9
ཡེ༌ཤུའི༌ ཞ༌ར༌ཞིག༌ ཕན༌ཅུག༌ག༌ ཛདས༌།
9:1 ནེ༌ 12
1 གཙོ༌བོ༌ ཡེ༌ཤུ༌ ལམ༌ནེ༌ སྐྱོད༌ ཟ༌ནེ༌ ཁོང༌ངི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌ཞིག༌ ཟིགས༌།
2 ཁོང༌ངི༌ ལོབ༌ཕྲུགས༌གུན༌ནི༌ ཁོང༌ང༌ ཏྲིས༌, "ལོབ༌པོན༌ལེ༌, སུའི༌ སྡིག༌པའེ༌ ཞས༌ཏེ༌ ཁོ༌ ཞ༌ར༌ སྐྱེས༌ཏེ༌ ཨིན༌ནོག༌, ཁོ༌རང༌ངི༌ ཡ༌ ཁོའེ༌ ཕ༌མ༌གུན༌ནི༌?"
3 ཡེ༌ཤུའི༌ ཁོང༌གུན༌ལ༌ མོལས༌, "ཁོའེ༌ ཡ༌ ཁོའེ༌ ཕ༌མ༌གུན༌ནི༌ སྡིག༌པའེ༌ ཞས༌ཏེ༌ མ༌ནོག༌, ཨིན༌ནའང༌ དཀོན༌མཆོག༌གི༌ ཆག༌ལས༌གུན༌ ཁོའེ༌ མི༌ཚེ༌ ནང༌ང༌ སྔོན༌ ཅུག༌ག༌ ཛད༌ཅེས༌སི༌ ཕིའ༌ ཁོ༌ ཞ༌ར༌ སྐྱེས༌ཏེ༌ ཨིན༌ནོག༌།
4 ཉི༌མའེ༌ འོད༌པོ༌ ཡོད༌ ཟ༌ནེ༌ ང༌དང༌གུན༌ནི༌ ང༌ ཀལ༌ལ༌ ཛད༌ཁན༌ནི༌ ཆག༌ལས༌གུན༌ ཅོ༌གོས༌། ཚན༌ ལེབ༌ཨིན༌ ནམ༌ སུའིང༌ ལས༌ ཅོ༌ མི༌ཉན༌།
5 ནམ༌ཚོག༌པ༌ ང༌ ཇིག༌རྟེན༌ནི༌ ནང༌ང༌ ཡོད༌ ང༌ ཇིག༌རྟེན༌པ༌གུན༌ནི༌ ཕིའ༌ འོད༌ ཨིན༌།"
6 ཏེ༌ཟུག༌ མོལ༌ཏེ༌ སྟིང༌ནེ༌ ཡེ༌ཤུའི༌ སའེ༌ཀ༌ ཐུ༌ ཕང༌ང༌ ཛདས༌, ཡང༌ ཏེ༌བོའ༌ ཀ༌ལག༌ ཅོའ༌ ཛད༌ཏེ༌ ཞ༌ར༌བོའེ༌ མིག༌ག༌ སྐུའ༌ ཛདས༌།
7 ཁོང༌ངི༌ ཁོའ༌ མོལས༌, "སོང༌ཏེ༌ ཁྱོ༌རང༌ངི༌ མིག༌ སི༌ལོམ༌མི༌ ཟིང༌ངི༌ ནང༌ང༌ ཁྲུས༌" ༼སི༌ལོམ༌མི༌ ཏོན༌ ནི༌ ལམ༌ ཅུག༌ཅེས༌ལ༌ ཟེར༌ར༌ནོག༌༽། ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ མིག༌ ཟིང༌ངི༌ ནང༌ང༌ ཁྲུས༌ ཡང༌ ཁོའ༌ མིག༌ནེ༌ ཐོང༌ཨིན༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌།
8 ཞ༌ར༌བོའེ༌ ཁྱིམ༌ཚེས༌གུན༌ དང༌ སྔུན༌ལ༌ ཁོ༌ ཞ༌ར༌ ལྩང༌ཨིན༌ ཐོང༌ཁན༌གུན༌ནི༌ ཅིག༌ དང༌ ཅིག༌ག༌ ཏྲིས༌, "ཁོ༌ ལམ༌མི༌ ཐའ༌མ༌ དུགས༌ཏེ༌ ལྩང༌ཁན༌ནི༌ མི༌བོ༌ མ༌ནོག༌ག༌?"
9 ཁ༌ཅིག༌གི༌, "ཏེན༌ན༌བོ༌ ཨིན༌ནོག༌" ཡང༌ ཞན༌གུན༌ནི༌, "མ༌ནོག༌, ཁོ༌ ཏེ༌ མི༌བོ༌ ཙོགས༌ཤིག༌ ཐོང༌དུག༌" ཟེརས༌།
ཨིན༌ནའང༌ ཏེ༌ མི༌བོའེ༌ འུ༌ཙུག༌ ཏང༌ཨིན༌ ཟེརས༌, "ང༌ ཏེན༌ན༌ ཞ༌ར༌བོ༌ ཨིན༌།"
10 ཁོང༌གུན༌ནི༌ ཏྲིས༌, "ཏེ༌ནེ༌ ཁྱོ༌རང༌ངི༌ མིག༌ ཀ༌ཟུག༌གི༌ ཕན༌?"
11 ཁོའེ༌ ལན༌ཏངས༌, "ཡེ༌ཤུ༌ ཟེར༌ཁན༌ནི༌ མི༌བོའེ༌ ཀ༌ལག༌ ཅོས༌ཏེ༌ ངའེ༌ མིག༌གི༌ཀ༌ སྐུའ༌ ཛད༌ཏེ༌ ངའ༌ སོང༌ཏེ༌ སི༌ལོམ༌མི༌ ཟིང༌ངི༌ ནང༌ང༌ མིག༌པོ༌ ཁྲུ༌ཅེས༌ལ༌ མོལས༌། ཏེ༌ནེ༌ ང༌ སོང༌ཏེ༌ མིག༌ ཟིང༌ངི༌ ནང༌ང༌ ཁྲུའ༌ཅིག༌ ངའ༌ མིག༌ནེ༌ ཐོང༌།"
12 ཁོང༌གུན༌ནི༌ ཏྲིས༌, "ཡེ༌ཤུ༌ ཀ༌ནེ༌ དུག༌?"
ཁོའེ༌ ཟེརས༌, "ང༌ གྱུས༌མེད༌།"
ཕ༌རུ༌ཤི༌པ༌གུན༌ནི༌ རྩར༌ཅོད༌ ཏངས༌།
9:13 ནེ༌ 34
13 ཏེ༌ནེ༌ ཁོང༌གུན༌ནི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌བོ༌ ཕ༌རུ༌ཤི༌པ༌གུན༌ནི༌ཀ༌ ཁྱོངས༌།
14 གཙོ༌བོ༌ ཡེ༌ཤུའི༌ ཀ༌ལག༌ ཅོའ༌ ཛད༌ཏེ༌ ཞ༌ར༌བོའེ༌ མིག༌ ཕན༌ཅུག༌ག༌ ཛད༌ཁན༌ནི༌ ཞག༌པོ༌ ཤབ༌བད༌དི༌ ངལ༌ཚོའེ༌ ཞག༌ ཨིན༌པིན༌།
15 ཏེན༌ན༌བོའེ༌ཕིའ༌ ཕ༌རུ༌ཤི༌པ༌གུན༌ནིའང༌ ཁོའ༌ ཏྲིས༌, "ཁྱོ༌རང༌ང༌ ཀ༌ཟུག༌གི༌ ཐོང༌ཐུབ༌།" ཁོའེ༌ ལན༌ཏངས༌, "ཡེ༌ཤུའི༌ ངའེ༌ མིག༌གི༌ཀ༌ ཀ༌ལག༌ སྐུའ༌ ཛདས༌ ཡང༌ ངའེ༌ ཁྲུའ༌ཅིག༌ ང༌ མིག༌ནེ༌ ཐོང༌།"
16 ཕ༌རུ༌ཤི༌པ༌ ཁ༌ཅིག༌གི༌ ཟེརས༌, "ཡེ༌ཤུ༌ ཟེར༌ཁན༌ནི༌ མི༌བོ༌ ནི༌ དཀོན༌མཆོག༌གི༌ ཆོགས༌ནེ༌ མ༌ནོག༌ ཅིའ༌ཟེར༌ན༌ ཁོའེ༌ ཤབ༌བད༌དི༌ ཞག༌གི༌ ཁྲིམས༌གུན༌ མ༌སྲུངས༌།"
ཞན༌ ཁ༌ཅིག༌གི༌ ཟེརས༌, "སྡིག༌ཅན༌ཞིག༌ག༌ འི༌ཙོགས༌སི༌ ལྟས༌གུན༌ ཀ༌ཟུག༌གི༌ ལྟན༌ ཉན༌ཨིན༌?" ཏེ༌བོའེ༌ཕིའ༌ ཁོང༌གུན༌ནི༌ ནང༌ང༌ ཁག༌ བུད༌།
17 ཏེ༌ནེ༌ ཁོང༌གུན༌ནི༌ ཞ༌ར༌བོའ༌ ཡང༌སྐྱར༌ ཏྲིས༌, "ཁྱོ༌རང༌ངི༌ མིག༌ ཕན༌ཅུག༌ཁན༌ནི༌ མི༌བོའེ༌ སྐོར༌ལ༌ ཁྱོ༌རང༌ངི༌ ཅི༌ སམ༌བ༌ ཨིན༌།"
ཁོའེ༌ ལན༌ཏངས༌, "ཏན༌ཏན༌ ཁོང༌ ལུང༌སྟོན༌པ༌ཞིག༌ ཨིན༌ནོག༌།"
18 ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ འི༌ མི༌བོ༌ ཞ༌ར༌ ཡོད༌ཁན༌ ཡང༌ དག༌ས༌ ཐོང༌ ཟེར༌ཁན༌བོ༌ ཏ༌རུང༌ངའང༌ དེན༌ མ༌ཤེས༌པ༌ ཁོའེ༌ ཕ༌མ༌གུན༌ བོད༌ཏེ༌ ཁྱོངས༌།
19 ཁོང༌གུན༌ནི༌ ཁོའེ༌ ཕ༌མ༌གུན༌ལ༌ ཏྲིས༌, "འི༌ མི༌བོ༌ ཁྱོ༌ཞའེ༌ བུ༌ཚ༌ ཨིན༌ན༌? ཅི༌ ཁོ༌ ཞ༌ར༌ སྐྱེས༌ས༌? ཏེ༌ནེ༌ ཁོའ༌ དག༌ས༌ ཀ༌ཟུག༌ག༌ ཐོང༌ཏེ༌ ཨིན༌ནོག༌?"
20 ཕ༌མ༌གུན༌ནི༌ ལན༌ཏངས༌, "ཁོ༌ ང༌ཞའེ༌ བུ༌ཚ༌ ཨིན༌ ཡང༌ ཁོ༌ སྐེ༌ ཟ༌ནེ༌ ཞ༌ར༌ ཡོད༌པིན༌།
21 ཨིན༌ནའང༌ ཁོའ༌ ཀ༌ཟུག༌གི༌ དག༌ས༌ ཐོང༌ངད༌ ཡང༌ སུའི༌ ཁོའེ༌ མིག༌ ཕན༌ཅུགས༌ ང༌ཞའ༌ ཅའང༌ གྱུས༌མེད༌, ཁོ༌རང༌ང༌ ཏྲིའ༌ ཛད༌། ཁོ༌ ལྡན༌ཁན༌ཞིག༌ ཨིན༌པ༌ ཁོའེ༌ ཉེ༌ཞའེ༌ ཏྲི༌ཝ༌གུན༌ལ༌ ལན༌ ཏང༌ཉན༌ན༌ནོག༌།"
22 ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཇིགས༌ཤེས༌པའེ༌, ཁོའེ༌ ཕ༌མ༌གུན༌ནི༌ ཏེ༌ཟུག༌ ཟེརས༌ ཅིའ༌ཟེར༌ན༌ འུ༌སྐྱོང༌གུན༌ནི༌, ཡེ༌ཤུའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ནོག༌ ཟེར༌ཁན༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ཨིན༌ ཟེར༌ཏེ༌ ཐག༌ཅད༌ཏེ༌ ཨིན༌པིན༌།
23 ཏེན༌ན༌ གྱུན༌ཚན༌བོའེ༌ ཕིའ༌ ཁོའེ༌ ཕ༌མ༌གུན༌ནི༌ ཟེརས༌, "ཁོ༌ ལྡན༌ཁན༌ཞིག༌ ཨིན༌ནོག༌ ཁོ༌རང༌ང༌ ཏྲིའ༌ ཛད༌།"
24 འུ༌སྐྱོང༌གུན༌ནི༌ སྔུན༌ལ༌ ཞ༌ར༌ ཡོད༌ཁན༌ནི༌ མི༌བོའ༌ ལན༌ ཉིས༌པ༌ བོད༌ཏེ༌ ཏྲིས༌, "དཀོན༌མཆོག༌ག༌ ཇིགས༌ཏེ༌ དྲང༌པོ༌ ཟེར༌། ང༌ཞའ༌ གྱུས༌ཡོད༌ ཡེ༌ཤུ༌ ཟེར༌ཁན༌ནི༌ མི༌བོ༌ སྡིག༌ཅན༌ ཨིན༌ནོག༌།"
25 ཁོའེ༌ ལན༌ཏངས༌, "ཁོང༌ སྡིག༌ཅན༌ ཨིན༌ན༌ མན༌ ང༌ གྱུས༌མེད༌, ཨིན༌ནའང༌ སྤེ༌ར༌ ཅིག༌ ང༌ ཏན༌ཏན༌ ཤེས༌སད༌ ང༌ སྔུན༌ལ༌ ཞ༌ར༌ ཨིན༌པིན༌ དག༌ས༌ ང༌ ཐོང༌ངད༌།"
26 ཁོང༌གུན༌ནི༌ ཁོའ༌ ཡང༌སྐྱར༌ ཏྲིས༌, "ཁོའེ༌ ཁྱོ༌རང༌ང༌ ཅི༌ ཅོས༌? ཁྱོ༌རང༌ངི༌ མིག༌པོ༌ ཁོའེ༌ ཀ༌ཟུག༌ག༌ ཕན༌ཅུགས༌?"
27 ཁོའེ༌ ཟེརས༌, "ངའེ༌ ཁྱོ༌ཞ༌གུན༌ལ༌ སྔུན༌ལ༌ ཟེར༌པིན༌, ཨིན༌ནའང༌ ཁྱོ༌ཞ༌གུན༌ནི༌ ཉན༌ན༌ མི༌དུག༌། ཏ༌ ཏེན༌ན༌ སྤེ༌ར༌བོ༌ ཡང༌སྐྱར༌ ཉན༌ཉིན༌ རག༌ག༌? ཅི༌ ཁྱོ༌ཞ༌གུན༌ནའང༌ ཁོང༌ངི༌ ལོབ༌ཕྲུགས༌ གྱུར༌ཉིན༌ རག༌ག༌?"
28 ཏེ༌ནེ༌ འུ༌སྐྱོང༌གུན༌ནི༌ ཁོའ༌ ཁྲེལ༌བ༌ ཅོ༌ཨིན༌ ཟེརས༌, "ཁྱོ༌རང༌ ཁོའེ༌ ལོབ༌ཕྲུགས༌ ཨིན༌ནོག༌། ང༌ཞའ༌ ནི༌ མོ༌ཟེས༌སི༌ ལོབ༌ཕྲུགས༌ ཨིན༌།
29 དཀོན༌མཆོག༌གི༌ མོ༌ཟེས༌ ཉམ༌པོ༌ ཞལ༌ཏ༌ སལ༌ཏེ༌ ཨིན༌ཁན༌བོ༌ ང༌ཞའ༌ ཤེས༌སད༌, ཨིན༌ནའང༌ འི༌ མི༌བོ༌ ཀ༌ནེ༌ ཡོངས༌ཏེ༌ ཨིན༌ ང༌ཞའ༌ ཅའང༌ གྱུས༌མེད༌།"
30 ཁོའེ༌ ལན༌ཏངས༌, "འི༌བོ༌ མ༌ ཡམ༌ཚན༌ རག༌། ཁྱོ༌ཞ༌གུན༌ནི༌ ཁོང༌ ཀ༌ནེ༌ ཡོངས༌ཏེ༌ ཨིན༌ ཤེས༌ས༌ མེད༌ནའང༌ ཁོང༌ངི༌ ངའེ༌ མིག༌ ཕན༌ཅུག༌ག༌ ཛདས༌།
31 འི༌བོ༌ ཚང༌མའེ༌ ཤེས༌ས༌ནོག༌, དཀོན༌མཆོག༌གི༌ སྡིག༌ཅན༌གུན༌ལ༌ སན༌ན༌ མ༌ནོག༌, ཨིན༌ནའང༌ དཀོན༌མཆོག༌གི༌ རྩི༌ཝ༌ དང༌ ཇིགས༌སི༌ ནང༌ང༌ གྲུལ༌ཏེ༌ ཁོང༌ངི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ལ༌ སན༌ན༌ནོག༌།
32 སྐྱེས༌པ༌ནེ༌ ཕར༌ལ༌ ཞ༌ར༌ ཨིན༌ཁན༌ཞིག༌ ཕན༌ཅུག༌ག༌ ཛད༌ཁན༌ནི༌ སྐོར༌ལ༌ སུ༌ཞིག༌གིའང༌ དག༌ས༌ ཚོག༌པ༌ ཚོར༌ཏེ༌ མེད༌གྲོ༌།
33 གལ༌ཏེས༌ འི༌ མི༌བོ༌ དཀོན༌མཆོག༌གི༌ ཆོགས༌ནེ༌ མན༌པིན༌ན༌ ཁོང༌ང༌ ཅའང༌ ཅོ༌ཉན༌ཏེ༌ མེད༌གྲོ༌།"
34 ཁོང༌གུན༌ནི༌ ཟེརས༌, "ཁྱོ༌རང༌ སྐྱེས༌པ༌ནེ༌ ཕར༌ལ༌ སྡིག༌པའེ༌ གངས༌ཏེ༌ ཡོད༌ཏེ༌ ཨིན༌ནོག༌། ང༌ཞ༌གུན༌ལ༌ ལབ༌ཅེས༌སི༌ ཧམ༌པ༌ ཀ༌ཟུག༌གི༌ ཡོངས༌།" ཏེ༌ནེ༌ ཁོང༌གུན༌ནི༌ འི༌ མི༌བོ༌ ཆོས༌ཚོགས༌སི༌ ཕྲོ༌ནེ༌ ཕིངས༌།
སེམ༌ཉིད༌དི༌ ཐོག༌ནེ༌ ཞ༌ར༌།
9:35 ནེ༌ 41
35 ཡ༌ཧུ༌དཱ༌པའེ༌ ཆོས༌ཚོགས༌སི༌ ཕྲོ༌ནེ༌ ཕིང༌ཁན༌ནི༌ མི༌བོའེ༌ སྐོར༌ལ༌ གཙོ༌བོ༌ ཡེ༌ཤུའི༌ སན༌, ཁོ༌ ཐོབ༌བ༌ཅིག༌ ཁོང༌ངི༌ ཏྲིའ༌ ཛདས༌, "ཁྱོ༌རང༌ངི༌ མི༌རིགས༌སི༌བུའི༌ཀ༌ ཏད༌པ༌ ཅོའད༌ད༌?"
36 ཁོའེ༌ ཟེརས༌, "ཁོང༌ སུ༌ ཨིན༌ནོག༌? ཁོང༌ངི༌ཀ༌ ཏད༌པ༌ ཅོ༌ཉན༌ཅེས༌ལ༌ ངའ༌ ཤད༌ད༌ ཛད༌དའང༌།"
37 ཡེ༌ཤུའི༌ ཁོའ༌ མོལས༌, "ཁྱོ༌རང༌ངི༌ ཁོ༌ ཐོངས༌ཏེ༌ ཨིན༌, ཡང༌ དག༌ས༌ ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌བོ༌ ཁོ༌ ཨིན༌།"
38 ཁོའེ༌ ཟེརས༌, "ཀྱེ༌ གཙོ༌བོ༌, ངའེ༌ ཉེ༌རང༌ངི༌ཀ༌ ཏད༌པ༌ ཅོའད༌" ཡང༌ ཁོའེ༌ ཡེ༌ཤུའ༌ ཆག༌ ཕུལ༌ཏེ༌ ཅོལས༌།
39 ཡེ༌ཤུའི༌ མོལས༌, "ཞ༌ར༌གུན༌ལ༌ ཐོང༌ཅུག༌ཅེས༌ ཡང༌ ཐོང༌ཁན༌གུན༌ལ༌ ཞ༌ར༌ ཨིན༌ཁན༌བོ༌ ལྟན༌ཏེ༌ ཇིག༌རྟེན༌པ༌གུན༌ལ༌ ཁྲིམས༌ཅད༌ ཅོ༌ཅེས༌སི༌ ཕིའ༌ ངའ༌ ཡོངས༌ཏེ༌ ཨིན༌།"
40 ཁོང༌ ཉམ༌པོ༌ ཡོད༌ཁན༌ནི༌ ཕ༌རུ༌ཤི༌པ༌ ཁ༌ཅིག༌གི༌ ཏེ༌བོ༌ ཚོར༌ཏེ༌ ཟེརས༌, "ཅི༌, ང༌ཞ༌གུན༌ནའང༌ ཞ༌ར༌ ཨིན༌ནོག༌ག༌?"
41 ཡེ༌ཤུའི༌ མོལས༌, "གལ༌ཏེས༌ ཁྱོ༌ཞ༌གུན༌ ཞ༌ར༌ ཨིན༌པིན༌ན༌ ཁྱོ༌ཞ༌གུན༌ནི༌ ནང༌ང༌ སྡིག༌པ༌ ཅོ༌ཁན༌ནི༌ སྐྱོན༌ ཐོབ༌ཏེ༌ མེད༌གྲོ༌, ཨིན༌ནའང༌ དག༌ས༌ ཁྱོ༌ཞའེ༌ ང༌ཞའ༌ མིག༌ནེ༌ ཐོང༌ངད༌ ཟེར༌པ༌ ཁྱོ༌ཞའེ༌ ནང༌ང༌ སྐྱོན༌ ལུས༌ཏེ༌ ཨིན༌ནོག༌།"