8
Yesu one a maalmaan kpeenm la yela
1 Nwa a ti pianꞌad la wusa zug. Ti mor maalmaan kpeenm wuu tiname deŋim pianꞌ soꞌ yela siꞌem la, ka o zinꞌi arazana ni, kpiꞌem sob naꞌam gbauŋ datiuŋ.
2 O tum Winaꞌam tuuma Winaꞌam zinꞌig ameŋa ni line ka o meŋ maal, ka kaꞌ fuug doog kane ka saalib maali n puꞌusid Winaꞌam laa.
3 Ba gaŋ maalmaan kpeenm wusa ye ba tis piini ka maal maana tis Winaꞌam. Ala ka li nar ye maalmaan kaŋa nwa me mor siꞌel n na tis Winaꞌam.
4 Ka o yaꞌa bein dunia nwa ni, o ku aan maalmaan baa biꞌelaa, bozugo maalmaan bane tisid piini line dol wada suer la be.
5 Ba tuuma zinꞌig nwaasne Winaꞌam zinꞌig line be arazana ni. Ka Moses n da ye o tiꞌ fuug doog line na aa Winaꞌam zinꞌig la, Winaꞌam da paꞌal o ye, “Baŋim ka maali li ka li wen wuu bun kan ka m paꞌal fu zuer zug la.”
6 Ka lin a siꞌem la nonaar kan ka Kiristo a nuꞌunweꞌed la, a suꞌum n gat nonaar kudug la, bozugo li mor noziꞌel suma. Ala yaꞌas ka o tuuma me a suꞌum n gati ba tuumkudug la.
7 Ka nonaar yiiga la yaꞌa da pu moren gbadaa, li pu narin ye ti mor nonaar yinni yaꞌase.
8 Ka Winaꞌam da nye ka gbada be la, ka yeli o gbauŋin ye,
“ ‘Dabisa la na kena ka m na maal nonaar paal,
man ne Israel dim ne Juda dim zug.
9 Li ku wenne nonaar kan ka m da maal ne ya yanam,
saŋkan ka m da gbanꞌe ba nuꞌug
ka doli ba yi Egipiti teŋin la.
Ka ba pu dol nonaar la suer suꞌuŋa
dinzug ka m basi ba.’
Man Zugsob n yet ala.
10 ‘Neꞌeŋa a nonaar kan ka m na maal ne Israel dim
dabisbama nwa nyaꞌaŋ la.’
Man Zugsob yeti ya ye,
‘M na noki m wada la niŋ ya potenꞌerin,
ka sobi li ya sunya ni.
Ka m na aa ba Winaꞌam,
ka ban me na aa m nidib.
11 Soꞌ kaeꞌ na ti lem paꞌani o tiraan bee o baꞌabiig ye,
“Baŋim Zugsob laa,”
bozugo ba wusa na baŋ man,
line pinꞌil ne kpeenm n ti paae biig.
12 M na zoo ba nimbaanlig
ka tisi ba suguru ba tuumbeꞌed yela,
ka ku lem tienn li yela yaꞌas baa biꞌela.’ ”
13 Ka Winaꞌam n buon nonaar kaŋa ye, “bunpaal” la zug, ke ka yiiga bun la a bunkudir. Ka line lieb bunkudir ka lem kaꞌa tuum la na bodig.