11
Zugpilib Winaꞌam puꞌusugin la yela
1 Tuꞌasimi man tuuma wuu man tuꞌas Kiristo tuuma siꞌem la.
2 M pianꞌadi ya yaname tiendi m yela siꞌel wusa ni ka mor paꞌalug kan ka m tolisi tisi ya la zug.
3 Amaa m bood ye ya baŋ ye Kiristo a dau wusa zugsob, ka dau me a o poꞌa zugsob, ka Winaꞌam me a Kiristo Zugsob.
4 Dinzugo, dau one puꞌusid Winaꞌam bee diꞌed Winaꞌam pianꞌad n tisid nidib, ka siꞌel pil o zug, diisne Kiristo nyan.
5 Ka poꞌa one puꞌusid Winaꞌam bee diꞌed Winaꞌam pianꞌad n tisid nidib, ka siꞌel pu pili o zugo, o diisne o sid nyan. Li wenne wuu o puni o zug ne.
6 Poꞌa yaꞌa zanꞌas ka pu pili o zugo, on kiesimi o zuobid. Lin sadigim a nyan n tis poꞌa ka o puni o zug la, bee kiesi o zuobid la, o pilimi o zug.
7 Winaꞌam n maal dau wenne o meŋ la ka o mor girima tisid Winaꞌam la, li pu suꞌum ka o zaŋ siꞌeli pil o zugo. Poꞌa me mor girima tisid dau.
8 Winaꞌam da pu zaŋ poꞌa konbir n maal dau, amaa o da zaŋ ne dau konbir n maal poꞌa.
9 Winaꞌam me da pu maal dau poꞌa zugo, amaa o da maali poꞌa dau zug.
10 Maleknam la zug, li suꞌum ka poꞌa zaŋ siꞌeli pili o zug n paꞌal ye o be ne o sid la nuꞌusin.
11 Amaa Zugsob nidib la puugin, poꞌa bene dau nuꞌusin, ka dau me be poꞌa nuꞌusin.
12 Winaꞌam da zaŋ dau n maal poꞌa. Ala men ka poꞌab me duꞌad dap. Ka siꞌel wusa yitne Winaꞌam saꞌan na.
13 Ya meŋ tenꞌesim n gos. Li a suꞌuŋa ka poꞌa puꞌus Winaꞌam paalo ni ka siꞌel kaꞌ o zuginee?
14 Ti malima pun paꞌali ya ye dau yaꞌa bas o zuobid ka li waꞌam, o diisidi o meŋ nyan.
15 Amaa li ane venlim poꞌa saꞌan. Winaꞌam maali o zuobid ka li waꞌam ye li a o zugpibig.
16 Amaa soꞌ yaꞌa bood ye o nwaꞌasi li yela, man na lebis siꞌel ane ye, tinam bee Winaꞌam nidib pu mor maluŋ siꞌa line be zugpilib puugine.
Zugsob nonaar diib la yela
17 M pu zunꞌodi ya yel kan ka m ye m yeli ya laa, bozugo ya yiti laꞌas taaba ka ya tuumbeꞌed gati ya tuumsoma.
18 Yiiga zinꞌigin, m wumya ye ya yaꞌa yiti laꞌas taaba ye ya puꞌus Winaꞌam, weligir be ya soogin. M me siak ye labaar la sieba ane sida.
19 Biꞌesug kaeꞌ, ye weligir na bee ya soogin ye ba baŋ bane dol sida suer la paalo ni.
20 Ya yaꞌa laꞌas taaba n tenꞌes ye ya ditne Zugsob Diib la, li kaꞌ walaa.
21 Bozugo ya yaꞌa laꞌas, soꞌ mekama ditne o meŋ diib, ka sieba koꞌom zabid ka sieba nuu kool.
22 Ya pu mor yaꞌ na di ka nuu? Bee ya kudum bood ye ya neꞌesne Winaꞌam nidib ka diis noŋdim nyane? M na yeli ya ye bo? M zunꞌe ya neꞌ zug bee? Ayei, m ku zunꞌe yaa.
(Mateo 26.26-29; Maak 14.22-25; Luuk 22.14-20)
23 M daa diꞌe paꞌalug kaŋa ne Zugsob la saꞌan, ka tolisi tisi ya. Ye yuꞌuŋ kan ka ba zam ti Zugsob la, ka o zaŋ bodobodo
24 n puꞌus Winaꞌam bareka, ka gbenꞌesi li, ka ye, “Neꞌeŋa ane m niŋgbiŋ kan ka m tisi ya. Niŋim ala ka li a tienri m yela.”
25 Ala ka o lem zaŋ nwam, bane di diib la naae la, ka yel ye, “Nwam kaŋa ane Winaꞌam nonaar paal line a man ziim. Ya yaꞌa yiti nuu li, yanam niŋimi li ka li tienn m yela.”
26 Ya yaꞌa yiti niŋ neꞌeŋa ka di bodobodo la ka nu nwam kaŋa ni, ya mooni Zugsob la kuꞌum yela n guri o lebig na.
27 Ala zugo, on mekama zanꞌa di Zugsob la bodobodo ka nu o nwam la ni, ka li pu suꞌum ye o di ka nu, o tumne tuumbeꞌed tis Zugsob la niŋgbiŋ ne o ziim la.
28 Soꞌ wusa tenꞌesim suꞌuŋa ka naan di bodobodo kaŋa ka me nu nwam kaŋa ni.
29 On mekama pu baŋ Zugsob la niŋgbiŋ la gbin ne, ka me di ka nu, o na nye saria kad beꞌed on di ka nu la zug.
30 Dinzug ka ya bedego a banꞌadnam, ka sieba kaꞌ paŋa, ka sieba kpi la.
31 Ti yaꞌa maki ti meŋ yiiga suꞌuŋa, ti ku kpenꞌ Winaꞌam sariakadib nii.
32 Ka Zugsob la kat tinam saria ka namisidi ti ye ti zamis ka ti da ti laꞌas ne dunia nidib n nye saria kad beꞌede.
33 Dinzugo, m baꞌabiise, ya yaꞌa laꞌas taaba ye ya di Zugsob diib la, yanam on gur taaba.
34 On koꞌom zabid, on dimi o yin ka naan kena, ka da kpenꞌ Zugsob la sariakadib nii.
Yela bane kpelim la, m yaꞌa kena, m na saꞌali ya li yela.