25
Ha Pangngalig Cha Simpuɏuʼn Byebyeɏasang
1 Intuɏuy Jesus un kalala, “Ha Mampangatan Apudyus ked miyalig si simpuɏuʼn byebyeɏasang un lampàawit si silawcha ta umoycha abton chi leɏakiʼn mikaseɏ.
2 Cha lima kan chicha laog-oggogencha, ngim cha lima ked lasilib.
3 Langawit cha mangkaoggog si silawcha ngim achipuncha langaɏa si igas un useɏoncha.
4 Ngim cha lasilib, langaɏacha si silawcha ya igas un useɏoncha.
5 Gapu ta lalachew un gummatong chi leɏakiʼn mikaseɏ, sinchuchukmog cha hachiʼn byebyeɏasang ot lasuyopcha.
6 “Gawan pun chi labi, inggew chi lampakuy un kalala, ‘Allaʼn ased chi leɏakiʼn mikaseɏ! Ingkayu abton siya!’
7 Ot bummangon cha hachiʼn byebyeɏasang ot insagalacha silawcha.
8 Ot kalan cha limaʼn mangkaoggog kan cha lasilib, ‘Idchen chikami u si igasyu ti allaʼn laamin chi igas chi silawmi.’
9 “Ngim kalan cha lasilib, ‘Lai, achipun umalay kan chitaku losan. Ingkayuggey mangngila si tinchaan para kan chikayu.’
10 “Ot ummoy cha mangkaoggog langngila. Ngim lalikmud cha pun, gummatong chi leɏakiʼn mikaseɏ. Ot litun-ud kan siya cha lakasagalan byebyeɏasang ot lilumlokcha si kaseɏan ot liyolob chi olob.
11 “Ummooli pun, gummatong cha mangkaoggog, ot kalancha, ‘Apu, Apu, iggatlu chikami!’
12 “Ngim summongbyat chi leɏakiʼn mikaseɏ un kalala, ‘Achipun makwa, ti lappun ammuk kan chikayu.’ ”
13 Ot inyalungus Jesus kalan, “Masapuɏʼn makasagala kayu kalayun, ti achipunyu ammu eɏgew willu uras un umaliyak.”
Ha Pangngalig Cha Allat Cha Lipiyeɏʼn Pilak Kan Chicha
(Luk. 19:11-27)
14 Ot intuɏuy Jesus un kalan, “Ha Mampangatan Apudyus ked miyalig si osaʼn taguʼn umoy mambiyasi si adchayuwan un ili. Ilayagela cha bubùulola ot impiyeɏla kan chicha cha kukkuwala.
15 Ot illidchela kacha osa sigun si kabyeeɏala. Si osa, illidchola lima un talent. Ked ha mikadwa, illidchola chuwa un talent, ked ha mikatlu, illidchola osa un talent. Ot ummoyon siya.
16 “Ha bubùulon un laidchen si lima un talent, kakmala illigusyu ot lakagalansiya si limaʼn talent.
17 Siya bo killingwan chi bubùulon un laidchen si chuwaʼn talent, lakagalansiya si chuwaʼn talent.
18 Ngim ha bubùulon un laidchen si ossaan talent, ummoyla ingkaub chi pilak chi apula.
19 “Labyeyebyeyeg pun, gummatong chi ap-apucha ot impaayegla chicha ot ilimusla lu himma killingwacha si pilakla.
20 Ot ummoy kan siya chi laidchen si limaʼn talent ot illidchola kan siya chi simpuɏu. Kalala, ‘Apu, illidchelak si limaʼn talent ked allaya bo lima un lagalansiyak.’
21 “Ot kalan chi ap-apula, ‘Gettok, bibiɏu killingwam ya mapiyeɏka un bubùulon. Gapu ta mapiyeɏka si akit un byaleg, ipiyeɏk kan sika chi chakchakeɏʼn gated. Waylu ta makaganggalaska kan sakon.’
22 “Ot ummoy bo laidchen si chuwaʼn talent kan siya ot kalala, ‘Apu, chuwaʼn talent illidchom kan sakon ked allaya bo chuwaʼn talent un lagalansiyak.’
23 Ot kalan chi ap-apula, ‘Gettok, bibiɏu killingwam ya mapiyeɏka un bubùulon. Gapu ta mapiyeɏka si akit un byaleg, ipiyeɏk kan sika chi chakchakeɏʼn gated. Waylu ta makaganggalaska kan sakon.’
24 “Oli pun ummoy chi bubùulon un laidchen si osaʼn talent ot kalala, ‘Apu, ammuk un lauyung kan tagu. Apitom chi achipunlu immuɏa ya aliyom chi achipunlu inyosok.
25 Umogyatak kan sika, ot ummoyku ingkaub chi pilaklu. Allaya pilaklu.’
26 “Ot kalan chi ap-apula kan siya, ‘Lawwingka ya lasachut kan bubùulon! Lu ammum un apitok chi achipunku immuɏa ya aliyok chi achipunku inyosok,
27 puggey achi inchipusitu si bangku pilakku ta awed paalakla un illaɏak pati puulan si allaʼn langulilak?’
28 “Ot kalala si osaʼn bubùulola, ‘Eɏam chi halat un pilak kan siya ked idchom si langchon si simpuɏuʼn talent.
29 Ti ha mapiyeɏʼn tagu, machogchog-an chi maatod kan siya inggala masaweɏ. Ngim ha taguʼn achipun mapiyeɏan, makaan chi ulay akit un awed kan siya.
30 Ot kalala si lappun simbilan bubùulon, ibyelluyu siya si lugeɏʼn amod chi gikbotla, udchi sin-iibin cha tagu ya singngingillot chi ngiponcha.’ ”
Ha Alungus Chi Makuisan Cha Tagu
31 Ot intuɏuy Jesus un kalala, “Sakon un Alak chi Tagu, lu umaliyak un isun chi Ari, kadwak cha losan un anghel ked maila kilachayawku. Ked mantugewak un manturay ya manguis si losan.
32 Ked manchetchetong si sangwalak cha losan un tagu utla pita. Ked mansilaok chicha si chuwaʼn grupu un isun chi koon chi man-aayyuwan un mangisila si keɏlilu kan cha keɏching.
33 Ked iggak cha mangkabyaɏuʼn tagu un miyalig si keɏlilu si kapit chi machuwalanku. Ngim cha mangkaɏawing un tagu un miyalig si keɏching, iggak si kapit chi machuwigik.
34 “Ked sakon un Ari, ibyegak kan cha inggew si kapit chi machuwalanku, ‘Wayyu, chikayuʼn bilinchisyulan Amak ta tawichonyu mipatiyanyu si Mampangatan Apudyus un lisasaggalan inggewanyu malipud si lakwaan chi lubung.
35 Ti labitilak ot pilakalalak, lauwawak ot pilailumalak. Lichawchaw-asak ot limangiliyak.
36 Lallulusayak ot sililupalak, lasakitak ot ilayyuwalalak, libyaɏuchak ot bilisitaak.’
37 “Ot summongbyat cha lalintog un tagu un kalancha, ‘Apu, kam-amman chi langitullonganmi kan sika un labitin ot pilakalanmi sika willu lauwaw ot pilailumanmi sika?
38 Kam-amman bo lichawchaw-asam ot limangilimi sika willu lallulussayam ot sililupanmi sika?
39 Kam-amman chi langitullonganmi kan sikaʼn lasakit ot illayyuwalanmi sika willu libyaɏuchem ot bilisitami sika?’
40 “Ked sumongbyat chi Ari kan chicha, ‘Tuttuwa ibyegak kan chikayu, lu killingwayu si osaʼn kabyabyaan kan cha susuludku, killingwayu bo kan sakon.’
41 “Ked ibyegak kan cha taguʼn inggew si machuwigik, ‘Wissed kayu, chikayuʼn machuchusa ti mibyellu kayu si mallalayun un apuy un lisasaggala para kan Satalas ya cha anghelesla.
42 Ti labitilak pun, achipunyu sakon pilakalan, lauwawak pun, achipunyu sakon pilailuman.
43 Lichawchaw-asak pun si iliyu, achipunyu sakon limangili ya lallulusayak pun, achipunyu sakon sililupan ya lasakitak pun, achipunyu sakon ilayyuwalan ot libyaɏuchak pun, achipunyu sakon bilisita.’
44 “Ot summongbyatcha, ‘Apu, kam-amman langitullonganmi kan sikaʼn labitin willu lauwaw, willu lichawchaw-as willu lallulusay, willu lasakit willu libyaɏud ot achipunmi sika tiluɏungan?’
45 “Ked songbyatak chicha, ‘Tuttuwa ibyegak kan chikayu, lu achipunyu tiluɏungan chi osaʼn kabyabyaan kan cha susuludku, achipunyu bo sakon tiluɏungan.’ ”
46 Ked inyalungus Jesus, un kalala, “Mipooycha si mallalayun un machusaancha, ngim cha lalintog un tagu, makatagucha kan Apudyus si ing-inggala.”