3
ཡེ༌ཤུའི༌ ཤབ༌བད༌དི༌ ཞག༌ག༌ མི༌ཞིག༌ ཕན༌ཅུག༌ག༌ ཛདས༌།
3:1 ནེ༌ 6
1 གཙོ༌བོ༌ ཡེ༌ཤུ༌ དུ༌ཁང༌ང༌ ཡང༌སྐྱར༌ སྐྱོདས༌, ཏེ༌རུ༌ ལག༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌།
2 ཡེ༌ཤུའི༌ ཁོ༌ གྱལ༌ཅུག༌ན༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོ༌ཅེས༌པོའ༌ སྐྱོན༌ ཀལ༌ཅེས༌ལ༌ ཕ༌རུ༌ཤི༌པ༌གུན༌ནི༌ ཁོང༌ང༌ གྱལ༌ལ༌ ཅོས༌ཏེ༌ སྟེན༌དུགས༌།
3 ལག༌པ༌ ཁོངས༌ཁན༌ནི༌ མི༌བོའ༌ ཡེ༌ཤུའི༌ མོལས༌, "ཡོང༌ ཡང༌ ཚང༌མའེ༌ དུན༌ལ༌ ལོངས༌།"
4 ཏེ༌ནེ༌ ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, "ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌ག༌ ཡ༌ ངན༌པ༌, སྲོག༌ སྐྱོབ༌ ཆོག༌ག༌ནོག༌ག༌ ཡ༌ སད༌?" ཨིན༌ནའང༌ ཁོང༌གུན༌ནི༌ ཁོང༌ང༌ ལན༌ མ༌ཏངས༌།
5 ཡེ༌ཤུའི༌ ཐུགས༌སྲོའེ༌ ནང༌ང༌ ཁོང༌ རེ༌རེའ༌ ཟིགས༌, ཡང༌ ཁོང༌གུན༌ནི༌ སྙིང༌ སྐྱོང༌པོ༌ ཟིགས༌ཏེ༌ ཁོང༌ང༌ མ༌སྲན༌ཏྲེ༌ ཐུགས༌ཚེར༌ སྐྱོདས༌། ཁོང༌ངི༌ ལག༌པ༌ ཁོངས༌ཁན༌བོའ༌ མོལས༌, "ལག༌པ༌ རྐྱོང༌" ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌།
6 ཏེ༌ནེ༌ ཕ༌རུ༌ཤི༌པ༌གུན༌ ཕི༌ལོག༌ག༌ སོང༌ཏེ༌, གྱལ༌པོ༌ ཧེ༌རོ༌དཱའི༌ ཆོགས༌པ༌གུན༌ ཉམ༌པོ༌ ཡེ༌ཤུ༌ སད༌ཅེས༌སི༌ ཐབས༌ ངན༌པ༌ ལྡིངས༌།
མི༌ཚོགས༌ ཡེ༌ཤུའི༌ སྟིང༌རང༌ནེ༌ སོང༌།
3:7 ནེ༌ 12
7 གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ ཚོའེ༌ ཆོགས༌ལ༌ སྐྱོདས༌, ཡང༌ གཱ༌ལིལ༌ལི༌ནེ༌ མི༌ཚོགས༌ ཆེན༌མོ༌ཞིག༌ ཁོང༌ངི༌ སྟིང༌རང༌ནེ༌ ཡོངས༌།
8 ཡེ༌ཤུའི༌ ཛད༌ཁན༌ ཚང༌མའེ༌ སྐོར༌ལ༌ ཚོར༌པ༌, ཏེ༌ མི༌ཚོགས༌པོ༌ ཡ༌ཧུ༌དཱ༌ ཡུལ༌ཇོངས༌, ཡེ༌རུ༌ཤ༌ལེམ༌མི༌ གྱལ༌ས༌, ཨི༌དུ༌མེའ༌, ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ས༌ཆ༌གུན༌, ཡང༌ བྱང༌ ཆོགས༌སི༌ ཐག༌རིང༌ངི༌ ནས༌ས༌ ཏཱ༌ཡིར༌ དང༌ སི༌དཱོན༌ གྱལ༌ས༌ གུན༌ནེ༌ ཡོངས༌ཏེ༌ ཨིན༌པིན༌།
9 མི༌ཚོགས༌སི༌ ཁོང༌ ནན༌ མི༌ནན༌ཅེས༌སི༌ ཕིའ༌ ཡེ༌ཤུའི༌ ཁོང༌ངི༌ ལོབ༌ཕྲུགས༌གུན༌ལ༌ གྲུ༌ཟིང༌ཞིག༌ གྲལ༌གྲིག༌ ཅོ༌ཅེས༌ལ༌ མོལས༌།
10 ཁོང༌ངི༌ མི༌ མང༌པོ༌ ཕན༌ཅུག༌ག༌ ཛད༌ཅེས༌པོའེ༌, ཟུ༌མོ༌ ཡོང༌ཁན༌ ཚང༌མའེ༌ ཁོང༌ང༌ ལག༌པ༌ ཐུག༌ཅེས༌ལ༌ ནན༌ཏེ༌ ཁྱོང༌ངད༌པིན༌།
11 ཡང༌ གོང༌པོ༌གུན༌ནི༌ ཁོང༌ ཇལ༌ལ༌ཅིག༌, ཁོང༌གུན༌ ཞུགས༌ཏེ༌ ཡོད༌ཁན༌ནི༌ མི༌གུན༌ ཡེ༌ཤུའི༌ སྐུན༌དུན༌ལ༌ སའ༌ གྱབས༌ཏེ༌ ཀུ༌ཅོ༌ ཏང༌ཨིན༌ ཟེརས༌, "ཉེ༌རང༌ དཀོན༌མཆོག༌གི༌ སྲས༌ ཞུགས༌ཏེ༌ ཨིན༌ནོག༌།"
12 ཨིན༌ནའང༌ ཡེ༌ཤུའི༌ གོང༌པོ༌གུན༌ལ༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ མི༌ཤད༌ཅེས༌ལ༌ བཀའ༌ སལ༌ལ༌ ཛདས༌།
ཡེ༌ཤུའི༌ སྐུ༌ཚབས༌ ཅུག༌ཉིས༌གུན༌ ལྡམ༌མ༌ ཛདས༌།
3:13 ནེ༌ 19
13 ཏེ༌བོའེ༌ སྟིང༌ནེ༌ གཙོ༌བོ༌ ཡེ༌ཤུ༌ རི༌ཞིག༌གི༌ཀ༌ སྐྱོད༌ཏེ༌ ཁོང༌ངི༌ ལྡམ༌མ༌ ཛད༌ཁན༌གུན༌ལ༌ བོད༌ད༌ ཛདས༌, ཡང༌ ཁོང༌གུན༌ ཁོང༌ ཡོད༌ས༌ ཡོངས༌།
14 ཁོང༌ངི༌ བོད༌ད༌ ཛད༌ཁན༌ ཅུག༌ཉིས༌པོ༌ ཁོང༌རང༌ངི༌ སྐུ༌ཚབས༌ལ༌ སྐོའ༌ ཛདས༌། ཁོང༌གུན༌ནི༌ ཁོང༌ང༌ ཕྲོ༌པ༌ ཅོ༌ཅེས༌ ཡང༌ ཁོང༌ངི༌ ཁོང༌གུན༌ ཆོས༌ཤད༌ཅེས༌ལ༌ ལམ༌ཅུག༌ག༌ ཛད༌ཨིན༌,
15 ཡང༌ ཁོང༌གུན༌ལ༌ རྡུད༌གུན༌ ཕིང༌ཅེས༌སི༌ ཝང༌ཆ༌ སལ༌ལ༌ ཛདས༌།
16 ཁོང༌ངི༌ སྐོའ༌ ཛད༌ཁན༌ནི༌ སྐུ༌ཚབས༌ ཅུག༌ཉིས༌པོ༌ ནི༌, ཤི༌མོན༌ ༼ཡེ༌ཤུའི༌ ཁོའེ༌ མིང༌ང༌ པི༌ཏྲར༌ ཏག༌ག༌ ཛདས༌༽,
17 ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཁོའེ༌ ནོ༌ ཡོ༌ཧཱ༌ནན༌ ༼ཁོང༌ ཉིས༌ཀོ༌ སྲོན༌ཇན༌ ཡོད༌པ༌, ཡེ༌ཤུའི༌ ཁོང༌གུན༌ལ༌ "བོ༌ཡ༌ནེར༌གེ༌" ཡང༌ན༌ "བྲུག༌ལྡིར༌རི༌ བུ༌ཚ༌གུན༌" མིང༌ ཏག༌ག༌ ཛདས༌༽།
18 ཨེན༌གྲིརུ༌, ཕི༌ལིབ༌, བར༌ཐོལ༌མཱ༌, མད༌ཐཱ༌, ཐོ༌མཱས༌, ཨལ༌ཕཱི༌འུས༌སི༌ བུ༌ཚ༌ ཡ༌ཀོབ༌, ཐད༌དཱ༌འུས༌, ཤི༌མོན༌ ༼ཡུལ༌དད༌ཅན༌༽,
19 དང༌ ཡུ༌དཱ༌ ཀར༌ཡོད༌པ༌ ཀ༌བོའེ༌ གཙོ༌བོ༌ ཡེ༌ཤུའ༌ སྟིང༌ནེ༌ ངོ༌ལོག༌ ཅོས༌།
ཡེ༌ཤུའི༌ གྲ༌འོ༌གུན༌ནི༌ ཁོང༌ང༌ རྡུད༌གུན༌ནི༌ གྱལ༌པོ༌ ཟེརས༌།
3:20 ནེ༌ 30
20 ཏེ༌ནེ༌ གཙོ༌བོ༌ ཡེ༌ཤུ༌ ཁང༌པ༌ཞིག༌གི༌ ནང༌ང༌ སྐྱོདས༌། མི༌ཚོགས༌ ཛོམ༌ཅེས༌ གོ༌ཟུགས༌པ༌, ཁོང༌ དང༌ ཁོང༌ངི༌ ལོབ༌ཕྲུགས༌གུན༌ལ༌ ཟན༌ནའང༌ ཟའ༌ཅེས༌སི༌ ཏུས༌ མ༌ཐོབ༌།
21 ཏེ༌ ཚང༌མ༌ ཡེ༌ཤུའི༌ ནང༌མི༌གུན༌ལ༌ ཚོར༌ར༌ཅིག༌, ཁོང༌གུན༌ ཡེ༌ཤུ༌ ཁང༌པ༌ ཁྲིད༌ཏེ༌ ཁྱེར༌ཅེས༌ལ༌ ཡོངས༌, ཅིའ༌ཟེར༌ན༌ མི༌གུན༌ནི༌, "ཁོང༌ སྙོས༌ཏེ༌ ཨིན༌ནོག༌" ཟེར༌རད༌པིན༌།
22 ཨིན༌ནའང༌ ཡེ༌རུ༌ཤ༌ལེམ༌ གྱལ༌ས༌ནེ༌ ཡོངས༌ཁན༌ནི༌ ཆོས༌ཁྲིམས༌ལ༌ ཁས༌པ༌གུན༌ནི༌ ཟེརས༌, "ཁོའེ༌ ནང༌ང༌ བེལ༌ཟེ༌བུལ༌ ཞུགས༌ཏེ༌ ཨིན༌ནོག༌། ཏེ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།"
23 ཡེ༌ཤུའི༌ ཁོང༌གུན༌ལ༌ བོད༌ད༌ ཛད༌ཏེ༌ སྤེ༌ སལ༌ཨིན༌ ལན༌སལ༌ལ༌ ཛདས༌, "ཀ༌ཟུག༌གི༌ ཤེ༌ཏན༌ནི༌ ཤེ༌ཏན༌ ཁོ༌རང༌ ཕིང༌ ཉན༌ན༌ནོག༌?
24 གལ༌ཏེས༌ གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ ཁྲངས༌པོ༌ མི༌ལུས༌།
25 གལ༌ཏེས༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཁོང༌གུན༌ནི༌ ནང༌ང༌ ཐུན༌བྲེལ༌ མི༌ལུས༌།
26 གལ༌ཏེས༌ ཤེ༌ཏན༌ནི༌ ཁོ༌རང༌ངི༌ གྱབ༌གལ༌ལ༌ ནོལ༌ཏེ༌ པོ༌བུད༌ན༌ ཁོའེ༌ ཀ༌ཟུག༌གི༌ ཝང༌སྲུལ༌ཨིན༌? ཁོ༌ མེད༌ཁན༌ ཆ༌ཅེས༌སི༌ ཏུས༌པོ༌ ལེབས༌ཏེ༌ ཨིན༌།
27 ང༌ ཡང༌ སྤེ༌ཞིག༌ ཏང༌ཅུག༌, སུའང༌ མི༌ ཤེད༌ཅན༌ཞིག༌གི༌ ཁང༌པའེ༌ ནང༌ང༌ ཞུགས༌ཏེ༌ ཁོའེ༌ ནོར༌ རྐུ༌ མི༌ཉན༌ ནམ༌ཚོག༌པ༌ ཁོའེ༌ སྔུན༌ལ༌ མི༌ ཤེད༌ཅན༌བོ༌ ལྡམ༌ མི༌ལྡམ༌, ཏེ༌ནེ༌ ཁོའེ༌ ཁང༌པའེ༌ ནང༌ང༌ ཡོད༌ཁན༌ནི༌ ནོར༌གུན༌ རྐུ༌ཉན༌ཨིན༌།"
28 "ངའེ༌ ཁྱོ༌ཞའ༌ དེན༌བ༌ ཟེར༌རད༌, མི༌གུན༌ནི༌ སྡིག༌པ༌ ཅོ༌ཁན༌ དང༌ དཀོན༌མཆོག༌ག༌ དད༌ལོག༌ ཞུ༌ཁན༌ ཚང༌མ༌ ཤགས༌པ༌ སལ༌ལ༌ ཛད༌ཨིན༌,
29 ཨིན༌ནའང༌ དམ༌པའེ༌ ཐུག༌ཉིད༌ལ༌ དད༌ལོག༌ ཞུ༌ཁན༌གུན༌ལ༌ ཤགས༌པ༌ མ༌ནེ༌ སལ༌ལ༌ མི༌ཛད༌; ཐའ༌མེད༌པའེ༌ སྡིག༌པ༌ ཅོ༌ཅེས༌སི༌ ནོངས༌ཅན༌ ཁོ༌ ཨིན༌ནོག༌།"
30 ཁོང༌ངི༌ ཁོང༌གུན༌ལ༌ ཏེ༌བོ༌ མོལ༌ལ༌ ཛདས༌ ཅིའ༌ཟེར༌ན༌, ཁོང༌གུན༌ནི༌ "ཡེ༌ཤུའི༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌" ཟེར༌རད༌པིན༌།
ཡེ༌ཤུའི༌ ནང༌ཚངས༌ ངོས༌མ༌གུན༌།
3:31 ནེ༌ 35
31 ཏེ༌ནེ༌ གཙོ༌བོ༌ ཡེ༌ཤུའི༌ ཨ༌མ༌ དང༌ ནོ༌གུན༌ ཡོངས༌, ཡང༌ ཕི༌ལོག༌ག༌ དུགས༌ཏེ༌ མི༌ཞིག༌ ཁོང༌ང༌ བོད༌ད༌ལ༌ ཀལས༌།
32 ཡེ༌ཤུའ༌ སྐོར༌ཏེ༌ ཡོད༌ཁན༌ནི༌ མི༌ཚོགས༌སི༌ ཟེརས༌, "ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ ཙལ༌ཨིན༌ ཕི༌ལོག༌ག༌ དུག༌།"
33 ཡེ༌ཤུའི༌ ལན༌སལས༌, "སུ༌ ཨིན༌ནོག༌ ངའེ༌ ཨ༌མ༌ དང༌ ནོ༌གུན༌?"
34 ཏེ༌ནེ༌ ཁོང༌ངི༌ ཁོང༌ང༌ སྐོར༌ཏེ༌ ཡོད༌ཁན༌གུན༌ལ༌ ཟིགས༌ཏེ༌ མོལས༌, "ངའེ༌ ཨ༌མ༌ དང༌ ནོ༌གུན༌ འི༌གུན༌ ཨིན༌།
35 ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ ངའེ༌ ཨ༌མ༌ དང༌ མིང༌སྲིང༌ གུན༌ ཨིན༌།"