11
མོས༌ལམ༌ ཞུ༌ཅེས༌ ལབ༌བ༌ ཛདས༌།
11:1 ནེ༌ 13
1 ཞག༌ཤིག༌ ཡེ༌ཤུའི༌ ནས༌ས༌ཞིག༌གི༌ཀ༌ མོས༌ལམ༌ ཞུའད༌པིན༌, མོས༌ལམ༌ ཞུ༌ ཚར༌ར༌ཅིག༌ ལོབ༌ཕྲུགས༌ ཅིག༌གི༌ ཁོང༌ང༌ ཟེརས༌, "གཙོ༌བོ༌ལེ༌, ང༌ཞའ༌ མོས༌ལམ༌ ཞུ༌ཅེས༌ ལབ༌བ༌ ཛད༌དའང༌ ཀ༌ཟུག༌ ཡོ༌ཧཱ༌ནན༌ནི༌ ཁོ༌རང༌ངི༌ ལོབ༌ཕྲུགས༌གུན༌ལ༌ ལབ༌བ༌ ཛདས༌།"
2 ཡེ༌ཤུའི༌ ཁོང༌གུན༌ལ༌ མོལས༌, "ཁྱོ༌ཞའེ༌ མོས༌ལམ༌ ཞུ༌ ཟ༌ནེ༌ འི༌ཟུག༌ ཟེར༌,
'ཡབ༌ལེ༌, ཉེ༌རང༌ང༌ མི༌ ཐམས༌ཅད༌ནེ༌ རྩི༌ཝ༌ ཐོབ༌ཤིག༌།
ཉེ༌རང༌ངི༌ གྱལ༌སྲིད༌ གྱོགས༌པ༌ ལེབ༌ཤིག༌།
3 ཞག༌ཏང༌ ང༌ཞའ༌ སྒོས༌དོམ༌མི༌ ཁར༌ཇི༌ སལ༌ལ༌ ཛད༌།
4 ང༌ཞའེ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ སལ༌ལ༌ ཛད༌,
ཅིའ༌ཞུ༌ན༌ ང༌ཞའེ༌ གྱབ༌གལ༌ལ༌ སྡིག༌པ༌ ཅོ༌ཁན༌ ཚང༌མ༌ལ༌
ང༌ཞེའང༌ ཤགས༌པ༌ ཏང༌ངད༌།
ཚོད༌ལྟའེ༌ ཏུས༌ལ༌ སྡིག༌པ༌ ཅོ༌ཅེས༌ནེ༌ ང༌ཞའ༌ སྐྱོབ༌བ༌ཛད༌།
5-6 ཏེ༌ནེ༌ ཁོང༌ངི༌ ཁོང༌གུན༌ལ༌ རུང༌ཞིག༌ ཤད༌ད༌ ཛདས༌, "ཁྱོ༌ཞ༌ ཅིག༌, ཁོ༌རང༌ངི༌ ཛ༌འོའེ༌ ཁང༌པ༌ ཚན༌ཕེད༌ལ༌ སོང༌ཏེ༌ ཟེར༌ན༌ 'ཛ༌འོ༌ ཇུ༌ཇུ༌ ང༌ ཏ༌གི༌ སུམ༌ སྐྱིས༌ཏེ༌ ཏོང༌ངའང༌, བེས༌སི༌ ནང༌ང༌ ཡོད༌ཁན༌ནི༌ ངའེ༌ ཛ༌འོ༌ཞིག༌ ཡོངས༌པ༌ ངའ༌ ཁོའ༌ ཟའ༌ལ༌ ཏང༌ཅེས༌ ཅའང༌ མེད༌།'
7 ཏེ༌ནེ༌ ནང༌ཀུག༌ནེ༌ ཟེརས༌, 'ང༌ ནགས༌ མ༌ལྟན༌། སྒོ༌ ཅུག༌ཚར༌ ཡང༌ ང༌ དང༌ ངའེ༌ ཕྲུ༌གུ༌གུན༌ མལ༌ཙའེ༌ ནང༌ང༌ ཞུགས༌ཚར༌། ངའེ༌ ཁྱོ༌རང༌ང༌ རོགས༌ ཅོ༌ཉན༌ཅེས༌ མེ༌རག༌།'
8 ངའེ༌ ཁྱོ༌ཞའ༌ ཟེར༌རད༌, ཛ༌འོ༌ ཨིན༌ཅེས༌པོའེ༌ ཁོའེ༌ ལངས༌ཏེ༌ ཏ༌གི༌ མ༌ཏང༌ང༌, ཁོའེ༌ ཁྲེལ༌ མེད༌པ༌ ཏོང༌ ཟེར༌ཨིན༌ དུགས༌ པ༌སང༌ ཁོ༌ ལངས༌ཏེ༌ ཁོའ༌ སྒོས༌དོམ༌ ཡོད༌ཁན༌བོ༌ ཏང༌ཨིན༌།"
9 "ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, ཞུ༌ཨིན༌ དུག༌ ཁྱོ༌ཞའ༌ སལ༌ལ༌ ཛད༌ཨིན༌, ཙལ༌ཨིན༌ དུག༌ ཁྱོ༌ཞའ༌ ཐོབ༌ཅུག༌ག༌ ཛད༌ཨིན༌, སྒོ༌ རྡུང༌ཨིན༌ དུག༌ ཕེའ༌ ཛད༌ཨིན༌།
10 ཞུ༌ཁན༌ ཚང༌མ༌ལ༌ སལ༌ལ༌ ཛད༌ཨིན༌, ཙལ༌ཁན༌ ཚང༌མ༌ལ༌ ཐོབ༌ཨིན༌, ཡང༌ སྒོ༌ རྡུང༌ཁན༌ ཚང༌མ༌ལ༌ ཕེའ༌ ཛད༌ཨིན༌།"
11 "ཁྱོ༌ཞ༌གུན༌ནི༌ ཕྲོ༌ནེ༌ ཀ༌ ཨ༌བ༌བོའེ༌ རང༌ངི༌ བུ༌ཚའེ༌ ཉ༌ ཏོང༌ ཟེར༌ན༌ རུལ༌ ཏང༌ཨིན༌ན༌?
12 ཡ༌ ཕྲུ༌གུའི༌ ཁྲུལ༌ ཏོང༌ ཟེར༌ན༌ ཁོའ༌ སྡིག༌པ༌རཱ༌ཙེ༌ ཏང༌ཨིན༌ན༌?
13 ཁྱོ༌ཞ༌གུན༌ སྡིག༌ཅན༌ ཨིན༌ཨིན༌ནའང༌ རང༌ངི༌ ཕྲུ༌གུའ༌ ཕན༌ཐོགས༌ཅན༌ ཏང༌ཅེས༌ ཤེས༌སད༌ན༌, ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌བི༌ ཁོང༌ང༌ ཞུ༌ཝ༌ ཞུ༌ཁན༌གུན༌ལ༌ དམ༌པའེ༌ ཐུག༌ཉིད༌ མང༌ང༌ མི༌སལ༌ལ༌?"
ཡེ༌ཤུ༌ དང༌ རྡུད༌དི༌ གོ༌བ༌ བེལ༌ཟེ༌བུལ༌།
11:14 ནེ༌ 28
14 གཙོ༌བོ༌ ཡེ༌ཤུའི༌ མི༌ ཧན༌གྲང༌ཞིག༌ནེ༌ རྡུད༌ ཕིང༌ང༌ ཛདས༌། རྡུད༌པོ༌ བིང༌ང༌ཅིག༌, ཧན༌གྲང༌བོའེ༌ སྤེ༌ར༌ ཏངས༌, ཡང༌ མི༌ཚོགས༌པོ༌ ཧ༌ལས༌།
15 ཨིན༌ནའང༌ ཁོང༌ ཁ༌ཅིག༌གི༌ ཟེརས༌, "བེལ༌ཟེ༌བུལ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།"
16 ཞན༌ ཁ༌ཅིག༌གི༌ ཁོང༌ང༌ ཚོད༌ལྟས༌ཏེ༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེརས༌།
17 ཁོང༌གུན༌ནི༌ སམ༌བ༌ ངན༌པ༌བོ༌ ཡེ༌ཤུའི༌ ཁྱེན༌ཏེ༌ མོལས༌, "གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ མེད༌ཁན༌ ཆེན༌, ཡང༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཏེ༌བོ༌ ཞིག༌ཨིན༌།
18 གལ༌ཏེས༌ ཤེ༌ཏན༌ནི༌ ཁོ༌རང༌ང༌ ནོལ༌ལད༌ན༌, ཏེ༌ནེ༌ ཁོའེ༌ གྱལ༌སྲིད༌པོ༌ ཀ༌ཟུག༌གི༌ ལུས༌ཨིན༌? ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ ཁྱོ༌ཞའེ༌, ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌དུག༌ ཟེར༌ར༌ནོག༌།
19 གལ༌ཏེས༌ ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའ༌ བྲངས༌ཁན༌གུན༌ནི༌ སུ༌ གྱུད༌ཏེ༌ རྡུད༌གུན༌ ཕིང༌ང༌ནོག༌? ཏེ༌བོའེ༌ཕིའ༌ ཁོང༌གུན༌ནི༌ ཁྱོ༌ཞའེ༌ ཟེར༌ཁན༌བོའ༌ སྐྱོན༌རྗོད༌ ཅོ༌ཨིན༌།
20 ཨིན༌ནའང༌ གལ༌ཏེས༌ ངའེ༌ དཀོན༌མཆོག༌གི༌ ཁྱུད༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ཀ༌ ནམ༌ཁའེ༌ གྱལ༌སྲིད༌ ལེབ༌ ཚར༌ཏེ༌ ཨིན༌།
21 མི༌ ཤེད༌ཅན༌ཞིག༌གི༌ ལག༌ཆ༌ ཁུར༌ཏེ༌ རང༌ངི༌ ཁར༌ སྲུང༌ན༌ ཁོའེ༌ ནོར༌གུན༌ རྐུ༌ མི༌ཉན༌།
22 ཨིན༌ནའང༌ ཁོའེ༌ སང༌ ཤེད༌ ཆེའ༌ཞིག༌གི༌ ཁོའ༌ ནོལ༌ཏེ༌ ཕམ༌ཀལ༌ཏེ༌ ཁོ༌ སྐྱོབ༌ཅེས༌ལ༌ ལོ༌ཁྱེལ༌ ཡོད༌ཁན༌ནི༌ ལག༌ཆ༌གུན༌ ཀོགས༌ཏེ༌ ཁོའེ༌ ནོར༌གུན༌ ཁྱེར༌ཨིན༌།"
23 "ངའེ༌ ཆོགས༌ལ༌ མན༌ཁན༌གུན༌ནི༌ ངའ༌ གྱབ༌གལ༌ ཅོའ༌ནོག༌, ཡང༌ ང༌ ཉམ༌པོ༌ ལས༌ ཅོས༌ཏེ༌ བྲས༌བུ༌ མ༌ལྡུམ༌ཁན༌གུན༌ནི༌, ངའེ༌ ལས༌སི༌ བྲས༌བུ༌ ཡན༌ཅུག༌ག༌ནོག༌།
24 མི༌ཞིག༌གི༌ ནང༌ནེ༌ གོང༌པོ༌ བིང༌ཏེ༌ སྟིང༌ནེ༌, གོང༌པོའེ༌ ཆུ༌ མེད༌ས༌ རི༌སྟོང༌ངི༌ ནང༌ང༌ ཁོར༌ཨིན༌ ངལ༌ཚོས༌སེ༌ ནས༌ས༌ ཙལ༌ཏེའང༌ མ༌ཐོབ༌ པ༌སང༌, ཁོའེ༌ ཁོ༌རང༌ང༌ ཟེར༌ར༌ནོག༌, 'ང༌ བིང༌ཏེ༌ ཡོང༌ཁན༌ནི༌ ཏེན༌ན༌ མིའི༌ ནང༌ང༌ ལོགས༌ཏེ༌ ཆེན༌།'
25 ཏེ༌རུ༌ ལེབ༌བ༌ཅིག༌, ཏེ༌ ནས༌ས༌བོ༌ ལག༌མོ༌ ལྡུས༌ཏེ༌ ཅི༌ཚང༌མ༌ རང༌རང༌ངི༌ མལ༌ལ༌ བོར༌ཏེ༌ ཐོང༌།
26 ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ སང༌ མང༌ང༌ ངན༌པ༌ ཞན༌ གོང༌པོ༌ རྡུན༌ ཁྲིད༌ཏེ༌ ཁྱོངས༌ ཡང༌ ཏེན༌ན༌ ནས༌སའེ༌ ནང༌ང༌ དུགས༌། ཏེ༌ནེ༌ ཏེ༌ མི༌བོའེ༌ ནས༌ལུག༌པོ༌ སྔུན༌ནི༌ སང༌ ཐུའ༌ སོང༌།"
27 ཡེ༌ཤུའི༌ འི༌ ཞལ༌ཏ༌གུན༌ མོལ༌ཨིན༌ ཡོད༌ ཟ༌ནེ༌ མི༌ཚོགས༌སི༌ ཕྲོ༌ནེ༌ བུ༌མོ༌ཅིག༌གི༌ ཀུ༌ཅོ༌ ཏང༌ཨིན༌ ཟེརས༌, "ཉེ༌རང༌ ལྟམས༌ཁན༌ ཡང༌ ཉེ༌རང༌ང༌ པི༌བི༌ ཏང༌ཁན༌ནི༌ ཨ༌མ༌ ཅིན༌ལབས༌ཅན༌ ཨིན༌།"
28 ཡེ༌ཤུའི༌ ལན༌སལས༌, "དཀོན༌མཆོག༌གི༌ བཀའ༌ ཉན༌ཏེ༌ ཏེ༌གུན༌ནི༌ཀ༌ ལག༌ལེན༌ ཅོ༌ཁན༌གུན༌ མང༌ང༌ ཅིན༌ལབས༌ཅན༌ ཨིན༌།"
ཡེ༌ཤུའ༌ སྟགས༌ ལྟན༌ཅེས༌ལ༌ ཟེརས༌།
11:29 ནེ༌ 32
29 མི༌ཚོགས༌པོ༌ གྱས༌ཨིན༌ སོང༌པ༌ ཡེ༌ཤུའི༌ མོལས༌, "འི༌ མི༌རབས༌ ངན༌པའེ༌ ངའ༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌, ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཁོང༌གུན༌ལ༌, ཡང༌སྟགས༌ཤིག༌ མི༌ལྟན༌།
30 ལུང༌སྟོན༌པ༌ ཡོ༌ནཱ༌ བྱུང༌ཁན༌བོ༌ ནི༌ནེ༌ཝ༌པ༌གུན༌ནི༌ ཕིའ༌ དཀོན༌མཆོག༌གི༌ ཁོ༌ ཀལ༌ལ༌ ཛད༌ཁན༌ནི༌ སྟགས༌ཤིག༌ ཨིན༌པིན༌, ཏེན༌ན༌ ཙོགས༌ལ༌ མི༌རིགས༌སི༌བུ༌ ཉམ༌པོ༌ བྱུང༌ཅེས༌ཅན༌བོའང༌ འི༌ མི༌རབས༌སི༌ ཕིའ༌ སྟགས༌ཤིག༌ ཨིན༌།"
31 "ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ལྷོ༌ ཆོགས༌སི༌ གྱལ༌མོའེ༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོ༌ གྱལ༌པོ༌ སོ༌ལོ༌མོན༌ནི༌ ཤེས༌རབས༌སི༌ སྤེ༌ར༌གུན༌ ཉན༌ན༌ལ༌ ས༌ཆ༌ མ༌ ཐག༌རིང༌ནེ༌ ཡོངས༌, ལྟོས༌སའང༌ སོ༌ལོ༌མོན༌ནི༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།
32 དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ནི༌ནེ༌ཝ༌པ༌གུན༌ནིའང༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ནཱའེ༌ ཆོས༌ཤད༌ཁན༌བོ༌ ཉན༌ཏེ༌, གྱོད༌པ༌ ཅོས༌, ལྟོས༌སའང༌ ཡོ༌ནཱ༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།"
དཀོན༌མཆོག༌གི༌ འོད༌།
11:33 ནེ༌ 36
33 "སུ༌ཞིག༌གིའང༌ འོད༌ ཏུགས༌ཏེ༌ སྦས༌ཏེ༌ ཡ༌ གོར༌མོའེ༌ ཡོག༌ག༌ མ༌བོར༌ར༌, ནང༌ང༌ ཡོང༌ཁན༌ ཚང༌མའེ༌ ཐོང༌ཅེས༌ལ༌ འོད༌སྟགས༌སི༌ཀ༌ བོར༌ཨིན༌།"
34 "ཁྱོ༌ཞའེ༌ མིག༌ ནི༌ ཟུགས༌སི༌ འོད༌པོ༌ ཨིན༌། མིག༌པོ༌ ཁམ༌ཟང༌ ཡོད༌ན༌, ཁྱོ༌ཞའེ༌ ལུས༌ གང༌པོ༌ འོད༌དི༌ གང༌ཨིན༌, ཨིན༌ནའང༌ མིག༌པོ༌ ཁམ༌ཟང༌ མེད༌ན༌, ཁྱོ༌ཞའེ༌ ལུས༌ གང༌པོ༌ མུན༌གྲིག༌གི༌ གང༌ཨིན༌།
35 ཏན༌ཏན༌ ཅོ༌ཤིག༌, ཁྱོ༌ཞ༌རང༌ངི༌ ནང༌ང༌ འོད༌ ཡོད༌ སམ༌ཁན༌བོ༌ ངོས༌པོའ༌ མུན༌གྲིག༌ཏ༌ མན༌ན༌?
36 ཏ༌ གལ༌ཏེས༌ ཁྱོ༌ཞའེ༌ ཟུགས༌པོ༌ གང༌པོ༌ འོད༌དི༌ གངས༌ཏེ༌, ཁག༌ཅིག༌གའང༌ མུན༌གྲིག༌གི༌ ནང༌ང༌ མ༌ལུས༌ན༌, ཏེ༌ནེ༌ ཁྱོ༌ཞའེ༌ཀ༌ འོད༌ ཀྲག༌པོ༌ ཕོག༌ཁན༌ ཙོགས༌ལ༌ ཁྱོ༌ཞའེ༌ ཟུགས༌པོ༌ གང༌པོ༌ ལྡང༌ཤན༌ གྱུར༌ཨིན༌།
ཡེ༌ཤུའི༌ ཆོས༌སི༌ འུ༌སྐྱོང༌གུན༌ལ༌ སྐྱོན༌རྗོད༌ ཅོའ༌ ཛདས༌།
11:37 ནེ༌ 54
37 གཙོ༌བོ༌ ཡེ༌ཤུའི༌ ཞལ༌ཏའ༌ མོལ༌ ཚར༌ར༌ཅིག༌, ཕ༌རུ༌ཤི༌པ༌ཞིག༌གི༌ ཁོང༌ང༌ ཁོ༌རང༌ངི༌ ཁང༌པ༌ དོན༌ཏང༌ང༌ སྐྱོད༌ ཞུས༌པ༌ ཡེ༌ཤུ༌ སྐྱོད༌ཏེ༌ ཅོག༌ཙེ༌ དུན༌ལ༌ ཞུགས༌།
38 ཕ༌མེས༌པོའེ༌ ལུག༌སྲོལ༌ ནང༌ཞིན༌ ཆག༌ མ༌སིལ༌ལ༌ ཁོང༌ དོན༌ཏང༌ དོན༌ན༌ ཞུག༌ཅེས༌པོ༌ ཐོང༌ཏེ༌ ཕ༌རུ༌ཤི༌པ༌ ཧ༌ལས༌།
39 ཏེ༌ནེ༌ གཙོ༌བོའེ༌ ཁོའ༌ མོལས༌, "ཁྱོ༌ཞའ༌ ཕ༌རུ༌ཤི༌པ༌གུན༌ནི༌ ཀོ༌རེ༌ དང༌ ཐལ༌ལི༌ ཕི༌ལོག༌པོ༌ ལག༌མོ༌ ཅོ༌རུག༌, ཨིན༌ནའང༌ ཁྱོ༌ཞའེ༌ ནང༌ཀུག༌པོ༌ ནབ༌སེམས༌ དང༌ རང༌དོད༌དི༌ གངས༌ཏེ༌ དུག༌།
40 ཁྱོ༌ཞའ༌ སམ༌བ༌ མེད༌ཁན༌གུན༌ ཕི༌ལོག༌ ཛད༌ཁན༌བོའེ༌ ནང༌ཀུག༌པོའང༌ ཛད༌ཏེ༌ མ༌ནོག༌ག༌?
41 ཁྱོ༌ཞའེ༌ སྙིང༌ནེ༌ སྒོས༌དོམ༌ ཡོད༌ཁན༌གུན༌ལ༌ ཅིན༌བ༌ ཏོང༌, ཏེ༌ནེ༌ ཁྱོ༌ཞའ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ནེ༌ ལག༌མོ༌ ཐེའ༌ ཛད༌ཨིན༌།"
42 "ཕ༌རུ༌ཤི༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞ༌གུན༌ནི༌ མ༌ས༌ལའེ༌ ཚས༌སི༌ ཀ༌ནེ༌ ཡོང༌གོ༌ ཆུང༌ཤོག༌གི༌ ནང༌ནེའང༌ རྕུ༌ཁག༌བོ༌ ཕུལ༌དུག༌པ༌, ཨིན༌ནའང༌ འོས༌པའེ༌ ཁྲིམས༌ཅད༌ དང༌ དཀོན༌མཆོག༌ག༌ ཡ༌ཤ༌ ཅོ༌ཅེས༌ གུན༌ལ༌ སྣང༌ང༌ བོར༌ར༌ མི༌དུག༌། ཁྱོ༌ཞའེ༌ ཏེ༌ བཀའ༌ཁྲིམས༌གུན༌ལ༌ སྣང༌ང༌ ཅོ༌ཅེས༌ མ༌ཚད༌ ཡོང༌གོའེ༌ རྕུ༌ཁག༌པོའང༌ དཀོན༌མཆོག༌ག༌ ཕུལ༌གོས༌།"
43 ཡེ༌ཤུའི༌ མོལས༌, "ཕ༌རུ༌ཤི༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ དུ༌ཁང༌ངི༌ ནང༌ང༌ རྩི༌ཝ༌ཅན༌ནི༌ ནས༌ས༌ ཙལ༌ལ༌ནོག༌, ཡང༌ ཁྲོམས༌སི༌ ནང༌ང༌ མི༌གུན༌ནི༌ ཀ༌ནེ༌ རྩི༌ཝ༌ ཐོབ༌ཅེས༌ལ༌ ཐད༌ད༌ནོག༌།
44 ཁྱོ༌ཞ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཁྱོ༌ཞ༌གུན༌ སྟགས༌ མེད༌ཁན༌ནི༌ རོམ༌ཁང༌ ཙོགས༌ ཨིན༌ནོག༌, ཏེ༌ ནས༌ས༌ མ༌ཤེས༌ས༌ ཏེ༌ཀ༌ གྲུལ༌ པ༌སང༌ མི༌གུན༌ ཚི༌ཏུ༌ གྱུར༌ར༌ནོག༌།"
45 ཆོས༌ཁྲིམས༌ལ༌ ཁས༌པ༌གུན༌ནི༌ ཕྲོ༌ནེ༌ཅིག༌གི༌ ཡེ༌ཤུའ༌ ཟེརས༌, "ལོབ༌པོན༌ལེ༌, འི༌ཟུག༌ མོལ༌ཏེ༌ ཉེ༌རང༌ངི༌ ང༌ཞའང༌ ཁྲེལ༌བ༌ ཅོས༌།"
46 ཡེ༌ཤུའི༌ ལན༌སལས༌, "ཆོས༌ཁྲིམས༌ལ༌ ཁས༌པ༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཁྱོ༌ཞ༌གུན༌ནི༌ ཁུར༌ མི༌ཉན༌ཅེས༌སི༌ ཁྲིམས༌སི༌ ཁུ༌རུ༌ ལྕིན༌ཏྲེ༌ མི༌གུན༌ལ༌ ཀལ༌ལ༌ནོག༌, ཨིན༌ནའང༌ ཡ༌ཏོ༌ ཅོ༌ཅེས༌ལ༌ ཁོ༌རང༌གུན༌ནི༌ ཛི༌གུའང༌ རྩེའ༌ ཐད༌ད༌ མ༌ནོག༌།"
47 ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ ལུང༌སྟོན༌པ༌གུན༌ནི༌ སྤུར༌ཁང༌ རྩིག༌དུག༌ ཀ༌གུན༌ ཁྱོ༌ཞའེ༌ ཕ༌མེས༌པོ༌གུན༌ནི༌ སདས༌།
48 ཁྱོ༌ཞའེ༌ ཁྱོ༌ཞ༌རང༌ངི༌ ཕ༌མེས༌པོ༌གུན༌ནི༌ ཅོས༌ཁན༌གུན༌ལ༌ ཁའ༌ཆམས༌ཏེ༌ སྤང༌པོ༌ ཏང༌དུག༌ ཅིའ༌ཟེར༌ན༌ ཁོང༌གུན༌ནི༌ ལུང༌སྟོན༌པ༌གུན༌ སདས༌ ཡང༌ ཁྱོ༌ཞའེ༌ ཁོང༌གུན༌ནི༌ སྤུར༌ཁང༌ རྩིགས༌།
49 ཏེ༌བོའེ༌ ཞས༌ཏེ༌ དཀོན༌མཆོག༌གི༌ ཤེས༌རབས༌སི༌ ནང༌ང༌ ཁྱོ༌ཞའེ༌ སྐོར༌ལ༌ མོལས༌, 'ངའེ༌ ཁོང༌གུན༌ནི༌ཀ༌ ལུང༌སྟོན༌པ༌གུན༌ དང༌ སྐུ༌ཚབས༌གུན༌ ཀལ༌ཨིན༌, ཁོང༌གུན༌ནི༌ ཁ༌ཅིག༌ སད༌ཨིན༌ ཡང༌ ཁ༌ཅིག༌ག༌ ནགས༌བར༌དོ༌ ལྟན༌ཨིན༌།'
50 ཏེ༌བོའེ༌ཕིའ༌ ཇིག༌རྟེན༌ ཆགས༌པ༌ནེ༌ ཕར༌ལ༌ ལུང༌སྟོན༌པ༌ ཚང༌མའེ༌ སྲོག༌ ལེན༌ཁན༌ནི༌ ཉད༌གལ༌བོ༌ འིན༌ན༌ མི༌རབས༌པོའེ༌ཀ༌ ཕོག༌ཨིན༌,
51 ཨ༌བེལ༌ སད༌ཁན༌ནེ༌ ཏངས༌ཏེ༌ ཆོད༌ཁང༌ དང༌ ཆོད༌ཁྲིའི༌ པར༌ལ༌ སད༌ཁན༌ནི༌ བ༌རག༌ཡཱའི༌ བུ༌ཚ༌ ཟ༌ཀར༌ཡཱའེ༌ ཚག༌པ༌། ངའེ༌ དེན༌བ༌ ཟེར༌རད༌, ཏེ༌ བྱུང༌ཁན༌ ཚང༌མའེ༌ ཆད༌པ༌བོ༌ འི༌ མི༌རབས༌པོའེ༌ཀ༌ ཕོག༌ཨིན༌།"
52 "ཆོས༌ཁྲིམས༌ལ༌ ཁས༌པ༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ དཀོན༌མཆོག༌ ཤེ༌ཤེས༌སི༌ ལམ༌བོ༌ སྦས༌ཏེ༌ བོར༌དུག༌, ཁྱོ༌ཞ༌རང༌གུན༌ ཏེ༌ནང༌ང༌ ཆ༌ མི༌དུག༌ མ༌ཚད༌ ཏེ༌ནང༌ང༌ ཆེན༌ ཡོད༌ཁན༌གུན༌ལ༌ གག༌སྐྱིལ༌ ཏང༌དུག༌།"
53-54 ཡེ༌ཤུ༌ ཏེ༌ཀ༌ནེ༌ སྐྱོད༌ ཟ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཚང༌མའ༌ སྲོ༌ ཡོངས༌ པ༌སང༌ ཁོང༌ང༌ ཏྲི༌ཝ༌ མང༌པོ༌ ཏྲིས༌ཏེ༌ ཁོང༌ ཁད༌ཅུག༌ཅེས༌སི༌ རྩོན༌གྲུས༌ ཅོས༌།