25
Maimaituwa ena palai waiyawa ḡalana wailovelovena
Maimaituwa Mousis i giuwe te lava ya giuwedi te edi puyo mwali tabudi bi tabudi sa natomedi Maimaituwa ena palai waiyawa voiyena aubaina.
8 Bada, Mousis i giuwena gado, “Islael lavedi kwa giuwedi te waitaubanava palaina waiyawa sa ḡala te tagu tedi vaitedi ka miya.
9 Niga palaina nopona ba ena ḡonaḡona vaitedi sa voiyedi, tagu yà wailovemna mainana.”
Waianina bogesina
10 Tedi akesiya kainemo bogesi sa voiyena ba lofana 110 sentamita, ena taba ba 66 bi kaidakina ba 66 sentamita.
11 Bi bogesina nopona bi taulina matabuna gold gabugabu vuneḡinemo sa pati yaḡosi.
12 Bi lin 4 ko voiyedi kewa ani laitatana. Lin labu niga nevanemo bi labu noko nevanemo.
13 Tam anikewana kai akesiyamo kwa voiyedi. Bi kewedi mododi goldimo kwa pati yaḡosidi.
14 Bi tam kewa lin nopodimo kwa laitatedi anilauavala.
15 Niga kewedi ba lin nopodimo sa kena mote koma soluvaidi.
16 Laḡannemo bogesina kwai kovina ba waianina ḡakimidi tabetabedi labu dabedimo waiḡake gilugilumidi bogesina noponemo kwa sivu yovoḡedi.
17 “Bogesi kuvuna goldimo kwa pati yaḡosi. Mba kuvunana ba gebogebo ani noḡotikamaḡena gabuna. Lofana ba 110 sentamita bi tabana ba 66 sentamita.
18 Bi gold ko bibi waitabetabedi te kelubim aluwidi labu ko voiyedi.
19 Bi kuvu dabanemo aluwidi kwa pati waiḡemotidi, ḡesau isunemo bi ḡesau isunemo.
20 Kelubim aluwidi labu kwai moitodi te matedi gabu ḡemota. Bi mabedi kuvuna sai kwesitawi bi sa kitakita yovoḡe.
21 Kamaina bi ḡakima tabetabedi dabedimo waiḡake gilugilumidi bogesina noponemo kwa sivu yovoḡedi bi kuvuna kwa vai te kwa kuvu.
22 Bi waianina bogesina kuvu dabanemo, gebogebo ani noḡotikamaḡena gabunemo kelubim labu gavogavodimo, tagu tam vaitem tai taubanava. Bi egu waiḡake matabudi yà vitem Islael lavedi aubaidi.”
Maimaituwa kota Mousis i giuwe te bainewa bena olta goldimo voivoiyena piupiu ani gabuna. Bi kwadam kaina lagana 7 ya voiyedi. Tana kota Mousis i giuwe bainewa palai waiyawa ya voiye. Bi noponemo nakanaka labu, guduboyo yai dawe te yai govegove. Bi kota i giuwe te blonsimo olta ya voiye ḡamoḡamo ani lausewasewayedi bi aboma dididiga ani launimakoḡa.