14
Ioane Babatiso Rune
(Mareko 6:14-29, Luka 9:7-9)
1 Eꞌe madaḡano Galilea habaꞌa kiniḡa Herodaꞌa Iesu hariḡa igiro.
2 Ebu ane gau azaḡa ziro, raenaꞌa, “Iesuꞌe Ioane Babatiso gaogi. Aneꞌa runeonoꞌo bare ḡabodeha! Eꞌanoꞌo aneꞌa haḡai gigiꞌa inaraḡa hina gauꞌeꞌohe.”
3-4 Ibite Herodaꞌa negoḡa, niḡa Filipo, inuga meiro. Inuga niḡaꞌe Herodia. Ebu Ioaneꞌa Heroda mazao barebare niro, raenaꞌa, “Ḡaeꞌa negoḡo inuga meirotaꞌaꞌe Badiꞌa goro variꞌeha.” Eꞌanoꞌo, Herodaꞌa Ioane obone tiro, ebu ḡuꞌa neḡano ohoniro.
5 Herodaꞌa Ioane matihi reiro, rehano aniꞌe vaze ḡuḡuvaḡa rihoziro, mazaḡa zeꞌe Ioaneꞌe peroveta vazeḡa rae mae ḡihiniro.
6 Herodaꞌa fureraroteꞌe madaḡa meirotene, Herodia aboḡaniꞌa vazevaze zamao zavonadu Heroda zama ufeta matuꞌoharo.
7 Eꞌanoꞌo Herodaꞌa ani mazao ḡoitoriro, raenaꞌa, “Ḡa nagini urateꞌetaꞌaꞌe eḡeꞌa ḡaniꞌuma.”
8 Ebu ani viꞌa ḡoere egadu Heroda niro, raenaꞌa, “Ioane Babatiso vadini siuvao ofadu izidi ꞌada enoꞌi.”
9 Eꞌe igirotene, Herodaꞌe zamaḡa adudaro. Rehano aniꞌa eꞌea vaze zamao ḡoitoriroteꞌe ꞌahine, roḡae tahiꞌaḡaniꞌa urateꞌeteꞌe ḡauḡa hanoꞌi rae reiro.
10 Eꞌanoꞌo aniꞌa uti vazeḡa tuḡunadu ḡuꞌa neḡano Ioane Babatiso ꞌunu variꞌe riꞌiro.
11 Vadigaꞌe siuvao teadu odohe ariro, ebu roḡae tahiꞌaḡa hanadu aneꞌa viꞌa haro.
12 Ebu Ioane tahiꞌatahiꞌaꞌa onaadu ane ahiri mae guriro. Eꞌe enogano zeꞌe Iesu vaḡe onamadu meꞌodoharo.
Vaze 5,000 Ḡubuziro
(Mareko 6:30-44, Luka 9:10-17, Ioane 6:1-14)
13 Iesuꞌa Ioane hariḡa igirotene, ani eꞌe habaꞌa modadu ḡasi hina vaze oꞌoꞌa habaꞌa sifu ruhau onamiro. Rehano vaze ḡuḡuvaḡaniꞌa eꞌe egadu nezeonoꞌo odao Iesu hegote onamiro.
14 Iesuꞌa ḡasiꞌonoꞌo buanadu vaze ḡuḡuvaḡa horoziro. Ebu vetuḡazeadu ugi azaḡa faiziro.
15 Ḡoravararotene, ane tahiꞌatahiꞌaꞌe ane vaḡe onaadu niro, raenaꞌa, “Ahiꞌe haba bohaꞌa ebu mada ꞌai zubureha. Eꞌanoꞌo vaze ḡuḡuvaḡa ꞌadi tuḡuzoꞌi, ebu ze uhiḡauhiḡa neḡa onamadu ogomuze hoitiꞌuma.”
16 Rehano aniꞌa naenaezinaꞌa, “Mene ꞌougiꞌuma. Zaeꞌa ogomu nu zenoꞌi.”
17 Zeꞌa ninaꞌa, “Eme mazaoꞌe beredi fuꞌo zu ḡozone ꞌaheu daꞌo.”
18 Aniꞌa zinaꞌa, “Eḡe vaḡe mae aroꞌi.”
19 Ebu aniꞌa vaze ḡuḡuvaḡa ve rana ehoroga radu ziro. Aniꞌa beredi fuꞌo zu ḡozone ꞌaheu madu adure ite ḡianeꞌenaꞌa, Badiꞌa mazao kuraro. Ebu vahege tahitahadu tahiꞌaḡa ziniro ebu zeḡeꞌa vaze ḡahuge ziniro.
20 ꞌOugadu zeḡe niduꞌa ogau idararo. Ebu Iesu tahiꞌatahiꞌaꞌa ogomu ḡahaꞌaḡahaꞌaꞌe nuꞌonadu tunahu 12 iriꞌavoniro.
21 Eꞌea ogaroteꞌe azaḡa boꞌaḡano ohoze isoiso niduꞌaꞌe 5000, u roḡaeroḡae zu tahiꞌa komeꞌakomeꞌaꞌe mene meꞌodiro.
Vu Rana Edau Onamiro
(Mareko 6:45-52, Ioane 6:15-21)
22 Eꞌe enogano Iesuꞌa tahiꞌaḡa zogone ibite tuḡuzenaꞌa, ziro, raenaꞌa, “Ḡasio tiradu duꞌura moneafa fare onamoꞌi.” U Iesu ꞌize vaze ḡuḡuvaḡa tuḡuziro.
23 Tuḡuze hauḡadu ane daꞌo maḡa itadu kuraro. Madaꞌa ḡoravararotene eꞌea ane daꞌo radiunu.
24 Eꞌe madaḡano ḡasiꞌe hesaꞌonoꞌo fararo. Ebu zavara boroboro onainu ꞌahine, saꞌu boro ragatadu ḡasi ḡihuḡihuniro.
25 Iraranae reirotene, Iesuꞌe vu rana edauꞌenaꞌa, ane tahiꞌatahiꞌa vaḡe ariro.
26 Ane tahiꞌatahiꞌaꞌa Iesu vu rana edau onairoteꞌe horonirotene, rihau rudauꞌenaꞌa, huau ḡaniḡanaro, raenaꞌa, “Aꞌe vine!”
27 Rehano Iesuꞌa zogone ziro, raenaꞌa, “Ago rihanoꞌi! ꞌAdi eḡe. Zamaze rinedoꞌi.”
28 Peteroꞌa ninaꞌa, “Zuhiꞌa Boro, a hube hune ḡa roꞌidene, e zuni vu rana ḡae vaḡe amoga veize huhoꞌi.”
29 Iesuꞌa ninaꞌa, “Aroꞌi.” Ebu Peteroꞌa ḡasionoꞌo buanadu vu rana Iesu vaḡe edau onamiro.
30 Rehano aniꞌa zavara boro horonirotene, rihanadu vu zamaḡa zubure ovoiro, ebu ḡaniḡaniniro, raenaꞌa, “Zuhiꞌa Boro, e ḡabohoꞌi!”
31 Iesuꞌa zogone evoꞌa ꞌeinadu ani hutube ḡihiniro, ebu ninaꞌa, “Ḡa, mene gigaru fieꞌeteꞌe vazeḡa, nougadu ꞌadaꞌadeha?”
32 Anianine ḡasio tirirotene, zavara ꞌai dauḡiro.
33 Ebu ḡasi rana azaḡaꞌe Iesu niguniro, raenaꞌa, “Hube hune ḡaꞌe Badiꞌa ubuga.”
Ugi Azaḡa Faiziro
(Mareko 6:53-56)
34 Zeḡeꞌa duꞌura faradu Genesareta habaꞌano hebetiro.
35 Haba eꞌe azaḡaniꞌa Iesuꞌa onairoteꞌe ederadu ne uhiḡauhiḡa azaḡa niduꞌa veize ḡoere tuḡuriro. Ebu zeḡeꞌa ugi azaḡa niduꞌa Iesu vaḡe tutuze ariro.
36 Ebu ugi azaḡaniꞌa ani dabuaḡa ꞌariḡa tahiḡano daꞌo tuꞌinoga veize ze uminiro. ꞌOugadu tuꞌiniroteꞌe azaḡa niduꞌaꞌe ugizeꞌa manoriro.