7
1 Gụbe ada-eze; iphe,
ị dụkwanu ùbvù l'ẹka i
yeru akpọkpa akpọ
ebvu akpọkpo!
Ụtapfu ngu tụko ama gẹ
mkpuma, vu oke-aswa,
onye maru eme ọna
kwọcharu akwọcha.
2 Mkpotubo ngu gbaẹrupho
kerere g'otumu;
mbụ otumu,
mẹe-vayịnu ta abvụjedu
abvụbvu.
Ẹpho ngu dụepho g'igberi,
a kụberu l'ikpo l'ikpo;
bya edophee ya ojimbvu,
ama mma mgburugburu.
3 Ẹra ngu ẹphenebo dụ g'ụnwu
umoro labọ.
Mbụ g'ụnwu umoro,
a nwụru ẹbo.
4 Olu ngu dụ g'ụlo-eli,
e meru l'eze-enyi.
Ẹnya ngu ẹphenebo doru kẹ
rịsaa
g'okpuru mkpụkpu
Hẹshibonu; mbụ ono,
nọ-kube ọguzo
Batu-Rabimu.
Imi ngu degeru edegeru
g'ụlo-eli Lébanọnu,
gharu iphu lẹ mkpụkpu
Damasụkosu.
5 Ishi ngu meru ngu;
ị nọdu ama mma g'úbvú
Kamẹlu.
Ẹgbushi, nọ ngu l'ishi nọdu
eke oruswe oruswe.
Iphe, eze eje rwụhuru ẹka
ọ nọ ele ẹgbushi ngu
g'a swịngashiru iya;
ọ nọdu ama ntụmatu.
6 Lewarọ gẹ gụbe onye mu
yeru obu amabe mma;
bya adụ ùbvù l'ẹnya;
waa g'ị bụ-be nwamgbọko,
emeje nemadzụ ẹhu-ụtso!
7 L'ụgbugba bẹ ị mịtaerupho
kẹ swangụswangu
gẹ mpfụ.
Ẹra ngu ẹphenebo dụchaepho
kẹ nwajọpfula.
8 Mu sụru: “Mu e-nyihu mpfụ
ono enyihu;
je enwota iya ẹpfu.”
G'ẹra ngu dụkwa kẹ jọpfula
g'akpụru vayịnu.
Tẹme unme, ịitufuta eshi
kwẹekweekwee gẹ
mpfụ-alị.
9 Tẹme ọnu nọdu atsọ ngu mẹe
mẹe gẹ mẹe,
kachaa atsọ ụtso.
Nwanyị ono ele ẹnya
onye o yeru obu
G'ọ bụkwaru onye ono,
mu yeru obu ono a-ngu
mẹe ono!
Mbụ-a g'ọ tọkpoepho nwẹhu
shi l'ụgbonu sọba
iya l'ọnu!
10 Ọ kwa onye ono,
mu yeru obu ono bẹ mu
bụ nkiya.
Tẹme mu bụkwarupho onye
anọduje agụ iya ẹgu.
11 Byanụ gụbe onye mu yeru
obu g'anyi je l'ọma ẹgu!
G'anyi je akwajẹ l'ime
mkpụkpu!
12 G'anyi nmaa ẹwa l'ụtsu
jeẹdu l'opfu-vayịnu;
je amaru mẹ vayịnu
tụwaru ige.
Mbụ g'anyi maẹduru m'ige
iya jashịkotawaru.
Anyi amakwarụpho mẹ oshi
ụdara ono tụshiwaru
ige nkiya.
Ọ bụru ẹka ono bẹ mu
a-nọdu goshi ngu lẹ
mu yeru ngu obu.
13 Oshi mandureku eshikwa
mkpọ.
Akpụru oshi ọ̀phúú;
mẹ akahụ iya,
dụgbaa iche iche,
nọ l'ọnu-ụlo anyi bẹ mu
dobekwaru gụbe
onye yeru mu obu.