5
1 Kacha kangatuwan un pachi ked chilutukan cha asintatagula ya siya mapiliyan un mangitakcheɏ kan cha tagu si sangwalan Apudyus. Siya mangichatun kan cha sagut ya losan un maichatun kan Apudyus gapu si byasbyasuɏcha.
2 Ked gapu ta tagu siya, maalusala cha makabyasuɏ un achipuncha ammu pin-acha koon un lawwing, ti ulay bo siya mismu alla bo mangkapuyala.
3 Ked gapu si kilakapsutla, masapuɏ un mangichatun si chatun kan Apudyus para si mismuʼn byasuɏla ya para kan cha byasbyasuɏn cha tagu.
4 Lappun tagu si italungla chutukan chi uwalan long-eg si machayaw un kasasaed chi kangatuwan un pachi. Ti abus si Apudyus un manchutuk si tagu, un isun chi lanchutukala kan Aaron si awi.
5 Ked isula bo kan Kristu, un achipunla chilutukan chi long-egla un mambyalin Kangatuwan un Pachi, ngim si Apudyus chi lanchutuk kan siya ya langibyega kan siya,
“Sika Alakku, si salaʼn eɏgew lambyalilak un Amam.”
6 Siya bo langibyega si osaʼn liigilin ugud Apudyus un kalala,
“Pachika si ing-inggala, un isun chi kilapachin Melchizedek.”
7 Si illinggewan Jesus utla pita, inyibinlaʼn lalluwalu ya lanchawat kan Apudyus un makwaʼn malagu kan siya si matoyala. Ked chingngeɏn Apudyus chi luwalula ti tummuttuwa ya ingkumbyabyala somsomokla kan Apudyus.
8 Ulay lu Alak Apudyus siya, laacheɏla un tummuttuwa gapu si lapampaligatala.
9 Ked gapu si hachiʼn killingwala lipaila un lappun langkuɏangala, siya lambyalilala puun chi mallalayun un mataguwan cha losan un tumuttuwa kan siya.
10 Ked chilutukan Apudyus siya un kangatuwan un pachi un isun chi kilapachin Melchizedek.
Ha Mitudtuchu Kan Cha Mangiyagey Si Pammaticha
11 Achu piok un ibyega mipanggop kan cha allaʼn byaleg, ngim mansukun un ipakaawat kan chikayu ti mabyeyeg un maawatanyu.
12 Ti ulay lu labyeyeg chi lamatiyanyu ya kabyeeɏanyu otyan un mantudtuchu kan cha uchum, ngim inggala si sala masapuɏyu pay laing chi sabyaliʼn mantudtuchu kasin kan chikayu si cha chamchamuʼn tudtuchu mipanggop si ugud Apudyus. Masapuɏyu gatas, chakampun un mangkot-ong un makan.
13 Ti losan un sumusususu, sissiyan alak achipunla ammu tudtuchu mipanggop si kilalintog.
14 Ngim cha mangkot-ong un makan ked para kan cha lalakman, un impaingsachaʼn mansomsomok un milasincha bibiɏu kan lawwing.