22
Poꞌapaal diꞌema siiliŋ la
(Luuk 14.15-24)
1 Ka Yesu lem pianꞌa ba ne siilis, ka yel ye,
2 “Winaꞌam soꞌolim la wenne naꞌatitaꞌar one maali o biig poꞌadiir diꞌema. Ka o tumi o tumtumnib ye ba buol nidib ban ka o daa deŋi tienn ba la.
3 Ka ba pu bood ye ba kenaa.
4 “Ka o lem tum tumtumnib sieba yaꞌas n ye, ‘Yelim ban ka m daa deŋi tienn la ye m tiꞌeb diibi ziꞌel, hale ka ku naꞌaraad ne konbbeda, ka siꞌel mekama wusa tiꞌebeya.’
5 “Ka ba zanꞌas ka keŋe ba ken. Ka yinni keŋe o poogin, ka yinni keŋe o kuosim zinꞌigin.
6 Ka bane kpelim la gbanꞌe o tumtumnib la tuꞌu ba yaal ka kuu ba.
7 Ka naꞌab la sunf pelig, ka o tum o zabzabidib, ka ba ku ninkuudib la ka nyuꞌe ba ya.
8 “Ka o buol o tumtumnib la ka ye, ‘Siꞌel mekama tiꞌebeya, ka man daa tienn sieba la kaꞌ ninsuma,
9 dinzugo kemi suekita ni, ka ya yaꞌa nye nidib siꞌem, yanam buolimi ba diꞌema la ni na.’
10 Ka tumtumnib la niŋ ala ka ba keŋ suekita ni ka buol ban nye sieba wusa, ninsuma ne nimbeꞌednam. Ka nidib peꞌel diꞌema zinꞌigin la.
11 “Ka naꞌab la keŋ ye o gos nidib la, ka nye ka dau soꞌ pu ye diꞌema fuugo.
12 Ka o yel o ye, ‘M zua, li niŋ wala ka fu kenn diꞌema la na, ka pu yee li fuugo?’ Ka o pu nyaŋe lebis siꞌela.
13 “Ka naꞌab la yel o tumtumnib ye ba loom o nuꞌus ne o noba yiis o lob likin sa. Ka anina ka nidib na ti kum ka gaꞌadi ba nyina.”
14 Ka Yesu lem yel ye, “Nidib bedego ka ba buon amaa biꞌela ka ba gaans.”
Lampo yoob la yela
(Maak 12.13-17; Luuk 20.20-26)
15 Ka Farisee dim keŋ gbanꞌad noor ban na niŋ siꞌem bend o, pianꞌad la poogin.
16 Ka ba tum ba nyaꞌandolib o saꞌan na ne naꞌab Herod nidib, ka ba yet ye, “Paꞌana, ti miꞌ ye fu ane yelmeŋir sob, ka paꞌan Winaꞌam suer suꞌuŋa, ka pu giꞌigid nidiba, ka me pu gaansid kpiꞌemnam ne tadimnama.
17 Yelimi ti fun tenꞌesid siꞌel. Li dol suer ye ti zaŋ lampo n tis naꞌab Kaisa bee li pu dol suere?”
18 Ka Yesu baŋi ba potenꞌebeꞌed la, ka yeli ba ye, “Zam dima, bo ka ya makid mane?
19 Bigisim man lampo laꞌaf yinni.” Ka ba mor laꞌaf na.
20 Ka o buꞌosi ba ye, “Anoꞌon foto ne anoꞌon yuꞌure n sobi tabili li ni?”
21 Ka ba yel ye, “Li ane Kaisa din.”
Ka o yeli ba ye, “Tisimi naꞌab Kaisa o din ka me tis Winaꞌam line a o din.”
22 Ka ban wum neꞌe la, ka li lidigi ba, ka ba bas o ka keŋ.
Kuꞌum vuꞌugir la yela
(Maak 12.18-27; Luuk 20.27-40)
23 Ka daar kan la ka Sadusii dim bane yiti yet ye kuꞌum ku vuꞌug la, kenn o saꞌan na ye ba buꞌos o siꞌel,
24 ka buꞌos o ye, “Paꞌana, Moses da sob ye, dau soꞌ yaꞌa kpi ka kaꞌ biiga, asee ka o bier bee o pitu di pokoonr la, n duꞌa biise tis one kpi la.
25 “Kelisima. Dau daa be ti saꞌan ne o pitib ayuobu, ka di poꞌa ka kpi ka pu mor biiga.
26 Ka one tiaꞌal la di pokoonr la ka me kpi. Ka atanꞌ sob la me niŋi ala n ti kaligi ba wusa.
27 Ka poꞌa la yuꞌun kpi.
28 Ka ba yaꞌa vuꞌug kumin ne, anoꞌone na soꞌe poꞌa la, ban wusa di o la zugo?”
29 Ka Yesu lebisi ba ye, “Ya yidig ne, yaname ziꞌ Winaꞌam gbauŋ la gbin ne Winaꞌam paŋ la zug.
30 Kuꞌum vuꞌugir daar la ba pu dit poꞌaba ka poꞌab me pu kun dapa. Ba wenne maleknam bane be arazana ni la.
31 Ka li yaꞌa ane kuꞌum vuꞌugir la, ya pu karem lin ka Winaꞌam yele ya ye,
32 ‘Man ane Abraham Winaꞌam ne Isaak Winaꞌam ne Jakob Winaꞌam la.’ Zugsob a Winaꞌam one pu kpiida, amaa o voe dinzug Winaꞌam saꞌan ka nidib wusa na voe.”
33 Ka nidib la wum ka on paꞌal neꞌeŋa la ka li lidigi ba.
Nooryelug kane kpiꞌem la yela
(Maak 12.28-34; Luuk 10.25-28)
34 Ka Farisee dim la wumi ye Yesu nyaŋ Sadusii dim la, ba laꞌas o saꞌan na.
35 Ka ba yinni, one a wada sob bood ye o zam o, ka buꞌos o ye,
36 “Paꞌana, wada kane kpiꞌem wada la wusa ni?”
37 Ka o lebis o ye, “ ‘Noŋimi Winaꞌam one a fu Zugsob la ne fu sunf wusa, ne fu siig wusa, ne fu yaꞌam wusa.’
38 Neꞌeŋa a wada kpiꞌeuŋ line a yiiga la.
39 Ka line tiaꞌal la wenne lina ye, ‘Noŋimi fu tiraan wuu fu meŋ ne.’
40 Ka Moses wada la ne Winaꞌam nodiꞌesidib sob siꞌel wusa la be ne bama nyaꞌaŋ.”
Kiristo la yela
(Maak 12.35-37; Luuk 20.41-44)
41 Ka Farisee dim laꞌas taaba ziꞌe la, Yesu buꞌosi ba
42 ye, “Ya tenꞌesid bo Kiristo yela? Anoꞌon yaaŋ a o?”
Ka ba lebis ye, “David yaaŋ.”
43 Ka o yeli ba ye, “Li niŋ wala ka David buon o ye, Zugsob, on pianꞌad lin ka Winaꞌam Siig Suŋ tis o la, ye
44 ‘Zugsob Winaꞌam yeli m Zugsob ye,
“Zinꞌinimi m datiuŋ,
hale ka m ti maal fu biꞌemnam
ka ba be fu noba teŋir.” ’ ”
Ka Yesu buꞌosi ba ye,
45 “David yaꞌa buon o ye, Zugsoba, li niŋ wala ka o a David yaaŋa?”
46 Ka soꞌ pu lem nyaŋe lebis o siꞌela. Ka dabis kan la gaad, soꞌ pu lem nyaŋe buꞌos o siꞌel yaꞌasa.