28
Yesu vuꞌug kumin la yela
(Maak 16.1-8; Luuk 24.1-12; Joon 20.1-10)
1 Ka Jew dim vuꞌusum daar n gaad la, Alasidaar bekeeung, ka Meeri one yi Magdala ne Meeri soꞌ isig keŋ ye ba kaae yaug la.
2 Ka teŋgbauŋ dam hale, bozugo Zugsob malek yi arazana sig na n bilig kugir la, ka ke yaug la noor, ka zinꞌi kugir la zug.
3 Ka o nindaa nyeen wuu saa iansug ne. Ka o fuug pelig hale nyain.
4 Ka dabiem kpenꞌ bane gur yaug la. Ka ba kirid wenne kuꞌum la.
5 Ka malek yel poꞌab la ye, “Da zoti dabiem, bozugo m miꞌ ye ya boodne Yesu, on ka ba daa ku la.
6 O kaꞌ kpelaa. O vuꞌugne wenne on daa yel siꞌem la. Kemi na gos ban daa digil o ziꞌig siꞌa la.
7 Kem toꞌoto n yel o nyaꞌandolib la ye, o vuꞌugiya ka bas kuꞌum. Ka o na deŋi ya tuon n keŋ Galilee teŋin. Anina ka ya na nye o. Li ane ameŋa ka m yeti ya.”
8 Ka poꞌab la bas yaug la ne dabiem amaa ba daa mor sumalisim bedego ka keŋ toꞌoto ye ba yel o nyaꞌandolib la.
9 Toꞌoto yim ka Yesu tuꞌosi ba n puꞌusi ba. Ka ba kena igin o tuon n puꞌus o.
10 Ka Yesu yeli ba ye, “Da zoti dabiem ka keŋ yel m baꞌabiis ye, ba kem Galilee teŋin, ka ba na nye m anina.”
Bane gur yaug la n yel siꞌel la yela
11 Ka ban daa waꞌae la, sogianam sieba bane guri yaug la leb teŋ poogin la yel maalmaan kpeenmnam la line naam wusa.
12 Ka ba laꞌas ne kpeenmnam sieba n gbanꞌe noor yinni ka tis sogianam ligidi bedego,
13 ka yeli ba ye, “Yelimi nidib la ye o nyaꞌandolib la kene yuꞌuŋ na ka ya gbisid ka ba zu niŋgbiŋ la.
14 Ka gomena la yaꞌa wum neꞌeŋa ti na maal suer ka ya yi yela ni.”
15 Ka sogianam la diꞌe ligidi la ka tum wuu ban yeli ba siꞌem la. Ka labaar kaŋa yadig n gilig Jew dimin ti paae nannanna nwa.
Yesu n nie o meŋ o nyaꞌandolib saꞌan la yela
(Maak 16.14-18; Luuk 24.36-49; Joon 20.19-23; Tuuma 1.6-8)
16 Ka nyaꞌandolib piinayinni la keŋ Galilee n du zuekan ka Yesu daa yeli ba ye ba keŋ la.
17 Ka ban nye o la, ka ba igini o tuon n naꞌas o, amaa sieba biꞌes o.
18 Ka Yesu liꞌeli ba saꞌan ka yeli ba ye, “M diꞌe paŋ kane be arazana ne dunia ni wusa.
19 Dinzugo kemi nidib buudi wusa ni, ka ke ka ba liebi nyaꞌandolib. Suumi ba Winaꞌam kuꞌom ne Baꞌ la yuꞌur zug ne Biig la yuꞌur zug ne Siig Suŋ la yuꞌur zug.
20 Ka paꞌali ba m noyelug kan wusa ka m tisi ya la, ye ba siaki li. Baŋimi ka m na be ne ya saŋa wusa n ti paae dunia naar.”