4
ཞིང༌བད༌པའེ༌ ས༌འོན༌ ཏབ༌ཁན༌ནི༌ རུངས༌།
4:1 ནེ༌ 20
1 ཡང༌སྐྱར༌ གཙོ༌བོ༌ ཡེ༌ཤུའི༌ གཱ༌ལིལ༌ལིའི༌ ཚོའེ༌ ཐའ༌མའ༌ ལབ༌ཞ༌ སལ༌ཅེས༌ གོ༌ཟུག༌ ཛདས༌། ཁོང༌ ཡོད༌ས༌ མི༌ཚོགས༌ མངས༌ཏེའང༌ མང༌པོ༌ ཛོམ༌པ༌ ཁོང༌ གྲུ༌ཟིང༌ངི༌ ནང༌ང༌ ཞོན༌ཏེ༌ ཞུགས༌, ཡང༌ མི༌ ཚང༌མ༌ ཚོའེ༌ ཐའ༌མ༌ དུགས༌།
2 ཁོང༌ངི༌ མི༌གུན༌ལ༌ རུངས༌ གྱུད༌ཏེ༌ ལབ༌ཞ༌ མང༌པོ༌ སལ༌ལ༌ ཛད༌ཏེ༌ མོལས༌,
3 "ཉོན༌ཤིག༌, ཞིང༌བད༌པ༌ཞིག༌ ས༌འོན༌ ཏབ༌བ༌ལ༌ སོང༌།
4 ཞིང༌ང༌ ས༌འོན༌ ཏབ༌ ཟ༌ནེ༌ ཁ༌ཅིག༌ ལམ༌མི༌ཀ༌ བུད༌, ཅི༌པ༌ ཡོངས༌ཏེ༌ ཏེ༌གུན༌ ཟོས༌།
5 ཁ༌ཅིག༌ ས༌ མང༌པོ༌ མེད༌སའེ༌ བྲག༌གི༌ཀ༌ བུད༌, ས༌ མང༌པོ༌ མེད༌ཅེས༌པོའེ༌ ས༌འོན༌བོ༌ གྱོགས༌པ༌ སྐྱེས༌།
6 ཨིན༌ནའང༌ ཉི༌མའེ༌ ཚད༌དི༌ ཞས༌ཏེ༌, ཞིང༌ སྐྱེ༌ཁན༌བོ༌ ཚིག༌, ཡང༌ པ༌ཀྲག༌ ཏིང༌ཅན༌ མེད༌ པ༌སང༌, ཏེ༌བོ༌ སྐམས༌ཏེ༌ ཤི༌།
7 ས༌འོན༌ ཁ༌ཅིག༌ ཚེར༌མང༌ངི༌ ཕྲོའ༌ བུད༌, ཡང༌ ཚེར༌མང༌ སྐྱེས༌ཏེ༌ ནན༌པ༌, ཞིང༌བོ༌ ལྡན༌ མ༌ཐུབ༌, ཏེ༌བོའེ༌ ཞས༌ཏེ༌ ཀྲོ༌ མ༌སྨིནས༌།
8 ཞན༌ ས༌འོན༌གུན༌ ས༌ གྱལ༌ལ༌ ཡོད༌སའེ༌ ཞིང༌ངི༌ཀ༌ བུད༌པ༌, ཏེ༌གུན༌ སྐྱེས༌ཏེ༌ ལྡན༌ཏེ༌ སྟོན༌ཐོགས༌ སྨིན༌, ཀ༌བོ༌ ས༌འོན༌ ཏབ༌ཁན༌ ནི༌ 30, 60, མ༌ཚད༌ 100 གྱུར༌རའང༌ སྨིན༌།"
9 ཏེ༌ནེ༌ ཁོང༌ངི༌ མོལས༌, "ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།"
10 སྟིང༌ནེ༌ ཡེ༌ཤུ༌ ཅིག༌པོ༌ ཡོད༌ ཟ༌ནེ༌, ཁོང༌ང༌ སྐོར༌ཏེ༌ ཡོད༌ཁན༌ནི༌ ཁོང༌ངི༌ ལོབ༌ཕྲུགས༌ ཅུག༌ཉིས༌ དང༌ ཞན༌གུན༌ནི༌ ཁོང༌ངི༌ ཤད༌ད༌ ཛད༌ཁན༌ནི༌ རུངས༌སི༌ ཏོན༌ཏག༌པོ༌ ཏྲིས༌།
11 ཁོང༌ངི༌ ལན༌སལ༌ལ༌ ཛདས༌, "དཀོན༌མཆོག༌གི༌ གྱལ༌སྲིད༌དི༌ སང༌ཝ༌གུན༌ ཧ༌གོ༌ཅེས༌སི༌ སྐབས༌ ཁྱོ༌ཞ༌གུན༌ལ༌ སལ༌ལ༌ ཛད༌ཏེ༌ ཨིན༌ནོག༌། ཨིན༌ནའང༌ དཀོན༌མཆོག༌གི༌ གྱལ༌སྲིད༌དི༌ ཕི༌ལོག༌ག༌ ཡོད༌ཁན༌གུན༌ལ༌ ངའེ༌, ཅི༌ཚང༌མ༌ རུངས༌ གྱུད༌ཏེ༌ ཤད༌དད༌།
12 དམ༌པའེ༌ སུང༌རབས༌སི༌ ནང༌ང༌ བྲིས༌ཁན༌བོ༌ དྲན༌དྲ༌ གྲུབ༌ཅེས༌ལ༌ ངའེ༌ ཏེ༌བོ༌ ཅོའད༌། ཏེ༌བོ༌ ནི༌,
'ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌།
ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌,
ཏེ༌ མ༌ནེ༌ ཁོང༌གུན༌ནི༌ སེམས༌ ངའེ༌ ཆོགས༌ལ༌ གྱུར༌ཏེ༌
ཁོང༌ངི༌ སྡིག༌པ༌གུན༌ལ༌ ཤགས༌པ༌ ཐོབ༌ཏེ༌ ཡོད༌གྲོ༌'།"
13 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, "གལ༌ཏེས༌ ཁྱོ༌ཞ༌གུན༌ལ༌ འི༌ རུངས༌པོའེ༌ ཏོན༌ཏག༌པོ༌ ཧ༌མ༌གོ༌ན༌, ཏེ༌ནེ༌ ཞན༌ཡང༌ རུངས༌ ཚང༌མའེ༌ ཏོག༌ཏག༌གུན༌ ཀ༌ཟུག༌གི༌ ཧ༌གོ༌ཨིན༌?
14 ཞིང༌བད༌པའེ༌ ས༌འོན༌ ཏབ༌ཅེས༌པོ༌ ནི༌, དཀོན༌མཆོག༌གི༌ བཀའ༌ ཤད༌ཅེས༌པོ༌ ཨིན༌ནོག༌།
15 ལམ༌མི༌ཀ༌ ས༌འོན༌ བུད༌ཁན༌གུན༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌, ཨིན༌ནའང༌ ཤེ༌ཏན༌ ཡོངས༌ཏེ༌ ཁོང༌གུན༌ནི༌ སྙིང༌ངི༌ ནང༌ང༌ ཏབ༌ཁན༌བོ༌ ཀོགས༌ཏེ༌ ཁྱེར༌ར༌ནོག༌།
16 བྲག༌གི༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ གྱལ༌སྲིད༌དི༌ བཀའ༌ ཚོར༌ར༌ཅིག༌ ཐད༌པོ༌ ཉམ༌པོ༌ ཏད༌པ༌ ཅོ༌ཁན༌གུན༌ ཨིན༌ནོག༌།
17 ཨིན༌ནའང༌ ཏེ༌བོའ༌ པ༌ཀྲག༌ ཏིང༌ཅན༌ མེད༌ པ༌སང༌ ཏུས༌ཡུན༌རིང༌ མི༌ལུས༌། ཁོང༌གུན༌ནི༌ བཀའེ༌ ནང༌ང༌ ཏད༌པ༌ ཅོ༌ཅེས༌པོའེ༌ ནགས༌ དང༌ བར༌དོ༌ ཐོང༌ང༌ཅིག༌ ཏད༌པ༌ ཕང༌ཨིན༌།
18 ཚེར༌མངས༌སི༌ ཕྲོའ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌,
19 ཨིན༌ནའང༌ མི༌ཚེའེ༌ ཚེར༌ཁ༌ ཡང༌ ནོར༌ དང༌ ཇིག༌རྟེན༌ནི༌ ཞན༌ དོད༌པ༌ གུན༌ནི༌ ནན༌ཅེས༌པོའེ༌ ཏེ༌བོའ༌ བྲས༌བུ༌ སྨིན༌ན༌ མ༌ནོག༌།
20 ས༌ ཟང༌པོའེ༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཉན༌ཏེ༌ ཏད༌པ༌ ཅོ༌ཁན༌གུན༌ ཨིན༌ནོག༌, ཁོང༌གུན༌ལ༌ བྲས༌བུ༌, ས༌འོན༌ ཏབ༌ཁན༌བོའེ༌ སང༌ 30, 60, ཡང༌ 100 གྱུར༌ སྨིན༌ན༌ནོག༌།"
འོད༌དི༌ རུངས༌།
4:21 ནེ༌ 25
21 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, "ཅི༌ ཁྱོ༌ཞའེ༌ འོད༌ ཏུགས༌ཏེ༌ གོར༌མོ༌ ཡ༌ ཉལ༌ཁྲི༌ ཡོག༌ག༌ བོར༌ཨིན༌ན༌? འོད༌པོ༌ འོད༌སྟགས༌སི༌ཀ༌ མི༌བོར༌ར༌?
22 སྦས༌ཏེ༌ བོར༌ཁན༌ ཚང༌མ༌ ཞག༌ཤིག༌ སྔོན༌ཅུག༌ག༌ ཛད༌ཨིན༌, ཡང༌ ཀབས༌ཏེ༌ བོར༌ཁན༌ ཚང༌མ༌ ཕི༌ལོག༌ག༌ ཕིང༌ང༌ ཛད༌ཨིན༌།
23 གལ༌ཏེས༌ ནམ༌ཅོག༌ ཡོད༌ན༌ ངའེ༌ ཟེར༌ཁན༌ལ༌ ཉོན༌ཤིག༌།"
24 ཁོང༌ངི༌ མོལས༌, "ཁྱོ༌ཞའེ༌ ཚོར༌ཁན༌གུན༌ལ༌ ནང༌སྟག༌ གྱལ༌ལ༌ ཏོང༌ཤིག༌། ཁྱོ༌ཞའེ༌ ཀོལ༌ཁན༌ནི༌ ཏབ༌ཟའ༌བོ༌ ཁྱོ༌ཞ༌གུན༌ནི༌ ཕིའང༌ ཀོལ༌ལ༌ ཛད༌ཨིན༌, ཡང༌ ཏེ༌སང༌ མང༌ང༌ སལ༌ཨིན༌།
25 ངའེ༌ ལབ༌ཞ༌ ཉན༌ཁན༌གུན༌ལ༌ མང༌ང༌ ཧ༌གོ༌ཅུག༌ག༌ ཛད༌ཨིན༌, ཨིན༌ནའང༌ མ༌ཉན༌ཁན༌གུན༌ནི༌ ནང༌ནེ༌ ཧ༌གོ༌ཏེ༌ ཡོད༌ཁན༌བོའང༌ ཁྱེར༌ར༌ ཛད༌ཨིན༌།"
ས༌འོན༌ ལྡན༌ཨིན༌ ཡོད༌ཁན༌ནི༌ རུངས༌།
4:26 ནེ༌ 29
26 གཙོ༌བོ༌ ཡེ༌ཤུའི༌ འི༌བོའང༌ མོལས༌, "དཀོན༌མཆོག༌གི༌ གྱལ༌སྲིད༌ ནི༌, ས༌འོན༌ ཞིང༌ང༌ ཡོག༌ཁན༌ནི༌ ཞིང༌བད༌པ༌ཞིག༌ ཙོགས༌ ཨིན༌ནོག༌།
27 ཁོ༌ ཉིད༌ ཏངས༌ཏེ༌ ཡ༌ ལངས༌ཏེ༌ ཡོད༌གྲོ༌, ཉིན༌ཚན༌ མེད༌པ༌ ས༌འོན༌བོ༌ སྐྱེས༌ཏེ༌ ལྡན༌ན༌ནོག༌, ཨིན༌ནའང༌ ཏེ༌བོ༌ ཀ༌ཟུག༌གི༌ ལྡན༌ནད༌, ཁོའ༌ ཅའང༌ གྱུས༌ མེད༌ཀྱག༌།
28 ས༌ ཁོ༌རང༌ངི༌ ས༌འོན༌ སྐྱེ༌ཅུགས༌ཏེ༌ ཞིང༌ ལྡན༌ཏེ༌ སྙེ༌མའེ༌ གོ༌ བིང༌ཏེ༌ བྲུ༌ གང༌ཅུག༌ག༌ནོག༌།
29 ཀྲོ༌ ཚོས༌ས༌ཅིག༌, ཞིང༌བད༌པ༌བོ༌ ཡོངས༌ཏེ༌ ཟོ༌ར༌ ཉམ༌པོ༌ ཏེ༌བོ༌ རྔའ༌ནོག༌ ཅིའ༌ཟེར༌ན༌, རྔབ༌སའེ༌ ཏུས༌པོ༌ ལེབས༌ཏེ༌ ཨིན༌ནོག༌།"
ཉུང༌སྐར༌རི༌ ས༌འོན༌ནི༌ རུངས༌།
4:30 ནེ༌ 34
30 གཙོ༌བོ༌ ཡེ༌ཤུའི༌ མོལས༌, "དཀོན༌མཆོག༌གི༌ གྱལ༌སྲིད༌པོ༌ ངའེ༌ ཁྱོ༌ཞའ༌ ཀ༌ཟུག༌གི༌ ཧ༌གོ༌ཅུག༌? ཏེ༌བོ༌ ཧ༌གོ༌ཅུག༌ཅེས༌སི༌ ཕིའ༌ ངའེ༌ ཀ༌རུངས༌པོ༌ ཀོལ༌?
31 ཏེ༌བོ༌ ནི༌, ཉུང༌སྐར༌རི༌ ས༌འོན༌ ཚང༌མའེ༌སང༌ ཆུ༌ངུན༌ སའེ༌ ནང༌ང༌ ཏབ༌ཁན༌བོ༌ ཙོགས༌ ཨིན༌ནོག༌།
32 ཨིན༌ནའང༌, ཏབ༌བ༌ཅིག༌ ལྡན༌ཏེ༌ ཚས༌སི༌ ནང༌ང༌ ཚང༌མའེ༌སང༌ ཆེན༌མོ༌ ལྕང༌མ༌ གྱུར༌ཨིན༌, ཡང༌ ཡལ༌ག༌གུན༌ འི༌ཟམ༌ ཆེན༌མོ༌ ཆེན༌ ནམ༌ཁའེ༌ ཅ༌གུན༌ནི༌ ཏེ༌བོའེ༌ སིལ༌ལི༌ ནང༌ང༌ ཚངས༌ ཅོ༌ཨིན༌།"
33 ཡེ༌ཤུའི༌ ཏེན༌ན༌ ཙོགས༌སི༌ རུངས༌ མང༌པོ༌ ཀོལ༌ཏེ༌ མི༌གུན༌ནི༌ ཧ༌གོ༌ཅེས༌སི༌ ཁྱུད༌ ཚག༌པ༌ དཀོན༌མཆོག༌གི༌ བཀའ༌ ཤད༌ད༌ ཛདས༌།
34 ཁོང༌ངི༌ རུངས༌ གྱུད༌ཏེ༌ མ༌སྟོགས༌ ཅི༌ ལབ༌ཞ༌ཞིག༌གའང༌ སལ༌ལ༌ མེད༌པིན༌, ཨིན༌ནའང༌ ཁོང༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཅིག༌པོ༌ ཡོད༌ ཟ༌ནེ༌, ཁོང༌ངི༌ རུངས༌ ཚང༌མའེ༌ ཏོན༌བོ༌ ཧ༌གོ༌ཅུག༌ག༌ ཛད༌དད༌པིན༌།
ཡེ༌ཤུའི༌ ལུང༌རག༌ དང༌ ཆུལ༌བག༌ མེད༌ཁན༌ ཛདས༌།
4:35 ནེ༌ 41
35 ཕི༌ཏོག༌ ལེབ༌བ༌ཅིག༌, གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, "ང༌དང༌ ཚོའེ༌ ཕར༌ཀ༌ ཆེན༌།"
36 མི༌ཚོགས༌པོ༌ བོར༌ཏེ༌ ཁོང༌གུན༌ ཡེ༌ཤུ༌ ཉམ༌པོ༌ གྲུ༌ཟིང༌ངི༌ ནང༌ང༌ ཞོན༌ཏེ༌ སོང༌། ཞན༌ གྲུ༌ཟིང༌གུན༌ནའང༌ ཁོང༌ངི༌ གྱབ༌ནེ༌ ཡོངས༌།
37 ཧུན༌མེད༌ལ༌ ནམ༌ཚུབས༌ཏེ༌ ལུང༌རག༌ ཀྲག༌པོ༌ ཡོངས༌, ཡང༌ ཆུལ༌བག༌ གྲུ༌ཟིང༌ངི༌ ནང༌ང༌ ལེབས༌ཏེ༌ ཏེ༌བོ༌ ནུབ༌ཅེས༌ སོང༌།
38 ཡེ༌ཤུ༌ གྲུ༌ཟིང༌ངི༌ ཇུག༌ག༌ ཉས༌སི༌ཀ༌ ཨུ༌ ཕབས༌ཏེ༌ ནལ༌ཟིམས༌ཏེ༌ ཡོད༌པིན༌། ལོབ༌ཕྲུགས༌གུན༌ནི༌ ཁོང༌ང༌ ཉིད༌ཚད༌ད༌ ཛད༌ཏེ༌ ཟེརས༌, "ལོབ༌པོན༌ལེ༌, ང༌ཞའ༌ ཆུའི༌ ནང༌ང༌ ནུབ༌ཅེས༌ དུག༌, སྐྱོབ༌བ༌ ཛད༌ད༌ མེད༌ད༌?"
39 ཡེ༌ཤུ༌ ཞངས༌ཏེ༌ ལུངས༌པོའ༌ ཁའ༌སྐྱེས༌ཏེ༌ ཆུལ༌བག༌གུན༌ལ༌ མོལས༌, "ཅུབ༌ཅོད༌, ཀུ༌ཅོ༌ མ༌ཏང༌།" ཏེ༌ནེ༌ ལུང༌རག༌ མེད༌ཁན༌ སོང༌ཏེ༌ ཚོའེ༌ ནང༌ང༌ པད༌ ཞི༌དེ༌ བྱུང༌།
40 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, "ཅིའ༌ ཇིགས༌སད༌? ཁྱོ༌ཞ༌གུན༌ལ༌ ངའེ༌ཀ༌ ཏ༌རུང༌ངའང༌ ཏད༌པ༌ མེད༌པ༌ ཨིན༌ན༌?"
41 ལོབ༌ཕྲུགས༌གུན༌ སྲན༌ཏྲེ༌ ཇིགས༌ཏེ༌ ཅིག༌ དང༌ ཅིག༌ག༌ ཏྲིས༌, "ཁོང༌ སུ༌ ཨིན༌ནོག༌? ལུངས༌པོ༌ དང༌ ཆུལ༌བག༌ གུན༌ནིའང༌ ཁོང༌ངི༌ ཁའ༌ ཉན༌དུག༌།"