15
Zama Dehenoꞌi
(Mareko 7:1-23)
1 Ebu Farisea azaḡa zu Mose goro ḡoeꞌa ihozeꞌeteꞌe azaḡa nuꞌa Ierusalemaꞌonoꞌo Iesu vaḡe onaadu ḡadiniro, raenaꞌa,
2 “Ḡa tahiꞌatahiꞌaꞌe izema oganogano ꞌevoreze mene vuzuꞌeꞌohe. Nougadu zeꞌa eme vouḡa goro ḡoeꞌa variꞌeꞌohe?”
3 Iesuꞌa naenaeziro, raenaꞌa, “Zaꞌe nougadu Badiꞌa goro ḡoeꞌaꞌe variꞌadu vouḡaze goro ḡoeꞌa tihitihineꞌohe?
4 Badiꞌaꞌa raenaꞌa, 'Viꞌu mogo gubazoꞌi', ebu 'Iniuꞌa ane viꞌa moga rae sausauzoꞌidene, mau runoꞌi.'
5 Rehano iniuꞌa viꞌa moga mazao raenaꞌa, 'Fase, e zae danazoga mene idaḡa, mazaḡa danaziꞌuma raꞌeteꞌe ḡauḡa ꞌahiꞌe eḡeꞌa Badiꞌa haꞌuma,' rae reine, zaeꞌa ani idaḡa rae raꞌohe.
6 Vazeꞌa vize moze mene gubaneꞌohe rehano, zaꞌa ze duduḡa rae ihoneꞌohe. Eꞌe teige, zaeꞌa vouḡaze goro ḡoeꞌa uꞌano, Badiꞌa goro ḡoeꞌa rae modeꞌohe.
7 Za, zama guhi azaḡa! Peroveta vazeḡa Isaiaꞌa zae moneo reirotaꞌaꞌe duduḡa raꞌohe, raenaꞌa,
8 ꞌVazevaze ꞌahiꞌe hebe hina daꞌo Badiꞌa gubaneꞌohe,
rehano zamazeꞌe Badiꞌa mazaonoꞌo faḡa hune.
9 Zeꞌa Badiꞌa mazao kurauꞌetaꞌaꞌe huga oꞌoꞌa,
ebu zeꞌe vazeꞌa tiroteꞌe goro ḡoeꞌa ihozeꞌohe.'”
10 Iesuꞌa vaze ḡuḡuvaḡa huze ane vaḡiro ebu ziro, raenaꞌa, “Egadu ederoꞌi.
11 Hebeo diuḡeꞌeteꞌe ḡauḡaꞌe vaze mene toratoraneꞌohe. Rehano hebeꞌonoꞌo buauꞌeteꞌe ḡauḡaniꞌa vaze toratoraneꞌohe.”
12 Ebu Iesu tahiꞌatahiꞌaꞌa ane vaḡe onaadu niro, raenaꞌa, “Ḡaꞌe Farisea azaḡaniꞌa ḡae ḡoere egadu maḡunataꞌaꞌe edeḡahe?”
13 Iesuꞌa naenaezinaꞌa, “Adureo eḡe Mamaꞌa mene ḡoraroteꞌe ḡauḡa niduꞌa taigaꞌonoꞌo ḡuri modiꞌuma.
14 Ze mode tauḡoꞌi! Zeꞌe vaze ibitoziniꞌohe, rehano ubuma kuruga azaḡa heuḡa. Kuruga vazeḡaniꞌa kuruḡa vazeḡa ibitohaune, anianine hoꞌona bohire ovoiꞌuma.”
15 Peteroꞌa ninaꞌa, “Auꞌeteꞌe ḡauḡaꞌe vaze mene toratoraneꞌeteꞌe hari idaidaḡa huga ihofoꞌi.”
16 Iesuꞌa zinaꞌa, “Eꞌa ihozataꞌaꞌe ꞌize mene edeḡahe?
17 Zaꞌe edeḡa, ogomuꞌe vaze hebeꞌonoꞌo diuḡe isi zamaḡa ovoadu vesu ahiriꞌonoꞌo buauꞌohe.
18 Rehano hebeꞌonoꞌo buaueꞌtaꞌaꞌe zamaonoꞌo buanadu vaze toratorazeꞌohe.
19 Vaze zamaonoꞌo buauꞌetaꞌaꞌe zamarone sauꞌa, gorugoru, hahuꞌa daroꞌeteꞌe, ubuma ḡezo, ḡonore, kotao ḡurire ḡoereꞌeteꞌe zu vaze rae sausauzeꞌeteꞌe raꞌohe.
20 Deꞌeguḡaniꞌa vaze toratoraneꞌohe. Rehano ꞌevore mene vuzuadu ogomu auꞌeteꞌeꞌa vaze mene toraneꞌohe.”
Kanana Roḡaeḡaniꞌa Iesu Mazao Firo
(Mareko 7:24-30)
21 Iesuꞌa Galilea habaꞌa modadu Turo zu Sidono habaꞌa onamiro.
22 Eꞌe habaꞌano Kanana roḡaeḡa ꞌahoganiꞌa ani vaḡe aradu ḡihau huniro, raenaꞌa, “Zuhiꞌa Boro, Davida mariga, eḡe vetuḡahoꞌi! Vine sauꞌaniꞌa eḡe abohe rana radu ani ufeta sausauneꞌohe.”
23 Rehano Iesuꞌa ḡoere ꞌahoga mene naenaeniro. Ebu ani tahiꞌatahiꞌaꞌa aradu uminiro, raenaꞌa, “Ani tuḡune vaḡinoꞌi, mazaḡa eme hegoteꞌenaꞌa, barebare huau ḡunuḡunufeꞌohe.”
24 ꞌOugadu Iesuꞌa roḡae eꞌe niro, raenaꞌa, “E ḡa mene danaꞌiꞌuma. Eꞌe Isaraela azaḡa, dauḡiroteꞌe mamoeḡa veize daꞌo tuḡuhiro.”
25 Rehano roḡaeḡaniꞌa aradu ani zamao ḡuḡuriro ebu raenaꞌa, “Zuhiꞌa Boro, danahoꞌi!”
26 Iesuꞌa naenaeninaꞌa, “Tahiꞌa ogomu madu ḡuni hanogaꞌe mene idaḡa.”
27 Roḡaeḡaꞌe ninaꞌa, “A hube, Zuhiꞌa Boro, rehano ḡuni zuni ane zuhiꞌa ogomu mumuḡa fataꞌonoꞌo buauꞌetaꞌaꞌe auꞌohe.”
28 Iesuꞌa naenaeninaꞌa, “Roḡae, ḡaꞌe eḡe mazao fieꞌetaꞌaꞌe boro! Ḡaꞌa urateꞌetaꞌaꞌe hidiꞌuma.” Eꞌe madaḡano ani aboḡa ꞌai manoriro.
Vaze Ḡehaḡa Faiziro
29 Iesuꞌa haba eꞌe modadu Galilea duꞌuraḡa uni onamiro. Ebu maḡa itadu eꞌea ehoriro.
30 ꞌOugadu vaze ḡuḡuvaḡaniꞌa mene edauꞌeteꞌe azaḡa, ubuma kuru azaḡa, oda sauꞌa azaḡa, mumutafa azaḡa zu ugi azaḡa nunu ḡehaḡa tutuze ane vaḡe ariro. Ebu zeꞌe ane oda babaḡano bazuze teadu aniꞌa faiziro.
31 Vaze ḡuḡuvaḡaniꞌa mumutafa azaḡaꞌe ḡoereꞌeteꞌe, oda sauꞌa azaḡaꞌa manorateꞌe, mene edauꞌeteꞌe azaḡaꞌe ragaveꞌeteꞌe zu ubuma kuru azaḡaꞌe ehamaneꞌeteꞌe horozirotene, zaguzagaro. Ebu zeꞌe Isaraela azaḡa Badiꞌaḡa matuꞌoharo.
Vaze 4000 Ḡubuziro
(Mareko 8:1-10)
32 Ebu Iesuꞌa ane tahiꞌatahiꞌa huzadu ziro, raenaꞌa, “'Eꞌe ꞌahi duḡuru vetuḡaziꞌohe, mazaḡa ze ꞌahao mada uḡidu eḡe teite radiuꞌohe zu ogomuze oꞌoꞌa. Eꞌe ze vinini tare nezeo tuḡuzoga mene urateꞌohe, mazaḡa ibio higau bauriꞌuma.”
33 Tahiꞌaḡaniꞌa ninaꞌa, “Haba bohaꞌano ꞌada, noumao ogomu ḡehaḡa horonadu vaze ḡuḡuvaḡa ꞌahi ḡubuziꞌuma?”
34 Iesuꞌa ḡadizenaꞌa, “Za mazao berediꞌe nugu?” Zeꞌa naenaeninaꞌa, “Berediꞌe fuꞌo ꞌaheu fare zu ḡozone komeꞌa tahiḡa.”
35 Ebu aniꞌa vaze ḡuḡuvaḡa rahao ehoroga radu ziro.
36 ꞌOugadu beredi fuꞌo ꞌaheu fare zu ḡozone madu Badiꞌa mazao kuraro. Ebu vahegadu vaze ḡuḡuvaḡa zenoga veize tahiꞌaḡa ziniro. Ebu tahiꞌaḡaniꞌa ḡahugiro.
37 Zeḡe niduꞌa au idararo. Ebu ogomu ḡahaꞌaḡahaꞌa mae ofadu tunahu fuꞌo ꞌaheu fare irivaꞌoniro.
38 Ogaroteꞌe azaḡa boꞌaḡano ohoze daꞌo niduꞌaꞌe 4000, u roḡae zu tahiꞌa komeꞌakomeꞌaꞌe mene meꞌodiro.
39 Ani vaze ḡuḡuvaḡa tuḡuziroteꞌe ḡarugano, ḡasiꞌo ehoradu Magadana habaꞌa onamiro.