10
སྐྱབ༌གོན༌ ཡེ༌ཤུ༌ ནི༌ ལུག༌རྫི༌ ཟང༌པོ༌།
10:1 ནེ༌ 21
1 གཙོ༌བོ༌ ཡེ༌ཤུའི༌ མོལས༌, "ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ལུག༌རའེ༌ ནང༌ང༌ སྒོ༌ནེ༌ མ༌ཡོང༌ང༌ རྩིག༌པའེ༌ ཀ༌ནེ༌ ཛགས༌ཏེ༌ ཡོང༌ཁན༌གུན༌ རྐུན༌མ༌ དང༌ ཅག༌པ༌ ཨིན༌ནོག༌།
2 སྒོ༌ནེ༌ ཡོང༌ཁན༌བོ༌ ལུག༌གུན༌ནི༌ ལུག༌རྫི༌ ཨིན༌ནོག༌།
3 སྒོ༌སྲུང༌པའེ༌ ལུག༌རྫིའ༌ སྒོ༌ ཕེའ༌ནོག༌ ཡང༌ ལུག༌གུན༌ནི༌ ལུག༌རྫིའི༌ སྐད༌བོ༌ ངོ༌ཤེས༌ས༌ནོག༌། ལུག༌རྫིའི༌ ཁོ༌རང༌ངི༌ ལུག༌ རེ༌རེའ༌ མིང༌ བོད༌ཨིན༌ ཕི༌ལོག༌ག༌ ཁྲིད༌ཏེ༌ ཁྱེར༌ར༌ནོག༌།
4 ཁོའེ༌ རང༌ངི༌ ལུག༌ ཚང༌མ༌ ཕི༌ལོག༌ག༌ ཕིང༌ ཚར༌ར༌ཅིག༌, ཁོ༌ ལུག༌གུན༌ནི༌ སང༌ སྔུན༌ལ༌ གྲུལ༌ཨིན༌ ཡང༌ ལུག༌གུན༌ ཁོའེ༌ སྟིང༌རང༌ནེ༌ ཡོང༌ཨིན༌ ཅིའ༌ཟེར༌ན༌ ཏེ༌གུན༌ནི༌ ཁོའེ༌ སྐད༌ ངོ༌ཤེས༌ས༌ནོག༌།
5 ལུག༌གུན༌ ཞན༌མ༌ མིའི༌ གྱབ༌ནེ༌ མ༌ཆའ༌ ཐག༌རིང༌ང༌ ཤོར༌ཏེ༌ ཆེན༌, ཅིའ༌ཟེར༌ན༌ ལུག༌གུན༌ནི༌ ཞན༌མ༌ མི༌བོའེ༌ སྐད༌ ངོ༌ཤེས༌ས༌ མ༌ནོག༌།"
6 ཡེ༌ཤུའི༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཏེ༌ སྤེ༌བོ༌ སལ༌ལ༌ ཛདས༌, ཨིན༌ནའང༌ ཁོང༌ངི༌ ཁོང༌གུན༌ལ༌ མོལ༌ཁན༌བོ༌ ཧ༌མ༌གོ༌།
7 ཏེན༌ན༌བོའེ༌ཕིའ༌ ཡེ༌ཤུའི༌ ཡང༌སྐྱར༌ མོལས༌, "ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ ནི༌ ལུག༌རའེ༌ སྒོ༌བོ༌ ཨིན༌།
8 ངའེ༌ སང༌ སྔུན༌ལ༌ ཡོངས༌ཁན༌ ཚང༌མ༌ ནི༌ རྐུན༌མ༌ དང༌ ཅག༌པ༌ ཨིན༌པིན༌, ཨིན༌ནའང༌ ངའེ༌ ལུག༌གུན༌ནི༌ ཁོང༌གུན༌ནི༌ ཟེར༌ཁན༌གུན༌ མ༌ཉནས༌།
9 ང༌ ནི༌ སྒོ༌བོ༌ ཨིན༌, ང༌ གྱུད༌ཏེ༌ ལུག༌རའེ༌ ནང༌ཀུག༌ག༌ ཞུགས༌ཁན༌གུན༌ལ༌ ཐར༌པ༌ ཐོབ༌ཨིན༌། སྒག༌ཞའ༌ མེད༌པ༌ ཁོང༌གུན༌ ནང༌ཀུག༌ག༌ ཡོང༌ཅེས༌ དང༌ ཕི༌ལོག༌ག༌ ཆེན༌ ཡང༌ རྩཱ༌ཁའ༌ གྱལ༌ལ༌ ཐོབ༌ཨིན༌།
10 རྐུན༌མ༌ ནི༌ ངའེ༌ ལུག༌གུན༌ རྐུ༌ཅེས༌, སད༌ཅེས༌ དང༌ མེད༌ཁན༌ ཅོ༌ཅེས༌ ཅིག༌པོའེ༌ ཕིའ༌ ཡོང༌ང༌ནོག༌། ཨིན༌ནའང༌ ང༌ ནི༌ ཏེ༌གུན༌ལ༌ གང༌པོ༌ མི༌ཚེ༌ ཚིམས༌པོ༌ཞིག༌ ཏང༌ཅེས༌ལ༌ ཡོངས༌ཏེ༌ ཨིན༌།"
11 "ང༌ ནི༌ ལུག༌རྫི༌ ཟང༌པོ༌བོ༌ ཨིན༌། ལུག༌རྫི༌ ཟང༌པོའེ༌ ལུག༌གུན༌ནི༌ ཕིའ༌ ཁོ༌རང༌ངི༌ སྲོག༌ ཏང༌ང༌ནོག༌།
12 ལ༌པ༌ ལུག༌གུན༌ནི༌ དག༌པོ༌ ཡང༌ ལུག༌རྫི༌ ཟང༌པོ༌ མན༌ པ༌སང༌, ཤང༌ཀུ༌ ཡོང༌ང༌ ཐོང༌ང༌ཅིག༌ ཁོ༌ ལུག༌གུན༌ ཕངས༌ཏེ༌ ཤོར༌ར༌ནོག༌། ཏེ༌ནེ༌ ཤང༌ཀུའི༌ ལུག༌གུན༌ལ༌ ཐམས༌ཏེ༌ ལུག༌ཁྱུ༌ ཡན༌ ཅུག༌ཨིན༌།
13 ཁོ༌ ཤོར༌ཏེ༌ ཆའ༌ནོག༌ ཅིའ༌ཟེར༌ན༌ ཁོ༌ ལ༌པ༌ཞིག༌ ཨིན༌ནོག༌ ཡང༌ ལུག༌གུན༌ལ༌ ཅི༌ཆ༌ནའང༌ ཚེར༌ཁ༌ མེད༌ཀྱག༌།"
14 "ང༌ ལུག༌རྫི༌ ཟང༌པོ༌བོ༌ ཨིན༌། ངའེ༌ ང༌རང༌ངི༌ ལུག༌གུན༌ ཤེས༌སད༌ ཡང༌ ངའེ༌ ལུག༌གུན༌ནི༌ ང༌ ཤེས༌ས༌ནོག༌,
15 ཀ༌ཟུག༌ ཡབ༌བི༌ ང༌ ཤེས༌སད༌, ངེའང༌ ཡབ༌ ཤེས༌སད༌། ཡང༌ ལུག༌གུན༌ནི༌ ཕིའ༌ ངའེ༌ ང༌རང༌ངི༌ སྲོག༌ ཏང༌ཨིན༌།
16 ང༌ འི༌ ལུག༌ཁྱུའི༌ ཕྲོའ༌ མེད༌ཁན༌ནི༌ ཡང༌ ལུག༌ རིག༌གའང༌ ཡོད༌། ངའེ༌ ཏེ༌གུན༌ནའང༌ ཁྱོང༌གོས༌, ཏེ༌གུན༌ནིའང༌ ངའེ༌ སྐད༌ལ༌ ཉན༌ཨིན༌, ཏེ༌ནེ༌ ལུག༌ཁྱུ༌ ཅིག༌ དང༌ ལུག༌རྫི༌ ཅིག༌ གྱུར༌ཨིན༌།"
17 "ངའེ༌ ཡབ༌བི༌ ང༌ ཅམས༌པ༌ ཛད༌ཅེས༌སི༌ གྱུན༌ཚན༌ ནི༌ ངའེ༌ ང༌རང༌ངི༌ སྲོག༌པོ༌ ཆོད༌པའ༌ ཏང༌ཅེས༌པོ༌ ཨིན༌, ཡང༌སྐྱར༌ ལོགས༌ཏེ༌ ཐོབ༌ཅེས༌སི༌ ཕིའ༌ ངའེ༌ ཏེ༌བོ༌ ཅོའད༌།
18 སུ༌ཞིག༌གའང༌ ངའེ༌ སྲོག༌ ངའེ༌ ཀ༌ནེ༌ ལེན༌ མི༌ཉན༌, ང༌ ང༌རང༌ ཐད༌ཏེ༌ ང༌རི༌ སྲོག༌པོ༌ ཏང༌ངད༌། ང༌ འི༌བོ༌ ཏང༌ཅེས༌ ཡང༌ ལོགས༌ཏེ༌ ལེན༌ཅེས༌སི༌ ཝང༌ ཡོད༌ ཅིའ༌ཟེར༌ན༌ ཡབ༌ དཀོན༌མཆོག༌གི༌ ང༌ བཀའ༌ སལ༌ལ༌ ཛད༌ཏེ༌ ཡོད༌།"
19 ཏེ༌ཟུག༌ མོལ༌ཁན༌བོའེ༌ ཞས༌ཏེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ནང༌ང༌ ཁག༌ བུད༌།
20 ཁོང༌ མང༌པོའེ༌ ཟེརས༌, "ཁོའ༌ རྡུད༌ ཞུགས༌ཏེ༌ སྙོས༌ཏེ༌ ཨིན༌ནོག༌, ཁོའ༌ ཅིའ༌ ཉན༌ནད༌?"
21 ཨིན༌ནའང༌ ཞན༌ ཁ༌ཅིག༌གི༌ ཟེརས༌, "འི༌ སྤེ༌ར༌གུན༌ རྡུད༌ ཞུགས༌ཁན༌ཞིག༌གི༌ མ༌ནོག༌། རྡུད༌དི༌ ཞ༌རའ༌ མིག༌ནེ༌ ཐོང༌ཅུག༌ ཉན༌ན༌ནོག༌ག༌? མ༌ནེ༌ ཉན༌ན༌ མ༌ནོག༌།"
ཡ༌ཧུ༌དཱ༌པ༌གུན༌ནི༌ གཙོ༌བོ༌ ཡེ༌ཤུའི༌ཀ༌ ཏད༌པ༌ མ༌ཁྱོངས༌།
10:22 ནེ༌ 42
22 དགུན༌ཏུས༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཆོད༌ཁང༌ གྲུབ༌ཁན༌ནི༌ ཞག༌ ཨིད༌ཏུ༌ ཅོ༌ཨིན༌ ཏུས༌ཆེན༌ རྩིའི༌ ཏུས༌ལ༌
23 ཡེ༌ཤུའི༌ ཆོད༌ཁང༌ངི༌ ནང༌ང༌ སོ༌ལོ༌མོན༌ནི༌ ཡབས༌ ཟེར༌ཁན༌ནི༌ཀ༌ གྲུལ༌ལ༌ ཛད༌དད༌པིན༌།
24 ཡ༌ཧུ༌དཱ༌པ༌གུན༌ ཁོང༌ང༌ སྐོར༌ཏེ༌ དུགས༌ ཡང༌ ཟེརས༌, "ནམ༌ཚོག༌པ༌ ང༌ཞ༌གུན༌ ཐེ༌ཚོམས༌སི༌ ནང༌ང༌ བོར༌རད༌། ང༌ཞའ༌ སལ༌པོ༌ ཤོད༌དའང༌, ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌བོ༌ ཨིན༌ན༌?"
25 ཡེ༌ཤུའི༌ ལན༌སལས༌, "ངའེ༌ ཁྱོ༌ཞ༌གུན༌ལ༌ ཤད༌པིན༌, ཨིན༌ནའང༌ ཁྱོ༌ཞའེ༌ དེན༌ཤེས༌ས༌ མི༌དུག༌། ངའེ༌ ང༌རང༌ངི༌ ཡབ༌བི༌ ཝང༌ངི༌ ནང༌ང༌ ཅོ༌ཁན༌ནི༌ ཧ༌ལས༌ཤེས༌སི༌ ལས༌གུན༌ནི༌ ངའེ༌ ཕིའ༌ སྤང༌པོ༌ ཏང༌ང༌ནོག༌།
26 ཨིན༌ནའང༌ ཁྱོ༌ཞ༌གུན༌ནི༌ དེན༌ཤེས༌ས༌ མི༌དུག༌ ཅིའ༌ཟེར༌ན༌ ཁྱོ༌ཞའ༌ ངའེ༌ ལུག༌ མ༌ནོག༌།
27 ངའེ༌ ལུག༌གུན༌ནི༌ ངའེ༌ སྐད༌ ཉན༌ན༌ནོག༌ ཡང༌ ངའེ༌ ཁོང༌གུན༌ ཤེས༌སད༌། ཁོང༌གུན༌ ངའེ༌ གྱབ༌ནེ༌ ཡོང༌ང༌ནོག༌།
28 ངའེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཏང༌ཨིན༌ ཡང༌ ཁོང༌གུན༌ ཉལ༌ཝའེ༌ ནང༌ང༌ མ༌ནེ༌ མི༌ཕང༌། སུ༌ཞིག༌གིའང༌ ཁོང༌གུན༌ ངའེ༌ ལག༌ནེ༌ ཀོགས༌ཏེ༌ ཁྱེར༌ མི༌ཉན༌།
29 འི༌ ལུག༌གུན༌ ངའེ༌ ལག༌ག༌ སྟད༌ད༌ ཛད༌ཁན༌ནི༌ ངའེ༌ ཡབ༌ ཚང༌མའེ༌སང༌ ཝང༌ཅན༌ ཞུགས༌ཏེ༌ ཨིན༌། སུ༌ཞིག༌གིའང༌ ངའེ༌ ཡབ༌བི༌ ལག༌ནེ༌ ཁོང༌གུན༌ ཀོགས༌ཏེ༌ ཁྱེར༌ མི༌ཉན༌།
30 ང༌ དང༌ ཡབ༌ ཉིས༌ཀོ༌ ཅིག༌ ཨིན༌།"
31 ཡང༌སྐྱར༌ ཡ༌ཧུ༌དཱ༌པ༌གུན༌ནི༌ ཁོང༌ང༌ རྡོའ༌ གྱབས༌ཏེ༌ སད༌ཅེས༌སི༌ ཕིའ༌ རྡོའ༌ ཁུརས༌།
32 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ ང༌རང༌ངི༌ ཡབ༌བི༌ ཆོགས༌ནེ༌ ཧ༌ལས༌ཤེས༌སི༌ ལྟས༌ མང༌པོ༌ ལྟན༌པིན༌, ཏེ༌གུན༌ནི༌ ནང༌ནེ༌ ཀ༌བོའེ༌ ཕིའ༌ ང༌ རྡོའ༌ གྱབས༌ཏེ༌ སད༌ཅེས༌ ཅོའད༌?"
33 ཡ༌ཧུ༌དཱ༌པ༌གུན༌ནི༌ ཁོང༌ང༌ ཟེརས༌, "ང༌ཞའེ༌ ཁྱོ༌རང༌ངི༌ ཧ༌ལས༌སེས༌སི༌ ལྟས༌གུན༌ནི༌ ཕིའ༌ མན༌པ༌, ཁྱོ༌རང༌ མི༌ ཨིན༌ ཨིན༌ནའང༌ རང༌དང༌རང༌ང༌ དཀོན༌མཆོག༌ ཨིན༌ ཟེར༌ཨིན༌ དཀོན༌མཆོག༌ག༌ དད༌ལོག༌ ཞུས༌ཁན༌བོའེ༌ ཕིའ༌ རྡོའ༌ གྱབས༌ཏེ༌ སད༌ཨིན༌།"
34 ཡེ༌ཤུའི༌ ལན༌སལས༌, "ཁྱོ༌ཞ༌རང༌ངི༌ བཀའ༌ཁྲིམས༌སི༌ སྤེ༌ཆའེ༌ ནང༌ང༌ དཀོན༌མཆོག༌གི༌ འི༌ཟུག༌ མོལ༌ལ༌ ཛད༌ཏེ༌ མི༌དུག༌ག༌?, 'ངའེ༌ ཟེར༌པིན༌, 'ཁྱོ༌ཞའ༌ དཀོན༌མཆོག༌གུན༌ ཨིན༌།'
35 གལ༌ཏེས༌ དཀོན༌མཆོག༌གི༌ བཀའ༌ ཐོབ༌ཁན༌ནི༌ མི༌གུན༌ལ༌ དཀོན༌མཆོག༌གུན༌ མོལ༌ལད༌ན༌, ༼ཡང༌ དམ༌པའེ༌ སུང༌རབས༌ མ༌ནེ༌ གྱུར༌ མི༌ཉན༌ཅེས༌པོ༌ ཁྱོ༌ཞའ༌ གྱུས༌ཨིན༌ནོག༌༽
36 ཡབ༌བི༌ ཁོང༌ངི༌ ཆག༌ལས༌ ཅོ༌ཅེས༌ལ༌ སྐོའ༌ ཛད༌ཏེ༌ འི༌ ཇིག༌རྟེན༌ནི༌ ནང༌ང༌ ཀལ༌ལ༌ ཛད༌ཁན༌བོའེ༌ སྐོར༌ལ༌ ཅི༌ མོལ༌ཨིན༌? ངའེ༌ 'ང༌ དཀོན༌མཆོག༌གི༌ བུ༌ཚ༌ ཨིན༌' ཟེར༌ཁན༌བོའ༌, དཀོན༌མཆོག༌གི༌ དད༌ལོག༌ ཞུས༌ཏེ༌ ཨིན༌ནོག༌ ཅིའ༌ ཟེར༌རད༌?
37 གལ༌ཏེས༌ ངའེ༌ ང༌རང༌ངི༌ ཡབ༌བི༌ ལས༌པོ༌ མ༌ཅོ༌ན༌ ཏེ༌ནེ༌ ངའེ༌ཀ༌ ཨིད༌ མ༌ཤེས༌ཤིག༌།
38 གལ༌ཏེས༌ ངའེ༌ ཏེ༌གུན༌ ཅོས༌ཏེ༌ ཁྱོ༌ཞའེ༌ ངའེ༌ཀ༌ ཨིད༌ མ༌ཤེས༌ནའང༌ ཧ༌ལས༌ཤེས༌སི༌ ལྟས༌གུན༌ནི༌ཀ༌ཏ༌ ཨིད༌ཤེས༌ ཅོས༌སའང༌, ཀ༌བོའེ༌ ཡབ༌ ངའེ༌ ནང༌ང༌ ཡང༌ ང༌ ཡབ༌བི༌ ནང༌ང༌ ཨིན༌ཁན༌བོ༌ ཁྱོ༌ཞའ༌ གྱུས༌སོང༌ཏེ༌ ཧ༌གོ༌ ཐུབ༌ཨིན༌།"
39 ཁོང༌གུན༌ནི༌ ཁོང༌ ཡང༌སྐྱར༌ ཟུམ༌ཅེས༌ ཅོས༌, ཨིན༌ནའང༌ ཁོང༌ ཁོང༌གུན༌ནི༌ ལག༌ནེ༌ ཤོར༌ཉན༌།
40 ཏེ༌ནེ༌ ཡེ༌ཤུ༌ ཡང༌སྐྱར༌ ཡོར༌དཱན༌ནི༌ ལྩངས༌པོའེ༌ ཕར༌ཀ༌ སྔུན༌ལ༌ ཡོ༌ཧཱ༌ནན༌ནི༌ ཁྲུས༌ ཏངས༌ཁན༌ནི༌ ནས༌སའེ༌ཀ༌ ལོགས༌ཏེ༌ སྐྱོདས༌ ཡང༌ ཏེ༌རུ༌ ཞུགས༌།
41 མི༌ མང༌པོ༌ ཁོང༌ ཡོད༌ས༌ ཡོངས༌ཏེ༌ ཅིག༌ དང༌ ཅིག༌ག༌ ཟེརས༌, "ཡོ༌ཧཱ༌ནན༌ནི༌ ཧ༌ལས༌སི༌ ལྟས༌ མ༌ནེ༌ མ༌ལྟན༌ནའང༌ ཁོང༌ངི༌ འི༌ མི༌བོའེ༌ སྐོར༌ལ༌ མོལ༌ཁན༌ ཚང༌མ༌ དྲང༌པོ༌ ཨིན༌ནོག༌།"
42 ཡང༌ ཏེ༌རུ༌ ཡོད༌ཁན༌ མི༌ མང༌པོའེ༌ ཁོང༌ངི༌ཀ༌ ཏད༌པ༌ ཁྱོངས༌།