6
1 I maining dalar han usa lanigo sur dingla na asaer kale ning ir arakrakai dala ana nundala tortorot. Gong dala asaer ulak ana ningnigo na asaerla oe Karisito ning dala ka asaer pas ono. A ningnigo na asaerla larne: dalar lingir a nuknukindala kusun a toltolla ning ir ben dala sur a minat, a tortorot oe God,
2 a asaer ana baptais, a asaer ana suah kundi saot na tarai, a kamkamtur ulak kusun a minat pa warkurai a arkeles tikin.
3 Dalar han usa lanigo ning e God ir malmaling.
4-6 A tarai ning la ka tasman a talapor ane God, la ka lartumus tar a artabar misaot na langit, la ka los pas a Talngan Tabu, la ka tasmani mang a warwara ane God i wakak pa la ka kilang tar a rakrakai ane God ning ir hanot lamur. Ning la ka gilam ris kusun e God, bel tik ir tolsot sur ir ben ulak la sur lar lingir a nuknukinla. Anasa i arlar larning la sai ahat ulak a Nat e God saot na rakai kutus pa la ame i na matan a tarai.
7 A kabalapiu ning i gang pas a polo na kiar ning i sira punga, pa i suah a utna na hangan ning i nangan la ning la oman tari, a kabalapiu ning e God i atong angisi.
8 Ika a kabalapiu ning i suah ka a suksukla pa rosrosla bel i to pas ta utna. Bel i bongnani pa e God ir saran a warkurai a arkeles teteki pa lamur ir tun seni ting na iah.
9 Na halalimila, mila ka atong tar a rakrakai a warwarala ne tamulo. Ika mila tasman momoli mang mulo mur a wakak a ngas, ning ir sot sur a tarai ning e God ka alaun pas la.
10 E God bel i sira tol ta utna ning bel i tostos. Bel ir duman sen pas anumulo a titol pa anumulo na marmaris ning mulo toli teteki, ning mulo ka nangan tar anuna tarai, pa kaning ot mulo toli.
11 Mila mang kol sur mulo rop taktakai mulor rakrakai ana marmaris mang ot larning mulo sira toli, tuk ana araropna. Mulor toli larning sur a ututnala ning mulo harnanai ana tortorot suri, ir hanot momol ot tetek mulo.
12 Bel mila mang sur mulor ngoro. Mila mang sur mulor arlar onla ning la tortorot pa la harnanai pa bel la ngoro, pa lar tong akes a ututnala ning e God ka lele tar ono.
A lele ane God i momol
13 Ning e God i lele tetek e Abaram, i arakrakai anuna lele ana risana ot, anasa bel ta risan tik ulak i itna tana.
14 E God i lele tar mang, “A momolna, ar atong angis u, par saran tar al galis a mangis a tarai hom.” Stat 22:17
15 Pa e Abaram i harnanai pa bel i ngoro, pa lamur i tong akes a utna ning e God ka lele tar ono teteki.
16 Ning a tarai la lele, la arakrakai anunla lele ana risan tik ning i itna tanla. Manglarning, a lele ning, ir tur rakrakai pa bel ma tik ir arngaras ulak ono.
17 Pa e God otleng, i arakrakai anuna lele ana risana ot, sur ir apuasa i tetek anuna tarai, la ning i tol tar anuna lele tetek la, mang bel ir lingir ulak a nuknukna.
18 E God i tol a lele, pa i arakrakai i ana risana. Naur a utna ne, bel tik i tolsot sur ir keles diau, anasa e God bel i tolsot sur ir asongo. I lele larning sur ir wunan dala, ning dala ka dun rait tar teteki, sur dalar tur rakrakai ana nundala keskes harnanai ana tortorot sur a lele ane God, ning kaning lanigo tandala.
19 Anundala tortorot ning dala harnanai ono sur a lele ane God, i arlar ana aga ning i tong akes a ingundala, pa bel ir susur. Anundala keskes harnanai ana tortorot i kas uting na rumai artabar ting na pukna ning i Tabu Kol lamur tana kaen na alalar kutus saot na langit.
20 E Iesu ka kas nigo usaot sur ir nangan dala. I anundala ningnigo na tena artabar tetek e God, a ngas a tena artabar arlar oe Melkisedek, pa anuna titol ning ir kes tikin.