8
దేవుణుదిఙ్‌ నమ్మితి వరిఙ్ సవులు పాడుః కిజినాన్‌
1 ఆ దినమ్‌కాఙ్‌ యెరూసలేమ్‌దు మహి దేవుణు సఙమ్‌దిఙ్‌ గొప్ప మాలెఙ్ ఆజి మహాద్‌. అపొస్తురు ఆఏండ మహి నమ్మితికార్ విజేరె యూదయ సమరియ దేసమ్‌కాఙ్ సెద్రిత సొహార్.
2 బక్తి కల్గితి నమ్మిత్తి లోకుర్ స్తెపానుఙ్‌ సమాది కితారె వన్ని వందిఙ్ గొప్ప దుకం ఆజి అడఃబాతార్.
3 నస్తివలె సవులు ఇనికాన్‌ యేసుప్రబు ముస్కు నమకం ఇడ్తిమహి వరి నమకం పాడుః కిదెఙ్ సుడ్ఃతాన్. ఇల్కాఙ్‌ ఇల్కాఙ్‌ డుఃగ్‌జి మొగ్గకొడొఃరిఙ్‌ అయ్‌లికొడొఃకాఙ్ ఈడిఃసి ఒసి జెలిదు ఇడ్ఃజి, వాండ్రు సఙమ్‌దిఙ్‌ పాడుః కిదెఙ్ మొదొల్‌స్తాన్.
సమరియ దేసమ్‌దు సువార్త సాటిస్తార్‌
4 అయావలె సెద్రితి సొహి సఙమ్‌దికార్‌ సువార్త సాటిసి విజు బాడ్డిఙ విజెరిఙ్‌ వెన్‌పిసి బూలాతార్.
5 అయావలె అపొస్తురు ఏర్‌పాటు కిత్తివరి లొఇ ఒరెన్ పిలిపు ఇనికాన్‌ సమరియ పట్నమ్‌దు సొహాన్‌. అబ్బె యేసు, క్రీస్తు ఇజి బోదిస్తాన్.
6 పిలిపు వెహ్తి మాటెఙ్‌ లోకుర్ విజేరె నెగ్రెండ వెహారె వాండ్రు కిత్తి బమ్మాని గుర్తుఙ్ సుడ్ఃతార్.
7 కిక్కు కాల్కు సాతికార్, సొటవారు నండొండార్ అబ్బె వాతారె నెగెండ ఆతార్. నండొండార్ లోకుర్ దెయం అస్తి మహికార్‌ అబ్బె మహార్‌. దెయమ్‌కు నండొ గగోలాజి వరిఙ్ డిఃస్తె సొహె.
8 అందెఙె సమరియ పట్నమ్‌దు నండొ సర్ద కల్గితాద్.
గార్డి పణి కిని సిమోను
9 సమరియ పట్నమ్‌దు సిమోను ఇని ఒరెన్ మహాన్‌. సిమోను ఆ పట్నమ్‌దు సెగం పంటెఙ్ గార్డి విదె కిజి నాను ఒరెన్ గొప్ప వాండ్రు ఇజి వెహ్సి మహాన్‌. అబ్బె మహి లోకాఙ్‌ సిమోను బమ్మ కిబిసి మహాన్‌.
10 అయ పట్నమ్‌దు మహికార్‌ ఇజిరికార్ పెరికార్‌ విజేరె వీండ్రు ‘దేవుణు గొప్ప సత్తు ఇనికాన్‌’ ఇజి వెహ్సి వన్ని ముస్కు నమకం ఇడ్ఃతార్.
11 నండొ కాలం సిమోను గార్డి పణి కిజి లోకాఙ్‌ బమ్మ కిబిసి మహాన్‌. అందెఙె వారు సిమోనుఙ్ నమ్మితార్.
12 గాని దేవుణు ఏలుబడిః వందిఙ్, యేసుక్రీస్తు వందిఙ్ పిలిపు పట్నమ్‌ది లోకాఙ్‌ సాటిస్తిఙ్ యా సువార్త వెహికార్. నమ్మిత్తారె మొగ్గకొడొఃర్, అయ్‌లికొడొఃక్‌ బాప్తిసం లాగె ఆతార్.
13 అయావలె సిమోనుబా నమ్మిజి బాప్తిసం పొందితాండ్రె పిలిపుఙ్ డిఃస్‌ఏండ వన్నివెటనె మహాన్‌. పిలిపు కిని బమ్మాని గుర్తుఙ్, బమ్మాని పణిఙ్ సుడ్ఃజి సిమోను గొప్ప బమ్మ ఆతాన్.
14 యేసు ప్రబు వందిఙ్ వెహ్తి సువార్త సమరియ దేసెమ్‌దికార్‌ ఒపుకొటార్ ఇజి యెరూసలేమ్‌దు మన్ని అపొస్తురు వెహర్. వెహారె పేతురుఙ్‌ యోహానుఙ్‌ వరి డగ్రు పోక్తార్‌
15 వీరు వాతారె సమరియ పట్నమ్‌దు నమ్మితి వరి ముస్కు దేవుణు ఆత్మ సత్తు వాదెఙ్‌ ఇజి పార్దనం కిత్తార్‌.
16 ఎందనిఙ్‌ ఇహిఙ అబ్బెణి దాక దేవుణు ఆత్మ సత్తు వరి ఎయేరి ముస్కుబా రెఏండ మహాద్‌. వారు ప్రబువాతి యేసు పేరుదాన్‌ బాప్తిసం ఉండ్రెనె లాగె ఆజి మహార్‌.
17 అయావలె పేతురు, యోహాను వరి ముస్కు కిక్కు ఇడ్తిఙ్ దేవుణు ఆత్మ సత్తు వరి ముస్కు వాతాద్.
18-19 అపొస్తురు లోకుర్ ముస్కు కిక్కు ఇట్తి వలె వారు దేవుణు ఆత్మదాన్‌ నిండ్రిజినార్ ఇజి సిమోను సుడ్ఃతాన్. సుడ్ఃతండ్రె, “నాను ఎయెన్‌ ముస్కు కిక్కు ఇడ్నానొ, వాండ్రు దేవుణు ఆత్మ సత్తుదాన్ నిండ్రిని వజ యా అతికారం నఙిబా సిదా”, ఇజి వెహ్సి వరి ముందాల డబ్బు ఇట్తాన్.
20 అయావలె పేతురు, “నీను డబ్బు సీజి దేవుణు వరం సంపాదనం కిన ఇజి ఒడిఃబిత్తిదా? నీ డబ్బు నీ వెట నాసనం ఆపిద్.
21 నీ ఆలోసనం దేవుణు సుడ్ఃతిఙ్ సరి ఆతిక ఆఏద్‌. అందెఙె మాపు కిని పణిదు నిఙి ఇని వంతు సిల్లెద్‌.
22 అందెఙె యా సెఇ ఆలోసనమ్‌కు డిఃసిసీజి దేవుణు డగ్రు వాజి పార్దనం కిదు. నీను ఒడిఃబిత్తి ఆలోసనమ్‌ వందిఙ్ దేవుణు నిఙి సెమిస్నాన్సు.
23 నీ మన్సుదు నండొ గోస నిండ్రిత మనాద్‌ ఇజి నాను నెస్నా. అక్కాదె ఆఏండ నీ పాపమ్‌కు నిఙి తొహ్తె మన్నె ఇజి నాను నెస్నా”, ఇజి పేతురు వెహ్తాన్‌.
24 దన్నిఙ్ సిమోను, “నీను వెహ్తికెఙ్‌ ఇనికబా నా ముస్కు రెఏండ మీరు నావందిఙ్‌ యేసుప్రబుఙ్‌ పార్దనం కిదు”, ఇజి పేతురుఙ్‌ యోహానుఙ్‌ వెహ్తాన్‌.
25 వెనుక పేతురు, యోహాను సాసి వెహ్సి, యేసుప్రబు సువార్త సాటిసి, యెరూసలేమ్‌దు మహ్త వాతార్. వాని సరి సమరియదు మహి నండొ నాహ్‌కాఙ్ సువార్త సాటిసి వాతార్.
పిలిపు అయ్తియొపియది వన్నిఙ్‌ బాప్తిసం సిత్తాన్‌
26 అయావలె, ఒరెన్ దేవుణు దూత పిలిపుఙ్ వెహ్తాన్‌, “నీను దసిణం దరోట్‌ సొన్సి యెరూసలేమ్‌దాన్ గాజ ఇని పట్నం సొని బిడిఃమ్‌ బూమిదు సొన్‌అ”, ఇజి వెహ్తాన్‌.
27-28 అందెఙె పిలిపు సోతాండ్రె సొహాన్‌. సొన్సి మహిఙ్ ఒరెన్ అయ్తియొపియదికాన్ రదం ముస్కు సొన్సినాన్. వాండ్రు అయ్తియొపియ దేసెమ్‌ది రాణి కందెకెబాన్ ముకెలమతి పణి కినికాన్‌ ఒరెన్. ఇని పణి ఇహిఙ దేసెమ్‌ది డబ్బు నడిఃపిసిని దన్ని ముస్కు వీండ్రు మంత్రి. వీండ్రు యెరూసలేమ్‌దు పార్దనం కిదెఙ్ సొహాండ్రె మర్‌జి సొన్సినాన్. సొన్సి మహిఙ్ వీండ్రు రదమ్‌దు బసి యెసయ ప్రవక్త రాస్తి పుస్తకం సద్‌విజినాన్.
29 అయావలె దేవుణు ఆత్మ పిలిపుఙ్, “నీను రదం డగ్రు సొన్సి దన్ని వెట నడిఃజి సొన్‌అ”, ఇజి వెహ్తాన్‌.
30 పిలిపు రదం డగ్రు ఉహ్‌క్సి సొహిఙ్‌ అయా అయ్తియొపియదికాన్ యెసయ ప్రవక్త రాస్తి పుస్తకం సద్‌విజినాన్. పిలిపు అక్క వెహాన్. వెహాండ్రె, “నీను సద్‌విజినిక అర్దం కిజినిదా?”, ఇజి వెన్‌బాతాన్.
31 వెన్‌బాతిఙ్, “ఎలాగ అర్దం కిన? ఎయెన్‌బా నఙి అర్దం వెహ్‌ఏండ మహిఙ ఎలాగ అర్దం కినా? రదమ్‌ ముస్కు ఎక్సి నా వెట బస్‌అ. దిన్ని అర్దం వెహ్సి సిదా” ఇహాన్‌, అయ అయ్తియొపియదికాన్. అందెఙె పిలిపు రదం ఎక్సి వన్ని డగ్రు బస్తాన్.
32 అయ అయ్తియొపియదికాన్ సద్‌విజి మహి మాటెఙ్‌ ఇనికెఙ్‌ ఇహిఙ “సప్తెఙ్‌ ఒని గొర్రె వజ వన్నిఙ్‌ ఒతార్. బుడుఃస్కుఙ్‌ కత్రిసినివలె అలెజి మంజిని మెండగొర్రెపిల్ల వజ అలేత మహాన్‌. వాండ్రు ఇనికబా ఇన్‌ఎతాన్.
33 వారు వన్నిఙ్‌ సిగు కిత్తార్‌. వన్నిఙ్‌ నాయం దొహ్‌క్‌ఏండాత సొహాద్. వన్ని పొటెఙాణి వరి వందిఙ్ ఎయెర్‌బా వెహ్‌ఏండ ఆనార్. ఎందనిఙ్‌ ఇహిఙ, వన్ని పాణమ్‌దిఙ్ బూమి ముస్కుహాన్ లాగితార్”.
34 అయ అయ్తియొపియదికాన్ ఈహు వెన్‌బాతాన్, “ప్రవక్త ఎయె వందిఙ్ ఈహు వెహ్సినాన్‌? వన్ని వందిఙెనా, మరి ఒరెన్ వందిఙా? దయ కిజి వెహ్‌అ”.
35 అందెఙె పిలిపు అయ అయ్తియొపియదికాన్ సద్‌వీజి మహి యెసయ ప్రవక్త రాస్తి పుస్తకమ్‌దు మహి మాటదాన్‌ మొదొల్సి యేసుప్రబు వందిఙ్ సువార్త వెహ్తాన్‌.
36 ఆహె వారు సొన్సి మహిఙ్ ఏరు మహి ఉండ్రి బాడ్డిదు వాతార్. అయ అయ్తియొపియదికాన్ వెహ్తాన్‌, “ఇబ్బె ఏరు మన్నె. నాను బాప్తిసం లాగె ఆదెఙ్‌ ఇనికబా అడ్డు మనాదా?”.
37 దన్నిఙ్ పిలిపు, “నీను మన్సు పూర్తి యేసుప్రబుఙ్‌ నమ్మిత్తిఙ బాప్తిసం లాగె ఆదెఙ్‌ ఇని అడ్డుబా సిల్లెద్‌”, ఇహాన్‌. అందెఙె వాండ్రు, “ఒఒ, యేసుక్రీస్తు దేవుణు మరిసి ఇజి నాను నమ్మిజిన”, ఇహాన్‌.
38 అయావలె, “రదం నిల్‌ప్‌అ”, ఇజి అయ్తియొపియదికాన్ ఆడ్ర సిత్తాన్‌. రదం నిల్‌ప్తాండ్రె వాండ్రు, పిలిపు, రిఎర్‌ డిఃగ్‌జి ఏరుదు డిఃగితార్. పిలిపు అయ్తియొపియది వన్నిఙ్‌ బాప్తిసం సిత్తాన్‌.
39 వారు ఏరు లొఇహాన్‌ వెల్లి వాతిఙ్‌ వెటనె దేవుణు ఆత్మ పిలిపుఙ్ కూక్త ఒతాన్. అయ్తియొపిదికాన్‌ పిలిపుఙ్ మరి సుడ్ఃఏతాన్. గాని వాండ్రు సర్ద ఆజి వన్ని సరినె సొహాన్‌.
40 పిలిపు సుడ్ఃతిఙ్ అజొతు పట్నమ్‌దు మన్న ఇజి నెస్తాన్. అబ్బెణిఙ్‌ సోసి వాండ్రు సొహి సరిదు మహి విజు పట్నమ్‌కాఙ్‌ యేసు ప్రబు వందిఙ్ సువార్త వెహ్సి కయ్‌సరియ ఇని పట్నమ్‌దాక వాతాన్.