6
1 Ked achi taku ipuputput chi chamchamuʼn tudtuchu mipanggop kan Kristu ngim ituɏuy taku achaɏon chi lachaɏom un tudtuchu ta chumakchakɏan chi pammati taku. Achipun masapuɏʼn ikasikasin taku achaɏon chi puun chi pammati taku un isun chi mambyabyawiyan si lawwing un pin-a taku koon ya in-ilon taku un mamati kan Apudyus,
2 cha tudtuchu mipanggop si bunyeg, mangipatayan si ima kan cha iluwaluwan, kasin umuliyan cha latoy mataguwan ya mallalayun un manguisan Apudyus kan cha losan un tagu.
3 Ked ha koon taku otyan lu ipalubus Apudyus, achaɏon taku cha lachaɏom un tudtuchu un mampakoscheɏ si pammati taku.
4-5 Ti cha taguʼn lan-awichencha pammaticha, achipun makwaʼn mambyabyawicha kasin. Lalawagen chi somsomokcha, lapachasancha amod un binchisyun Apudyus, ya ilawatcha Ispiritun Apudyus. Kan lapachasancha kilabiɏun cha ugud Apudyus ya laliklacha pallakabyelin un mipaila si umaliʼn timpu.
6 Gapu ta lan-awichencha pammaticha, pulus lu makwaʼn mambyabyawicha kasin, ti isun chi ilansacha kasin si krus chi Alak Apudyus ya imbibiincha si sangwalan cha tagu.
7 Chitaku miyalig un pita. Ha pitaʼn lauche-uchelan tumubu cha bibiɏuʼn muɏa un tumutup kan cha langawachi ked hachi binchisyulan Apudyus.
8 Ngim ha pitaʼn tummubuwan cha lasi ya cha luut, lappun simbila. Ti achipun mabyeyeg ked yam-alon Apudyus si apuy.
9 Ngim ulay lu kamatchi ilugudmi, ay-ayatok un susulud, achipun kami machalagen mipanggop kan chikayu ti mantegod kami un labibbiɏu kasasaedyu ked lamlamaonmi mataguwanyu.
10 Ti lalintog si Apudyus, ked achipunla maliwatan cha pin-ayu killingwa ya ayatyu kan siya un impailayu si pin-ayu laluɏungan kan cha susulud taku un mamati ya sissiyan ituɏutuɏuyyu tuɏungan chicha.
11 Ked pionmi otyan kacha osa kan chikayu ipapatiyu ituɏuy chi lamlamayu ta malak-amyu inggala si alungusla.
12 Ya achi kayu sumachu-sachut, ngim ha koonyu tuɏachonyu cha lamati ya langan-alusancha, ked ilawatcha ingkarin Apudyus.
Mantegochen Cha Ingkarin Apudyus
13 Si langkariyan Apudyus kan Abraham, gapu ta lappun langatngatu lu siya, intalungla long-egla langkariyan.
14 Kalala kan Abraham, “Ikarik un binchisyulak sika ya paachuwok cha galaklu.”
15 Gapu ta ilalu-alusan Abraham un languuway, laawatla ingkarin Apudyus.
16 Lu mansapata osaʼn tagu, useɏola ngachen chi osaʼn langatngatu lu siya, ked hachi mampaloklok si ingkarila ya siya bo magamputan cha losan un lillili.
17 Ked kamatchi bo, un pion Apudyus un ipailan ustu-ustu kan cha taguʼn ummawat si ingkarila un achipun maobbo-obbos chi simsimmokla. Tilakcheɏala alla gapu si ingkarila.
18 Killingwan Apudyus chi alla ta cha allaʼn chuwa achipun maobbo-obbos ti pulus lu mantuntulli si Apudyus. Ked chitakuʼn mamati kan siya masegeg takuʼn mamopotpot si lamlama un illidchola kan chitaku.
19 Ked ha allaʼn lamlama taku, siya lumin-otan, mampakchot ya mangigoled si biyeg taku. Siya mangilussut kan chitaku si lumlokan takuʼd langit si ustuʼn inggewan Apudyus.
20 Taplu tuɏungan chitaku, ummun-ula si Jesus un lilumlok para kan chitaku. Siya lambyalin un kangatuwan un pachi taku si ing-inggala, un isun chi kilapachin Melchizedek si awi.