཏེ༌ སྤུར༌ཁང༌བོ༌ སྟན༌པོ༌ ཅོས༌ཏེ༌ སྒོའེ༌ཀ༌ ཐེ༌ཙེ༌ གྱབས༌, ཡང༌ མག༌མི༌གུན༌ སྲུང༌ང༌ བོརས༌།