3
Yesu n gat Moses siꞌem la yela
1 M Baꞌ Winaꞌam biis bane ka Winaꞌam laꞌam buoli ya la, tenꞌesimi Yesu yela, one a Winaꞌam tumtum ne maalmaan kpeenm ka ti peligidi ti poog n yet o yela o nidibin la.
2 O a yelsida sobi tis one gaŋ o la wuu Moses da a yelsida sob siꞌem Winaꞌam yidimin la.
3 Dau kane meed yir diꞌed naꞌasi gat yir la meŋ. Ala men ka Yesu nar naꞌasi bedego n gat Moses.
4 Yir mekama, ti miꞌ ye soꞌ mee li, ka Winaꞌam a one meed siꞌel mekama wusa.
5 Ka Moses da ane tumtum ka a sida sob Winaꞌam yidimin wusa, ka da yel yelkane ka ba na ti pianꞌ li yela la.
6 Ka Kiristo me da a biig ka a yelsida sob ka gur Winaꞌam yidim, dinzug ti yaꞌa mor sukpiꞌem ne tiꞌir ye ti ane o yidim, ti na nweꞌed nyoꞌog li yela.
Winaꞌam nidib vuꞌusum la yela
7 Ala zugo, wenne Siig Suŋ la yet siꞌem la ye,
“Zina, ya yaꞌa wum Winaꞌam kukor,
8 da endi ya toba
wuu saŋkan ka ya yaanam da zanꞌas Winaꞌam
ka mak o moogin la.
9 Zinꞌikan ka ya yaanam da mak man,
ye ba kpans la,
ka nye m tuuma yuma piisnaasi.
10 Dinzug ka m sunf da pelig
ne zumaaŋ kan dim la.
Ka ye, ‘Saŋa wusa ba poꞌogid man,
ka pu baŋ man sueya la a siꞌem.’
11 Man sunf pelig ne ba ka m po noor ye,
‘Ba kudum ku kpenꞌ m vuꞌusum zinꞌiginee.’ ”
12 M baꞌabiise, guꞌusimi ka ya soꞌ da mor sunf beꞌed line pu niŋid Winaꞌam yadda, ka o fendig ka bas Winaꞌam one voe la suere.
13 Amaa kpemisimi taaba daar wusa line buon ye Zina la, ka baꞌa yinni ya saꞌan da kpeꞌeŋi o suunr ne tuumbeꞌed damaꞌam.
14 Ti diꞌedne ti poor ne Kiristo, ti yaꞌa mor ti pinꞌilug yadda la kiŋ kiŋ ti paae ti dunia nwa beilim.
15 Ka Winaꞌam gbauŋ pun yel ye,
“Zina, ya yaꞌa wum Winaꞌam kukor,
da endi ya tobaa wuu saŋkan ka ya yaanam da zanꞌas Winaꞌam la.”
16 Anoꞌonami da wum ka zanꞌas la? Li kaꞌ bane n da dol Moses ka bas Egipiti laa?
17 Ka anoꞌonam ka Winaꞌam sunf da pelig ne ba yuma piisnaasi la? Li da kaꞌane bane da tum beꞌed ka kpi moogin laa?
18 Ka anoꞌonam ka o da po noor ye ba kudum ku kpenꞌe o vuꞌusum zinꞌigin la? Li da kaꞌane bane da zanꞌasi o noor laa?
19 Ka ti baŋ ye ba da pu nyaŋe kpenꞌe, ban pu niŋ Winaꞌam yadda la zug.