24
Waianina bagibagina
3 Mousis i yovo munaḡa lava lisidimo bi Bada ena waiḡake bi ena wailovelove matabuna lava i giuvitedi. Bi tedi matabudi ai anina ḡemota bi a giuna gado, “Kamaina, tama Bada bai matabuna i giugiuwena ka voiye.”
4 Ḡome Mousis, Bada ena giu bi ena waiḡake bukamo i gilumidi. Bokina mainana olaolalemo i kenamoito bi oya pakanemo olta i voiye. Bi kota ḡakima nananakidi 12 i waimoitodi bi ḡakimidi ba Islael dam 12 yawai matailedi.
5 Kamaina bi Mousis Islael ewaewalidi i giukamaḡedi te ḡamoḡamo a vunudi bi Bada lisinemo sewasewa a gabuḡosedi. Bi kota bulumakau a lausewasewayedi Bada lisinemo wainuwaḡemota aubaina.
6 Ḡome Mousis ḡamoḡamodi kwasinidi nevana abomemo i ḡini yovoḡe bi olta dabanaḡa i lai sepusepu nawe.
7 Tana kota waianina bukana i vai bi i iyevi lava matabudi lisidimo. Tedi matabudi Bada giuna a vaiye bi a giuna gado, “Kamaina, tama Bada bai matabuna i giugiuwena ka voiye.”
8 Mousis kwasina abomina i vai bi lava i laisepusepudi bi i giuna gado, “Niga kwasinina ba waianina matailina yà laibagi Bada i voivoiyena.”
12 Bada, Mousis i giuwena gado, “Kwa saḡa oyamo lisigumo kwa miyamiya kaka, ḡakima labu tabetabedimo egu waiḡake bi egu wailovelove e gilugilumina yà vitem. Bi kwa yovo kwa nawa bi lava kwai lovelovedi te sa kaiwatedi.”
13-14 Kamaina bi Mousis tausaguna Diyosuwa vaitena a vononoḡa, oya saḡaina aubaina. Tana waibabada i giuwedina gado, “Niga ḡome ko labelabemai eete ka yovo munaḡa lisimimo. Elon bi Uwa ba niga vaitemi bamoda aiyai ena pilipili ba ya nawa lisidimo te sa kadidimani.” Ḡome Mousis bi Diyosuwa Maimaituwa ena oya saḡaina ai tubu.
15 Mousis i saḡa i nawa Maimaituwa ena oya dabanemo bi giyou pwatapwatana oyana i sumatawi.
16 Bi Bada namalina i yovo Sainai oyana dabanemo bi giyou i kenana eete laḡan 6 a kovi. Bi laḡan wai 7-nemo giyou noponaḡa Bada, Mousis i giuwe te ya nato lisinemo.
17 Bi Islael lavedi Bada namalina oya dabanemo a kita saḡe maibena kai vavanina, ḡemoḡemotina dobu ya kala ḡosa.
18 Mousis oya i saḡai te giyou noponemo i sola nawa. Bi oyanemo i miyana laḡan 40 bi dudubala 40.