17
Yesu n tiak o meŋ la yela
(Maak 9.2-13; Luuk 9.28-36)
1 Ka daba ayuobu nyaꞌaŋ la, ka Yesu zaŋ Piita ne Jemes ne Jemes baꞌabiig Joon n du zuetitaꞌar zug. Ka ban gullim be anina.
2 Ka o tiak ba tuon. Ka o nindaa niene nyain wuu nintaŋ ne. Ka o fuud pelig hale.
3 Ka ba nye Moses ne Elija, ka ba kena n sonsid ne Yesu.
4 Ka Piita yel Yesu ye, “M Zugsoba, li a suꞌum ye ti be kpela. Fu yaꞌa siak, m na tiꞌ suga atanꞌ n tis fun yinni, Moses yinni, Elija me yinni.”
5 Ka on nam kpelim pianꞌad la, ka saŋgbauŋ line nie nyain kena n ligili ba. Ka kukor yi saŋgbauŋ la ni n yel ye, “Oŋa ane m binoŋir, one paae m yaꞌam bedego. Kelisimi ne o pianꞌad.”
6 Ka o nyaꞌandolib la n wum la, ka ba vabin teŋin ne dabietitaꞌar.
7 Ka Yesu liꞌel n siꞌisi ba n yel ye, “Duomi, ka da zot dabiem.”
8 Ka ba godig ba zut n gos, ka pu lem nye nidaa, asee Yesu gullim.
9 Ka ban sigid zuer zug la na, Yesu saꞌali ba ye, “Mit ka ya yel nid bun kan ka ya nye la, hale ka Ninsaal Biig la ti vuꞌug ka bas kuꞌum.”
10 Ka o nyaꞌandolib la buꞌos o ye, “Wala ka gbauŋmiꞌidib yel ye, Elija na deŋi kena?”
11 Ka o lebis yeli ba ye, “Li ane ameŋa ye Elija na deŋ kena, ka lebis siꞌel wusa li zinꞌigin.
12 Amaa man yeti ya ne ye, Elija pun kena sa, ka ba pu baŋ on a soꞌ, ka niŋ o ban bood siꞌem la. Ala men ka Ninsaal Biig la na nye namisugi ba nuꞌusin.”
13 Ka o nyaꞌandolib la yuꞌuŋ baŋ ye o yeti ba ne Joon one suud nidib kuꞌom la yela.
Yesu n tiꞌeb kpisiŋkpiꞌir daan la yela
(Maak 9.14-29; Luuk 9.37-43a)
14 Ka ban paae nidib bedego la saꞌan la ka dau soꞌ kena igin Yesu tuon,
15 ka yel ye, “M Zugsoba, zomi m biig nimbaanlig ka o lutne kpisiŋkpiꞌir ka li namisid o hale. Ka li yaꞌa yiti due o, o lutne bugumin bee kuꞌomin.
16 Dinzug ka m mor o na amaa fu nyaꞌandolib la pu nyaŋe tiꞌeb oo.”
17 Ka Yesu lebisi ba ye, “Zumaaŋ kaŋa nidib bane kaeꞌ yadda ka me kaꞌa yelmeŋir dim la. Saŋa wala ka ya bood ye m be ne ya? Saŋa wala ka ya bood ye m gbenn ne ya?” Ka o yel dau la ye, “Mor biig la na.”
18 Ka Yesu kad kikirig la biig la ni, ka anina yim ka biig la nye laafe.
19 Ka nyaꞌandolib la keŋ Yesu saꞌan baanlim na buꞌos o ye, “Bo niŋ ka ti pu nyaŋe kad kikirig la yiise?”
20 Ka o lebisi ba ye, “Ya yadda pu zuꞌe la zug. Li a sida ka m yeti ya ye ya yaꞌa niŋ Winaꞌam yadda hale ka li kudim pood biꞌela nwa wenne soꞌod biili ne, ya na tunꞌe yel zuer kaŋa ye, ‘Toom keŋ zinꞌisiꞌa sa,’ ka li na niŋ ala. Ka siꞌel kaeꞌ ka ya ku nyaŋe maali.
21 Asee Winaꞌam sosug ne noloor ka ya na tunꞌe kad neꞌenam buudi.”
Yesu lem pianꞌa o kuꞌum la yela
(Maak 9.30-32; Luuk 9.43-45)
22 Ka nyaꞌandolib la laꞌas taaba n kenn Galilee na, ka Yesu yeli ba ye, “Ba na ti gbanꞌe Ninsaal Biig la n niŋ o nidib nuꞌusin
23 ka ba ku o, ka daba atanꞌ daar o na ti vuꞌug ka bas kuꞌum.” Ka ba sunya saꞌam bedego.
24 Ka Yesu ne o nyaꞌandolib la paae Kapeenum teŋin, ka Winaꞌam puꞌusum yir lampodiꞌesidib buꞌos Piita ye, “Ya paꞌan la yood puꞌusum yir lampo bee?”
25 Ka o lebis ye, “O yood walla.” Ka Piita n kul yin la Yesu deŋin pianꞌ o ye, “Simon, fu tenꞌesid ye bo? Anoꞌon saꞌan ka dunia nwa naꞌanam diꞌesid ba lampo? Teŋin dimin bee bane a saam la ni?”
26 Ka Piita ye, “Saam la ni.” Ka Yesu yel o ye, “Ala teŋin dim la baꞌa kaeꞌ.
27 Tiname pu bood ye ti ziemi ba la zug, kem los guꞌa beuŋin la ka fun gbanꞌe ziŋ siꞌa yiiga la, fun yaꞌami o noor ka fu na nye anzurifa laꞌaf line ka fu na yo man ne fu yela.”