4
1 Dinzugo keli ka ti zo dabiem ka ya soꞌ da wenne o guꞌuŋ Winaꞌam vuꞌusum zinꞌigin kpenꞌebo saŋkan ka o noziꞌel la nan be la.
2 Ka labasuŋ la paae ti saꞌan na wenne labasuŋ paae ba saꞌan siꞌem la, ka labakan ka ba wum la pu mor nyoodi ba nii, bozugo ban wumi li la pu diꞌe li ne yadda.
3 Ka tinam bane niŋ o yadda la kpenꞌed o vuꞌusum zinꞌigin wuu on yel siꞌem la ye,
“M sunf da peligeya
ka m po noor ye ba kudum ku kpenꞌe m vuꞌusum zinꞌiginee.”
O yel neꞌeŋa hale baa ne o dunia maalug tuuma la naae la.
4 Ka o gbauŋ la yel zinꞌisiꞌa dabis kane a Yopoi Daar la yela, ye,
“Ka Winaꞌam da vuꞌus o tuuma wusa zinꞌigin,
dabis kane a Yopoi Daar la.”
5 Ka o lem yet kpela yaꞌas ye,
“Ba kudum ku kpenꞌe m vuꞌusum zinꞌiginee.”
6 Li kpelimne ye sieba kpenꞌe li ni, ka bane da deŋim wum labasuŋ la guꞌuŋ kpenꞌeb ba zanꞌasug la zug,
7 ka Winaꞌam lem gaŋ dabis siꞌa yaꞌas ka li buon ye Zina. Ka naꞌab David da pianꞌ li yela yuma bedego line gaad la wenne lin daa deŋim yel la ye,
“Zina, ya yaꞌa wum Winaꞌam kukor,
da endi ya tobaa.”
8 Bozugo Josua yaꞌa da tisini ba vuꞌusum zinꞌig, Winaꞌam da ku lem pianꞌ dabis siꞌa yela yaꞌase.
9 Ka lin a siꞌem la, vuꞌusum dabis siꞌa kpelim be Winaꞌam nidib la yela.
10 Dinzugo one kpenꞌed Winaꞌam vuꞌusum zinꞌigin la me na vuꞌus ne o meŋ tuuma wenne Winaꞌam n da vuꞌusi o tuuma ni siꞌem la.
11 Dinzugo ti kpeꞌeŋimi ti meŋ ka kpenꞌ vuꞌusum zinꞌigin la, ka soꞌ da tuas bane da zanꞌas ka guꞌuŋ kpenꞌeb laa.
12 Ka Winaꞌam pianꞌad la voene ka tum. Li pulim ka diti gat zaba suꞌug mekama kane dit noya ayi la, ka kunsidne n ti paae siig ne vuꞌusum ben, wuu suꞌug la kensid niŋgbina sunꞌula ne konba poogin biim siꞌem la. Ka pianꞌad la paꞌan nidib potenda a siꞌem.
13 Ka Winaꞌam maal siꞌel wusa la ku nyaŋe suaꞌa o saꞌanee. Li wusa digne paalo ni, one tuon ka li a tilas ye ti ziꞌen n tuꞌas ti yela la.
Yesu n a maalmaan kpeenm la yela
14 Ka tiname pun mor maalmaan kpeenm titaꞌar one a Winaꞌam Biig, Yesu, ka deŋim gaad arazana ni la, ti gbanꞌami ti yadda la kiŋ kiŋ.
15 Ka ti mor maalmaan kpeenm one zoti ti nyoog ne, tiname pu kpiꞌem la yela, ka o da nye makir buudi wusa wenne tiname nye siꞌem la. Ka laꞌam ne wala o pu tum tuumbeꞌede.
16 Dinzug keli ka ti liꞌel o yelsum naꞌam gbauŋ la ne sukpiꞌeuŋ ka diꞌe o nimbaanlzoor bareka la, ka li suŋi ti, ti yelpakir saŋa.