12
ཤང༌ ཅོ༌ཅེས༌ དང༌ སྤོས༌པ༌ ཏང༌ཅེས༌།
12:1 ནེ༌ 12
1 ཏེ༌ཏུས༌ལ༌ སྟོང༌ཕྲག༌ མང༌པོའེ༌ མི༌ཚོགས༌ ཛོམ༌ཅེས༌པོའེ༌ ཅིག༌ དང༌ ཅིག༌ ནན༌ནད༌པིན༌, ཡེ༌ཤུའི༌ སྔུན༌ལ༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཟིགས༌ཏེ༌ མོལས༌, "ཕ༌རུ༌ཤི༌པའེ༌ སྐྱུར༌ནེ༌ ཤང༌ ཅོས༌ ཀ༌བོ༌ ཁོང༌ངི༌ ཁ༌ཆོས༌པོ༌ ཨིན༌ནོག༌།
2 ཀབས༌ཏེ༌ བོར༌ཁན༌ ཚང༌མ༌ ཕིང༌ང༌ ཛད༌ཨིན༌ ཡང༌ སྦས༌ཏེ༌ བོར༌ཁན༌ ཚང༌མ༌ མི༌གུན༌ལ༌ སྔོན༌ ཅུག༌ག༌ ཛད༌ཨིན༌།
3 ཁྱོ༌ཞའེ༌ མུན༌གྲིག༌གི༌ ནང༌ང༌ ཟེར༌ཁན༌གུན༌ ཉི༌མའེ༌ འོད༌དི༌ ནང༌ང༌ ཚོར༌ཨིན༌, ཡང༌ ཁྱོ༌ཞའེ༌ ཁང༌པའེ༌ ནང༌ཀུག༌ག༌ ནམ༌ཅོག༌གི༌ ནང༌ང༌ ཤུབས༌ཏེ༌ ཟེར༌ཁན༌གུན༌ ཁང༌པའེ༌ ཁེ༌ཐོག༌ནེ༌ ཀུ༌ཅོ༌ ཏངས༌ཏེ༌ ཤད༌ཨིན༌།"
4 "ངའེ༌ ཛ༌འོ༌གུན༌ ཁྱོ༌ཞའ༌ ཟེར༌རད༌, ལུས༌ ཅིག༌པོ༌ སད༌ ཉན༌ཁན༌གུན༌ལ༌ མ༌ཇིགས༌ ཏེ༌སང༌ མང༌ང༌ ཁོང༌ང༌ ཅའང༌ ཅོ༌མི༌ཉན༌།
5 ཨིན༌ནའང༌ ཇིགས༌གོ༌ཤེས༌ཅན༌བོ༌ ངའེ༌ ཁྱོ༌ཞ༌གུན༌ལ༌ ཤད༌ཨིན༌, ལུས༌ སད༌ཏེ༌ སྟིང༌ནེ༌ ཉལ༌ཝའེ༌ ནང༌ང༌ ཕང༌ང༌ ཛད༌ཅེས༌སི༌ ཝང༌ཆ༌ ཡོད༌ཁན༌ནི༌ དཀོན༌མཆོག༌ག༌ ཇིགས༌། འོ༌ན༌ ངའེ༌ ཁྱོ༌ཞའ༌ ཟེར༌རད༌, ཁོང༌ང༌ ཇིགས༌།"
6 "པེ༌ནེ༌ ཉིས༌ལ༌ ཅི༌པ༌ ལྔ༌ ཙོང༌ང༌ མི༌དུག༌ག༌? ཨིན༌ནའང༌ དཀོན༌མཆོག༌གི༌ ཏེ༌གུན༌ནི༌ ནང༌ནེ༌ ཅིག༌གའང༌ ཞེད༌ད༌ ཛད༌ད༌ མི༌དུག༌།
7 ཁྱོ༌ཞའེ༌ གོའེ༌ཀ༌ ཡོད༌ཁན༌ནི༌ སྲའེ༌ ཀྲངས༌ཀའང༌ ཁོང༌ངི༌ ཁྱེན༌ན༌ ཛད༌ད༌ནོག༌། ཏེན༌ན༌བོའེ༌ཕིའ༌ ཇིགས༌ མ༌ཇིགས༌, དཀོན༌མཆོག༌གི༌ སྐུན༌དུན༌ལ༌ ཅི༌པ༌ མང༌པོའེ༌ སང༌ ཁྱོ༌ཞའ༌ ཅིག༌ མང༌ང༌ རིན༌ཆེའ༌ ཨིན༌ནོག༌།"
8 "ངའེ༌ ཁྱོ༌ཞའ༌ ཟེར༌རད༌, མི༌གུན༌ནི༌ དུན༌ལ༌, ཡེ༌ཤུ༌ ངའེ༌ གཙོ༌བོ༌ ཨིན༌ ཟེར༌ཁན༌ ཚང༌མའ༌ མི༌རིགས༌སི༌བུའིང༌ དཀོན༌མཆོག༌གི༌ ཕོ༌ཉ༌གུན༌ནི༌ དུན༌ལ༌ ཁོང༌གུན༌ ཁོའེ༌ དེན༌བའེ༌ ལོབ༌ཕྲུགས༌ ཨིན༌ ཟེར༌ཨིན༌།
9 ཨིན༌ནའང༌ མི༌གུན༌ནི༌ དུན༌ལ༌ ངའ༌ མི༌ཤེས༌ཟུན༌ ཏང༌ཁན༌ ཚང༌མའ༌, ངེའང༌ དཀོན༌མཆོག༌གི༌ ཕོ༌ཉ༌གུན༌ནི༌ དུན༌ལ༌ ཁོང༌གུན༌ མི༌ཤེས༌ ཟེར༌ཨིན༌།
10 མི༌རིགས༌སི༌བུའི༌ གྱབ༌གལ༌ལ༌ ཟེར༌ཁན༌ ཚང༌མའ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ དམ༌པའེ༌ ཐུག༌ཉིད༌དི༌ གྱབ༌གལ༌ལ༌ ཟེར༌ཁན༌གུན༌ལ༌ ཤགས༌པ༌ མ༌ནེ༌ མི༌སལ༌།"
11 "ཁོང༌གུན༌ནི༌ ཁྱོ༌ཞའ༌ དུ༌ཁང༌, ཝང༌སྲུལ༌པ༌ དང༌ ཝང༌ཆ༌ ཡོད༌ཁན༌ གུན༌ནི༌ དུན༌ལ༌ ཁྱོང༌ང༌ཅིག༌ རང༌ ནོངས༌མེད༌ ཀ༌ཟུག༌གི༌ ལྟན༌ཨིན༌ ཡ༌ ཅི༌ ཟེར༌ཨིན༌ སམ༌ཏེ༌ ཚེར༌ མ༌ཚེར༌།
12 ཅིའ༌ཟེར༌ན༌ ཏེན༌ན༌ ཏུས༌ལ༌ ཟེར༌གོ༌ཤེས༌པོ༌ དམ༌པའེ༌ ཐུག༌ཉིད༌དི༌ ཁྱོ༌ཞའ༌ སལ༌ལ༌ ཛད༌ཨིན༌།"
སམ༌བ༌ མེད༌ཁན༌ནི༌ མི༌ ཆུག༌པོ༌ཞིག༌གི༌ རུངས༌།
12:13 ནེ༌ 21
13 ཏེ༌ནེ༌ མི༌ཚོགས༌སི༌ ཕྲོ༌ནེ༌ མི༌ཞིག༌གི༌ གཙོ༌བོ༌ ཡེ༌ཤུའ༌ ཟེརས༌, "ལོབ༌པོན༌ལེ༌, ང༌ཞའ༌ ནོར༌སྐལ༌ ཐོབ༌ཁན༌བོ༌ ང༌ ཉམ༌པོ༌ བགོ༌ཅེས༌ལ༌ ངའེ༌ ཨ༌ཅོ༌ མོལ༌ལའང༌།"
14 ཡེ༌ཤུའི༌ ཁོའ༌ མོལས༌, "ཛ༌འོ༌ ཁྱོ༌ཞའེ༌ ནོར༌སྐལ༌ བགོ༌ཁན༌ནི༌ ཁྲིམས༌པོན༌ ཡ༌ བར༌མིའ༌ ངའ༌ སུའི༌ སྐོས༌?"
15 ཏེ༌ནེ༌ ཁོང༌ངི༌ མི༌ཚོགས༌ལ༌ མོལས༌, "ཤང༌ ཅོས༌, ནབ༌སེམས༌སི༌ རིགས༌ ཚང༌མ༌ནེ༌ ཐག༌རིང༌ང༌ ཁྱོ༌ཞའེ༌ རང༌ སྐྱོབས༌ཏེ༌ བོར༌ ཅིའ༌ཟེར༌ན༌ མི༌ཞིག༌གི༌ མི༌ཚེ༌ རིན༌བོ༌ ཁོའ༌ ཡོད༌ཁན༌ནི༌ ནོར༌རི༌ཀ༌ རག༌ལས༌ས༌ མ༌ནོག༌།"
16 ཏེ༌ནེ༌ ཡེ༌ཤུའི༌ རུངས༌ཤིག༌ ཤད༌ད༌ ཛདས༌, "མི༌ ཆུག༌པོ༌ཞིག༌གི༌ ས༌ཀྱད༌ལ༌ སྟོན༌ཐོག༌ གྱལ༌ལ༌ མ༌ མང༌པོ༌ སྨིན༌།
17 ཁོའེ༌ སམ༌ 'ཏ༌ ངའེ༌ ཅི༌ ཅོ༌ཨིན༌? འི༌ སྟོན༌ཐོག༌ ཚང༌མ༌ ཆུད༌ཅེས༌སི༌ བང༌ང༌ ངའ༌ མེད༌།'
18 ཏེ༌ནེ༌ ཁོའེ༌ ཁོ༌རང༌ང༌ ཟེརས༌, 'ངའེ༌ བང༌ང༌གུན༌ དང༌ ཅ༌ལག༌ བོར༌ས༌ ཤིགས༌ཏེ༌ ཆེན༌མོ༌ རིག༌ རྩིག༌ཨིན༌ ཡང༌ ཏེ༌གུན༌ནི༌ ནང༌ང༌ ངའེ༌ ཀྲོ༌ནས༌ དང༌ ནོར༌ ཚང༌མ༌ བོར༌ཨིན༌།
19 ངའེ༌ ང༌རང༌ང༌ ཟེར༌ཨིན༌, "ངའ༌ སོ༌དེ༌ཅན༌, ཏ༌ ལོ༌ མང༌པོའེ༌ ཕིའ༌ ནོར༌ དུག༌། ངལ༌ཚོས༌ཏེ༌ ཟོ༌ཐུང༌, སྐྱིད༌པོ༌ དང༌ ཐད༌པོ༌ ཅོས༌'།"
20 "ཨིན༌ནའང༌ དཀོན༌མཆོག༌གི༌ ཁོའ༌ མོལས༌, 'སམ༌མེད༌ ཁྱོ༌རང༌, དི༌རིང༌ ཚན༌ལ༌ ཁྱོ༌རང༌ངི༌ སྲོག༌ ངའེ༌ ཁྱེར༌ཨིན༌། རང༌ངི༌ ཕིའ༌ སགས༌ཁན༌ནི༌ ནོར༌གུན༌ སུའ༌ ཕན༌ཨིན༌?' "
21 "དཀོན༌མཆོག༌གི༌ དུན༌ལ༌ ཆུག༌པོ༌ མ༌གྱུར༌ར༌ རང༌ངི༌ ཕིའ༌ ཇིག༌རྟེན༌ནི༌ཀ༌ ནོར༌ སག༌ཁན༌གུན༌ལ༌ ཏེན༌ན༌ ཙོགས༌ ཆེན༌།"
ཚེར༌ མ༌ཚེར༌།
12:22 ནེ༌ 34
22 ཏེ༌ནེ༌ ཡེ༌ཤུའི༌ རང༌ངི༌ ལོབ༌ཕྲུགས༌གུན༌ལ༌ མོལས༌, "ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, ཅི༌ ཟེན༌, ཡ༌ ཟུགས༌ལ༌ ཅི༌ གོན༌ཨིན༌ སམས༌ཏེ༌ རང༌ངི༌ མི༌ཚེའེ༌ ཕིའ༌ ཚེར༌ མ༌ཚེར༌།
23 ཟན༌ནི༌ སང༌ སྲོག༌པོ༌ ཡང༌ ཀོས༌སི༌ སང༌ ལུས༌པོ༌ ཁག༌ཆེའ༌ མ༌ནོག༌ག༌?
24 ཕོ༌རོག༌གུན༌ལ༌ ལྟོས༌, ཏེ༌གུན༌ནི༌ ཞིང༌ ཏབ༌བ༌ ཡ༌ ཞིང༌ རྔའ༌ མི༌དུག༌, ཏེ༌གུན༌ལ༌ ཛོད༌ ཡ༌ བང༌ང༌ མི༌དུག༌, ཨིན༌ནའང༌ དཀོན༌མཆོག༌གི༌ ཏེ༌གུན༌ལ༌ ཟན༌ སལ༌ལ༌ ཛད༌དུག༌། ཅ༌གུན༌ནི༌ སང༌ ཁྱོ༌ཞའ༌ མང༌ང༌ རིན༌ མི༌ཆེའ༌།
25 ཁྱོ༌ཞའ༌ སུ༌ཞིག༌གི༌ ཚེར༌ཁ༌ ཅོས༌ཏེ༌ ཁྱོ༌ཞའེ༌ མི༌ཚེ༌ ནང༌ང༌ ཆུ༌ཚོད༌ ཅིག༌ སྐྱེད༌ ཐུབ༌ཨིན༌ན༌?
26 ཁྱོ༌ཞའེ༌ ཚེར༌ཁ༌ ཅོས༌ཏེ༌ ཏེ༌ཙོགས༌ ཆུ༌ངུན༌ ལས༌ཤིག༌ ཅོ༌ མ༌ཉན༌ན༌, ཏེ༌ནེ༌ ཞན༌ ལུས༌ཁན༌གུན༌ནི༌ ཕིའ༌ ཅིའ༌ ཚེར༌ཁ༌ ཅོའད༌?"
27 "སྤང༌ཐང༌ངི༌ མེན༌ཏོག༌གུན༌ ཀ༌ཟུག༌གི༌ ལྡན༌དུག༌ ལྟོས༌ཤིག༌, ཏེ༌གུན༌ནི༌ ལས༌ ཅོའ༌ ཡ༌ བལ༌ ཁལ༌ཏེ༌ ཀོས༌ ཐག༌ག༌ མི༌དུག༌། ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྱལ༌པོ༌ སོ༌ལོ༌མོན༌, ཁོ༌རང༌ངི༌ སྤལ༌ལི༌ ནང༌ང༌ མ༌ཀྲག༌པོ༌ ཀོས༌ལག༌ གོན༌ནའང༌ ཏེ༌ མེན༌ཏོག༌གུན༌ ཙོགས༌ ལྡེ༌མོ༌ དང༌ ཛེས༌པོ༌ ཐོང༌ང༌ མེད༌པིན༌།
28 གལ༌ཏེས༌ དཀོན༌མཆོག༌གི༌ དི༌རིང༌ ཡོད༌ཁན༌ ཐོ༌རེ༌ མེའ༌ སྲག༌ག༌ ཕང༌ཅེས༌ཅན༌ནི༌ སྤང༌ཐང༌ངི༌ མེན༌ཏོག༌གུན༌ལ༌ ཏེ༌ཙོགས༌སི༌ ཀོས༌ལག༌ སྐོན༌ ཐུབ༌བད༌ན༌, ཏད༌ཆུང༌ཅན༌གུན༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཏེ༌གུན༌ནི༌ སང༌ ཀོས༌ལག༌ ཀྲག༌པོ༌ སྐོན༌ན༌ མི༌ཛད༌ད༌?"
29 "ཏེ༌བོའེ༌ཕིའ༌ ཏུས༌གྱུན༌ ཁྱོ༌ཞའེ༌ ཅི༌ ཟེན༌ ཡ༌ ཐུང༌ཨིན༌ མ༌སམ༌, ཏེ༌གུན༌ནི༌ ཕིའ༌ ཚེར༌ཁ༌ མ༌ཅོ༌།
30 ཇིག༌རྟེན༌ནི༌ ཞན༌ ཆོས༌ལུག༌གི༌ མི༌གུན༌ ཏེ༌ ཚང༌མའེ༌ སྟིང༌རང༌ནེ༌ བང༌ཏང༌ང༌ནོག༌, ཡང༌ ཁྱོ༌ཞའེ༌ ནམ༌ཁའེ༌ ཡབ༌བི༌, ཁྱོ༌ཞའེ༌ ཏེ༌ཙོགས༌ སྒོས༌དོམ༌གུན༌ ཁྱེན༌ན༌ ཛད༌ད༌ནོག༌།
31 ཨིན༌ནའང༌ ཁྱོ༌ཞ༌གུན༌ དཀོན༌མཆོག༌གི༌ གྱལ༌སྲིད༌དི༌ སྟིང༌རང༌ནེ༌ བང༌ཏོང༌, ཏེ༌ནེ༌ ཁོང༌ངི༌ ཏེ༌ཀ༌ ནན༌ཏེ༌ ཁྱོ༌ཞའེ༌ ཞན༌ སྒོས༌དོམ༌གུན༌ནའང༌ སལ༌ལ༌ ཛད༌ཨིན༌།"
32 "ངའེ༌ ལུག༌ ཁྱུ༌ ཆུ༌ངུན༌, ཇིགས༌ མ༌ཇིགས༌། ཁྱོ༌ཞའེ༌ ནམ༌ཁའེ༌ ཡབ༌ ཁྱོ༌ཞ༌གུན༌ལ༌ ཁོང༌རང༌ངི༌ གྱལ༌སྲིད༌ སལ༌ལ༌ ཐུགས༌ཐད༌ད༌ནོག༌།
33 རང༌ངི༌ ནོར༌གུན༌ ཙོངས༌ཏེ༌ ཉལ༌བ༌ཅན༌གུན༌ལ༌ ཅིན༌བ༌ ཏོང༌། ཏེ༌ཟུག༌ ཅོ༌ན༌ ཁྱོ༌ཞའེ༌ ཁྱོ༌ཞ༌རང༌ངི༌ ཕིའ༌ མ༌ནེ༌ མི༌ཆད༌ཅེས༌སི༌ ཁོ༌མགས༌ དང༌ ནམ༌ཁའེ༌ ནང༌ང༌ མི༌ཚར༌ཅེས༌སི༌ ནོར༌ ཐོབ༌ཨིན༌, ཏེ༌རུ༌ རྐུན༌མ༌ མི༌ཡོང༌ ཡ༌ མུག༌པའེ༌ མི༌ཟའ༌།
34 ཁྱོ༌ཞའེ༌ ནོར༌ ཡོད༌ས༌ ཁྱོ༌ཞའེ༌ སྙིང༌ངའང༌ ཆགས༌ཨིན༌།"
ཤང༌ ཅོ༌ཅེས༌།
12:35 ནེ༌ 48
35 "ཞབ༌སྟོག༌ ཞུ༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཁྱོ༌ཞ༌རང༌ངི༌ འོད༌ སྤར༌ཏེ༌ བོར༌,
36 ཀ༌ཟུག༌ སྤོན༌བོ༌ བག༌སྟོན༌ནི༌ གྲོན༌ནེ༌ ལོག༌ཏེ༌ ལེབ༌ཅེས༌ལ༌ སྲུངས༌ཏེ༌ དུག༌ཁན༌ནི༌ ཡོག༌པོ༌གུན༌ནི༌ ཅོའད༌། སྒོ༌ རྡུང༌ང༌ཅིག༌ ཁོང༌གུན༌ནི༌ གོར༌ མ༌ཅུག༌ག༌ སྤོན༌བོའ༌ སྒོ༌ ཕེས༌།
37 སྤོན༌བོ༌ ཡོང༌ང༌ཅིག༌ སྲུངས༌ཏེ༌ ཉིད༌ མ༌ཏང༌ང༌ ཐོང༌ཁན༌ནི༌ ཡོག༌པོ༌གུན༌ནི༌ཀ༌ ཐད༌པོ༌ ཆེན༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌ ཞབ༌སྟོག༌པའེ༌ ཀོས༌ལག༌ གོན༌ཏེ༌ ཁོང༌གུན༌ ཟན༌ ཟའ༌སའེ༌ ཅོག༌ཙེ༌ དུན༌ལ༌ དུག༌ཅུགས༌ཏེ༌, ཁོང༌གུན༌ལ༌ ཞབ༌སྟོག༌ ཞུ༌ཨིན༌།
38 སྤོན༌བོ༌ ཚན༌ཕེད༌ལ༌ ཡ༌ ནམ༌ལང༌སྐྱིའ༌ ཡོངས༌ཏེའང༌ ཁོང༌གུན༌ ཉིད༌ མ༌ཏང༌ང༌ ཤང༌ ཅོས༌ཏེ༌ ཐོང༌ན༌, ཁོང༌གུན༌ལ༌ སོལ༌རས༌ ཏང༌ཨིན༌།"
39 "ཨིན༌ནའང༌ འི༌བོ༌ ཧ༌གོ༌ཤིག༌, གལ༌ཏེས༌ ཚན༌ལ༌ རྐུན༌མ༌ ཡོང༌ཅེས༌སི༌ ཏུས༌ཚོད༌པོ༌ ཁང༌དག༌ག༌ གྱུས༌ཡོད༌པིན༌ན༌, ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ རྐུན༌མ༌ ཞུགས༌ མི༌ཅུག༌།
40 ཏེ༌བོའེ༌ཕིའ༌ ཁྱོ༌ཞའ༌ ཏུས༌གྱུན༌ གྲལ༌གྲིག༌ དུག༌གོས༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རེ༌ཝ༌ མེད༌དི༌ ཏུས༌ལ༌ མི༌རིགས༌སི༌བུ༌ ཡོང༌སྲིད༌ཅེས༌ ཨིན༌ནོག༌།"
41 པི༌ཏྲར༌རི༌ ཏྲིས༌, "གཙོ༌བོ༌, འི༌ རུངས༌སི༌ སྤེ༌བོ༌ ང༌ཞའེ༌ ཕིའ༌ ཨིན༌ན༌ ཡ༌ མི༌ཚང༌མའེ༌ ཕིའ༌ ཨིན༌?"
42 གཙོ༌བོའེ༌ ཡང༌ རུངས༌ཤིག༌ གྱུད༌ཏེ༌ ལན༌སལས༌, "སྤོན༌བོའེ༌ ཁོ༌རང༌ངི༌ ཁང༌པའེ༌ ལྟ༌སྟོག༌ དང༌ ཞན༌ ཡོག༌པོ༌གུན༌ལ༌ ཏུས༌སི༌ཀ༌ ཞག༌ཏང༌ངི༌ ཁར༌ཇི༌ ཏང༌ཅེས༌སི༌ ཕིའ༌ སྐོས༌ཁན༌ ཨིད༌ཤེས༌ཅན༌ དང༌ ཤེས༌རབས༌ཅན༌ནི༌ ཆག༌ཟོད༌ སུ༌ ཨིན༌ནོག༌?
43 སྤོན༌བོ༌ ལོགས༌ཏེ༌ ཡོང༌ང༌ཅིག༌ ཡོག༌པོ༌བོའེ༌ ཁོའེ༌ སྐོས༌ཁན༌ནི༌ ལས༌པོ༌ ཅོ༌ཨིན༌ ཐོང༌ན༌ ཁོའ༌ སོལ༌རས༌ ཏང༌ཨིན༌།
44 ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌, ཁོ༌རང༌ངི༌ ནོར༌ ཚང༌མ༌ ལྟ༌སྟོག༌ ཅོ༌ཅེས༌སི༌ ཁག༌པོ༌ ཁོའ༌ ཏང༌ཨིན༌།
45 ཨིན༌ནའང༌ གལ༌ཏེས༌ ཡོག༌པོ༌བོའེ༌, ངའེ༌ སྤོན༌བོ༌ ཏུས༌ཡུན༌རིང༌ ལོགས༌ཏེ༌ མི༌ཡོང༌ སམས༌ཏེ༌ ཞན༌ ཡོག༌པོ༌ དང༌ ཡོག༌མོ༌ གུན༌ལ༌ རྡུང༌ཅེས༌ གོ༌ཟུག༌ ཅོས༌ཏེ༌ ཟེན༌ ཆང༌ ཐུང༌ཨིན༌ ར༌རོས༌ན༌,
46 ཁོའེ༌ རེ༌ཝ༌ མི༌ཅོའེ༌ ཞག༌ག༌ ཡང༌ ཁོའ༌ གྱུས༌མེད༌དི༌ ཏུས༌ཚོད༌པོའེ༌ཀ༌ སྤོན༌བོ༌ ཡོངས༌ཏེ༌ ཁོ༌ ཏུམ༌པ༌ཏུམ༌པའེ༌ ནང༌ང༌ སྟུབས༌ཏེ༌ ཏད༌པ༌ མེད༌ཁན༌གུན༌ ཕང༌སའེ༌ ནས༌སའེ༌ ནང༌ང༌ ཕང༌ཨིན༌།"
47 "སྤོན༌བོའེ༌ ཐུགས༌དོད༌པོ༌ གྱུས༌ཡོད༌ཏེའང༌ གྲལ༌གྲིག༌ ཡ༌ ཏེ༌གུན༌ ལག༌ལེན༌ མ༌ཅོ༌ཁན༌ནི༌ ཡོག༌པོ༌གུན༌ལ༌ ཆད༌པ༌ སྲན༌ཏྲེ༌ ཏང༌ཨིན༌།
48 ཨིན༌ནའང༌ སྤོན༌བོའེ༌ ཐུགས༌དོད༌པོ༌ མ༌ཤེས༌ས༌ ཡང༌ ཆད༌པ༌ ཕོག༌ཅེས༌སི༌ ལས༌ ཅོ༌ཁན༌ནི༌ ཡོག༌པོ༌གུན༌ལ༌ ཆད༌པ༌ ཉུ༌ངུན༌ ཕོག༌ཨིན༌། ཁག༌ མང༌ང༌ ཀལ༌ཁན༌གུན༌ནི༌ ཀ༌ནེ༌ ཞབ༌སྟོག༌ མང༌ང༌ ཐོབ༌ཅེས༌སི༌ རེ༌ཝ༌ བོར༌ཨིན༌, ཡང༌ མང༌ང༌ སྟད༌ཁན༌གུན༌ནི༌ ཀ༌ནེ༌ མང༌ང༌ རྩོད༌ཨིན༌།"
ཞི༌དེ༌ མན༌ པོ༌ པུད༌ཅེས༌།
12:49 ནེ༌ 53
49 "ང༌ འི༌ ཇིག༌རྟེན༌པ༌གུན༌ནི༌ སེམས༌སི༌ ནང༌ང༌ མེ༌ སྤར༌ར༌ ཡོངས༌པིན༌, ཡང༌ ངའེ༌ དོད༌པ༌ ནི༌ སྤར༌ ཚར༌ཏེ༌ བར༌ཨིན༌ ཡོད༌ཅེས༌པོ༌ ཨིན༌།
50 ཨིན༌ནའང༌ ངའེ༌ རྡུག༌ངལ༌ལི༌ ཁྲུས༌ཤིག༌ ལེན༌ཅེས༌ ཨིན༌, ཏེ༌བོ༌ དྲན༌དྲ༌ གྲུབ༌གྲུབ༌ ཚག༌པ༌ ངའ༌ སེམས༌ལྡོམ༌ སྲན༌ཏྲེ༌ རག༌།
51 ཁྱོ༌ཞའེ༌ ང༌ ཇིག༌རྟེན༌ནི༌ཀ༌ ཞི༌དེ༌ ཁྱོང༌ང༌ ཡོངས༌ཏེ༌ ཨིན༌ནོག༌ སམ༌མ༌ རག༌ག༌? མན༌, ངའེ༌ ཁྱོ༌ཞའ༌ ཟེར༌རད༌, ངའ༌ པོ༌ པུད༌ད༌ལ༌ ཡོངས༌ཏེ༌ ཨིན༌།
52 ཏ༌ནེ༌ཕར༌ལ༌, སྤེར༌ན༌ ནང༌མི༌ ལྔའེ༌ ནང༌ཚངས༌སི༌ ནང༌ང༌ པོ༌ བུད༌ཨིན༌, སུམ༌བོའེ༌ ཉིས༌སི༌ གྱབ༌གལ༌ ཡ༌ ཉིས༌པོའེ༌ སུམ༌མི༌ གྱབ༌གལ༌ ཅོ༌ཨིན༌,
53 ངའེ༌ཀ༌ ཏད༌པ༌ ཅོ༌ཅེས༌པོའེ༌,
ཨ༌བའེ༌ རང༌ངི༌ བུ༌ཚ༌ ངོ༌ལོག༌ ཡང༌
བུ༌ཚའེ༌ རང༌ངི༌ ཨ༌བའ༌ ངོ༌ལོག༌ ཅོ༌ཨིན༌།
ཨ༌མའེ༌ རང༌ངི༌ བུ༌མོའ༌ ངོ༌ལོག༌ ཡང༌
བུ༌མོའེ༌ རང༌ངི༌ ཨ༌མའ༌ ངོ༌ལོག༌ ཅོ༌ཨིན༌།
བུ༌ཚའེ༌ ཨ༌མའེ༌ བུ༌ཚའེ༌ ན༌མའ༌ ངོ༌ལོག༌ ཡང༌
བུ༌ཚའེ༌ ན༌མའེ༌ རང༌ངི༌ མག༌པའེ༌ ཨ༌མའ༌ ངོ༌ལོག༌ ཅོ༌ཨིན༌།"
སྟགས༌གུན༌ ཧ༌གོ༌ཅེས༌།
12:54 ནེ༌ 59
54 གཙོ༌བོ༌ ཡེ༌ཤུའི༌ མི༌ཚོགས༌ལ༌ མོལས༌, "ཁྱོ༌ཞའེ༌ ནུབ༌ ཆོགས༌ནེ༌ སྲིན༌ ལང༌ང༌ ཐོང༌ང༌ཅིག༌, ཆར༌པ༌ ཏང༌ཅེས༌ ཨིན༌ནོག༌ ཟེར༌དུག༌, ཡང༌ ཆར༌པ༌ ཏང༌དུག༌།
55 ཡང༌ ལྷོ༌ ཆོགས༌ནེ༌ ལུངས༌པོ༌ གྱུག༌ག༌ཅིག༌, ཁྱོ༌ཞའེ༌ ཚད༌ ཡོང༌ཅེས༌ ཨིན༌ནོག༌ ཟེར༌དུག༌, ཡང༌ ཚད༌ ཡོང༌དུག༌།
56 ཝ༌ ཁ༌ཆོས༌པ༌གུན༌, ཁྱོ༌ཞའེ༌ ནམ༌ཁའ༌ དང༌ སའེ༌ཀ༌ བྱུང༌ཁན༌ནི༌ ནམ༌ལའེ༌ སྟགས༌གུན༌ ཤད༌ཉན༌དུག༌, ཨིན༌ནའང༌ ཁྱོ༌ཞ༌གུན༌ནི༌ འི༌ཏུས༌སི༌ སྟགས༌གུན༌ ཅིའ༌ ཤད༌ཉན༌ན༌ མེ༌རག༌?"
57 "དྲང༌པོ༌ ཅི༌ ཨིན༌ ཁྱོ༌ཞ༌རང༌ངི༌ ཐག༌ཅད༌ ཅིའ༌ ཉན༌ན༌ མེ༌རག༌?
58 ཁྱོ༌རང༌ངི༌ ཉད༌གལ༌པ༌ ཉམ༌པོ༌ ཁྲིམས༌པོན༌ནི༌ དུན༌ལ༌ ལེབ༌བི༌ སང༌ སྔུན༌ལ༌ ལམ༌མ༌ ནང༌གྲིག༌ ཅོ༌ཅེས༌སི༌ རྩོན༌གྲུས༌ ཅོས༌, ཏེ༌ མན༌ན༌ ཁོའེ༌ ཁྱོ༌རང༌ ཁྲིམས༌པོན༌ནི༌ དུན༌ལ༌ ཁྱེར༌སྲིད༌ཅེས༌ ཨིན༌ནོག༌, ཡང༌ ཁྲིམས༌པོན༌ནི༌ ཁྲིམས༌ཁུང༌ངི༌ མག༌སྤོན༌ལ༌ སྟད༌ཏེ༌, ཁྱོ༌རང༌ ཙོན༌ཁང༌ང༌ ཀག༌ཨིན༌།
59 ངའེ༌ ཁྱོ༌ཞའ༌ ཟེར༌རད༌, ཁྱོ༌རང༌ ཙོན༌ཁང༌ནེ༌ ཏེ༌ཏེ༌ཚོག༌པ༌ མི༌ཕུད༌ ནམ༌ཚོག༌པ༌ ཁྱོ༌རང༌ངི༌ ཆད༌པའེ༌ པེ༌ནེ༌ ཚང༌མ༌ མི༌ཤལ༌།