44
Kamongo Doko Baa Iki Anatu
Ingyuo Karamo
1 Kamongo dopa letamo.
Isaraele wambu nambana kendemande
nambana rombo palyisi Jekopena para pyao nyisi dupwa epapu pii dake selapa.
2 Namba Kamongo dokome nakama wasiyu.
Nakama ene nyaŋa manjo nyiyami dokona piso nambame nyiso epeyo.
Nakama paka nalapape. Nakama nambana kendemande wambu.
Namba rangena rombo palyiyu dokona nambame mona retelyo.
3 Nambame yuu oo lasi dokona rombe lanyi pyambwakaro.
Yuu kulisa pao yando nasi dupwana ipwa guu lanyi pyakamena lao piru.
Dopa pipala nambana porai renge doko nakamana wane wanakepe dupwa keta kulimbwanyi peyaro
dee nakamana para pyao paraminyi dupwa elyape keta pisakaro.
4 Nakama andaramisa yanenge dupwa ipwa epo pengena
isoko mokwame isape andele lapala puiya nongopa soo karara.
5 Dokopa mendaki mendaki lao wambu dupwame lao, Namba Kamongona wambu karo lao epo
Isaraele wambu pipya konda konda pirami.
Dopa pipala wambu mendaki mendaki lao nakamana kingi sukuli dokona Kamongona kingi pyanyi palyarami.
Palyapala baa range Anatunya wambu dokona mende karo, larami.
6 Kamongo baame Isaraele wambu dupwa iso kyawa minyuo karenge doko
Kamongo Porai Wakasa dokome pii dake palipyasa lalana letamo.
Kama wambowana nambako kareyo doko lumwa pyuo dokopa namba kararoko.
Anatu mende mendasa kara nange. Anatu doko nambako iki karenge.
7 Mendeme namba piyunu dopale piyamende karase?
Api mende ene kanda soo dokona piso yuu gii lumwa piramo dupwana
dopa piraŋa lao leyamende karase?
8 Nambana wambu dupwa nakama paka nalapape.
Wamba kanda soo dokona piso pao dakepape
rengya nyera dorena polo lenge kandapi dokona
nakama nambame dopa pyuo lengeŋe lao usinisi lakarami ingilyamo.
Anatu mende wakale karase?
Anatu mende wakale porai renge palengende kararamo sepa nayonde ramo kandena.
Kingimi Wasisi Dupwa Anatu Angi Daaŋa Lao Panelyamo
9 Wambu isa kanape kingimi imambuŋu lao wasilyaminyi dupwa keyange angi ingya nalyamopa mee bange anatuŋu lao mange karelyaminyi dupwa mee ingyuo para ingilyamo. Wambu dupwame anatuŋu lao mona maiyuo lakandelyaminyi dupwa lenge kwaeyo sepa napala letaminyi dokona elya nyerami ingilyamo.
10 Kana ane palenge dupwame kingi kokwa soo wasapala anatu ingyuo kingi lao kararami doko kapa ingya nalyamo.
11 Mendeme mona maiyuo kingi wapambupi lakao lao pisarami dupwa mee elya nyerami ingilyamo. Isa kana dopa pyuo wasarami wambu dupwa mee isa wambu ingyapala renge mende pali nalyamo. Nakama kote dokona nyuo epena lao panda maiyuo laramanopa randa nyuo pako elya nyinyale.
12 Kapame pyuo wasingi akali dokome kapa kunjasi mende nyepala isarena yango wasara. Banya kingi porai dokome ama minyuo pyao ponga lyuo lenge kambu waso nyingi. Dopa pyuo yulu pipala makame kumuo lopo ipwa nano pingi.
13 Kamondame isa angi doko makande pyuo kandenge. Kandapala banya makande isa dokome wambu yalende lenge kambu keyange inginyi pyambuo rombo palyuo wasingi. Pipala wambu yale doko lanyuo epo banya anda dokona retenge.
14 Dopa pyuo dokopa baame sita isa kameya dupwa poko nyuo isa oke panda saiperese isape imwa dokona karapyamo dupwa koto pao yapo nyilyamo. Dopako pyuo yuu lapo lorele isa dupwa wara pipala apunda dokome andena lapala mali soo karenge.
15 Akalimi isa dokonako nyepala pakirena dorena isarena yangapala soo piso borete minyuo yango pingi. Dee pakirena dorena anatuŋu lao wambu yale wasapala kingi wapambupi lakao kingi lenge.
16 Isa dokona lapo mee isa yangapala dokona mena minju ketae kiso napala sikya pilyamo karenge. Baa range isare soo isasa pilyamo dokopa lao, Isare keyange doko silyuŋu isale lenge.
17 Isa dolo silyamo dupwame mee bange anatuŋu lao wasingi. Wasapala kingi wapambupi lakao kingi lao ateŋa pyao dokopa, Emba nambana anatuŋu embame namba kyawa lete nyepe, lenge.
18 Wambu doo nakama yale doko angi mende pilyamanoko lao kopyali ingyuo karo aki pilyamano lao see nange. Nakama lenge raa nao ayemba suu pipala pyuo karo kinyi angi doko kanda nange.
19 Isame anatuŋu lao waso karenge akali dokome lao, Isa lapo mee yango lapome borete yango waso dee mena minju yangapala nao pyuo dokopa silyamo dupwame anatu ingyuo wasapala mee isa dokona kingi wapambupi lakao piso dokopa isa dokona lao kopyali ingyuo pyuo lao karalyano lao suu pyao laowape pii nange.
20 Isareme raramo sungwa lengya doko nyuo mona palya napala narama ingya nalyamo. Banya suu pingi kopyali dokome baa nyuo isoko kata nembapyasa apa pilyu lao see nalyamo dokona mendeme nyisarami ingya nalyamo. Baa rangeme sepa napala bange kingi rakana minyuo karamo doko anatu angi daaŋa lao meelyamo lao soo nyii nalyamo.
Kamongo Bange Peparae Wasiya Baa Pyuo Nyingi Ingyuo Karamo
21 Kamongo dokome lao,
Isaraele nakama renge dasipa suu pyalapape, letamo.
Doko nambame nakama nambana kendemande ingyuo kararami lao wasiyu.
Nakama nambana kendemande ingyuo karaminyi.
Nakama kame soo yaki nyeronde daa.
22 Nambame nakamana koo dupwa kopa apupi pyao nembele lao kwuanyi nembakayoŋo.
Nambame nakama lete wai pyao nyilyuŋu. Namba range karo dakena ipupwape.
23 Kamongome banya yulu andake pyuo lasaka pyuo
banya Isaraele wambu dupwa nyiso pyuo lete nyiya dokona
nakama yake panda dorenape
isa yuu rapunya palenge dupwape
dee imwa isape yuu kyaupi dupwa nakama pii ketae palyuo lao rae maiyuo karalapape.
24 Namba Kamongo doko nakamana pyuo nyingi akali.
Nambame iki nakama wasiyu.
Nambameko Kamongo ingyuo karapala bange silyamo dupwa peparae wasiyu.
Nambame iki yake doko nyuo pyasinju lanyi reteyo.
Dopa pyuo isa yuu dake wasiyuŋu dokopape mendalimi namba nyiso kara nayako.
25 Nambame wambu lapome mali mali sakange dupwa kopyali ingyuo letaminyi lao pyuo lasaka pingi.
Nambame wambu bui dupwa dopa pira dapa pira lao isaro karenge dupwa uki minyuo nembakamingi.
Akali soo nyinginya pii dupwa pyao isa nembakamyuo
nakamana mona palenge singinya renge dupwa kopyali ingyuo pelyamo lao lasaka pingi.
26 Dopa pipyamopape nambana kendemande dupwa rengya mende piraŋa lao lenge.
Nambame wai pii minyakange akali dokome nambame mende rengya piruŋu lao rapa rapa pyuo retenge doko pano lakale peenge.
Dopa pipala doo ene rengya mende pira letono dupwape dee mende pinya rapa rapa pilyuŋu dupwape angi kinyi lao panenge.
Nambame Jerusaleme range wambu dupwa range epo dee paliraminyipa
Juta wambunya taone dupwa kamba range piramiŋi leto.
Taone dupwa lalyuo kwaeyasi doko minyalyuo pirami ingyara, namba dopa pyuo leto.
27 Ipwa kota andake dupwa sokonya laronopa mee sokwara.
28 Nambame akali Sairose lamaiyuo, Embame nambana wambu dupwa isakao kara, laro.
Namba pinya suu pilyu dupwana palyuo pyakare.
Jerusaleme doko dee kamba minyalyinya lakare.
Dopa lao dokopa tembole anda pirami dokona puu rombo minyakao susa isa retako pinya lao lamaikare, lapusa pilyamo.