11
Yesu paꞌalug Joon kibar la yela
(Luuk 7.18-23)
1 Ka Yesu n paꞌali o nyaꞌandolib piinayiŋa la naae la, ka o yi zinꞌikan keŋ teens bane kpiꞌe la n moon Winaꞌam labaar ka paꞌan nidib la.
2 Ka Joon n da be sarega ni la ka wum Kiristo tuuma labaar, ka tum o nyaꞌandolib Yesu saꞌan,
3 ye ba buꞌos ye, “Fune a one na kenna la bee ti gur soꞌ nyaꞌaŋa?”
4 Ka Yesu lebis ye, “Kem yeli Joon yanam wum ka nye siꞌel.
5 Zunzoos nyet ka ponda ken ka kukoma nye laafe, ka tobkpidanam wum ka bane kpi vuꞌug, ka ba moon labasuŋ n tisid noŋdim.
6 Yelsum be ne one pu biꞌesid ne mam.”
Yesu paꞌalug Joon la yela
(Luuk 7.24-35)
7 Ka ban n keŋ la ka Yesu pianꞌadi paꞌan nidib la Joon yela ye, “Bo bun ka ya daa keŋ moogin ye ya gose? Ya daa keŋ ye ya gos mood ban ka sisiꞌem miꞌimi ba la bee?
8 Ka bo yela ka ya keŋe? Ya keŋ ye ya nye dau kane ye fusuma la bee? Tenꞌesimi, bane ye fusuma la be naꞌanam yaan.
9 Ka bo yela ka ya keŋe? Ya keŋ ye ya gos Winaꞌam nodiꞌes la bee? M yeti ya ye, eenn, asida. On ka ya keŋ gos la gaad Winaꞌam nodiꞌes siꞌa.
10 Dau kaŋa a one yela ka li da sob la ye,
‘Gosimi m tumi m tumtum fu tuon na,
ka o na maali fu suer nyain.’ ”
11 Ka Yesu yel ye, “Soꞌ kaeꞌ ka ba duꞌa o ka o gaad Joon ne. Amaa one a kpaanr Winaꞌam soꞌolim ni la gaad Joon.”
12 Joon labaar moolug saŋa la n ti paae nannanna nwa la, nidib daa mugusidi ba meŋ ye ba paam Winaꞌam soꞌolim la kpenꞌ. Ka zigid ye ba keŋ tuone kpenꞌ.
13 Winaꞌam nodiꞌesidib wusa ne wada kan ka Moses da tis la sobne soꞌolim la yela hale ka Joon nan kaeꞌ.
14 Ya yaꞌa bood ye ya baŋi li gbin, Joon ane Elija one na kenna la.
15 One mor toba, n bood ye o wum, on baŋin li gbin suꞌuŋa.
16 “Bo ka m na zaŋi n mak ka li wen wuu zumaaŋ kaŋa nidiba? Ba wenne biise zinꞌi daꞌani buoni ba taaba ye,
17 ‘Ti piebid wiis ka ya pu waꞌada, ka kaasid kuur ka ya pu fabin na.’
18 Ka Joon kena lood noor ka pu nuud daam ka ba yel ye, ‘Kikirise dol o.’
19 Ka Ninsaal Biig la kena dit ka nuud ka ba yel ye, ‘O ane diis ne danuud, ka o zuanam ane lampodiꞌesidib ne ninyood.’ Yaꞌam sob tuuma paꞌan ye o mor yaꞌam.”
Yesu saꞌal teens bane pu niŋ o yadda la
(Luuk 10.13-15)
20 Ka o zerigi teens bane ka o tum tuumnyalima bedego ka ba pu tiake ba tuumbeꞌed la. Ka yel ye,
21 “Korazin dima, yel toꞌog be ya zug. Besaida dima, yel toꞌog be za zug men. Bozugo tuumnyalima line tumi ya saꞌan nwa yaꞌa da tumin ne Taya ne Sidon teensin ba naan tiakin ka yee boto fuud ka bug tampeligim line paꞌal ye ba tiakeya.
22 Ala zug ka m yeti ya ye, Winaꞌam saria kadib daar la, li na toe tisi ya n gaad Taya ne Sidon dim.
23 Ne yanam Kapeenum dima, ya bood ye ya duꞌosi ya meŋ arazana nii? Ya na sig kuꞌum zinꞌigin. Tuumnyalima line ka m tum ya saꞌan nwa yaꞌa da tumin Sodom teŋin li naan kpelim been zinkaŋa nwa.
24 Ka m yeti ya ye Winaꞌam saria kadib daar la, li na toe n tisi ya n gaad Sodom dim.”
Yesu paꞌalug Baꞌ la ne Biig la yela
(Luuk 10.21-22)
25 Saŋkan la Yesu yel Winaꞌam ye, “M Baꞌ one a arazana ne dunia Zugsoba, m puꞌus uf ne fun suaꞌad yela nwa ka yaꞌam dim ne baŋidib ku baŋi li gbin la, amaa fu ke ka biis baŋi li.
26 Eenn m Baꞌ, li ane fu meŋ yaꞌamboodim.”
27 Ka Yesu yel nidib la ye, “M Baꞌ pun tisi m siꞌel wusa. Soꞌ ziꞌ Biig laa, asee Baꞌ la. Ka soꞌ me ziꞌ Baꞌ laa, asee Biig la ne ban ka Biig la bood ye o nie paꞌali ba o Baꞌ la.
Yesu buol nidib o saꞌan ye ba nye vuꞌusum
28 “Kemi mam saꞌan na, yanam ban wusa ze zetebisa genn la, ka mam na tisi ya vuꞌusum.
29 Zaŋimi m yokisin daug la n paꞌal ya niŋgoya zug ka zamis mam saꞌan. Ala ka ya na nye vuꞌusum, bozugo m ane sumbugusum daana.
30 M yokisin daug la fakne ka m ziid la pu tebisa.”