45
Kamongome Kiŋi Sairose Rombo Palyiya
1 Kamongo dokome akali Sairose baa kiŋi ingyuo
yuu liti wakale dupwa pyao anamasi minyinya lao rombo palyiya.
Baame kiŋi yango dupwana pawa dupwa pyao kui lao isa palyala pena leya.
Kamongo yuu taone dupwana kame kambu dupwa banya lao pyao lumbwanyi retakamira.
Sairose kando Kamongo lao dokopa
2 Embena lao namba rangeme kata rapa rapa pyakao
yuu kyau kuki andakepe pyao kapa kapa pyuo retaro.
Nambame kana koneme kambu wasingi dupwa pyao lalyaro
dee ane isa porai dupwa roo pyao muu muu pyakaro.
3 Nambame kamongonge bange wakale iminjinginya yalu pyuo singi dupwa emba jero.
Dokopa emba namba Kamongoŋo lao soo nyuo
dee Isaraele wambunya Anatu dokome emba kingi lao kee lapyalamo lao soo nyere.
4 Isaraele wambu nambana kendemande dupwa namba rangeme rombo palyuo nyiyunu dupwa
embame nyisakare lao emba rombo palyilyu.
Embame namba soo nyii napinyipape
namba emba kingi ketae pyambuo rape rape lao karapu.
5 Namba iki Kamongo. Anatu wakale mende kara nange.
Embame namba soo nyii napinyipape
nambame emba yano piramo kararene dokopa porai renge jero.
6 Wambu peparae
yuu muu pinjingi paki piso pao paki suu lao dupwame
anatu wakale mende kara nange.
Namba iki Kamongo lao soo nyerami lao dopa piru.
7 Nambame yangange iminjingipi dolapo pyuo wasingi.
Nambameko elyape keta pisingipi dee randa maingi rengepe dolapo peenge.
Namba Kamongo dokome yulu dasipa pingi.
8 Nambame yake dokona piso apunda epengenyili pyuo rolaena renge peyaro.
Isa yuunya wambu dupwame lenge pee lao nyelana kararami.
Dopa piramo dokopa isa jingi kalya pingi lokwa sinyi peenge dopale ingyuo kiiramo nyingipi pii soo rolo lengepe peyakamiru.
Doko namba Kamongo dokome dopa pyuo pinya laronosa pira.
Kamongo Isa Yuu Wasapala Ee Kana Peparae Iso Kareyamo Doko
9 Penge warame wasisi lapo serami dupwanako yale mendeme
akali pee wasaramo doko kando apiyanda pyuo larase.
Dee wara dokome akali doko kando apa pipyasa dopa pilini lao piso serase?
Penge dokome akali wasaramo doko kando emba mora pisa nange lamo lao mumu larase?
10 Mendeme banya endangi rakangepe kando piso sokondali pyuo,
Akipamo embame namba lenge kambu dopale ingyuo manjo nyiisi? larase?
11 Dokona lao Isaraele wambunya Kamongo Anatu poo pyasi
rengyana nyera dupwana singi dokome lao,
Nakamame nambana wane wanake dupwana lao namba piso soope
dee dopa pyuo piri laope namba langirami ingya nalyamo.
12 Nambame yuu doko wasapala dokona
wambu rara dupwa palena leyo.
Nambana porai renge dokome palepeta pyasinju leyo dokopa yake doko pee leya.
Nambame renge palyuo neta kana buipi panda range dokona karena lao rapu pyuo karenge.
13 Nambame Sairosena mona doko pyao kui laronopa
nambana yulu dokona pyuokondali pyuo yulu kwaeyaramo dupwa rolae ingyuo retara.
Nambame baa nyiso kata dupwa peparaena paramo dupwa wapuo rolae ingyuo retaro.
Dokopa baame nambana taone Jerusaleme doko dee pipala
nambana anjisi wambu dupwa kiiramo nyera.
Mendeme baa bange mairuŋu yulu pyakana laope dee panga soo kana maiyuo nyepala yulu pinya laope pii nara ingilyamo.
Kamongo Porai Wakasa dokome lapyamo pilyamo.
14 Kamongome Isaraele wambu dupwa lamaiyuo lao,
Itiopia wambupi dee Isipi wambupinya mena bangepe dupwa nakamana ingyara
dee yuu Sepa akali londe dupwa karapusi ingyuo karo nakamana yulu pakao kararami.
Karapala nakama puu maisi karo nakama moko minyuo paeyarami.
Dopa pyuo karo nakamame nakama kando pangu soo karo
Anatu nakama pipya role pyao karamo doko baa iki Anatu angi lao polo larami.
15 Isaraele wambunya Anatu banya wambu dupwa lete pyuo nyingi doko
baa range yalu yalu pyuo karenge.
16 Wambu isa kanapeme anatuŋu lao wasilyaminyi dupwa
mende neta paa nao elya nyerami.
17 Dopa piraminyipape Isaraele wambu dupwa Kamongome lete pyuo nyilyamo doko
soo puu para ingilyamo.
Dee banya wambu dupwa kamame elya renge nyii narami.
18 Kamongo dokome yake doko wasiya.
Doko baa ikiko Anatu karamo.
Baame yuu doko see nayamopa pyuo ingiya.
Baame kandokondali pyuo wasapala sulu seraŋa lao piya.
Baame yuu muiyane penda penda ingyuo mee soo paraŋa lao wasiyande daa.
Yuu doko wambu paliramiŋi lao piya.
Dopa pyuo wasiya dokome lao, Namba doko Kamongo.
Dokona Anatu wakale mende kara nange lao letamo.
19 Nambame pii yalu pyuo laa nao
mende pinya dokopa kalyama nange.
Isaraele wambu dupwa yuu muiyane nenge anda nange dokona
namba kotala pena laa nayo.
Namba Kamongo dokome pii kinyi lenge
dee aki mende rolae ingingi dupwa soo nyepala karena lao lamaingi.
Yuu Muu Dupwa Peparaena Kamongo Dee Bapilone Wambunya Mee Bange Kingimi Wasisi Dupwape
20 Kamongo dokome lao,
Nakamana yuu liti wakale wakale dupwa pyao kokwa soo nembeyaminyipa
wambu lapo kyawa lete nyisi karaminyi dupwa epo nyuo pyaselapape.
Kote letaminyi dokona nakama ipupwape.
Wambu nakamana mee bange isame wasisi dupwa kalya pyuo pao
dee mee bange anatu lenge nakama kyawa lete nyii narami dupwa kando loma silyaminyi dupwa
renge angi doko soo nyii nange dupwa nakama peparae eparami, letamo.
21 Nakamana kote pii palamo dupwa minyuo kotena ipupwape.
Wambumi nakama nyiso letaminyi dupwa mendeme mende pisalya pisana pyuo lena.
Rengya mende piraŋa apimi wambo nolakao leyase?
Doko namba Kamongo Anatu banya wambu dupwa nyiso kyawa lete nyingi dokomeko leyo.
Anatu wakale mendepe kara nange.
22 Dakepa yuu muu peparaena wambu palaminyi dupwa
nakama namba keta kapu kyuo epapala range kyawa lete nyelapape.
Anatu doko iki namba karo.
23 Nambana lalu lao lenge doko angi kinyi dokona
dee alowa pii naro.
Namba keta kana minyuo lalu lao lao,
Wambu peparae nambana lenge kambu dokona epo wapambu pii pyaro piso lalu lao lao,
nakama namba kando rape rape lao yulu poraiyuo pyakarama lao larami, leyo.
24 Nakamame lao namba keta iki anamasi minyuo wini pingi rengepe dee porainya rengepe dupwa
kando nyerama ingilyamo larami.
Dopa piraminyipape wambu lapo namba kando epe kanda nalyaminyi dupwa randa andake nyuo elyame kumuo kararami.
25 Namba Kamongo dokome Jekopena para pyasi dupwa peparae kiiramo nyeronopa
nakamame namba lakando kararami.