5
1 A ningnigo na tena artabarla rop tetek e God, e God i aslang pas la miting na tarai, pa i suah tar la sur lar tur aslang a tarai na matana. Lar saran a artabarla pa lar tun a inagoila sur e God ir kepsen a toltol laulaula anuna tarai.
2 A ningnigo na tena artabar tetek e God i tolsot pasi sur ir titol ana marmaris tetek a tarai ning bel la tastasmai pa la han rongo, anasa i otleng bel ta rakrakaina sur ir tolsot pas a rakrakaina ana toltol laulau.
3 Ine a kamkamna ot ning i sira tun a artabarla. Bel sur ir kepsen ka a toltol laulaula anuna tarai. Sur ning ir kepsen otleng anuna toltol laulaula.
4 Bel ana nuknukin tik ning ir los pas a leklek a tiniba na ningnigo na tena artabar tetek e God. Ana arkabah ot ane God ning a barsan ir ningnigo na tena artabar, arlar larning i toli tetek e Aron.
5 Mang otleng larning, e Karisito bel i aleklek pasi sur ir ningnigo na tena artabar tetek e God. Ika e God i atongi tana larne,
“U a Natuklik,
pa onone ia ka hanot e Tamam.” Buk Song 2:7
6 Pa ning a tuk otleng ting na Buk Tabu, e God i atongi larne,
“U a tena artabar tetek e God,
a ngas a tena artabar arlar oe Melkisedek,
pa anum a titol ir kes tikin.” Buk Song 110:4
7 Ning e Iesu i laun te na rakrakan hanua, i kukuk ana nuna niaringla ana luru matana tetek e God, esaning i tolsot sur ir alaun pasi kusun a minat. Pa e God i longori, anasa i anatarna pasi nahaina.
8 I momol kol e Iesu a Nat e God, ika ning i kibas a kankan, a kankan ne i asaeri sur ir mur a warwara ane God.
9 Ning e God ka tolsot pas a titol ning oe Natnalik, e Natnalik i hanot a kama titol na alaun tikin a tarai, tetek la rop ning la mur anuna warwara.
10 Pa e God i suah tari sur i a ningnigo na tena artabar, a ngas a tena artabar arlar oe Melkisedek.
A atumarang sur gong tik i han masik kusun a tortorot
11 A galis a utna ot ning milar warwara ono ana utna ne. Ika i ngangaten sur milar pak wakaki tetek mulo, anasa bel mulo kibas kapiti.
12 Mulo ka tortorot bongnan mulo, pa onone ka sot sur mulo na tena asaer. Ika, mulo kapan ot sur tik ning ir asaer mulo ulak ana ningnigo na asaer ana warwara ane God. Bel mulo tolsot pasi sur mulor ien a rakrakai a utna. Mulo tolsot pasi ka sur mulor sus.
13 Esining kaning ot i sus, i a kaklik betbete ot, pa bel i lasan ana asaer ana tostos a toltol.
14 La ning la ka itna la ien a rakrakai a utna na hangan. La ning la ka alasan pas la sur lar oroi lalan a wakakna pa laulauna.