4
Met elar nama kum kuro oros kut ra di pami nama piso
1 O God i maris met ra i pitar tar a pinapam ri tamet. Iri a kibino ra ka met tusako.
2 Met sa mana gusun a kum sakino petutna ra di ser pam eno i, ma di ser maimai nami. Ka met papam nama torotoro, ma ka met palos raro a wasiso anun o God, awu. Met palos talapor a lingmulus na wasiso torom a taro, sur det in tasman lele i ut una nuknukin det lena, met watung a lingmulusino umatan o God.
3 Ma a Wakak na Wasiso ri, ra met ser wasiso puaso uni, ra in parau, in parau kut torom det ra det wan sur a iniru.
4 O Satan, a god taginin una rakrakon bual, i sa upulu pas a nuknukin a taro ra ka det nurnur, sur ka det in tama a talapor ina Wakak na Wasiso ra i upuaso a minamar anun o Karisito, i ra a malalarin o God.
5 Ka met ser wasiso un met ut, met wasiso puaso kut un o Iesu Karisito lena, i a Labino. Ma met anumot a kum tultul kut, kibino una itula anun o Iesu.
6 Numugu utmakai, o God i watungi lena, “A talapor in sisio pat una dumirum.” Ra uniri, o God i sa ukis anun a talapor una nuknukin dat sur in sisio, sur dat in tasman a minamarin o God, ra di tama i umasarin o Karisito.
7 A talapor ri, ra kuri un met, i a utna ra i wakak ma i labo doko. Ikut, met elar nama kum kuro oros kut ra di pami nama piso, sur in ese i lena, a labino dekdek ra kuri un met, tan o God ut, awu sur tagun met.
8 Met barato a kum mamaut una kum papori met rop, ikut ke ban laulau ru met. A susut na utna i utalara a nuknuki met, ikut ka met mana.
9 A taro det ukadik met, ikut o God i kis ut tomo nam met. Det um met, ikut ka det um doko ru met.
10-11 Ra met laun a minat i milau kut, uni met papam torom o Iesu. Una kum bung rop, met ese a minat anun o Iesu una pinimet, sur a taro det in tama i kai, a nilaun anun o Iesu un met.
12 I mo ra a minat i papam un met, ikut a nilaun i papam un mot.
13 Di sa tumus tari una Buk Tabu lena, “A wasiso, uni a nurnur.” Sng 116:10
A ngas na nurnur lenri, i kis utkai un met. Met kai met nurnur, i mo ra met wasiso puaso.
14 Uni met tasmani lena o God, i ra i sa ukatutur melet pas a Labino o Iesu gusun a minat, lenkutkai ra in ukatutur melet pas met tomo nam o Iesu, ra in ben pas met tomo nam mot, sur dat in kis tomo nami umatan o God.
15 A kum mamaut ra met barato i, det wanpat sur in uwakak mot. Ra a marmaris anun o God i wan sarara torom a taro, a susut na taro det in watung wakak torom o God, ma det in watung ulabo pasi.
16 Iri a kibino ra ka met tusako. I kis pirso nanan a pinimet, ikut di umatok a niomet una kum bung rop.
17 A kum mamaut ra met taramo det, ka det labo ma ka det in kis suano i, ikut det warut met, sur met in rakon pas a wakak na kinkinis una minamar, ra ken rop. A minamar ra, i labo sakit taun a kum mamaut ra met taramo i.
18 Ka met nuk a kum utna ra di tama i, met nuki kut a kum utna ra ka di tama i. Uni a kum utna ra di tama i, ka det in kis suano i, ikut a kum utna ra ka di tama i, det in kis tukum.