12
E Iesu a Leklek tagun a Pukakiar Sabat
(Mak 2:23-28; Luk 6:1-5)
1 Lamur, ana ning a Pukakiar Sabat, e Iesu i han potor ting na barim a wit. Anuna kakak a asaerla la murak, pa la turpas a kumut kutus a witla pa la ieni.
2 Ning a Parisaiola la oroi i, la atai i mang, “Oroi, anum na kakak asaer la tol a utna ning, pa bel la mur a warkurai tagun a Pukakiar Sabat.”
3 E Iesu i keles la mang, “I mangasa, belot mulo was asaning e Dewit i toli, ning la murak taum ana taraila ning la armuri?
4 I kas uting na rumai ane God, pa i ien a bret ning di ka tabar tar e God ono. Pa la otleng ning la han taum onoi la hangan ono. A bret ning, a warkurai ono i manglarne, na tena artabar tetek e God ka lar ieni, pa tarai oros gong.
5 I mangasa, belot mulo was a warwara miting na Buk a Warkurai? I atongi mang, na tena artabar tetek e God la sira titol ting na rumai artabar ana Pukakiar Sabat, ika bel la rongo ono.
6 A atongi tamulo mang, takai kane i itna tana rumai artabar.
7 Ning ngandek mulo ka tasman a kamkam a warwara ne, ‘A mang sur a marmaris, pa bel a mang sur a artabar ning di sira tuni,’ Hosea 6:6
bel mulor tiu la ning bel la rongo.
8 Anasa a Nat a Barsan a Leklek tagun a Pukakiar Sabat.”
E Iesu i alangolango pas a barsan ning a kuna i del
(Mak 3:1-6; Luk 6:6-11)
9 E Iesu i han mitingia, pa i kas uting na nunla a rumai lotu.
10 Ning a barsan kaning ia, a kuna i del. La tai sur ta ngas ning lar tiu e Iesu ono, pa la dekeni mang, “I mangasa, i tostos ot arlar ana anundala a Warkuraila sur dir alangolango pas tik ana Pukakiar Sabat o bel?”
11 Pa i keles la mang, “Ning ta halimulo anuna ta sipsip ir punga tar uting na ta tung ana Pukakiar Sabat, mangmangasa, bel ir tong akesi pa ir dat kas ulaki?
12 A sipsip a utna oros ka, ika a barsan i itna kol. Larning, i tostos sur dir tol a wakakna ana Pukakiar Sabat.”
13 Pa i atai a barsan ning mang, “Ur kodos a kum.” I kodosi, pa kuna i tostos ulak, arlar ana ning a kuna ning i wakak.
14 A Parisaiola la purum, pa la warwara taum pas sur ta ngas ning lar umkol e Iesu ono.
A tena titol ning e God i aslang pasi
15 Ning e Iesu i tasmani mang la warwara taum sur lar umkoli, i han masik mitingia. A galis a tarai la muri, pa i alangolango pas la rop ning la sasam.
16 Pa i atumarang la, sur gong la atai tar tik mang, i esi.
17 I atongi larne sur ir tolsot pas a warwara ane God ning e Aisaia a propet ka warwara nigo tar ono mang,
18 “Ine anuk a tena titol ning ia ka aslang pasi,
a katnani, a gas kol ono.
Ar akas tar a Inguk ono,
pa ir apuasa a warkurai ning i tostos tetek na tarai miting na matanitula.
19 Bel ir warwara na balakut, pa bel ir agaia,
bel dir longor a elngena ting na ngasla.
20 Bel ir kuben a kunai ning i talikun,
pa bel ir wus kol a lam ning bel i kubar wakak.
Ir toli larne tuk a tostos a warkurai ir tolsot pas a toltol laulau.
21 Na tarai miting na matanitula lar tortorot ana risana pa lar harnanai sur ir alaun la.” Aisaia 42:1-4
E Iesu pa e Belsebul
(Mak 3:20-30; Luk 11:14-23)
22 La ben otnan tar ning a barsan tetek e Iesu, i ngat pa i kut, pa mot kaning ono. E Iesu i alangolango pasi, pa barsan ning i warwara pa i tai kakat.
23 Pa tarai rop la kulkulan, pa la deke mang, “Ngandek a Nat e Dewit ot ne?”
24 Ika a Parisaiola la longori pa la atongi mang, “A barsan ne, i sira kepsen a motla ana rakrakai e Belsebul, a leklek anuna motla.”
25 E Iesu ka tasman tar a nuknukinla, pa i atongi tanla mang, “Ning a tarai miting na ta matanitu lar harum artalai tanla ot, a matanitu ning ir rarop. Ning ta hanua, o al tarai miting na ta rumai, lar harum artalai tanla ot, bel ma lar kes taum.
26 Ning e Satan ir kepsen anuna tena titolla, bel lar tur taum ulak ma, lar han sarara. Manglarning, anuna matanitu ir tur rakrakai mangmangasa?
27 Ning iau a kepsen a motla ana rakrakai e Belsebul, anumulo na tarai la sira kepsen la ana rakrakai esi? Mulo tasmani mang la kepsen a motla ana rakrakai e God, pa ine i asangani mang anumulo a artitiu hok i rongo.
28 Ika, ning a kepsen a motla ana rakrakai a Inguna e God, mulor tasmani mang a matanitu ane God ka hanot tetek mulo.
29 “Bel tik ir tolsot pas sur ir kas uting na rumai anuna ta rakrakai a barsan, pa ir los pas a ututnala mitisaui na rumai, ning bel ir dot akes nigon tari. Ning ot ir dot akes nigon tari, ir bot los a ututnala anuna barsan ning.
30 “Esining bel i nangan iau, i sairas iau ka. Pa esining bel i nangan iau ona ben a tarai, i lu sarara la ka.
31 Pa atongi tamulo mang, e God ir kepsen na toltol laulau rop anuna tarai, pa nunla na laulau a warwara otleng oe God, ika a warwara laulau ana Talngan Tabu, e God bel ir kepseni.
32 Esi otleng ning ir atong tar ta laulau a warwara ana Nat a Barsan, e God ir kepsen anuna toltol laulau ning, ika esining ir atong laulau a Talngan Tabu, e God bel ir kepsen anuna toltol laulau ning, ana lalaun anone pa ana lalaun lamur otleng.
A rakai pa wana
(Luk 6:43-45)
33 “Ning a rakai i wakak, ir sira suah a wakak a wana, pa ning a rakai i laulau, ir sira suah a laulau a wana. Dir oroi lalan a rakai miting na wana.
34 Mulo na natnat a soila! Mulo ning a laulau a taraila, mulor atong mangasa ta wakak a warwara? Anasa a pahana tarai i atong puasa a toltol ning i bukus ting na balanla.
35 A wakak a barsan i asangan anuna wakak a toltol ning kaning na balana, pa laulau a barsan otleng, i asangan anuna toltol laulau ning kaning na balana.
36 A atongi tamulo mang, a warwara laulaula rop ning a tarai la ka atong tari, lamur bot, ana pukakiar a warkurai, e God ir deken la ono.
37 Ana pukakiar ning, anum a warwara ot ir alangolango u, o ir saran a warkurai a arkeles tetek u.”
La nunung e Iesu sur ir tol ta akinalang
(Mak 8:11-12; Luk 11:29-32)
38 Lamur dingla na tarai tagun na tena asaer tagun a warkurai pa Parisaiola la atongi tana mang, “Tena Asaer, ur tol ta akinalang sur milar tasmani mang, u a tena titol ane God.”
39 I keles la mang, “A tarai tagun onone, a laulau a tarai, anunla a lalaun i bakbak kusun e God. La nunung sur ta akinalang, ika bel dir tol tar tik tetek la. Dir tol ka a akinalang arlar larning di tol tari oe Jona a propet.
40 Arlar oe Jona i laun natol a pukakiar ting na balan a tnan sis, larka otleng ning a Nat a Barsan ir borbor pas natol a pukakiar tingui na piu.
41 Ana pukakiar a warkurai, a tarai Niniwe lar tur pa lar tiu rakrakai a tarai tagun onone, anasa la lingir a nuknukinla ana warawai ane Jona, ika onone, esaning i leklek ta e Jona kanet.
42 Ana pukakiar a warkurai, a kwin mitumo na matana tobar ir tur pa ir tiu rakrakai a tarai tagun onone, anasa i hanot miting bakbak sur ir longor a mananos ana King Solomon, pa onone, esaning i leklek ta e Solomon kanet.
A mot i ulak
(Luk 11:24-26)
43 “Ning ta mot ir purum kusun ta barsan, ir han uting na puknala ning bel al malum ia, sur ir manah, ika bel ir pastek ta pukna ning ir manah ia.
44 Pa ir atongi mange, ‘Ar ulak sur anuk a rumai, ning a purum tar kusuni.’ Ning ir hanot, ir oroi mang ka belbel, di ka surupu tar, pa di ka atostos tari.
45 Lamur ir han pa ir ben ulak pas mais a mot, ning la laulau kol tana, pa lar kas rop ting na rumai ning, pa lar kes tingia. Pa lalaun anuna barsan ning ir laulau kol tan anuna lalaun nating. Ir mang ka otleng tetek a laulau a tarai tagun anone, anunla lalaun lamur ir laulau kol.”
E tana e Iesu pa na tastasna
(Mak 3:31-35; Luk 8:19-21)
46 Ning e Iesu kaning ot i warwara tetek a kunum a tarai, e tana pa na tastasna la hanot, pa la tur tumo lapiu, anasa la mang sur lar warwara taum onoi.
47 Pa ning a barsan i atai e Iesu mang, “E tnam pa na tastasim, kanumo la tur tumo lapiu. La mang sur lar warwara taum hom.”
48 Pa i kelesi mange, “Esi e nang, pa esi la na tastasik?”
49 Pa i tusu tetek anuna tarai a asaer pa i atongi mang, “Oroi, la ne e nang pa na tastasik!
50 Anasa esining i sira mur a nuknuk e Tata ning i kes saot na langit, i ka ning a tasik barsan, pa tasik hane, pa e nang.”