16
Ba n bood ye Yesu maal bunnyalima la yela
(Maak 8.11-13; Luuk 12.54-56)
1 Ka Farisee dim ne Sadusii dim sieba kenn Yesu saꞌan na n bood ye ba bend o, ka yet o ye o maal bunnyalima line sid yi arazana ni.
2 Ka Yesu lebis ye, “Winig yaꞌa kpenꞌed ya yet ye zinꞌig la a nyain bozugo saŋgbana la a zenꞌug la zug.
3 Ka bekeeung ka ya yet ye saa na ni, bozugo saŋgbana la a zenꞌug ka sobug la zug. Ya tunꞌe paꞌal saŋgbana la a siꞌem, amaa ya ku nyaŋe baŋ zabina line paꞌan saŋa la a siꞌem.
4 Zumaaŋ kaŋa nidib bane a nimbeꞌednam ne dianꞌad tuuma dim ka pu dol Winaꞌam suer la, bood tuumnyalima amaa ba ku nyee asee Jona tuumnyalima zabin la.” Ka o basi ba ka toom.
Farisee dim ne Sadusii dim dabin la yela
(Maak 8.14-21)
5 Ka nyaꞌandolib la loꞌoŋ beuŋ gbeug la sa, ka tam bodobodo morem.
6 Ka Yesu yeli ba ye, “Guꞌusimi ya meŋ ne Farisee dim ne Sadusii dim dabin la yela.”
7 Ka nyaꞌandolib la pianꞌad ne taaba ye, “Tiname pu mor bodobodo na la zug ka o yel ala.”
8 Ka Yesu baŋi li ka buꞌosi ba ye, “Yanam bane yadda niŋir pood nwa, bo ka ya pianꞌad yaname pu mor bodobodo la yela? Ya nam pu baŋ li gbin nee?
9 Ya pu tenr bodobodo gbila anu la ka dap tusa anu daa di laa? Ka ya daa vaae dikane daa kpelim la n peꞌel peeda ala?
10 Bee bodobodo gbila ayopoi la ne dap tusa anaasi la? Peeda ala ka ya daa vaae dikane daa kpelim la?
11 Ka bo ka ya pu baŋ ye m pu pianꞌadi ya bodobodo yela? Guꞌusimi yanam ne Farisee ne Sadusii dim dabin la yela.”
12 Ka ba naam baŋ ye o pu yeli bane ye ba guꞌusimi ba meŋ ne dabin kane gendig bodobodo ni laa, amaa Farisee dim ne Sadusii dim paꞌala la.
Piita n yel Yesu a soꞌ la yela
(Maak 8.27-30; Luuk 9.18-21)
13 Ka Yesu paae Sizerea Filipi teŋin ka buꞌos o nyaꞌandolib la ye, “Nidib yet ye man one a Ninsaal Biig la a anoꞌone?”
14 Ka ba lebis n yel ye, “Sieba ye, fu ane Joon, one da suud nidib kuꞌom la. Ka sieba ye Elija. Ka sieba ye, Jeremia, bee one a Winaꞌam nodiꞌes soꞌ.”
15 Ka o lebis n buꞌosi ba ye, “Ka yanam on yet ye man a anoꞌone?”
16 Ka Simon Piita lebis n yel o ye, “Fu ane Kiristo, Winaꞌam one voe la Biig.”
17 Ka Yesu lebis n yel o ye, “Simon, Joon biig, yelsum be fu zug, bozugo li kaꞌ ninsaal paꞌal fu nwaa, amaa li ane m Baꞌ one be arazana ni la.
18 M yet uf ye, fu ane Piita. Ka tampiing kaŋa ka m na ziꞌel m yadda dim laꞌasug. Ka kuꞌum ku mor paŋ ne baa.
19 M na tis uf arazana soꞌolim saafibiis. Bun lin wusa ka fu na lo dunia nwa zug la, lin me na lo arazana ni. Ka bun lin wusa ka fu na idig dunia nwa zug la, lin me na idig arazana ni.”
20 Ka Yesu saꞌal o nyaꞌandolib la ye, ba da yel soꞌ ye, one a Kiristo laa.
Yesu n paꞌal o kuꞌum la yela
(Maak 8.31-9.1; Luuk 9.22-27)
21 Saŋkan la ka Yesu pinꞌil n paꞌan o nyaꞌandolib la ye, “Li a tilas ye m keŋ Jerusalem n paam namisug bedego teŋin kpeenmnam ne Winaꞌam maalmaan kpeenmnam ne gbauŋmiꞌidib saꞌan. Ka ba na ku m. Ka daba atanꞌ daar ka m na vuꞌug kumin.”
22 Ka Piita buol o n yi kpeŋ n pinꞌil n saꞌan o ye, “Winaꞌam na yiis uf yelkaŋa ni, ka li da niŋ uf alaa.”
23 Ka Yesu fendig n yel Piita ye, “Lem m nyaꞌaŋ, Sutaana nwa. Fu giŋid man ne. Fu tenꞌesug ane ninsaal potenꞌer ka kaꞌ Winaꞌam din ne.”
24 Ka Yesu yel o nyaꞌandolib la ye, “Nid yaꞌa bood ye o dol man, asee ka o zanꞌas o meŋ boodim ka zaŋ o kuꞌum dapuudir n dol man.
25 On wusa bood ye o suaꞌ o nyovur la, o nyovur la na bodig. Amaa on wusa n bas o nyovur man zug la, o na nye o nyovur.
26 Nid yaꞌa nye dunia nwa laꞌad wusa, ka o meŋ nyovur la bodig, o nyood a bo? Bozugo siꞌel kaeꞌ dunia ni ka nid na zaŋ n tiak o nyovure.
27 Ninsaal Biig la na ti kena ne o Baꞌ naꞌam line nyeen pil pil ne o maleknam, ka saŋkan la o na tis soꞌ kam wusa yood line zemisi ba tuuma.
28 Yelmeŋir ka m yeli ya ye, ninsieba ziꞌe kpela ka ku kpii, ka na nye Ninsaal Biig la n kenna ne o naꞌam.”