13
Bunyuasa ayi la yela
1 Ka m nye bunyua ka o yi ateukun la na n mor iila piiga ne zuta ayopoi. Ka naꞌam zugpibis be iila la zut yinni yinni ni. Ka yuꞌur line saꞌamid Winaꞌam yuꞌur la sob o zutin la.
2 Ka bunyua one ka m nye la daa wenne weog baa ne. Ka o nobeens a buntitada. Ka o noor wenne gbigim noor ne. Ka dragon la daa tis bunyua la o meŋ paŋ ne o naꞌam gbauŋ ne o kpiꞌeuŋ titaꞌar.
3 Ka bunyua la zug yinni daa wenne ba poaꞌalim o ne, amaa sapoꞌat la daa binꞌei. Ka li pak dunia dim wusa ka ba dol bunyua la.
4 Nidib wusa daa zunꞌod dragon la, on tis bunyua la o paŋ la zug, ka zunꞌod bunyua la men ye, “Anoꞌone mor paŋ wenne bunyua la? Ka anoꞌone na tunꞌe zab ne li?”
5 Ka ba tis bunyua la suer ka o pianꞌad nyeesim pianꞌad ka saꞌamid Winaꞌam yuꞌur, ka len ke ka o mor paŋ nwadis piisnaasi ne ayi.
6 Ka li tuꞌud Winaꞌam ka saꞌamid Winaꞌam yuꞌur ne zinꞌikan ka o be la ne bane be arazana ni la wusa.
7 Ka ba tis o suer ka o zab ne Winaꞌam nidib ka nyaŋe ba, ka tis o paŋ kan na nyaŋ buudi ne dood ne pianꞌad ne teŋgbana wusa.
8 Nidib wusa bane be dunia ni, ka ba yuda pu sob nyovurpaal dim gbauŋin saŋkan ka dunia nam pu pinꞌil la, na zunꞌe bunyua la. Gbauŋ la ane Peꞌebil kan ka ba da ku la din.
9 Dinzug one bood ye o wum, on kelisim.
10 One bood ye o a yamug, o sid na a yamug. Ka one ku nidib ne suꞌuraug, ba me sid na kuu o wala. Linzug li a suꞌum ka Winaꞌam nidib mor modigir ka niŋ Winaꞌam yadda.
11 Ka m nye bunyua siꞌa ka o yi teŋin na n mor iila ayi wenne peꞌebil iila ne, ka pianꞌad wenne dragon pianꞌad siꞌem la.
12 Ka ziꞌe yiiga bunyua la saꞌan n mugus dunia ne dunia dim wusa ka ba zunꞌod yiiga bunyua one mor sapoꞌat line binꞌei la.
13 Ka maal bunnyalima titada hale ka ke ka bugum yi agol n sig dunia ni na ka nidib nye li.
14 Ka zaŋ bunnyalima bane ka li daa maal yiiga bunyua la zug la n maꞌ dunia nidib, ka yeli ba ye ba meem win, ka zunꞌe bunyua one daa diꞌe sapoꞌat ne suꞌuraug ka nan voe la.
15 Ka ba tis bunyua one peꞌes ayi la suer ka o tis win line wenne yiiga bunyua la vuꞌusum. Ka win la na tunꞌe pianꞌ ka me ke ka ba ku bane pu puꞌusidi li la wusa.
16 Ka bunyua la daa lem mugus nidib wusa, tadimnam ne kpiꞌemnam ne kpanꞌam dim ne noŋ dim laꞌam ne yamis ne bane kaꞌa yamise, ye ba niŋ zanbina ba datiuŋ nuꞌusin bee ba gbeꞌedin.
17 Ka soꞌ daa ku tunꞌe daꞌ bee kuos siꞌela, asee o mor bunyua la zanbin, line a o yuꞌur bee o kal.
18 Neꞌeŋa a yaꞌam. On mekama mor yaꞌam on na tunꞌe baŋ bunyua la kal la gbin, bozugo kal la gbin ane dau soꞌ yuꞌur. Li kal daa ane kobus yuobu ne piis yuobu ne ayuobu.