7
Maalmaan Melkizedek la yela
1 Melkizedek nwa, one daa a Salem naꞌab ne Winaꞌam one gat siꞌel wusa la maalmaan. Abraham n daa keŋ tanpin n nyaŋe naꞌanam anaasi ka kun na la, Melkizedek tuꞌos o ka niŋ o zug bareka.
2 Ka Abraham n zabi nyaŋ ka nok laꞌasieba la wusa, o yiisne yinni piiga puugin n tis Melkizedek. Melkizedek yuꞌur la gbin ane ye, “Popielim naꞌab,” ka lem a Salem naꞌab, ka li gbin ane “Sumalisim naꞌab.”
3 Siꞌel kaeꞌ paꞌal ye o mor baꞌ ne ma ne yaanama. Siꞌel kaeꞌ me paꞌal o duꞌam ne o kuꞌum saŋa, ka o kpelim a maalmaan saŋa wusa wenne Winaꞌam Biig la ne.
4 Baŋimi Melkizedek n mor kpiꞌeuŋ siꞌem. Abraham, ti yaa yalin yak tis o yinni piiga wusa puugin line a laꞌad line ka ba nok zaba ni la.
5 Ka Winaꞌam tis noor siꞌa ye bane a Levi yaas ka me a Abraham yaas ka a Winaꞌam maalmaanib la, diꞌes nidibin la ayinni piiga wusa puugin. Ba diꞌesi ba buudi ni hale baa ban a Abraham yaas la.
6 Ka Melkizedek kaꞌa ba yaanam yaaŋa, amaa o diꞌe Abraham saꞌan ayinni piiga wusa puugin, ka niŋ Abraham zug bareka, on Abraham one diꞌe Winaꞌam noziꞌela la.
7 Li a sida ye one tisid yelsum gat one diꞌedi li.
8 Ka maalmaanib la yela la, ka bane na kpiid la diꞌed yinni pudugir piiga la ni, ka nyaꞌal ka Melkizedek one ka Winaꞌam gbauŋ sob ye o voe la, me niŋidi ala.
9 Soꞌ tunꞌe yel ye hale Levi meŋ one diꞌesid ayinni piiga wusa puugin la da yo yinni piiga wusa puugin ka li naan o yaab Abraham nuꞌusin, n keŋ Melkizedek saꞌan,
10 bozugo Melkizedek n da tuꞌos Abraham la, saŋkan ka Levi nan kpelim be o yaab Abraham poogin.
11 Li da ane Levi yaas bane a maalmaanib saŋa la, ka Winaꞌam tis nidib la wada. Ka Levi maalmaanib tuuma yaꞌa da nyaŋe keen ka nidib aan suꞌum naae, li pu narin ye maalmaan buud siꞌa kena yaꞌase, one ledig Melkizedek zinꞌigin la ka kaꞌ Aaron zinꞌiginee.
12 Ka maalmaan yela yaꞌa tiak, asee ka wada me mor tiaker.
13 Ka ti Zugsob one yela ka ba yel neꞌeŋa la, ane Israel dim buud siꞌa nid, buudi kan nid nan ziꞌ tum maalmaan tuuma.
14 Li a sida ye Zugsob la ane Juda buudi, amaa Moses da pu pudug buudkaŋa yela on da pianꞌad maalmaanib yela laa.
Maalmaan soꞌ one wenne Melkizedek la yela
15 Ka maalmaan soꞌ one a Yesu kena one wen wuu Melkizedek la, ka maalmaan yela maligim nie nyain.
16 Li kaꞌane wada line dol ninsaal duꞌam yela, amaa li ane nyovur line kaꞌ saꞌuŋ la paŋ yela ka o lieb maalmaan.
17 Ka Winaꞌam gbauŋ yel ye,
“Fu na ledig Melkizedek zinꞌig
n a maalmaan saŋa wusa.”
18 Yel yinni ane ye, noyelug kudug la pu kpiꞌemaa, ka kaꞌ tumire ka pu ket ka siꞌel siꞌel a suꞌum la zug, ka Winaꞌam basi li.
19 Moses noziꞌelug la da pu nyaŋe ke ka siꞌel siꞌel a suꞌuŋa. Amaa tiꞌir suŋ line ke ka ti liꞌel Winaꞌam kena.
20 Winaꞌam da po ne gaŋ o.
21 Ka bane deŋim lieb maalmaanib la da pinꞌili ba tuuma ka poor kaeꞌ. Ka Winaꞌam maal Yesu ka o a maalmaan ka yel ye,
“Zugsob la poya ka ku tiake o potenꞌere.
Fu ane maalmaan saŋa wusa.”
22 Neꞌeŋa ke ka Yesu ziꞌe ti nyaꞌaŋ n a nonaar suŋ.
23 Ka maalmaan kuda la da ane babig, ka kuꞌum yela ka ba pu kpelimi ba tuuma la nii.
24 Ka Yesu n pu kpiid la o a maalmaan saŋa wusa.
25 Dinzugo ban wusa ken Winaꞌam saꞌan na, ka li yi ne Yesu maꞌasim zug o nyaŋe faandi ba wusa. Bozugo on voe la, o be Winaꞌam tuon n nweꞌed Winaꞌam nuꞌug ba zug.
26 Li nar ka ti mor maalmaan kpeenm wuu oŋa nwa, one a nyain ka gbaꞌar ne dianꞌad kaeꞌ, ka fuue o meŋ yiis tuumbeꞌed dim zinꞌigin, ka Winaꞌam duꞌos o gaad saŋgbauŋ.
27 O pu wenne maalmaan kpeenm bamma, bane ka li nar ye ba maal maana daar wusa ba meŋ tuumbeꞌed yela yiiga, ka nyaan yuolim maal nidib yela la. On lee nokne o meŋi maal maan ba tuumbeꞌed la zug vuguri.
28 Wada la gaŋ dap bane tuumsoma poꞌog ka ba a maalmaan kpeenmnam. Amaa Winaꞌam poor yela line yuolim kena la gaŋ Biig la one a suꞌum saŋa wusa la.