11
E Iesu pa e Jon a Tena Baptais
(Luk 7:18-35)
1 Ning e Iesu ka warwara rop tar tetek anuna ning a bonot pa pisir naur a kakak a asaer, i han mitingia sur ir asaer a tarai pa ir warawai ting na hananuala, tumo na papar Galili.
2 E Jon i kes ting na karabus pa i longor a titolla anuna Karisito. Pa i sune anuna kakak a asaerla sur lar deke mang,
3 “U ma ning di warwara nigo tar hom mang ur hanot, o milar harnanai ot sur tik?”
4 Pa e Iesu i keles la mang, “Mulor ulak, pa mulor atai e Jon ana ututnala ne mulo ka longori pa mulo ka oroi tari:
5 A kutla la ka tai, la ning a hanla i mat la ka han tostos, a leprala la ka langolango, na talngana kutkut la ka longor, a minatla la ka kamtur, pa di warawai ana Wakak a Warwara tetek a kapan a tarai.
6 Esining i oroi a ututnala ne a toli, pa anuna tortorot bel i punga, ka angis.”
7 Ning kaning a kakak a asaerla ane Jon la han, e Iesu i atai a kunum a tarai oe Jon mang, “Lanigo ning mulo han uting na hanua bel tetek e Jon, asaning mulo tai suri? Ngandek a kunai ning i maler ana wuwu? Bel.
8 Asaning mulo han sur mulor oroi i? A barsan ning i mermer ana wakak a kaenla? Bel. Oroi, la ning la sira mermer ana ngangaten a kaenla la sira kes ting na rumai ana kingla.
9 Asaning mulo han sur mulor oroi i? A propet? Momol, a atai mulo, e Jon i leklek kol tana propetla.
10 Di ka tumtumus tar onoi ting na Buk Tabu mange,
‘Oroi, ar sune anuk a tena los warwara sur ir nigon u,
pa ir atalapor anum a ngas.’ Malakai 3:1
11 A atong momoli tamulo, e Jon a Tena Baptais i leklek kol tana taraila rop mite lapiu. Ika esining i natarna kol ana matanitu misaot na langit, i leklek tana.
12 “Turpasi ana rau ning e Jon a Tena Baptais i turpas a warawai tuk onone, a matanitu misaot na langit i han rakrakai amon, pa tarai la rakrakai kol sur lar kas tingia.
13 A propetla rop pa Warkuraila ane Moses la apuasa a warwara ana matanitu ane God, tuk ana rau ning e Jon i turpas a titol ono.
14 La warwara ana propet Elaija ning ir hanot. Ning mulo mang sur mulor tortorot ana warwara ning, anone, e Jon a propet Elaija ning ir hanot.
15 Esining a talngana kaning, i wakak ning ir longor ono.
16 “Esi na warwara larlar ning ar atongi ana tarai tagun onone? La arlar ana kakakla ning la kes ting na tinine hanua pa la arkabah tetek na halalinla mang,
17 ‘Mila pasar kudu,
ika bel mulo tortor ono,
pa mila saken a saksak a balmaris,
ika bel mulo domos ono.’
18 E Jon i hanot, bel i ien ta wakak a utna pa bel i gang a wain, pa la atongi onoi mang, ‘A mot kaning onoi.’
19 A Nat a Barsan i hanot, i hangan pa i gang, pa la atongi onoi mang, ‘Oroi, a barsan ne a tena hangan pa tena gang, a hal a tena los totokomla pa tena laulaula.’ Ika a titolla ane God i apuasa i mang, anuna tastasman i a tastasmai momol.”
A warkurai a arkeles tetek la ning bel la lingir a nuknukinla
(Luk 10:13-15)
20 Pa e Iesu i warwara na balakut tetek a tarai ting na hananuala ning ka tol tar anuna galis a utna na kulkulan kol tingia, anasa bel la lingir a nuknukinla.
21 I atongi mang, “Ir laulau tetek mulo a tarai Korasin, pa ir laulau otleng tetek mulo a tarai Betsaida. Ning di kar tol tar a ututnala na kulkulan ne tetek a tarai Tair pa tarai Saidon, arlar larning di ka tol tari tetek mulo, la kar lingir kapit a nuknukinla pa lar tobo, lar mermer ana kaenla na tobo pa lar sabar a palaonla ana kubus a iah. Ika mulo, bel mulo lingir a nuknukimulo.
22 A atongi tamulo mang, ana pukakiar a warkurai, a warkurai a arkeles tetek mulo a tarai Korasin pa tarai Betsaida, ir rakrakai kol tana warkurai tetek a tarai Tair pa tarai Saidon.
23 Pa mulo otleng a tarai Kapernaum, mangasa, mulo nuki mang dir aleklek pas mulo usaot? Bel! Dir migen purum mulo uting na tnan iah. Ning di kar tol tar a ututnala na kulkulan tetek a tarai Sodom, arlar larning di ka tol tari tetek mulo, e Sodom kanet.
24 A atongi tamulo mang, ana pukakiar a warkurai, a warkurai a arkeles tetek mulo a tarai Kapernaum ir rakrakai kol tana warkurai tetek a tarai Sodom.”
La ning a mamahatla i monong la, lar han tetek e Iesu
(Luk 10:21-22)
25 Ana taim ning, e Iesu i atongi mang, “Tata, u a Leklek saot na langit pa te na rakrakan hanua rop. Ar rakan aleklek pas u, anasa u bunur a ututnala ne kusun a tena tastasmaila pa la ning la tastasman, pa u apuasa i tetek la ning la arlar ana kakakla.
26 A momolna, Tata, anasa u mang ot sur ir manglarning.
27 “E Tata ka saran tar a ututnala rop tak. Bel tik i tasman e Natnalik, e Tamana ka, pa bel tik otleng i tasman e Tamana, e Natnalik ka, pa la otleng ning e Natnalik i mang sur ir apuasa e Tamana tetek la.
28 “Mulo rop ning a palaomulo i ngol pa mamahatla i monong mulo, mulor han tetek iau, sur ar amanah mulo.
29 Mulor los anuk a ikep, pa mulor noren iau ar asaer mulo, anasa a magirak i wowowon pa sira anatarna pas iau. Mulor los anuk a ikep sur a ingumulo ir manah.
30 Anasa a ikep ar sarani tamulo bel i ngangaten, pa lolos ar sarani tamulo bel i mamahat.”