27
Ba n mor Yesu n keŋ Pilate saꞌan la yela
(Maak 15.1; Luuk 23.1-2; Joon 18.28-32)
1 Ka beug nie ka maalmaan kpeenmnam ne kpeenmnam sieba gbanꞌe noor ye ba ku Yesu.
2 Ka ba loo o more keŋ Pilate one a Gomena la saꞌan.
Judas kuꞌum la yela
(Tuuma 1.18-19)
3 Ka Judas one zam Yesu la n nye ka ba gbanꞌ o lo ye ba ku o la, ka o sunf saꞌam ka o mor anzurifa ligidi piistanꞌ la n lebi tis kpeenmnam la
4 ka yel ye, “M tum taalne man zam nid kane pu tum beꞌede ka ba na kuu o la.”
Ka ba yel ye, “Ti baꞌa kaeꞌ. Li ane fu zugin yela.”
5 Ka Judas lob ligidi la bas ka keŋ yul o meŋi kpi.
6 Ka kpeenmnam la zaŋ ligidi la ka ye, “Li ane ziim ligidi. Li pu nar ka ti zaŋ ligidi la n gendig puꞌusum yin ligidi nii.”
7 Ka ba gbanꞌe noor yinni ye ba nok ligidi la daꞌ yaꞌab yaꞌab poog ye ba mum saam.
8 Hale laꞌam ne zina ba kpelim buon zinꞌikan la ye ziim poog.
9 Ka lin ka Winaꞌam nodiꞌes, Jeremia da sob la sid niŋ sida ye, “Ka ba nok anzurifa ligidi piistanꞌ, ligikan la ka Israel yaas da gbanꞌe noor yinni ye ba yoo la
10 n daꞌ yaꞌab yaꞌab poog la wenne Zugsob la yeli m siꞌem la.”
Pilate n buꞌos Yesu la yela
(Maak 15.2-5; Luuk 23.3-5; Joon 18.33-38)
11 Ka Yesu ziꞌe Gomena la tuon ka o buꞌos o ye, “Fune a Jew dim naꞌab laa?”
Ka o lebis o ye, “Eenn, fune yel ala.”
12 Ka kpeenmnam la yel ye o niŋ siꞌelnam ka li a tuumbeꞌed. Ka o pu lebis siꞌela.
13 Ka Pilate yel o ye, “Fu pu wum ban yet siꞌem la wusa n ziꞌel uf laa?”
14 Ka o pu lebis siꞌel siꞌela, ka li lidig Gomena la hale.
Ba n koos Yesu ye o na kpi la yela
(Maak 15.6-15; Luuk 23.13-25; Joon 18.38-19.16)
15 Li da ane anwa kuꞌum malek gaadug daar tienr diꞌema saŋa la, ka li mor suer ye Gomena la yiis sarega nid yinni bas, on ka nidib bedego na gaŋ la.
16 Saŋkan la ba daa mor nimbeꞌug one be sarega ni, ka ba buon o Barabbas.
17 Ka nidib la laꞌas bedego na, ka Pilate buꞌosi ba ye, “Anoꞌon ka ya bood ye m basi, Barabbas bee Yesu, on ka ba buon Kiristo la?”
18 Pilate baŋ ye li ane nennim yela ka ba gbanꞌ Yesu.
19 Ka Pilate n zinꞌin saria kadib zinꞌigin la, ka o poꞌa tolim tis o labaar ye, “Yiisimi fu nuꞌug ne popielim daana la yela ni; ka man zaansim o yela yuꞌuŋ ka li daam man bedego.”
20 Ka kpeenmnam la nyaŋe ke ka nidib la yel Pilate ye, o basim Barabbas, ka ku Yesu.
21 Ka Gomena la lem buꞌosi ba yaꞌas ye, “Nidib ayi nwa, ya bood ye m basi anoꞌone?”
Ka ba lebis ye, “Barabbas.”
22 Ka Pilate buꞌosi ba ye, “Ya ye m niŋ Yesu, on ka ba buon Kiristo la wala?”
Ka ba tansid ye, “Kpaꞌam o dapuudir zug kuu o.”
23 Ka o buꞌosi ba ye, “O tuumbeꞌed a bo?”
Ka ba lem tansid bedego ye, “Kpaꞌam o dapuudir zug, kpaꞌam o dapuudir zug.”
24 Ka Pilate nye ka o ku nyaŋe niŋ siꞌel la, ka tukpeedug duꞌed bedego la, ka o nok kuꞌom pie o nuꞌusi ba wusa tuon ka yel ye, “Mam baꞌa kaeꞌ dau kaŋa kuub yela nii. Li ane ya yela.”
25 Ka nidib la lebis ye, “O kuub la yela doli tinam ne ti yaas.”
26 Ka o bas Barabbas tisi ba, ka ke ka ba buꞌ Yesu ne kpaꞌasa ka nok o tis ye ba kpaꞌ o dapuudir zug.
Sogianam n laꞌad Yesu la yela
(Maak 15.16-20; Joon 19.2-3)
27 Ka Gomena la sogianam mor Yesu kpenꞌ Gomena la yin ka ba wusa laꞌase giligi o,
28 ka pilig o fuug ka yeel o fuzenꞌug,
29 ka maal gonꞌos zugpibigi n pid o ka nok dansaar niŋi o datiuŋ nuꞌugin, ka laꞌad o yet ye, “Naa, Jew dim naꞌaba.”
30 Ka tubis nintoond mad o, ka nok dansaar nweꞌ o zug.
31 Ka bane laꞌ o naae la ka ba zaŋ fuzenꞌug la ka lebis o meŋ fuudi yeel o, ka mor o keŋ ye ba kpaꞌ o tabil dapuudir zug.
Ban kpaꞌ Yesu dapuudir zug la yela
(Maak 15.21-32; Luuk 23.26-43; Joon 19.17-27)
32 Ban daa yit la, ka nye dau one yi Sairene teŋin, ka o yuꞌur buon Simon, ka ba mugus o ye o ze dapuudir la.
33 Ka ba paae zinꞌisiꞌa ka li yuꞌur buon Golgota, li gbin ane zunwana zinꞌig.
34 Ka ba nok daam gendig ne buntoogi n tis o ye o nu. Ka on lemi li la ka zanꞌas nuub.
35 Ka ba kpaꞌ o dapuudir zug ka nok o fuud n bugul bugulum n pudugi tis ba meŋ,
36 ka yuꞌun zinꞌi gosid o.
37 Ka ba sobi tabili o zug baba yelkan zug ka ba gbanꞌ o la,
“Oŋa a Yesu, one a Jew dim naꞌab la.”
38 Ka ba me kpaꞌ naꞌayiis baba ayi n kpiꞌel Yesu, ka yinni be o datiuŋ ka oŋa la be o dagobug.
39 Ka bane gati anina baba ka nye o la gomisidi ba zut ka tuꞌud o yet ye,
40 “Fune yet ye fu na nwaꞌe Winaꞌam puꞌusum yir la ka lem meꞌ li daba atanꞌ poogin la, dinzugo faaenmi fu meŋ. Fu yaꞌa sid ane Winaꞌam Biiga, fun naamim dapuudir la zug sig na.”
41 Ala men ka maalmaan kpeenmnam ne gbauŋmiꞌidib ne kpeenmnam sieba laꞌad o n yet ye,
42 “O suŋid sieba, ka lee ku nyaŋe suŋ o meŋa. One n a Israel dim naꞌab la, din la o sigim dapuudir zug nannanna na, ka ti naan siak o.
43 O niŋ Winaꞌam yadda ye o a sida sob, ka Winaꞌam yaꞌa noŋ o, on faaenmi o nannanna, bozugo o ye o ane Winaꞌam Biig.”
44 Ka naꞌayiis bane ka ba kpaꞌa kpiꞌel o la me tuꞌud o ala.
Yesu kuꞌum la yela
(Maak 15.33-41; Luuk 23.44-49; Joon 19.28-30)
45 Ka nintaŋ buluŋ ka zinꞌig wusa lebug lik n ti paae zaamnoor, karefa atanꞌ.
46 Saŋkan la ka Yesu tans ne kukotitaꞌar ye, “Eli, Eli, lama sabaktani.” Li gbin ane ye, “M Winaꞌam, m Winaꞌam, bo ka fu basi ma?”
47 Ka bane ziꞌe kpiꞌe anina ka wumi li la sieba yel ye, “Dau la buoni Elija.”
48 Ka yinni zo keŋ zaŋ sooso n los danmiꞌisugin niŋ kikanꞌar zugin n tis o ye o nu.
49 Ka bama la yet ye, “Ti guꞌusim ka gos ye Elija na kena suŋ o bee.”
50 Ka Yesu tans ne kukotitaꞌar ka nyaan kpi.
51 Ka fuug lin beŋ Winaꞌam puꞌusum doog zinꞌis ayi la aaenn zugini, hale ti paae teŋin, zinꞌis ayi. Ka teŋ dam, ka tampiins nwaꞌ,
52 ka yaad yoꞌos ka popielim dim bedego bane daa kpi la vuꞌug kumin,
53 ka yi yaadin la na. Ka Yesu n ti vuꞌug kumin la ka ba kpenꞌ Jerusalem ka nidib bedego nye ba.
54 Ka sogianam ne ba kpeenm bane ziꞌe gur Yesu la nye ka teŋ la dam la, ne line naam la, ka dabiem kpenꞌe ba hale ka ba yel ye, “O sid ane Winaꞌam Biig.”
55 Ka poꞌab bedego bane yi Galilee n daa suŋid Yesu la, doli kena ziꞌe lalle sa n gosid o.
56 Ba sieba ane Meeri Magdalene ne Meeri one a Jemes ne Josef ma la, ne Zebedee biis la ma.
Ban mum Yesu siꞌem la yela
(Maak 15.42-47; Luuk 23.50-56; Joon 19.38-42)
57 Ka zaam maꞌae ka dau soꞌ paae na ka o yuꞌur buon Josef one yi Aramatea na, o ane kpanꞌa ka lem a Yesu nyaꞌandol,
58 ka kenn Pilate saꞌan na n sos o ye o tis suer ka o zaŋ Yesu niŋgbiŋ la keŋ mum. Ka Pilate bas noor ye ba tisim o.
59 Ka Josef zaŋ kuꞌum la vilig ne pien pielig,
60 ka mum kuꞌum la, on Josef meŋ yapaalig kane ka ba tu tampiing zug la. Ka bilig kugtitaꞌar ligil yaug la noor.
61 Meeri Magdalene ne Meeri soꞌ da zinꞌi anina kpaꞌa yaug la. Daar kan la ka Jew dim tiebid ba vuꞌusum daar yela.
62 Ka vuꞌusum daar kane pinꞌin daar kan zaam la, ka maalmaan kpeenmnam ne Farisee dim laꞌas Pilate saꞌan na
63 n yel o ye, “Zugsoba, ti tenr ye damaꞌa la da nan voe la, o da yel ye, ‘M na vuꞌug kumin daba atanꞌ daar.’
64 Dinzugo basim noor tisi ti ka ti gur yaug la suꞌuŋa n ti paae daba atanꞌ la, ka li yaꞌa kaꞌa ala o nyaꞌandolib la na zu kuꞌum la keŋ, ka maꞌ nidib ye o vuꞌug kumin, ka damaꞌa kaŋa nwa yuꞌun na gaad yiigin la.”
65 Ka Pilate yeli ba ye, “Ya mor sogianam bane gur, kel ka ba gur yaug la ka soꞌ ku nyaŋe kpenꞌe wuu yaname na bood siꞌem la.”
66 Ka ba keŋ niŋ ala, n zanbil kugir la ka ke ka sogianam guri li.