3
Met a kum tene pinapam una matok na kunubus
1 Pepetlai, mot nuki lena, met ulabo pas met umatamot? Ara taro det ser los a kum pas ra i wasiso puaso una nundet a ngas na nilaun. Pepetlai, mot nemi sur met in los tu pas lenra torom mot? Pepetlai, met in saring mot sur mot in tumus tu pas lenra un met?
2 Mot ut a pas anumet, ra di sa tumus tari una balamet. A taro rop det lukluki ma det tasmani.
3 I talapor lena, mot a pas ra o Karisito i tumusi, kibino una numet a pinapam torom mot. Awu sur i tumusi namin nepen, i tumusi ut nama Nion o God ra i laun. Ke tumusi una du wat, i tumusi ut una balan a taro.
4 Met wasiso una kum utna ri, uni met tagun o Karisito, ma met nurnur un o God lena, a kum utna ri i lingmulus.
5 Met tasmani lena, met ut ka met pet lar pasi sur met in pam a pinapam ri, ikut o God ut i warut met sur met in pami.
6 I ut i ukis tar met sur met a kum tene pinapam una matok na kunubus, ma i pitar tar a dekdek tamet sur met in papam nami. A matok na kunubus ri, awu sur tagun a kum wasiso na Warkurai ra di sa tumus tari, i kibino pas ut una Tokodos na Nion. A wasiso na Warkurai i pitar pati kut a minat, ikut a Tokodos na Nion i pitar a nilaun.
7 A kum Warkurai ra o God i pitar tar det torom o Moses, ra di tumus tar det una ru wat, det wanpat tomo nama minamar anun o God. Ra o Moses i losi torom a taro Israel, ka det pet lar pasi sur det in tama in masarino, uni in masarino i talapor doko nama minamar anun o God. Ikut numur, a talapor ina minamar ra, i rop nanan gusuni. A kum Warkurai ra det upuaso a minat, det wanpat nama minamar lenra.
8 Ikut a matok na kunubus una Tokodos na Nion, a minamarino i labo sakit tauni.
9 A kum Warkurai anun o Moses det wanpat nama labino minamar, ikut a pinapam na mur Warkurai i pitari kut a minat. Ikut a pinapam ina matok na kunubus i utokodos a taro umatan o God, ma a minamarino i labo sakit.
10 A kum Warkurai anun o Moses ra det wanpat nama labino minamar numugu, kalako minamarin det mo. Uni a matok na kunubus, a minamarino i labo sakit tauni.
11 A kum Warkurai anun o Moses ra i ling na rop, i wanpat tomo nama minamar. Ikut a matok na kunubus ra in kis tukum, a minamarino i labo sakit tauni.
12 Ka met ngara sur met in wasiso puaso nama matok na kunubus, uni met nurnur lena, in kis tukum.
13 Ka met elar nam o Moses, ra i pulus bat in masarino nama du malu, sur gong a taro Israel det tama a minamar, ra i rop nanan gusun in masarino.
14 Ikut a nuknukin det i tobonot, ma tuk uniri, ra di luk a kum wasiso una mugano kunubus torom det, i elar kut nami ra di pulus bat a nuknukin det nama du malu ra. Katutaio i rakon ru i, uni o Karisito kut, in rakon ru i gusun osi ra tagun o Karisito.
15 A lingmulus, tuk uniri, ra di ser luk a kum Warkurai anun o Moses torom det, i elar nama du malu kura i pulus bat a nuknukin det.
16 Ikut ra taio i milet torom a Labino, o Karisito in rakon ru a du malu ra gusuni.
17 A Labino i a Nion, ma taio ra a Nion a Labino kura uni, in langolango.
18 Ma dat, ra ka di pulus bat a masarindat nam tu du malu, dat upuaso a minamar anun a Labino. Ma anundat a nilaun i tupukus nanan sur dat in elar nam o Karisito, ma anun a minamar i lubung una nundat a nilaun. A minamar ra, tan a Labino ut, i ra a Nion.