44
Nya-mangaji banikin ki-Jujiba nganthiwa?
1 Jujiba ka-wukanyi yiku nyuwiku ki-jawinawu ki-wirdiyu, kili-nu nganinya, “Bawuji barra, yibalyibarraya ma-ngarra alunga rrungkalunga rru-bayikila! Ma-jakarda yibarraya kurdandu kulu kurdardi munhamanthawu! Kulu baji barra rru-bayikila rrungkalunga nungkandu-mulungka yibarraya ma-mani ruthuruthu aluwa!
2 Kulu jinangu, nya-mangaji banikin marringaya nya-ngatha, ma-jakarda ma-mani karna-ngunda bayimanthawu nya-mangaji, nya-yibarraya nyuwu-mangaji yilaa ki-buyiyu rrungkiku rru-bayikila nungkandu-mulungka!” Kulu nganambaji barra kilu-yibarra ma-mangaji barranamba ma-kingkirra alunga, kilu-yibalyibarra...i, wiji kilu-wayatha awara alunga.
3 Bajingu barra bawuji nunyilanku kalali-ja, kalu-lhuwarri akarriya barra nakaringu aluwa, nyungkalunga ki-awaralu kalu-wani, likili-baba kulu alunga yirrikirri.
4 Kulu Jujiba ka-wukanyi yiku nyuwiku ki-jawinawu ngalalu bajalu nyala wunumbarra ki-barrawula ki-walkurrangka, kili-nu yiwa wingkayawu aluwalu. Ka-arri yiku, “Wingkaya aluwalu linji-mangaji linji-wulungku! Yarlajka wingkaya! Namba linya-mirrinymaya kulu linyi-yalbangaya, arriya alunga, ‘Nyangatha wirdi ka-wukanyi ngatha nganinya. Wayi yirru kirru-wardima nungka awara yiku? Ngalhiyu barra kirru-wardima yiku wumba ka-arri yabi yirrunga? Ngalhiyu kirru-wajkirra nya-mangaji banikin yiku ki-wirdiyu?
5 Kilu-ngunda ma-jakarda ma-mani bayimanthawu nya-mangaji, ma-jakarda barra kulu ja-wunja yurrngumantha nyungku-mangaji ki-banikinda. Kilu-barlirra kurdandu nya-mangaji. Yirru barra kirru-wardima awara kurdandu!’ ” Nganinya kili-nu ki-Jujiba, yiwa wukanyinjawu alunga.
6 Kulu ka-wingka yarlajka kulu kalilu-mirrinyma, kalila-kala marnalu. Ka-wukanyi nya-mangaji wuka barrawumba kili-nu ki-wirdinju nyungkiku, ki-Jujiba.
7 Kala-nykarri wukanyinjarra nganinya, kulu kalu-ruwama kurdandu, kalinyamba-ngarninyma yiku, “Ngalhiyu ja-wukanyinyu nganinya nganunga, ngalhiyu? Kurdardi kana-kanma awara yiku, kurdardi! Nganu li-yabi, li-marringaya. Kurdardi nganu wajkirranthawu awara, kurdardi.
8 Yabi kunganu-waninjanguma ma-mangaji ma-mani wumba ku-arri wu-bayikila nganuwa, nakaringu jujungka ki-awarala Kinin kunganu-waninjanguma wumba kunganu-wakarama kulu nganambaji kungana-ka nganuwa kulu kanu-ngunda yiwa barra wirdi. Mili ngalhiyu kanu-wajkirrinjima awara bajingu ki-barrawula nganinyanga?
9 Namba kinyu-wakaramanjima nya-mangaji banikin nganinya jiwini yilaa, kulu kinyu-ramala nganambaji ngala nganarrku barra kana-nmala li-jawina yiku,” nganinya kalu-arri yiku.
10 Kulu ka-wukanyi alunga nya-mangaji jawina, “Kurdardi yirru, ngala nya-mbangu wumba nya-mangaji banikin yilaa, yiwa barra kiwa-nmala jawina yiku wambu, ngala yirru winarrku kirru-wanila akarriya, li-yabiwiji.”
11 Kulu bawuji barra kalu-yibalyibarra wajkaliya awaralu a-birndabirndawara kulu karrili-nmalinma a-birndawara alunga ruthuruthu.
12 Kulu ambuliyalu ki-wirdiyu ka-yarrba barra nya-mangaji jawina, karrila-kala a-bayiki barra arndaarnda, kurdardi. Kulu nyuwu-mangaji mili ngulakaringu nyiki-anyirawu ka-lhanka, karrila-kala. Kurdardi yiku. Kulu mili yurrulu kiwa-lhankalarra rrungkalunga rru-bayikila nuwalarrkulu. Kurdardi kilu-wakaramanma. Kulu ngulakari barra ki-buriyu ki-Binjamin rrikungu a-birndawara, karrili-nma nanda-mulu, ka-lhanka arndaarnda, kila-kala marniwa barra, wakara nya-mangaji banikin. “Yiya! Marniwa barra nya-mangaji! Marniwa nya-mangaji banikin yilaa, nyungku-ja!”
13 Kulu li-mangaji likili-baba, kalu-ruwama kulu kalu-rarri nalu-wurdu, kulu kalu-maluma alunga jumbala, kalngiya kalu-wardirri nalu-wurdu nyuwalunga-anyirawu yiku. Kulu yurrulu kalu-yibalyibarra a-birndawara ki-yirrikirrila. Kalu-wani barra karakarra aya barra bajinju ki-barrawulu.
14 Ngala kalu-yibanda barra baji alanjila ngaliwa Jujiba nyala bajingulaji ki-barrawula ka-arri. Kulu kalu-wingka yilalu, kala-kala marniwa mingkiya, kala-nba wajkaliya mududu, nyamba-yibarranthawu li-buyi yiku, nganinya narnu-yuwa narnalunga liyi-Juwu.
15 Jujiba ka-wukanyi alunga, “Ngandarra kirru-arri ngatha, ngandarra? Marda kirrima mirdan ngatha, ngarna kalngiya wirdiwalangu, mingkin jarnini ki-awarawu wayi ka-nmala baku.”
16 Kulu yiwa, nyiki-baba Juda kumba-ngarninyma yiku, “Wirdi, kirna-barlirra. Ngandarra nganu wukanyinjawu yinku? Ngandarra nganu yunduyundumanthawu awara yinku? Ngandarra nganu nyamba-mirnimanthawu li-yabi? Kurdardi. Ki-Yijandu ki-Kud, kanilu-lhaa nganu li-wardi, ja-wukanyinji nganinya nganunga nganu-wurdu. Nganu wiji kana-nmala marnaji li-jawina yinku. Kurdardi arrkula, yiwa wumba ka-arri nya-mangaji banikin yilaa, ngala nganu wiji.”
17 Kulu Jujiba ka-arri yiku, “Kurdardi ngarna wardimanthawu awara wiji yirrunga, kurdardi barra yirru anmanthawu marnaji li-jawina ngatha, ngala ngayamantharra nya-mangaji, bawuji ka-arri banikin yilaa, bawuji yiwa. Yamulu yirru nirrarrku kirru-wanila yabi yilalu ki-malbungku nyungkirrunga-biyilu.”
Juda ka-wukanyi yiku ki-Jujiba
18 Bajingu Juda ka-wunambarrirri yilalu ki-Jujiba kulu ka-wukanyi yiku, “Kirna-barlirra wirdi! Yamulu karna-wukanyinjima yinku? Barni-yinjatharrinja ngatha! Yinda wirdiwalangu barranamba king.
19 “Wirdi, kaninya-yalbanganhu ambuliyalu, ‘Bajiwa kuna nyirrunga-biyi kulu nyirrunga-anyira?’
20 Kulu kaninyamba-ngarninyma yinku, kani-nu nyanganunga-biyi kulu nyanganunga-anyira, ka-yanjarri ngaliwa ka-malburri. Nyiki-baba ambirriju yilaa, kumba-mirra. Jinangu barra, marniwa barra, arrkula anku rrikurra-wibiyu lhungku, kulu nyiki-biyi ja-yabirrinji na-wurdu kurdandu yiku, kanu-wukanyi yinku nganinya ambuliyalu.
21 “Kulu wirdi, yinda kaninya-yalbanganhu nganu kanthawu marnajinju, yinda nganthawu yiku.
22 Kulu kaninyamba-ngarriinyma, ‘Kurdardi nya-mangaji yalkuyi kila-ndarru nyiki-biyi. Namba ka-lhuwarrinjima, kila-ndayima, kulu kumba-mirranjima nyiki-biyi.’
23 Kangka ka-wukanyinyu yindalungu nganunga, ‘Namba kurdardi kirra-karru marnajinju kulu barni-wingkaya marnajinju ngathangkalu bardabarda yiku,’
24 kulu kanu-wani yilalu wunyathalu, kulu kanu-wukanyi yiku bajarnaji barrawumba yinda ka-wukanyinyu nganunga.
25 “Kulu baku barra yiwalungu kali-nu wunyathalu nganu waninjawu marnajinju barra rdumanthalu ma-ngarra.
26 Kulu kaninyamba-linginma barra yinku bajarnaji, kulu kanu-wukanyi yiku wunyathawu, ‘Kurdardi kanu-wingkarru winarrku nganulumba. Kurdardi kana-ngarru nya-mangaji wirdi namba nyanganunga-anyira kiwa-nmala marnajingulaji. Namba nganu wiji kanu-wingkala bajinju, kulu yamulu.’
27 “Kulu wunyatha ka-wukanyi nganunga, ‘Yirru li-mirdan, rra-ngatha a-Rijil, kanumba-kulhakulhama ngayamantharra kanymardawujara rri-mayani.
28 Mayani arrkula bajiyawuthu barra nungka. Nyungku-mbanguwuthu barra ki-wardalinju kila-tha. Ka-lhuwarri nakaringu ngathangka kulu kurdardi ka-waninma ngathangkalu.
29 Namba kirra-kala jinangu nakaringu ngathangka kulu ka-wardirrinjima awara yiku, kurdardi ka-waninjima, kulu karnamba-rarrinjima barra yiku yurrngumantha kulu ngarna nyamba-mirranthalu ndingarna ngarna-malbu,’ nganinya ka-arri nganunga.
30-31 “Wiirdi! Namba kanu-wanila yilalu wunyathalu nganulumba, namba kanila-ngala bardabarda yiku ki-yalkuyiyu, kulu kumba-mirranma. Kumba-yibarra na-wurdu yiku kalngiya nyuwu-ja, jiwini baji akarru yukumantharra yiku waninjawu. Kalngiya ja-malburrinji kurdandu. Namba kanila-nganjima nganu nganulumba bardabarda yiku, kulu kumba-rarrinjima baji yurrngumantha kulu nyamba-mirranthalu.
32 “Kulu ngarna, karna-wukanyi yiku wunyathawu, ngarna waninjangumanthawu jinangu yalkuyi yabi yilalu, kulu namba kurdardi, ngarna anmanthawu wananjawu yiku ngarna-yurrngu, ngarna karnamba-yunduyundumala ngarna-yurrngu, karna-wardima awara yiku wunyathawu.
33 “Wirdi, kirna-barlirra! Ngarna karna-nmala marnaji jawina nyinku ngala nya-mangaji yalkuyi nyi-jaya aluwa linjikulinji-babala, ngala karna-nmala yiku marnaji.
34 Kurdardi karna-wanirru bajinju wunyathalu yilalu ngarnalumba, bardabarda yiku ki-yalkuyiyu. Jarna-rarrinji ngarna-wurdu nyamba-nykalanykarrinjarra wunyatha namba karna-ndayima nyangathi-anyira marnaji kulu karna-waninjima wunyathalu ngarnalumba, bardabarda yiku. Kurdardi karna-wardimarru awara yiku ki-malbuwu nganambaji.”