12
Poꞌa ne dragon la yela
1 Ka siꞌel nie arazana ni, ka mor gbin suaꞌadir. Poꞌa daa be, ka o fuug daa ane nintaŋ la. Ka nwadig la bee o noba teŋirin. Ka naꞌam zugpibig bee o zugin, ka nwadibibis pii ne ayi bee li ni.
2 Ka o mor poog ka o saꞌar la toe la ke ka o kaas n bood ye o duꞌa.
3 Ka siꞌel lem nie arazana ni yaꞌas, ka wenne bunyua zinꞌa titaꞌar line ka ba buon dragon, ka mor zuta ayopoi ne iila piiga. Ka naꞌam zugpibis pibili o zut la wusa.
4 Ka nwadibibis pudug zinꞌis atanꞌ ka dragon la uk o zuur n daꞌe pudugir yinni yiis saŋgbauŋin n bas dunia ni na. Ka o ziꞌe poꞌa one bood duꞌam la tuon n gur ye poꞌa la duꞌa ka o ob o biig la.
5 Ka poꞌa la duꞌa biribiŋ one na soꞌe buudi wusa ne paŋ. Ka ba daa ze biig la mor o keŋ Winaꞌam ne o naꞌam gbauŋ la saꞌan.
6 Ka poꞌa la zo keŋ moogin. Ka anina ka Winaꞌam maal zinꞌigi digil poꞌa la, zinꞌikan ka ba na gos o dabisa tusir ne kobus yi ne piisyuobu.
7 Ka zaba koꞌ arazana ni. Ka malek kpeenm Maikel ne o maleknam la zab ne dragon one laꞌas ne o maleknam ka ba zab ne Maikel.
8 Ka ba daa nyaŋ dragon ne o maleknam la, ka ba len kaꞌ suer na be arazana ni yaꞌasa.
9 Ka ba daa nok dragon titaꞌar la lobi yiis. Dragon ane waaf kan da be kudumin sa, ka o yuꞌur buon kikiris naꞌab, bee Sutaana, ka maꞌad dunia wusa la. Ka ba yiis o ne o maleknam lobi sigis dunia ni na.
10 Ka m wum kukotitaꞌar arazana ni ka li yel ye,
“Nannanna Winaꞌam faangir la ne o paŋ
ne o naꞌam saŋa la sid paa na
ka o Kiristo paŋ saŋa me paa na,
bozugo ba nok one gbiꞌidi ba baꞌabiis
niŋi Winaꞌam tuon nintaŋ ne yuꞌuŋ la
lobi yiis arazana ni.
11 Ka ba baꞌabiis la nok Peꞌebil la ziim
ne sida dine ka ba mool la n zab,
ka pu zo ba nyovur naare ka siak ye ba kpi.
12 Ka dinzugo arazana ne ban bane wusa be anina la maalimi sumalisim.
Amaa susaꞌaŋ be n tis teŋgbauŋ ne ateuk
bozugo Sutaana sigi ba ni na,
ka o sunf pelig hale
on miꞌ ye o saŋa kpelim biꞌela la zug.”
13 Ka dragon la baŋ ye ba nok o lob sigis dunia ni na la, o daa kad poꞌa one duꞌa biig la ye o gbanꞌe o.
14 Ka ba daa tis poꞌa la niiŋ titaꞌar kpukpama ayi ye o ianki keŋ o zinꞌig line be moogin la, zinꞌikan ka ba na gur o yuma atanꞌ ne pusuk n yiis o waaf la zaba ni.
15 Ka waaf la puus kuꞌom ka li yi o noorin na, wenne moꞌar ne n dol poꞌa la ye kuꞌom la di o.
16 Amaa teŋ daa suŋ poꞌa la tans tans mugulim n fuenn kuꞌom dine yi dragon la noorin na la.
17 Ka dragon la suunr pelig ne poꞌa la hale, ka o keŋ ye o zab ne poꞌa la yaas bane kpelim n siak Winaꞌam noyelug ka yet nidib Yesu yela la.
18 Ka dragon la ziꞌe moꞌar gbeug.