10
Yesu nyaꞌandolib piinayiŋa la yuda
(Maak 3.13-19; Luuk 6.12-16)
1 Ka Yesu buol o nyaꞌandolib piinayiŋa la laꞌas taaba ka tisi ba paŋ ye ba kad kikiris, ka maꞌae banꞌas ne wiim buudi wusa.
2 O Tumtumnib piinayiŋa la yuda nwa. Yiiga sob ane Simon, on ka ba buon ye Piita la, ne o pitu Andrew, ne Zebedee biis Jemes, ne Joon,
3 ne Filip ne Bartolomew, ne Tomas, ne Mateo, on a lampodiꞌes la, ne Jemes, Alfeus biig, ne Tadus,
4 ne Simon, o ane nidib bane bood ye Jew dim zabi ba teŋgbauŋ yolisim zug la yinni, ne Judas Iskariot, one na zam Yesu la.
Piinayi la na tum siꞌem la yela
(Maak 6.7-13; Luuk 9.1-6)
5 Piinayi kaŋa nwa ka Yesu da tumi ba ka yeli ba ye, “Da keŋ buudi kan kaꞌa Jew dim la saꞌanee, ka da kpenꞌ Samaria dim teŋinee.
6 Amaa kemi Israel dim saꞌan bane wenne peꞌebane bodig la.
7 Ya yaꞌa ken, yanam moolim ye, ‘Winaꞌam soꞌolim la liꞌel ne.’
8 Ka maꞌae banꞌadnam, ka vuꞌug bane kpi, ka maal kukoma ka ba nye laafe, ka kad kikiris. Ya diꞌedne ka pu yooda, dinzugo tisimi ka da diꞌe yoode.
9 Da zaŋ salima ligidi bee anzurifa ligidi bee koba ya buorisnee.
10 Da zanl kolug sueren bee banaas ayi bee taꞌada bee duore. Li nar ka one tum tuuma la me di.
11 “Ya yaꞌa kpenꞌ teŋsiꞌa yanam iem ninsuŋ yire sig ka kpelim anina n ti paae ya yiib saŋa.
12 Ya yaꞌa kpenꞌ yin la, yanam puꞌusimi ba.
13 Ka ba yaꞌa diꞌe ya, yanam ke ka ya sumalisim sigi ba ni. Amaa ba yaꞌa zanꞌasi ya, yanam ke ka ya sumalisim kpelimi ya saꞌan.
14 Ka yikan bee teŋkane pu diꞌe yaa bee kelisidi ya pianꞌade yanam kpaꞌasimi ya noba titan ka yi.
15 Asida sida ka m yeti ya ye saria kadib daar la, teŋkan dim na nye toog n gaad Sodom ne Gomorra nidib.”
Yesu paꞌalug namisug la yela
(Maak 13.9-13; Luuk 21.12-17)
16 Ka Yesu lem yel ye, “M tumi ya wenne peꞌesi na be kunduna soogin. Ala zugo more yaꞌam wuu wiigi ne, ka a suꞌuŋa wenne naꞌadawana ne.
17 “Guꞌusimini ya meŋ ne nidib. Ba na ti gbanꞌe ya more keŋ koto ni, ka buꞌu ya ba laꞌasug doodin.
18 Mam zug ba na gbanꞌe ya keŋ kpeenmnam ne naꞌanam tuon. Ka ya na tuꞌasi mam labasuŋ la tisi ba, ne buudi kane kaꞌ Jew dim la.
19 Ka ba yaꞌa more ya na, da ke ka li paki ya, yaname na yel siꞌela bee yaname na pianꞌ siꞌela. Bozugo Winaꞌam Siig Suŋ na tisi ya yanam na pianꞌ siꞌel saŋkan.
20 Pianꞌabane ka ya ye ya pianꞌa la, kaꞌa ya dinne. Li ane ya Baꞌ Winaꞌam Siig Suŋ one be ya ni la pianꞌad.
21 “Baꞌabiig na gbiꞌi o baꞌabiig n ke ka ba kuu o. Ka saamnam me na niŋ ala ne ba biis. Ka biis me na gbiꞌi ba duꞌadib n ke ka ba kuu ba.
22 Ka nidib bedego na kisigi ya, man yuꞌur la zug. Ka one modig ka doli m n ti paae siꞌel mekama wusa naar saŋa, o na nye faangir.
23 Ba yaꞌa namisi ya teŋ siꞌa, yanam zo toom teŋ. Mam yeti ya ne ye, ya ku nyaŋe naae ya tuuma la Israel teensin ka Ninsaal Biig la nyaan kenaa.
24 “Nyaꞌandol pu gati o tuon soba. Ka samkpanꞌas me pu gati o zugsoba.
25 Li suꞌum ka nyaꞌandol wen wuu o tuon sob ne, ka samkpanꞌas wenne o zugsob ne. Ka ba yaꞌa tuꞌ yidaan ye o a Beelzebul, ba na tuꞌ yidim la ka li gaadi ala.
Yesu paꞌalug one ka ba na zo la yela
(Luuk 12.2-7)
26 “Da zoti nidib dabiem. Siꞌel kaeꞌ ka ba ligili li ka li ku lake. Ka line suaꞌ wusa na nie paalo.
27 Man yeti ya siꞌel likin nwa, asee ka ya nie li nintaŋin. Ka mane nyaꞌam siꞌel ya toba ni nwa, moolimi li dood zug ka soꞌ wusa wum.
28 Da zoti dabiem ne bane kuud niŋgbina, ka ku nyaŋe ke ka siig la kpi laa. Amaa zomi Winaꞌam one na nyaŋe saꞌam niŋgbina ne siig wusa bugum teŋin.
29 Ba pu kuosid niimbibisa ayi kobire? Amaa baa yinni ku lu teŋin n kpii, asee ka ya Baꞌ Winaꞌam siaki li.
30 Hale zuobid line be ya zutin la, Winaꞌam miꞌi li kal.
31 Dinzugo, da zoti dabiem. Ya mor nyood gaad niimbibis bedego.
Yesu paꞌalug on siakir ne on kiꞌisug la yela
(Luuk 12.8-9)
32 “On mekama siak mam nidibin ye o doli man, m me na siak o m Baꞌ Winaꞌam tuon arazana ni.
33 Ka on mekama kiꞌis mam nidibin ye o ku doli ma, m me na kiꞌis o m Baꞌ Winaꞌam tuon arazana ni.”
Yesu paꞌalug sumalisim ne zabir la yela
(Luuk 12.51-53; 14.26-27)
34 “Da tenꞌes ye mam kena ye m mor sumalisim dunia ni naa. Kaꞌ alaa. Li ane zabir ka man more kena.
35 M ken la zug ane ye, ‘biribis zab ne ba saamnam, ka bipumis zab ne ba manam, ka bipoꞌab me zab ne ba sidib manam.
36 Ka nid biꞌemnam na aa o meŋ yidim.’
37 “Ka on mekama noŋ o saam bee o ma gati m, o pu nar ne o na doli ma. Ka one mekama noŋ o biribiŋ bee o bipuŋ gati m, o pu nar ne o na doli ma.
38 Li ane ala men tis on mekama pu nok o dapuudir zee n doli ma.
39 Ka on mekama guri o nyovur, na koꞌoŋi li. Amaa one basi o nyovur mam dolim zug, na nyee li.
Yesu n paꞌan line mor nyood la yela
(Maak 9.41)
40 “On mekama diꞌe ya, o diꞌene man. Ka on mekama diꞌe man, o diꞌene one tum man na la.
41 Ka on mekama diꞌe Winaꞌam nodiꞌes on a Winaꞌam nodiꞌes la zug, o na diꞌe nyood wenne Winaꞌam nodiꞌes la ne. Ka on mekama diꞌe popielim sob, on a popielim sob la zug, o na diꞌe nyood wenne popielim sob la ne.
42 Ka on mekama kulum nok kuꞌom maꞌasig n tisi m nyaꞌandolbibis nwa yinni, on aa m nyaꞌandol la zug, m yeti ya asida ye, o na diꞌe o nyood.”