22
1 Ka malek la lem paꞌali m moꞌar line kuꞌom tisid nyovur la, ka li ianꞌad wuu gotiŋ ne ka yitne Winaꞌam ne Peꞌebil la naꞌam gbauŋ la ni,
2 ka be teŋ la suer titaꞌar la soogin. Ka tiig line tisid nyovur la ziꞌe moꞌar la gbeed ayi la ni, ka ba wen wela noor piinayi yuum poogin, ka wen noor yinni nwadig poogin. Ka tiig la vaand tisid dunia soꞌolim wusa laafe.
3 Ka Winaꞌam nopoor la ku lem be yaꞌasa. Bozugo Winaꞌam ne Peꞌebil la naꞌam gbauŋ na be li ni. Ka o tumtumnib na zunꞌe o,
4 ka nye o nindaa. Ka o yuꞌur na sob ba gbeꞌedin.
5 Ka yuꞌuŋ ku lem bee. Ka Zugsob Winaꞌam na ke ka li a nyain, ka ba ku lem bood fitla ne nintaŋ ani. Ka ba na di naꞌam saŋa line kaꞌ benne.
Yesu na kena la yela
6 Ka malek la yeli m ye, “Yelbama ane asida. Ka Zugsob Winaꞌam one tisid o nodiꞌesidib o Siig Suŋ la, tum o malek ye o kena paꞌal o tumtumnib yel ban ku yuuge, ka niŋ la.”
7 Yesu yel ye, “Li ku yuuge, ka m na kena. Yelsum be ne one siak gbauŋ kaŋa nodiꞌesug la yet siꞌel la.”
8 Man Joon n wum ka nye yelbama wusa. Ka man daa wum ka nye li naae la ka vabin malek one paꞌali m yelbama la tuon ye m zunꞌe o.
9 Ka o yeli m ye, “Da niŋ alaa. Ka man me ane fu tumtum tiraan laꞌam ne fu baꞌabiis bane a nodiꞌesidib ne nimbane siak bun line be gbauŋ kaŋa ni la. Zunꞌom Winaꞌam.”
10 Ka o yel man ye, “Da suꞌa gbauŋ kaŋa nodiꞌesug la yet siꞌel laa, bozugo saŋa la liꞌeliya, ka yelbama wusa na niŋ.
11 Kel ka one a tuumbeꞌed daan kpelim aa ala. Ka one tum dianꞌad tuuma kpelim niŋim ala. Ka one a popiel on kpelim tum line a suꞌum. Ka one suunre a nyain on kpelim aa ala.”
12 Ka Yesu yel ye, “Kelisimi. Li ku yuuge, ka m na kena. Yood la be m saꞌan. M na tis soꞌ wusa o tuuma yoode a siꞌem.
13 Mane a Alfa ne Omega, ka a yiiga daan ne nyaꞌaŋ daan ka a bun wusa pinꞌilug ne li naar.”
14 Yelsum be ne bane pie ba fuud nyain la. Dinzugo ba na mor suer na di nyovur tiig la wela, ka na kpenꞌ zaꞌanoorin n keŋ teŋ la ni.
15 Ka nimbeꞌednam ne bane dit tima la ne bane tum dianꞌad tuuma la ne ninkuudib la ne baꞌamaanib la ne nimbane wusa n noŋ ye ba maꞌa ziri la ku kpenꞌ teŋ la poogin ne, ka na bene teŋ la yiiŋ.
16 “Man Yesu tumi m malek ye o yel uf yelbama ka fu tuꞌas tis Winaꞌam nidib la. Mane a naꞌab David yaaŋ ne beogin nwaddar line nyeen.”
17 Winaꞌam Siig Suŋ ne Peꞌebil Poꞌapaal la yel ye, “Kem na.”
Ka one wumi li la me yelim ye, “Kem na.” Ka one wusa ka kuꞌonuud more o la, kel ka o kena, ka one me bood la, kel ka o diꞌe piini line a nyovur kuꞌom la zaalim.
Li naar nwa
18 Man Joon saꞌal soꞌ mekama wum gbauŋ kaŋa nodiꞌesug yet siꞌel la ne nimmua. Soꞌ yaꞌa yel siꞌel n paas gbauŋ kaŋa yet siꞌel la, Winaꞌam na maligim paas on sob yeltood line sob gbauŋ kaŋa ni la.
19 Ka soꞌ yaꞌa yiis siꞌel gbauŋ kaŋa nodiꞌesug yet siꞌem la ni, Winaꞌam na moŋ on sob o pudugir line be nyovur tiig la ni, laꞌam ne Teŋ Suŋ la kpenꞌeb. Tiig ne teŋ kane yela n sob gbauŋ kaŋa ni la.
20 One yet ye yelbama ane sida la yel ye, “Sida li ku yuuge, ka m na kena.”
Li a suꞌum. Ti Zugsob Yesu kem na.
21 Ti Zugsob Yesu yelsum na be ne ya wusa. Ami.