6
Ajị, ụnwada Jierúsalẹmu ajị
1 ?Bụ awe bẹ onye i yeru obu
ọbu jeru; gụbe nwanyị,
kachaa ama mma l'iphe,
bụ ụnwanyi?
?Bụ ụzo awe bẹ onye i yeru
obu ọbu phoberu;
k'ọphu anyi achọ-bude
ngu iya?
Ọnu nwanyị ono eye
2 Onye mu yeru obu jeru lẹ
mgbabu iya;
mbụ l'ẹka ọ dzashịru iphe,
eshi mkpọ.
O jeru eche atụru iya lẹ
mgbabu ono;
tẹme l'oomekọkwapho
ojimbvu.
3 Mu bụ k'onye mu yeru obu;
onye mu yeru obu bụru
nkemu.
Ooche atụru iya l'ẹka
ojimbvu kụru.
Nwoke ono atụ ọnu nyee
ya l'edzudzu ọha
4 Gụbe onye nọ mu l'obu;
ịima mma gẹ mkpụkpu
Tịza;
mbụ l'ị dụta-beru ùbvù
gẹ Jierúsalẹmu.
Ị dụ-be akpabiri gẹ ndu ojọgu,
pa ẹkwa-ọgu phẹ.
5 Jiko te elehẹ mu ẹnya;
kẹle ẹnya ngu anọduje
alọ mu ẹka lẹ meji.
Ẹgbushi, nọ ngu l'ishi tụko
ejigbaa g'ẹka eghu
dzeberu shi l'eli úbvú
Giladu awụ-zeta.
6 Eze ngu nọdu achaẹpho
pemu pemu g'ikpoto
atụru,
shi l'ẹka a wụshiru phẹ
ẹhu awụfuta.
G'ẹphe ha tụko chịgbaaru
ụnwu ẹbo ẹbo;
ọphu ọ dụdu mẹ nanụ,
gba ẹka nwa.
7 Agbagba nchị ngu,
i phuchiteru ẹkwa ono
yeru ụdara,
e buwaharu ẹbo.
8 Unyomu eze a-dụchakpokwa
ụkporo ẹto;
ndu ọphu abụ-zidu
unyomu iya adụkwaro
ụkporo ẹno;
tẹme ụnwumgboko,
e teke ejepfuswe
abụkwaruro agụta agụta.
9 Gụbe ndo-nwẹnu mu;
gụbe onye nkemu,
dụebe ree;
ị bụ onye gbaru iche;
bya abụru onye tụbaru
ne iya l'ẹnya;
mbụ onye ntụcha adụdu
l'ẹhu l'ẹnya ne,
nwụru iya nụ.
Ụnwumgboko hụmaru iya
bya ekua ya onye a
gọru ẹhu-ụtso nụ.
Ndu bụ eze-nwanyị;
mẹ ndu a ta lụzidu
ọkpobe alụlu jakwaru
iya phọ ajaja.
10 ?Bụ onye dụ g'ìphóró
nchi-abọhu ono?
?Bụ onye egbu pemu pemu
g'ọnwa ono?
Mbụ-a; ?bụ onye egbu nwịinwii
g'ẹnyanwu ono?
?Bụ onye dụ akpabiri
gẹ ndu ojọgu,
chịgbaa ẹkwa-ọgu?
11 Mu jeru l'ẹka a dzashịru oshi,
aphọje ishi;
gẹ mu je agbaphee iphe
efushigba k'ọ̀phúú lẹ
nsụda ono;
gẹ mu maẹduru vayịnu
emeshiwa okoko;
wakwaphọ gẹ mu maru mẹ
itorokuma atụwa ige.
12 Iphe ono bya edo mu ẹnya;
egomunggo mu gbẹ
nọduwanu l'ụgbo-inya
ono,
ndibe mu gude dulataru
mu nwamgbọko mu ono.
13 Lwanụ azụ! Lwanụ azụ;
gụbe nwanyị Shulemu!
Lwanụ azụ! Lwanụ azụ;
g'anyi lerwee ngu
ẹnya elerwee!
?Bụ gụnu meru iphe,
unu anọdu ele nwanyị
Shulemu taataataa
g'onye ele ndu Mahanemu
ẹnya ẹka ẹphe ete ebvu?