10
Baꞌa dolim la yela
1 M baꞌabiise, m bood ye ya tenꞌes line da niŋi ti yaanam bane da dol Moses la. Winaꞌam da nok saŋgbauŋ n guri ba wusa, ka ba wusa loꞌoŋ ateuk line buon ateuk Zenꞌug la.
2 Ban ne Moses da dol saŋgbauŋ ka loꞌoŋ ateuk la ka ala ka Winaꞌam da suu ba ye ba a yinni ne Moses.
3 Ba wusa da di ne diib yinni ka nu kuꞌom kan ka Winaꞌam da tum nyalima maal la.
4 Ba da nune tampiing kan ni ka Winaꞌam da tisi ba, ka li doli ba keŋ la. Tampiing kan da ane Kiristo meŋ.
5 Amaa ne wala wusa, Winaꞌam sunf da pu malis ne ba sieba bedego ka ba kpi, ka ba niŋgbina dig zinꞌis konꞌob konꞌob moogin la.
6 Neꞌeŋanam wusa da ane zanbin n tisi ti n saꞌali ti ye ti da bood bunbeꞌednama wenne ban laa.
7 Da maani baꞌar wuu ba sieba da niŋ siꞌem laa. Ka li sob Winaꞌam gbauŋin ye, “Nidib da zinꞌin n di, ka nu, ka due waꞌ baꞌar maanib waꞌ.”
8 Ti da saꞌam poꞌab wuu ba sieba da niŋ siꞌem laa. Ka daar yinni poogin ka ba tusa piisi ne atanꞌ n kpi laa.
9 Ti me da mak ye ti kpans Zugsob la wuu ba sieba da niŋ siꞌem, ka wiigi da kuu ba la.
10 Ka ti da nyon ne Winaꞌam wuu ba sieba da nyon siꞌem, ka kuꞌum malek da kuu ba laa.
11 Neꞌeŋa wusa da niŋ ne, ye li saꞌali ba. Ka ba sobi li ka li a nimmua saꞌalug n tis tinam bane be saŋa kan ka dunia liꞌel naar la.
12 Dinzugo, one tenꞌes ye o niŋid suꞌum, ka ziꞌe suꞌuŋa, on guꞌusim, ka yaꞌa kaꞌ ala, o na lu.
13 Makir ban buudi paadi ya la, nan miꞌ paae sieba. Ka Winaꞌam ane yelsida sob, ka ku ke ka makir kane gaadi ya paŋ la paae yaa. Ne makir puugin, o na maal suer tisi ya paŋ, ka ya nyaŋe li.
14 Dinzug, m baꞌabiise, luakimi ne bada maalug.
15 M pianꞌade tisidi ya wenne ya ane nidib bane mor yaꞌam. Yanam meŋ baŋim man yet siꞌel la gbin.
16 Nwam kan ka ti yiti zaŋi puꞌus bareka tis Winaꞌam la, ti yaꞌa nu nwam kaŋa ni, ti pu naalimne ne Kiristo ziim bee? Ka bodobodo kan ka ti gbenꞌesid la, ti yaꞌa di bodobodo kaŋa, ti pu naalimne ne Kiristo niŋgbiŋ bee?
17 Tiname pudugid bodobodo gbil yinni n dit la zug, ti ane niŋgbiŋ yinni laꞌam ne tinam zuꞌe la.
18 Gosimi Israel dim niŋid siꞌem la. Bane dit diib bane ka ba maali tis Winaꞌam maan maalug zinꞌig ni la, ba a yinni ne Winaꞌam one soꞌe maan maalug zinꞌig la.
19 Bo ka m yet nwa? Ya tenꞌes ye man yel ye baꞌar bee diib line ka ba maani tisidi li la ane siꞌel bee?
20 Ayei, m yet ye, lin ka baꞌamaanib maani tisid bada la, ba maani tisidne kikiris, ka pu maani tisidne Winaꞌam. M pu bood ye ya a yinni ne kikirise.
21 Ya ku nyaŋe nu Zugsob nwam la ni, ka lem nu kikiris nwam la nii, ka me ku nyaŋe di Zugsob la diib, ka lem di kikiris diibo.
22 Ti bood ye fufum kpenꞌ Zugsob la bee? Ya tenꞌes ka ti mor paŋ gaad o bee?
23 Ba ye, “Suer be ka ti na maal siꞌel wusa.” Eenn, sida. Amaa li kaꞌ siꞌel wusa mor nyoode. “Suer be ka ti na maal siꞌel wusa.” Amaa li kaꞌ siꞌel wusa kpeꞌeŋid nidiba.
24 Soꞌ da tenꞌesid o meŋ yelsum maꞌanee. Amaa o me tenꞌesimi o taaba yela.
25 Dimi niꞌim kan wusa ka ba kuosid daꞌan. Ka da ke ka ya potenda ke ka ya buꞌosi buꞌosaa.
26 Li sob Winaꞌam gbauŋin ye, “Dunia ne siꞌel wusa line bee li ni ane Zugsob la din.”
27 Fu yaꞌa keŋ one kaꞌa yadda niŋid yin ka o tis uf diib, fun dim line ka o mora ziꞌeli fu tuon, ka da buꞌos ye bo niꞌim nwa.
28 Amaa soꞌ yaꞌa yel uf ye, “Dikaŋa nwa ane baꞌar diib” fun da dii. Ka li na suŋ fun ne one yel uf la potenda.
29 Li kaꞌane fun meŋ potenꞌer yelaa, amaa li ane soꞌ potenꞌer yela.
Bozug ka m mor yolisim ka soꞌ potenꞌer kati m saria?
30 M yaꞌa puꞌus Winaꞌam bareka ka di diib, bo ka soꞌ na poꞌogi man ne bun lin ka m puꞌus Winaꞌam bareka li yela?
31 Ya yaꞌa di bee nu bee niŋ siꞌel mekama, yanam niŋimi li wusa ka li duꞌos Winaꞌam yuꞌur.
32 Da niŋ siꞌel Jew dim bee Greek dim bee Winaꞌam nidib saꞌan ka li daami baa.
33 Niŋimi wuu man niŋid siꞌem la. Hale m mood ye m tum line malis soꞌ mekama siꞌel wusa puugin. Bozugo m pu bood man meŋ yel suꞌum ne, amaa nidib wusa suꞌum yela, ye ba paam faangir.