45
Jujiba kumbi-nu alunga liyikuliyi-babawu
1 Bawuji barra wunumbarra ka-rarrinma barra aluwalu ngala minja kumba-lumbuma baku na-wurdu. Winarrkululu kalili-ja winkandu li-mangaji li-jawina likungu, li-jibiya Yijiba, ngala alu likili-baba, baji kalu-arri arndaarnda, alulumba yilaa. Kulu bawuji barra kumbi-nu alunga liyikiliyi-babawu. “Ngarna barra, marningarna nyirrunga-anyira Jujiba.”
2 Bawuji barra ka-rarri kalngiya kurdandu aluwalu kangka li-ja wurrbi likili-baba, arrkula alunga nyalunga-biyi, kurdandu ka-rarri. Kulu li-mangaji winkanda, li-jibiya Yijiba, wumba kala-nykarri rarrinjarra kulu kalu-lhaa yiwa nyamba-rarrinjarra liyikuliyi-babawu, kalu-lhaa kulu kala-ka jinangu wuka barra aluwa linji-jawinalu, linjiku ki-king, “Nya-mangaji barra jumba-rarrinji Jujiba, kangka bajalu barra likili-baba yilaa,” nganinya kalu-arri alunga liyiku.
3 Kulu yiwa barra Jujiba, ka-arri alunga liyikuliyi-babawu, “Kalngiya barra ngarna Jujiba. Kulu wayi barra wunyatha? Yabi bajiwa?” Ngala li-mangaji likili-baba, wumba kumbi-nu alunga kalngiya yiwa, kulu kalinyamba-kala nalu-mi, kulu kalu-ruwama yiku, kalu-wardanka barra kurdandu barra yiku, marnalu barra yilaa ki-Jujiba. Karnalu-linginma barra bajarnaji wabarrangu wumba kalu-wardimanthaninya awara yiku, bajarnaji barra kalu-wardanka nalu-wurdu yiku kurdandu. Kulu li-ja likili-baba, kurdardi barra kalinyamba-ngarninymanma yiku, kalinyamba-wama yiku wambu.
4 Kulu mili yurrulu ka-wukanyi alunga Jujiba liyikuliyi-babawu, “Marrirru, kirna-barlirra. Kawa rru-wingkaya wunumbarra ngathangkalu!” Kulu kalu-wingka barra yilalu wunumbarra. Kulu mili yurrulu ka-wukanyi, “Ngarna kalngiya Jujiba nyirrunga-anyira wumba kanhirri-jilima wabarrangu linji-ja aluwalu, karnala-ka karakarra wabarrangu, jilimanthalu marnaji Yijiba, kulu marningarna barra.
5 “Barni-wardirrinja rra-nmaya nirru-wurdu kulu barni-wanantha! Kulu barninyamba-yunduyundumantha rra-nmaya wumba kanhirri-ja bajarnaji wabarrangu. Ngala kurdardi yirru kanhirri-janma marnajinju ngala yiwa ki-Yijandu ki-Kud karnili-ja marnajinju barra, ambuliyalu yirrunga barra, ngarna yabimanthawu barra awara yirrunga marda wudurruwu barra, ngarna barra ngulngundayawu nganinya wumba nuwarnu-wirndajkuwu, yirru nmanthalu lhungku, yirru yabirrinjawu nirru-manka.
6 “Marnarnaji barra jinangu lhabayi ka-wayarrinji barra. Kulu yurrulu mili kambala-nmala kurdardi ki-lhabayiyu kanymarda kulu kanymarda arrkula yurrujurru kiwa-nmala kurdardi ki-lhabayiyu.
7 Yiwa kalngiya ki-Yijandu ki-Kud, karnili-ja barra marnajinju yirrunga ambirriju. Kulu ngarna barra karna-ruwama yiku ki-Kud kangka karnili-yibarra wirdiwalangu marnaji nungkarnu-wirndajku, ngarna ngulngundayawu ma-ngarra alunga liyirrungaliyi-ardubirriyu kulu liyirrungaliyi-nganjingku, liyirrungaliyi-murimuribirriyu, kurdardi barra wirndajkirrinjawu nganinyaji barra kangka yiwa barra ki-Yijandu ki-Kud karnili-yibarra marnaji.
8 Kurdardi yirru ngala yiwa. Yiwa barra karnili-yibarra wirdi marnaji. Yiwa kinga wirdi ambirriju ngathangka ngala ngarna ngulakari yilaa wirdi nyuwu-jawuthu ki-yumbulyumbumanthawu ki-awarawu, jarnini wirdi ngulakari yilaa alunga liyi-wuluwu liyi-jibiya Yijiba, alunga wiji.
9 “Yarlajka rru-waniya wunyathalu yilalu! Nyirri-naya ngandarra ja-arrinji awara marnaji! Nyirri-naya wunyatha ngatha, marningarna ngarna Jujiba, jarnini marnaji wirdi ki-awarala Yijiba. Karnili-yibarra ki-Yijandu ki-Kud wirdi nyuwu-ja ki-awarawu marnaji Yijiba. Kulu nyirri-naya ka-wingkala marnajinju ngathangkalu, wingkayawu marnajinju yarlajka.
10 Kulu karnilu-yabimala na-alanji baji Kujin, nguthundu awara, baji barra yiwa arrinjawu wunumbarra ngathangka, yiwa baki likili-ardu, likili-murimuri kulu nyiku yukularri marda nyiku buluki marda nya-mbangu yumbulyumbumantha wumba jiwini yilaa.
11 “Kulu yiwa baji barra Kujin, ngarna barra wudurrumanthawu wunumbarra likili-nganji. Baku barra yurrulu mili kanymarda kulu kanymarda kulu arrkula kiwa-nmala awara kurdardi lhabayiyu. Kalirna-wudurrumanthanama kulu kurdardi yiwa kulu likili-nganji anmanthawu wirndajku, marda nyiku yumbulyumbumantha buluki, jibi, kurdardi anmanthawu wirndajku,” nganinya ka-arri.
12 Kulu yurrulu ka-wukanyi alunga Jujiba, nganinya ka-arri, “Yirru barra wiji, janhirra-nganji ngarna, janhirra-lhaanji barra kalngiya ngarna Jujiba wukanyinjarra. Marda yinda, wunhaka, janha-nganjimu kalngiya ngarna Jujiba nyinki-baba.
13 “Nyirri-naya wunyatha, ngarna barra walkurrawala wunungu wirdiwalangu nyuwu-ja ki-awarawu wiji lukuluku marnaji Yijiba, kulu rru-arriya yiku jinawuthu yumbulyumbumantha wumba jirra-nganji marnaji! Nyirri-nalinaya barra jirra-ngalanganji awara yabi marringaya, nganinya barra rru-arriya yiku wunyathawu. Kulu nyirra-kaya yarlajka marnajinju ngathangkalu!” Ka-arri nganinya bawuji.
14 Kulu kilu-manha wakurlu wurrbi nyiki-anyira Binjamin, kulu ka-rarri yilalu, arrkula rrawulangarra-wibi, kulu marda yiwa Binjamin, kilu-manha, wumimbijilu babakula, marda yiwa ka-rarri yiku nganambajilulu.
15 Kulu nganambajilulu mili li-mangaji nalarrku likili-baba, nganambajilulu kalinyamba-rarri wumimbijilu, kulu kalilu-lhuji likili-baba wiji. Kulu bawuji barra kalinyamba-wukalukanyi barra yabi.
16 Kulu bawuji barra, jinangu barra wuka ja-wingka aluwalu barra, kalala-nykarri wumba kumbi-nu Jujiba alunga liyikuliyi-babawu linji-mangaji winkanda, kala-ka wuka barra yilalu ki-king. Kali-nu nya-mangaji barra king kulu ka-yabirri na-wurdu, kilu-barlirra Jujiba, marda wiji li-jawina likungu ki-king marda, kalu-yabirri nalu-wurdu alunga.
17 Kulu king, ka-arri yiku ki-Jujiba, “Linyi-naya barra linkili-baba, jalirni-jirrinymanji nganinya. Nyalu-yabilyabimaya awara alunga, nyalu-yibalyibarraya awara ki-yirrikirrila, alu waninjawu bajinju ki-awaralu nyungkalunga Kinin.
18 Kulu alu rdumanthawu nyalunga-biyi kulu lalungali-ardu wingkayawu marnajinju, alu lalungali-nganji wiji. Kulu kalirna-ngundarra awara marnaji Yijiba, nya-mangaji awara marringaya, yabi awara alunga marda kalirna-ngundarra, marda ma-ngarra alunga ma-jakarda, alu anmanthawu wudurru yurrngumantha.
19 Kulu linyi-naya jalirni-jirrinymanji mili, nyala-kaya wilbarra aluwa nakaringu marnajingu Yijiba, liyalungaliyi-ardubirriyu, kulu liyalungaliyi-nhanawawu kulu marda nyuwirrunga-biyiyu. Lu-wingkaya aluwa marnajinju.
20 “Kalinyi-nala nganinya, barninyamba-nykalanykarrinja nyuwu-mangajiwuthu ki-awarawu baji, kanthawu marnajinju! Wambu wandi baji nya-mangaji yumbulyumbumantha, wambu wandi! Yamulu kalirna-ngulngundarra awara marnaji, kalngiya marringaya ki-Yijiba awara kalirna-ngulngundarra,” nganinya ka-arri king yiku ki-Jujiba.
21 Kulu ki-Jikaba likili-ardu, nganambaji barra kalu-arri. Kulu ki-Jujiba, kalilu-ngunda wilbarra wumba kalila-ngunda ki-king, kulu marda ma-ngarra alunga, alu nyamba-wudurrumanthawu rru-yabalawu alunga.
22 Kulu kalilu-ngulngunda marringaya jumbala ruthuruthu, ngala wakulamba yiwa nyiki-anyira kilu-ngunda kurdandu jumbala marda ma-jakarda ma-mani yiku nyiki-anyirawu.
23 Kulu marda kili-ja marda yiku nyiki-biyiyu, mili ruthuruthu 10-bala yirrikirri ji-munhama barra awara marrimarringaya yumbulyumbumantha kulu rrarrku mili a-10-bala a-yirrikirri nandayirdi wudurruwu barra ma-jakarda ma-ngarra ma-burlurlu, wudurru yiku nyiki-biyiyu.
Jinangu barra wudurru alunga kili-ja, nuwarrku yiku nyamba-wudurrumanthawu baji akarru baki nuwarrku yiku nyamba-wudurrumanthawu baku ngaliwa karakarra wumbiji wu-yabalangka ngaliwa ka-lhuwarrila karakarra.
24 Kulu kalili-ja barra likili-baba, kalilu-murdama, kulu kalili-jirrinyma, “Barninyamba-mirirrinja yabayabala!”
25 Kulu kalu-lhuwarri bajingu Yijiba bawuji. Akarriya kalu-wingka...i nyala bajinju, kalu-yibanda baji nyungkalunga-biyila ki-Jikaba, baji Kinin.
26 Kulu kalu-wukanyi yiku, “Ngabinya biyi! Bajiwa nyinki-ardu Jujiba, nyala lhungku bajiwa Yijiba. Bajiwa kalngiya wirdiwalangu alunga liyi-wuluwu liyi-jibiya Yijiba, alunga wiji. Nyinki-ardu bajiwa yamulu!” Kulu ka-wurdulanba, ka-ngajbirri alunga. “Ngandarra yaa!”
27 Ngala kalu-wukanyi barra yiku mili jinangu wuka wumba yiwa Jujiba ka-wukanyi alunga, nya-mangaji barra wuka kalu-wukanyi yiku nyuwalunga-biyiyu. Kulu nganinya ka-warnkanga, kila-kala barra nya-mangaji wilbarra wumba kili-ja yiku, yiwa wingkayawu yilaa barra nyungku-mangaji bajinju Yijiba. Kulu ka-yabirri na-wurdu kurdandu, kulu na-ngawulu ka-mirlilmirlilirri.
28 “Nyangathi-ardu Jujiba, bajiwa ngatha lhungku,” nganinya ka-arri. “Ka-yabirri barra ngatha awara. Karna-wingkala barra nganthalu yiku ngalingarna lhungku,” ka-arri nganinya bawuji.