23
Yesu n saꞌal gbauŋmiꞌidib ne Farisee dim la yela
(Maak 12.38-39; Luuk 11.43, 46; 20.45-46)
1 Ka Yesu yel o nyaꞌandolib ne nidib la ye,
2 “Gbauŋmiꞌidib ne Farisee dim diꞌe Moses zinꞌig.
3 Dinzugo ba yaꞌa paꞌali ya siꞌem, yanam tum ala ka da gosidi ba tuuma, bozugo ba paꞌane ka pu dol ban paꞌan siꞌem laa.
4 Ba paꞌalug la wenne zetebisa ka ba lo ziil nidib ne, amaa ba meŋ ku siꞌisi li ne ba nuꞌubila ye ba suŋi baa.
5 “Bozugo ba zaŋ Winaꞌam gbauŋ la sobsieba n sobi niŋ daka bibisin n tabil ba gbeedin ne ba nuꞌusin. Ka paꞌasidi ba futusa waꞌalim.
6 Ba bood kpeenmnam zinꞌisa diꞌema maluŋin ne zinꞌisuma laꞌasug doodin,
7 ka bood ye nidib puꞌusidi ba daꞌasin ye, ‘Naa, paꞌana.’
8 “Da ke ka ba buoni ya ye ‘Paꞌana.’ Bozugo ya more paꞌan yinni maꞌaa, ka yanam wusa a baꞌabiis ne taaba.
9 Da buoni soꞌ ye, ‘Ti baꞌ’ dunia nwa nii. Bozugo ya more Baꞌ yinni, one be arazana ni.
10 Ka da ke ka soꞌ buoni ya ye, ‘Zugsoba.’ Bozugo ya more Zugsob yinni, one a Kiristo la.
11 One a kpeenm ya saꞌan o suꞌum ye o a ya tumtum.
12 Ka one bood ye o duꞌos o meŋ, Winaꞌam na sigis o. Ka one bood ye o sigis o meŋ Winaꞌam na duꞌos o.
Yesu n yel gbauŋmiꞌidib ne Farisee dim zam la yela
(Maak 12.40; Luuk 11.39-42, 44, 52; 20.47)
13 “Farisee dim ne gbauŋmiꞌidib bane a zam dima, ya na paam toog, bozugo ya yoꞌ Winaꞌam soꞌolim la ye nidib ku kpenꞌe. Yanam pu kpenꞌeda, ka me ku bas suer ye nidib kpenꞌe.
14 “Farisee dim ne gbauŋmiꞌidib bane a zam dima. Ya na paam toog, bozugo ya faand pokonya ya ka maꞌad nidib n puꞌusid Winaꞌam ne puꞌus waꞌa.
15 “Gbauŋmiꞌidib ne Farisee dim, bane a zam dima. Ya na paam toog, bozugo ya loꞌoŋidne ateuk ne teŋ bane lal hale. Ka ya yaꞌa paam nid yinni ka o siaki dol ya suer ya na ke ka o keŋ bugum teŋ hale n gat yanam meŋ noor ayiꞌiŋa.
16 “Yanam bane a tuongatib ka a zunzoos la, ya na paam toog, bozugo ya yet ye, soꞌ yaꞌa po panꞌalim ne Winaꞌam puꞌusum yin la, li ane zaalim. Amaa soꞌ yaꞌa po panꞌalim ne salima line be yir la poogin la, li ane tilas ye o na lebis o panꞌaluŋ la.
17 Zunzoos bane a zon ne, line kpiꞌema? Salima la bee puꞌusum yir line ket ka salima la a Winaꞌam bunsuma la?
18 Ya lem paꞌan ye soꞌ yaꞌa po panꞌalim ne Winaꞌam maan zinꞌig la li ane zaalim. Amaa soꞌ yaꞌa po ne piini line be maan zinꞌig la, li ane tilas ye o na lebis o panꞌaluŋ la.
19 Zunzoose, line kpiꞌema? Piini la bee maan zinꞌig line ket ka piini la a Winaꞌam bunsuma la?
20 Ka one po ne maan maalug bimbim la me po ne laꞌam ne line be anina wusa.
21 Ka one po ne puꞌusum yir la me po ne laꞌam ne Winaꞌam one be anina la.
22 Ka one po arazana la me po ne Winaꞌam naꞌam gbauŋ, ne one zinꞌi li zug la.
23 “Gbauŋmiꞌidib ne Farisee dim, bane a zam dima. Bozug ka ya pudugidi ya zenmaꞌasa zinꞌis piiga, ka yiisid yinni tisid Winaꞌam, ka pu niŋid yela bane kpiꞌem wada la poogin line a popielim ne nimbaanlzoor ne yadda niŋir laa. Li a suꞌum ka ya maalin yelbama ka da yiis sieba n base.
24 Yanam bane a tuongatib ka a zunzoose, ya yiisid pompuꞌos ya bunnuuda ni basid, ka lee von yugum.
25 “Gbauŋmiꞌidib ne Farisee dim bane a zam dima, ya na paam toog. Ya piesidi ya laas ne butiis nyaꞌaŋ la ka ba a nyain, ka ba poogin la peꞌel ne filuŋ ne fufum bunam.
26 Farisee dim bane wenne zunzoose! Piemi line be ya laas poogin yiiga la ka li nyaꞌaŋ me na a nyain.
27 “Gbauŋmiꞌidib ne Farisee dim bane a zam dima. Ya wenne yaad ka ba pent ne penti piel ne ka li venl hale, ka li poogin peꞌel ne kuꞌum konba ne ponꞌosug.
28 Ya ane ala men. Ya ket ka nidib tenꞌesid ye ya ane ninsuma ka ya poogin peꞌel ne zam ne tuumbeꞌed.
Yesu n yel gbauŋmiꞌidib ne Farisee dim saansug la yela
(Luuk 11.47-51)
29 “Gbauŋmiꞌidib ne Farisee dim, bane a zam dima. Ya meed Winaꞌam nodiꞌesidib yaad ka maan Winaꞌam ninsoma la yaad ka li venl hale.
30 Ka yel ye, yanam yaꞌa da beene ya yaanam saŋa la, ya ku suŋini ba n kuun Winaꞌam nodiꞌesidib laa.
31 Ya dine ya meŋ kaset ye ya ane bane da ku nodiꞌesidib la yaas,
32 ka kpelim naae lin ka ya yaanam da pinꞌil la.
33 “Yanam wiigi ne wiigi biise, ya na niŋ wala luak ne saria kadib daan la ka o ku kpenꞌesi ya bugum teŋine?
34 Dinzugo m tum nodiꞌesidib ne yaꞌamdim ne gbauŋmiꞌidib, ka ya na ku sieba, ka kpaꞌ sieba dapuuda zut, ka bu sieba ne kpaꞌasa ya laꞌasug doodin ka doli ba buga teŋ teŋ n namisidi ba.
35 Lin ke ka popielim dim wusa bane ka nidib ku dunia ni la ziim na zuoni ya zutin, line pinꞌil Abel kuub n ti paae Barakia biig, Zekaria kuub saŋa la, one ka ya ku Winaꞌam puꞌusum doog ne maan maalug bimbim teŋsuk la.
36 Sida ka m yeti ya ye, nwa me na paae zumaaŋ kaŋa nidib wusa.
Yesu n noŋ Jerusalem dim siꞌem la yela
(Luuk 13.34-35)
37 “Jerusalem dima, Jerusalem dima, bane kuud Winaꞌam nodiꞌesidib ka lobid ban ka Winaꞌam tumi ba la ne kuga. Noorin babiga ka m bood ye m laꞌase ya wenne nonyaꞌaŋ laꞌasedi o biise o kpukpama ni siꞌem la, ka ya me pu siakida.
38 Baŋimi Winaꞌam na basi ya ka ya teŋ lieb zaalim.
39 M yeti ya ye, ya ku len nyee m yaꞌasa, asee ka ya ti yel ye, ‘Winaꞌam yelsum be ne one kenna ne Zugsob la yuꞌur.’ ”