21
Saŋgbauŋ ne teŋgbauŋ paal la yela
1 Ka m nye saŋgbauŋ ne teŋgbauŋ paal. Ka yiiga saŋgbauŋ ne teŋgbauŋ ne ateuk gaad ka lem kaeꞌ.
2 Ka m nye Jerusalem Teŋ Paal line a suꞌum nyain, ka li yi arazana, Winaꞌam saꞌan n sigid na wenne poꞌa paale ye fuvenla n tiꞌeb ye o kul o sid ne.
3 Ka m wum ka kukor tans yi naꞌam gbauŋ la zug na n yel ye, “Winaꞌam yir yuꞌun be dunia nidib saꞌan. Ka o be ne ba, ka ba na aa o nidib. Ka Winaꞌam meŋ na bee ba ni ka aa ba Winaꞌam,
4 ka na eenns ba nintoꞌom wusa. Yelkuda la wusa gaadeya, ka kum ne susaꞌaŋ ne kaasug ne toog ku lem be yaꞌasa.”
5 Ka one zinꞌi naꞌam gbauŋ zug la yel ye, “M maan siꞌel wusa ne bunpaala.” Ka yeli m ye, “Som neꞌeŋa n digil bozugo pianꞌad la ane sida ka a yelmeŋir.”
6 Ka yel man ye, “Li naaeya. Mane a Alfa ne Omega, ka a siꞌel wusa pinꞌilug ne li naar la. Ka kuꞌonuud yaꞌa kuud soꞌ, man na tis o nyovur kuꞌobulum zaalim ka o nu.
7 Ka one nyaŋ yelbeꞌed wusa la na diꞌe lina wusa. Ka man na aa o Winaꞌam ka on me na aa m biig.
8 Amaa dabiem dim la ne bane kaꞌ yadda, ne nimbeꞌednam la ne ninkuudib la ne bane tum dianꞌad tuuma la ne bane dit tima la ne baꞌamaanib la ne ziri dim la wusa zinꞌig ane bugum moꞌar line peꞌel ne bugum ne tan line nyelig n dit wuu bugum la ni. Lina a kuꞌum line paꞌas ayi la.”
Jerusalem Teŋ Paal la yela
9 Ka maleknam ayopoi la ni yinni bane daa mor laas ayopoi, ka li peꞌel ne yeltood ayopoi line kpelim nyaꞌaŋ la yeli man ye, “Kem na, ka m paꞌali fu Poꞌa Paal la, one a Peꞌebil la poꞌa.”
10 Ka Winaꞌam Siig Suŋ more m. Ka malek la noki m du zuetitaꞌar zugin, ka paꞌali m Jerusalem teŋ line a suꞌum nyain la, ka li yi Winaꞌam saꞌan arazana ni n sigid na.
11 Ka Winaꞌam naꞌam la paŋ nyeene li ni. Ka teŋ la me nyeen wuu kugvenliŋ line ka ba buon yaspa ka li nyeen wuu gotiŋ ne.
12 Teŋ la daa mor zaŋguom titada ka ba zug waꞌam ne zaꞌanoya ne kolis piinayi. Ka maleknam piinayi gur zaꞌanoya la. Ka Israel dim buudi piinayi la yuda daa sob kolis la zugin.
13 Ka zaꞌanoya atanꞌ daa be zaŋguom anaasi la yinni, yinni, ni. Ka atanꞌ be ya nyaꞌaŋ baba. Ka atanꞌ be ya datiuŋ baba. Ka atanꞌ be ya dagobug baba. Ka atanꞌ me be ya tuon baba.
14 Ka ba daa eenb teŋ la zaŋguoma la ne kuga piinayi. Ka Tumtumnib piinayi la yuda daa sob kuga la zugin.
15 Ka malek kane daa pianꞌ tisi m la daa mor salima daug line ka ba more makid la ye o mak teŋ la ne li kolis ne li zaŋguoma la.
16 Ka teŋ la daa ane teŋ mauk. Ka li waꞌalim ne li yaluŋ la zem ne taaba. Ka malek la mak teŋ la ne daug line ka ba more makid la. Ka li yaluŋ ane maila tusir yinni ne kobus anu. Ka li waꞌalim ne li yaluŋ ne li waꞌalim line ziꞌe la wusa zem taaba.
17 Ka malek la me mak zaŋguoma la. Ka li waꞌalim la daa ane ninsaal kantiig kobuga ne piisnaasi ne anaasi. Malek kantiig me ane ala.
18 Ka zaŋguoma la daa meꞌ ne kugvenliŋ line yuꞌuri buon yaspa. Ka teŋ la meŋ daa a salima ameŋa line nyeen wuu gotiŋ ne.
19 Ka kugvenla buudi wusa n daa be teŋ la eenbir kuga la ni n ke ka ba venl bedego. Ka yiiga eenbir kuga la daa ane yaspa. Ka ayi daan la a safir. Ka atanꞌ daan la a agat. Ka anaasi daan la a emeral.
20 Ka anu daan la a onik. Ka ayuobu daan la a kanelian. Ka ayopoi daan la a kirisolat. Ka anii daan la a beril. Ka awai daan la a topas. Ka piiga daan la a kirisopas. Ka piinayinni daan la a yasin. Ka piinayi daan la a ametis.
21 Ka kulis piinayi la daa ane kugvenla line yuꞌuri buon peel la piinayi. Ka ba maal kulis la yinni yinni ne peel yinni. Ka teŋ la sueya la daa ane salima ameŋa n nyeen wuu gotiŋ ne.
22 Ka m daa pu nye Winaꞌam puꞌusum yir teŋ la nii, bozugo Zugsob Winaꞌam paŋ titaꞌar daan la ne Peꞌebil la aa anina puꞌusum yir.
23 Ka Winaꞌam naꞌam paŋ ne Peꞌebil la daa nyeen li ni, ka ket ka li a nyain. Ka linzug ka teŋ la daa pu bood winig ne nwadig ye ba nyeen li nii.
24 Ka dunia soꞌolim buudi wusa me na goond neesim la ni. Ka dunia naꞌanam na more ba kpanꞌam keŋ teŋ la ni.
25 Ka teŋ la zaꞌanoya maligim pu yood nintaŋa, bozugo yuꞌuŋ ku be aninaa.
26 Ka ba na mor dunia naꞌam ne kpanꞌam n kenn teŋ la ni na.
27 Ka line kaꞌa tituꞌaa wusa ne one tum nyan tuuma ne ziri dim la ku kpenꞌ teŋin laa. Nimbane yuda sob Peꞌebil la nyovurpaal dim la gbauŋ la ni maꞌaa na kpenꞌ teŋ la poogin.